1-2. Bays pahn Psalm 25:14, weh wi haftu du if wi waahn ga wahn kloas frenship wid Jehoava?

 WAT da sohn kwaliti weh ku help yu fi kip wahn kloas frenship wid sohnbadi? Maybi yu wuda seh dat gud frenz shuda sopoat ahn lov eech ada. Bot maybi yu wuda neva tink dat fyaa da wahn impoatant kwaliti fi wahn gud frenship. Bot laik weh di teem skripcha fi dis aatikl seh, enibadi weh waahn wahn kloas frenship wid Jehoava haftu “fyaa” hihn.—Reed Psalm 25:14. b

² Ih noh mata how lang wi di serv Jehoava, wi need fi ga di karek kaina fyaa fi hihn. Bot weh ih reeli meen fi fyaa Gaad? How wi ku laan fi shoa lata rispek fi Jehoava? Ahn weh Oabadaiya, Hai Prees Jehoyada, ahn King Jehoawash egzampl ku teech wi bowt weh ih meenz fi rispek Gaad?

3. Wat da sohn tingz weh ku mek wi feel frayd, ahn how fyaa ku protek wi?

³ Wi feel frayd weneva wi feel laik wi ku geh hert. Dis kaina fyaa gud kaaz ih ku help wi mek gud disizhanz. Fi egzampl, wi noh wahn waak da di ej a wahn klif if wi frayd fi jrap. Er wi wahn ron weh fahn eniting weh daynjaros bikaaz wi frayd fi geh hert. Ahn wi chrai noh seh er du tingz weh noh kain bikaaz wi frayd fi hert peepl weh wi lov.

4. How Saytan waahn mek wi feel bowt Jehoava?

⁴ Saytan waahn mek wi frayd fi Jehoava. Hihn waahn mek wi feel jos laik how Elifaz mi feel bowt Jehoava—dat Jehoava aalwayz beks wid wi ahn waahn ponish wi, ahn dat wee  kuda neva mek Gaad hapi. (Job 4:18, 19) Saytan waahn mek wi frayd bad fi Jehoava soh dat wi stap serv Ahn. Bot wi noh fi bee frayd fi Jehoava. Insteda dat, wi need fi laan fi rispek ahn an bee frayd fi hert ahn.

5. Weh ih meen fi fyaa Gaad?

⁵ If yoo reeli rispek Jehoava, yu wahn lov ahn. Soh yu noh wahn du eniting weh wahn damij yu rilayshanship wid ahn. Jeezas mi “fyaa Gaad” eena di rait way. (Heeb. 5:7) Hihn neva frayd fi Gaad. (Isa. 11:2, 3) Insted, hihn mi lov Jehoava wahn lat an ih mi waahn obay ahn. (Jan 14:21, 31) Jos laik Jeezas, wee ga lata rispek fi Jehoava ahn wi shoa ahn aana bikaaz hihn lovin, waiz, powaful, an ih ak wid jostis. Wi noa dat Jehoava lov wi wahn lat ahn hihn kay bowt weh wi du wid weh ih teech wi. Soh wi hert Jehoava wen wi noh obay ahn, bot wi ku mek hihn hapi wen wi obay ahn.—Ps. 78:41; Prov. 27:11.

6. Weh ku help wi fi laan fi rispek Gaad? (Psalm 34:11)

⁶ Wi noh baan wid rispek fi Jehoava, dis da sohnting weh wi haftu laan fi shoa. (Reed Psalm 34:11.) c Wan way how wi ku du dis da fi luk pahn di tingz eena kriyayshan. Di moa wi spen taim di luk pahn “di ting dehn weh hihn mek,” di moa wi wahn geh fi si Jehoava wizdom, powa, ahn lov fi wee. Dis wahn help wi fi ga moa lov ahn rispek far ahn. (Roam. 1:20) Wahn sista weh naym Adrienne mi tek taim fi meditayt pahn di tingz weh Jehoava mek. Dis da weh shee seh: “Wen Ai si evriting weh Jehoava mek ahn how waiz Jehoava waiz, dat help mi fi riyalaiz dat hihn noa weh bes fi mee. Soh wai Ai wuda waahn du eniting weh wuda damij mi rilayshanship wid Jehoava, di Wan hoo gi mi laif?” Shee kuda seh dis bikaaz ih mi spen taim di tink bowt di tingz weh ih si eena kriyayshan. Maybi yu ku spen sohn taim dis week di tink bowt sohnting weh Jehoava mek. If yu du dat, yu lov ahn rispek fi Jehoava wahn groa.—Ps. 111:2, 3.

