LISA * menshan weh mi jraa shee tu di chroot; ih seh: “Di bradaz ahn sistaz mi reeli kain, ahn dat mi reeli toch mi haat.” Anne mi seh sohnting simila; shee seh: “Weh mi jraa mi moa tu di chroot da di Witnis dehn kainis dan dehn teechinz.” Eevn doa dehndeh too sistaz injai reed dehn Baibl ahn meditayt pan it, weh mi reeli toch dehn haat da di kainis a di Kristyan bradaz ahn sistaz.

How wee ku shoa kainis eena wahn way weh toch peepl haat? Mek wi diskos too wayz how wi ku du dat: wid di tingz weh wi seh ahn di tingz weh wi du. Den wi wahn taak bowt hoo aal wi shuda shoa kainis tu.

Proverbs chapta 31 seh dat wahn gud waif aalwayz memba “di laa a kainis” wen ih seh sohnting. (Prov. 31:26) Shee mek dis “ laa” gaid weh ih seh ahn how ih seh it. Wahn pa shuda aalso mek dis “laa” gaid weh ih seh. Wahn lata payrents noa dat if dehn taak tu dehn pikni eena wahn rof way, dat ku hert dehn pikni feelinz, ahn dehn pikni mait noh lisn tu weh dehn seh. Wen payrents taak eena wahn kain way, ih wahn eeziya fi mek dehn pikni lisn an obay.

Weda yoo da wahn payrent er nat, how yoo ku laan fi taak eena wahn kain way? Di skripcha da Proverbs 31:26 gi wi wahn aidyaa; ih seh: “Wen ih taak, da waiz werdz kom owt.” Dis meenz dat wi haftu bee waiz wen wi di tink bowt weh fi seh ahn how wi wahn seh it. Ih gud fi aks wiself, ‘Weh Ai bowt fi seh wahn mek tingz wers, er ih wahn kaam dong di sichuwayshan?ʼ (Prov. 15:1) Soh, ih waiz fi tink bifoa wi taak.

Wahn nada praverb seh: “Wen yu taak widowt tink, da laik wahn stab fahn wahn soad.” (Prov. 12:18) Wen wi tink bowt how di tingz wi seh ahn di toan a wi vais ku mek adaz feel, ih ku help wi fi kanchroal weh kom owta wi mowt. Yes, if wi memba “di laa a kainis,” wi noh wahn yooz werdz weh ku hert adaz er taak eena wahn rof toan a vais. (Ifee. 4:31, 32) Insteda tink ahn seh negitiv tingz, wi ku seh pazitiv ahn kain werdz eena wahn nais way. Jehoava mi set wahn gud egzampl a dis. Wen ih servant Ilaija mi fraitn, di aynjel weh mi reprizent Jehoava mi taak tu Ilaija eena “wahn kaam way ahn wid wahn loa vais.” (1 Ki. 19:12) Soh, fi bee wahn kain persn meenz moa dan jos seh kain tingz. Wi aalso haftu du kain tingz. Mek wi si how wi ku du dat.

Wi kapi Jehoava egzampl wen wi du ahn seh kain tingz tu adaz. (Ifee. 4:32; 5:1, 2) Dis da weh Lisa, weh wi mi menshan erliya, mi seh bowt di kainis weh di Witnisiz mi shoa ahn: “Wen mi famili mi haftu moov sodn-wan fahn wehpaat wi mi-di liv, too koplz fahn di kangrigayshan mi tek aaf taim fahn werk fi help wi pak op.  An jos imajin, Ai nat eevn mi-di stodi di Baibl yet!” Di kainis weh dehn mi shoa Lisa mi mek shee waahn fain owt moa bowt di chroot.

Anne, weh wi mi menshan eena di biginin a dis aatikl, mi aalso tankful fi di kainis weh di Witnisiz mi shoa ahn. Shee seh: “Bikaaz a how dis werl stan, Ai mi fain it haad fi chros peepl. Wen Ah mi meet di Witnisiz, Ah neva chros dehn. Ah yoostu wanda, ‘Wai dehn di chreet mi soh kain?ʼ Bot di kainis weh mi Baibl teecha shoa mi mek Ah chros ahn bikaaz Ah mi noa ih neva mi-di priten fi bee kain.” How dat mi help shee? Shee seh: “Laytaraan, Ah mi reeli staat tu foakos eena di tingz weh Ah mi-di laan.”

