1. Bays pahn 1 Peeta 5:2, weh impoatant rispansabiliti di eldaz gat?

 JEHOAVA gi di eldaz di rispansabiliti fi tek kayr a Ih preshos sheep. Dehn reeli hapi dat Jehoava chros dehn fi tek kayr a dehn bradaz ahn sistaz, ahn dehn werk haad fi bee “shepadz weh . . . reeli tek kayr a dehn.” (Jer. 23:4; reed 1 Peeta 5:2.) Wi soh tankful fi ga wi eldaz eena wi kangrigayshan!

2. Wat da sohn chalenjiz weh eldaz mait goh chroo?

² Di rispansabiliti weh eldaz ga kohn wid wahn lata chalenjiz. Eldaz haftu werk haad fi tek kayr a di kangrigayshan. Wahn elda fahn di United States weh naym Tony seh dat ih mi haftu laan fi noh tek aan moa werk dan weh ih ku handl. Hihn mi seh: “Wen di COVID-19 pandemik mi jos staat, Ah mi chrai fi du moa werk fi aaganaiz di meetinz ahn di minischri. Bot noh mata humoch Ah mi du, dehn mi aalwayz ga moa werk. Bifoa Ah noatis, Ah mi soh bizi dat Ah neva ga inof taim fi pray, fi du Baibl reedin, ahn fi du persnal stodi.” Wahn elda fahn Kosovo weh naym Ilir mi gaahn chroo wahn difrent chalenj. Wen hihn mi deh eena wahn ayrya wehpaat dehn mi ga waar, ih mi haad fi mek ih obay di inschrokshanz weh ih geh fahn di aaganaizayshan. Hihn seh: “Wen di branch mi gi mi wahn asainment fi help di bradaz ahn sistaz eena wahn daynjaros ayrya, dat mi reeli tes mi korij. Ah mi frayd, ahn di inschrokshanz neva reeli mek sens tu mee.” Tim, wahn mishineri weh deh da Asia, mi fain it haad fi du aal weh ih mi ga fi du evri day. Hihn seh: “Sohntaim, Ah mi feel soh taiyad dat ih mi haad fi tek kayr a di bradaz ahn sistaz.” Weh ku help eldaz weh di goh chroo chalenjiz laik dehnya?

3. Weh aala wi ku laan fahn Gidiyan egzampl?

³ Eldaz ku laan fahn Gidiyan egzampl. (Heeb. 6:12; 11:32)  Hihn mi leed ahn protek Jehoava peepl. (Judg. 2:16; 1 Chron. 17:6) Jos laik Gidiyan, eldaz tudeh ga di rispansabiliti fi tek kayr a Gaad peepl joorin dehnya haad taimz. (Aks 20:28; 2 Tim. 3:1) Gidiyan set wahn gud egzampl fi wi bikaaz hihn mi hombl, ih mi noa ih limits, an ih mi obay weh Jehoava tel ahn fi du. Hihn mi laan fi bayr op wen ih mi du di asainment weh Jehoava mi giv ahn. Weda wee da wahn elda er nat, wi ku laan fi bee moa tankful fi wi eldaz. Wi ku help dehnya bradaz weh tek kayr a aala wi eena di kangrigayshan.—Heeb. 13:17.

4. How Gidiyan mi shoa dat ih mi hombl ahn dat ih mi noa ih limits?

⁴ Gidiyan mi hombl an ih mi noa ih limits. b Wen wan a Jehoava aynjel mi tel ahn dat hihn mi wahn bee di wan fi sayv Izrel fahn di Midyanait dehn, Gidiyan mi ansa eena wahn hombl way. Hihn mi seh: “Mai peepl da di lees impoatant eena Manaaseh chraib, an Ai da di lees impoatant persn eena mi pa hows.” (Judg. 6:15) Gidiyan mi feel laik hihn neva kwalifai fi da asainment, bot Jehoava mi noa dat hihn kuda mi du it. Ahn wid Jehoava help, hihn mi finish di werk weh Jehoava mi giv ahn fi du.