7. How pryaa ku help wi ga lata rispek fi Jehoava?

⁷ Wahn nada way fi laan fi shoa lata rispek fi Gaad da fi pray wahn lat. Di moa wi pray tu Jehoava, di moa wi wahn si Jehoava az wahn reel Persn. Eech taim wi aks Jehoava fi gi wi di schrent fi bayr op, ih ku help wi fi memba how powaful hihn. Wen wi tank Jehoava fi di sakrifais a ih Son, ih ku help wi memba humoch Jehoava lov wi. Ahn wen wi bayg Jehoava fi help wi wid wahn prablem, ih ku help wi memba dat hihn waiz. Dehndeh kaina pryaaz help wi fi rispek Jehoava eevn moa. Ahn dis schrentn wi fi stik tu wi disizhan fi noh du notn weh ku damij wi rilayshanship wid Jehoava.

8. Weh wi ku du fi noh looz rispek fi Jehoava?

⁸ Fi mek wi noh looz rispek fi Gaad, wi haftu stodi di Baibl. Di Baibl gat een lata gud ahn bad egzampl weh wi ku laan fram. Mek wi luk pahn di egzampl a too faytful servants a Jehoava. Di fers wan da Oabadaiya, hoo mi in chaaj a King Ayhab palis, ahn di sekant wan da Hai Prees Jehoyada. Den wi wahn laan fahn di egzampl a Jehoawash, di king a Jooda, weh mi staat aaf di serv Jehoava bot laytaraan ih mi stap serv ahn.

9. How rispek fi Jehoava mi help Oabadaiya? (1 Kings 18:3, 12)

⁹ Di fers taim di Baibl menshan Oabadaiya, d ih seh: “Oabadaiya mi ga lata rispek fi  Jehoava.” (Reed 1 Kings 18:3, 12.) e How rispek fi Jehoava mi help Oabadaiya? Ih mi help ahn fi bee sohnbadi weh aanis ahn weh di king kuda mi chros. Ahn bikaaz a dat, di king mi put hihn in chaaj a di palis. (Kompyaa Nehimaiya 7:2.) Rispek fi Jehoava mi help Oabadaiya fi ga lata korij. Hihn mi need dis kwaliti bikaaz ih mi liv joorin di taim wen wikid King Ayhab mi-di rool. Dis king mi “wosa dan aala di king weh mi-di rool bifoa hihn.” (1 Ki. 16:30) Ayhab waif, Jezebel, hoo mi wership Baal, mi hayt Jehoava soh moch dat shee mi chrai stap evribadi weh mi liv eena di naadan kingdom fahn wership Jehoava. Shee mi eevn kil wahn lata Jehoava prafit dehn. (1 Ki. 18:4) Oabadaiya mi wership Jehoava joorin sohn terabl taimz fi chroo.

10. How Oabadaiya mi shoa dat ih ga lata korij?

¹⁰ How Oabadaiya mi shoa dat ih ga lata korij? Wen Jezebel mi staat kil owt Gaad prafit dehn, Oabadaiya mi tek 100 a dehn ahn haid dehn. Hihn mi “put 50 a dehn eena wahn kayv ahn 50 a dehn eena wahn nada kayv ahn . . . gi dehn bred ahn waata.” (1 Ki. 18:13, 14) If Jezebel mi noa weh Oabadaiya mi du, shee wuda mi kil ahn. Af koars, Oabadaiya mi praabli frayd, ahn hihn neva waahn ded. Bot Oabadaiya mi lov Jehoava an ih servants moa dan ih lov ihself.

11. How Jehoava servants tudeh da laik Oabadaiya? (Koment pahn di picha.)

¹¹ Tudeh wahn lata Jehoava servants liv eena sohn konchri wehpaat wi werk deh anda ban. Dehnya bradaz ahn sistaz rispek peepl weh ga atariti. Bot jos laik Oabadaiya, noh mata wat, dehn wuda neva stap serv Jehoava. (Mach. 22:21) Wen dehn obay Jehoava insteda man, dehn shoa dat dehn ga lata rispek fi Jehoava. (Aks 5:29) Wan way how dehn obay Jehoava insteda man, da wen dehn kantinyu preech ahn meet tugeda widowt enibadi noa. (Mach. 10:16, 28) Dehn chrai mek shoar dehn bradaz ahn sistaz geh di spirichwal food weh dehn need fi help dehn stay kloas tu Jehoava. Mek wi luk  pahn Brada Henri egzampl. Hihn liv da wahn konchri da Africa weh di werk mi deh anda ban fi wahn wail. Joorin da taim, hihn mi diliva poblikayshanz tu di bradaz ahn sistaz. Hihn mi seh: “Ai da wahn shai persn. Soh Ah mi noa dat di deep rispek weh Ai mi ga fi Jehoava help mi fi ga di korij weh Ah mi need.” Yu tink yoo ku bee brayv laik Henri? Af koars yu kud, if yu ga lata rispek fi Gaad.