Wi si dat bikaaz di bradaz ahn sistaz eena di kangrigayshan mi kain tu Lisa an Anne, dat mi reeli toch dehn haat ahn mek dehn waahn laan di chroot. Di kainis weh di kangrigayshan mi shoa dehn mi mek dehn chros Jehoava ahn fi hihn peepl.

Som peepl seh nais tingz ahn smail wahn lat bikaaz dat da how dehn payrents rayz dehn er dat da how peepl naamali du tingz rong weh dehn liv. Da wahn reeli gud ting wen peepl shoa kainis bikaaz a dehn kolcha er dehn persnaliti. Bot if dat da di onli reezn wai dehn kain, dat noh meenz dat dehn di kapi Gaad egzampl a kainis.—Kompyaa Aks 28:2.

Kainis da wan a di froot weh Gaad hoali spirit bayr. (Gal. 5:22, 23) Soh dis meenz dat wi need Gaad hoali spirit fi help wi shoa chroo kainis. Wen wi du dat, wi di kapi Jehoava ahn Jeezas egzampl. Ahn jos laik Jeezas, wi kay bowt adaz bikaaz wi lov Jehoava Gaad ahn peepl. Kainis da wahn powaful kwaliti weh kohn fahn wi haat an ih pleez Gaad.

Ih eezi fi shoa kainis tu peepl weh mi kain tu wi er tu sohnbadi weh wi noa. (2 Sam. 2:6) Wan way da fi tel dehn tanks. (Kol. 3:15) Bot wat if wi feel laik sombadi noh dizerv fi mek wi chreet ahn wid kainis?

Tink bowt dis: Jehoava set di bes egzampl a how fi shoa grayt kainis. An ih Werd di Baibl teech wi wahn impoatant lesn bowt how fi shoa dis kwaliti. Di werdz “grayt kainis” geh yooz eena di Kristyan Greek Skripchaz wahn lata taimz. How Gaad shoa wi kainis?

Jehoava shoa kainis tu milyanz ahn milyanz a peepl bikaaz hihn gi dehn weh dehn need fi liv. (Mach. 5:45) Akchwali, Jehoava mi shoa kainis tu wi eevn bifoa wee geh fi noa Hihn. (Ifee. 2:4, 5, 8) Fi egzampl, hihn giv op ih onli Son fi aal hyoomanz. Di apasl Paal mi rait ahn seh dat Jehoava giv op ih Son fi pay di ransom weh set wi free ahn dat da wai “di grayt kainis a Gaad reeli grayt fi chroo!” (Ifee. 1:7) Pahn tap a dat, eevn doa wi sin ahn mek Jehoava sad, hihn kantinyu gaid ahn teech wi. Di Baibl seh dat di inschrokshan weh hihn gi wi ahn di tingz weh hihn tel wi da laik “jentl rayn.” (Deut. 32:2) Wee kuda neva pay hihn bak fi aala di kainis weh ih shoa wi. Ahn wee noa dat if Jehoava neva shoa wi ih grayt kainis, wi neva mi wahn ga wahn hoap fi di fyoocha.—Kompyaa 1 Peeta 1:13.

Jehoava kwaliti a kainis mek it eeziya fi mek wi waahn jraa kloas tu hihn, an ih aalso mek it eeziya fi mek wi waahn kapi ih egzampl. Soh insteda bee kain wid onli sertn peepl, wi shuda bee laik Jehoava ahn shoa kainis tu evribadi evri singl day. (1 Tes. 5:15) If wee kain aal di taim, wi wahn bee laik wahn faiya weh kip wi waam pahn wahn koal day. Wi famili, wi bradaz ahn sistaz, di peepl weh wi werk wid, di peepl weh wi goh da skool wid, ahn wi naybaz wahn bee hapi rong wi.

Tink bowt yu famili er di bradaz ahn sistaz eena di kangrigayshan weh yu wahn ku inkorij wen yu seh ahn du kain tingz fi dehn. Maybi dehn ga sohnbadi eena yu kangrigayshan weh need help fi kleen ih hows an ih gyaadn er maybi ih need sohnbadi fi du ih shapin. Er maybi yu meet sombadi wail yu mi deh owt eena servis, weh need help. Yu tink yu ku help dehn owt?

Mek wi kapi Jehoava egzampl ahn mek di “laa a kainis” gaid weh wi seh ahn du.