12. How Hai Prees Jehoyada an ih waif mi shoa dat dehn laayal tu Jehoava?

¹² Rispek fi Jehoava mi help Hai Prees Jehoyada fi bee laayal ahn fi inkorij adaz fi wership di chroo Gaad. Wi si dis wen Jezebel daata, Atalaiya, mi tek oava di chroan ahn mek ihself kween oava di kingdom a Jooda. Di peepl mi ga lata reezn fi bee frayd fi Atalaiya. Shee mi soh greedi fi powa dat shee mi wilin fi du wateva shee mi haftu du fi geh da pozishan. Shee mi eevn chrai kil ih oan granson dehn bikaaz dehn mi ga di rait fi rool oava di kingdom a Jooda! (2 Chron. 22:10, 11) Bot wan a fi shee granson, Jehoawash, mi servaiv bikaaz Jehoyada waif, Jehoshabiyat, mi sayv ahn. Jehoshabiyat an ih hozban mi haid Jehoawash sohnweh sayf ahn dehn mi tek gud kayr a ahn. Dis da how dehn mi mek shoar dat sohnbadi fahn Dayvid famili lain servaiv soh dat ih ku bee king. Wen dis mi hapm, Jehoyada mi praabli oava 100 yaaz oal. Stilyet, ih mi laayal tu Jehoava an ih neva frayd fi Atalaiya.—Prov. 29:25.

13. Wat els Jehoyada mi du fi shoa dat ih laayal tu Jehoava?

¹³ Wen Jehoawash mi sevn yaaz oal, Jehoyada mi shoa agen dat hihn laayal tu Jehoava. Hihn mi ga wahn plan. Sins Jehoawash da-mi fahn Dayvid famili lain, Jehoyada mi waahn mek dis lee bwai king. Bot if di plan neva werk owt, Jehoyada mi wahn looz ih laif. Wid Jehoava help, evriting mi gaahn gud. Di cheef ahn di Leevait dehn mi sopoat Jehoyada. Soh dehn mi mek Jehoawash di king a Jooda ahn dehn mi kil Atalaiya. (2 Chron. 23:1-5, 11, 12, 15; 24:1) Den Jehoyada “mek wahn kovenant bitween Jehoava ahn di king lang wid di peepl, soh dat dehn ku kantinyu fi bee Jehoava peepl.” (2 Ki. 11:17) Jehoyada mi aalso “put sohn man fi gyaad di gayt dehn a Jehoava hows, soh dat enibadi weh noh kleen kyaahn goh een.”—2 Chron. 23:19.

14. Eena weh wayz Jehoyada mi geh aana sayka weh hihn mi aana Jehoava?

¹⁴ Jehoava mi pramis: “Ah wahn aana enibadi weh aana mee.” Wi noa dat dis da chroo bikaaz Hihn mi aana Jehoyada. (1 Sam. 2:30) Fi egzampl, Jehoava mek dehn rait dong di gud tingz weh Jehoyada du eena di Baibl soh dat wee ku laan fan it. (Roam. 15:4) Wen Jehoyada mi ded, dehn mi giv ahn wahn speshal aana. Dehn mi beri ahn “eena Dayvid Siti wehpaat dehn beri di king dehn, bikaaz hihn mi du wahn lata gud tingz fi Izrel, fi di chroo Gaad, ahn fi Gaad templ.”—2 Chron. 24:15, 16.

15. Wat da sohn lesn weh wi ku laan fahn Jehoyada egzampl? (Koment pahn di picha.)

¹⁵ Jehoyada egzampl ku help aala wi fi ga lata rispek fi Jehoava. Di eldaz eena di kangrigayshan ku kapi Jehoyada egzampl wen dehn kip di luk fi wayz how dehn ku protek di kangrigayshan. (Aks 20:28) Jehoyada egzampl ku help oalda bradaz ahn sistaz fi si dat wen dehn ga lata rispek fi Jehoava ahn dehn stay laayal tu Ahn, Hihn noh wahn ferget dehn. Insted, ih wahn kantinyu yooz dehn fi mek ih perpos kohn chroo. Yong peepl eena di kangrigayshan ku laan wahn lat fahn di  way how Jehoava mi chreet Jehoyada. Jos laik Jehoava, dehn ku chreet oalda wanz wid aana ahn rispek, espeshali dehn wan weh di serv Jehoava fi wahn lang taim. (Prov. 16:31) An aala wi ku laan fahn di cheef ahn di Leevait dehn weh mi sopoat Jehoyada. Mek aala wi bee laayal an obay “di wan dehn weh di tek di leed.”—Heeb. 13:17.

16. Wai King Jehoawash da-mi wahn bad king?

¹⁶ Jehoyada mi help King Jehoawash fi bee wahn gud persn. (2 Ki. 12:2) Soh wen di king mi yong, hihn mi waahn obay Jehoava. Bot afta Jehoyada mi ded, King Jehoawash mi staat lisn tu sohn leeda weh mi ton gens Jehoava. Weh mi hapm sayka dat? Hihn ahn di peepl weh ih mi-di rool oava “staat tu serv di Ashera poas ahn di aidol dehn.” (2 Chron. 24:4, 17, 18) Jehoava mi feel hert, bot stilyet “hihn mi kip di sen ih prafit dehn monks dehn fi bring dehn bak. . . , bot dehn rifyooz fi lisn.” Dehn neva eevn waahn lisn tu Jehoyada son, Zakaraiya. Zakaraiya da neva onli Jehoava prafit ahn prees, bot ih da-mi Jehoawash kozn tu. King Jehoawash mi mek dehn kil Zakaraiya eevn doa Zakaraiya famili mi sayv fi hihn laif.—2 Chron. 22:11; 24:19-22.

17. How laif mi tern owt fi Jehoawash?

¹⁷ Sins Jehoawash mi looz ih rispek fi Jehoava, tingz mi gaahn bad far ahn. Jehoava mi seh: “Ah wahn hayt enibadi weh hayt mee.” (1 Sam. 2:30) Eevn doa Jehoawash mi ga “wahn big aami,” wahn smaal aami fahn Siriya mi en op di win wahn waar gens ahn.  Ahn joorin da waar, Jehoawash mi geh hert bad. Afta di Siriyan aami lef, Jehoawash oan servant dehn mi kil ahn bikaaz a weh hihn mi kil Zekaraiya. Sins da king mi soh wikid, di peepl neva beri ahn eena di plays “wehpaat dehn beri di king dehn.”—2 Chron. 24:23-25; si “son of Barachiah” stodi noat fi Machyu 23:35 eena di Study Bible.

18. Bays pahn Jeremiah 17:7, 8, weh wi need fi du soh dat wi noh bee laik Jehoawash?

¹⁸ Weh wi ku laan fahn Jehoawash egzampl? Hihn da-mi laik wahn chree weh di root neva gaahn deep dong, soh ih need wahn stik fi sopoat it. Jos laik da stik weh sopoat di chree, Jehoyada mi sopoat Jehoawash. Bot afta Jehoyada mi ded, Jehoawash mi staat lisn tu dehn wan weh mi ton gens Jehoava. Sayka dat, Jehoawash mi stap bee faytful tu Jehoava. Dis teech wi wahn impoatant lesn—if wi waahn stay kloas tu Jehoava, eech wan a wi need fi schrentn wi oan rilayshanship wid Jehoava ahn noh jos obay Jehoava bikaaz wi famili er frenz eena di kangrigayshan di du it. Wi schrentn wi rilayshanship wid Jehoava wen wi pray aal di taim, reed di Baibl, ahn meditayt pan it evri day.—Reed Jeremiah 17:7, 8; f Kol. 2:6, 7.

19. Weh Jehoava ekspek fahn wi?

¹⁹ Jehoava noh ekspek tu moch fahn wi. Ecclesiastes 12:13 tel wi weh hihn ekspek fahn eech wan a wi. Ih seh: “Fyaa di chroo Gaad ahn kip ih komanment dehn, bikaaz dis da weh wi sopoas tu du.” Wen wi fyaa Gaad, er shoa lata rispek far ahn, wi wahn ku stay faytful tu ahn noh mata weh hapm eena di fyoocha, jos laik weh Oabadaiya ahn Jehoyada mi du. Notn wahn ku brok wi frenship wid Jehoava.