5. Wai ih mait bee haad fi mek wahn elda bee hombl ahn noa ih limits?

⁵ Eldaz du dehn bes fi aalwayz shoa dat dehn hombl ahn dat dehn noa dehn limits. (Mic. 6:8; Aks 20:18, 19) Dehn noh boas bowt dehn skilz er di tingz weh dehn du, ahn dehn noh tink dat dehn noh gud inof bikaaz dehn mek mistayk. Stilyet, ih ku bee haad fi mek dehn bee hombl ahn noa dehn limits. Fi egzampl, wahn elda mait fain it haad fi bee hombl wen adaz komen ahn er joj ahn fi di way ih du tingz. Er ih mait aksep sohn asainment an en op di chrai du moa dan weh ih ku handl. Weh eldaz ku laan fahn Gidiyan egzampl wen dehn fays chalenjiz laik dehndeh?

6. How Gidiyan egzampl ku teech eldaz fi noa dehn limits? (Koment pahn di picha.)

⁶ Aks fi help. Sohnbadi weh noa ih limits andastan dat dehn ga tingz weh dehn kyaahn du. Gidiyan mi shoa dat ih noa ih limits wen ih mi aks fi help. (Judg. 6:27, 35; 7:24) Eldaz weh waiz du di saym ting. Tony, weh wi menshan  erliya, seh: “Bikaaz a di way how Ai groa op, Ah yoozhwali aksep moa werk dan weh Ah ku du. Soh fi wi famili wership, Ah mi disaid fi diskos how wi ku noa wi limits, an Ah aks mi waif fi tel mi how shee tink Ah ku du beta. Ah aalso gaahn pahn jw.org ahn wach di veedyo weh naym Chrayn Peepl, Chros Dehn, ahn Gi Dehn Atariti, Jos Laik Jeezas.” Tony mi staat tu aks adaz fi help wid di werk weh ih mi gat. How dat mi werk owt far ahn? Hihn seh: “Di werk eena di kangrigayshan di geh don, an Ah ga moa taim fi schrentn mi rilayshanship wid Jehoava.”

7. How eldaz ku fala Gidiyan egzampl wen adaz joj dehn? (Jaymz 3:13)

⁷ Noh geh beks if sohnbadi joj yu. Wahn neks chalenj weh eldaz fays da wen adaz joj dehn. Dis da wahn nada way how Gidiyan egzampl ku help dehn. Gidiyan mi noa dat hihn neva perfek, soh hihn neva geh beks wen di peepl fahn Eefrayim chraib mi joj ahn. (Judg. 8:1-3) Hihn neva ansa dehn bak eena wahn bad way. Hihn mi shoa dat ih hombl wen ih mi lisn tu weh dehn mi-di komplayn bowt, ahn wen ih taak tu dehn eena wahn kaam way. Bikaaz a dat, dehn mi kaam dong. Eldaz weh waiz wahn fala Gidiyan egzampl fi lisn gud an ansa eena wahn kaam way wen adaz joj dehn. (Reed Jaymz 3:13.) Wen dehn du dat, dehn help kip di pees eena di kangrigayshan.

8. Weh eldaz shuda du wen adaz komen dehn? Yooz di egzampl eena di paragraaf.

⁸ Giv aal di prayz tu Jehoava. Wen adaz mi prayz Gidiyan fi di vikchri oava Midyan, hihn mi mek dehn noa dat Jehoava da di wan weh dizerv di prayz. (Judg. 8:22, 23) How eldaz ku kapi fi hihn egzampl? Dehn ku gi Jehoava di prayz fi weh dehn du. (1 Kor. 4:6, 7) Fi egzampl, if adaz komen wahn elda fi di way ih teech, hihn ku help dehn fi si dat da bikaaz a di inschrokshan weh ih geh fahn Gaad Werd, er ih ku seh dat aala wi ku laan fahn di chraynin weh Jehoava aaganaizayshan giv. Ih gud fi mek eldaz tink bowt di way dehn teech, fi si if ih di bring aana tu Jehoava er if dehn jos di chrai impres adaz. Mek wi luk pahn di egzampl a wahn brada weh naym Timothy. Wen hihn mi jos staat serv az wahn elda, hihn mi laik gi poblik taak. Hihn seh: “Ah yoostu kom op wid sohn lang inchrodokshan an iloschrayshan, an adaz wuda aalwayz komen mi fi mi taak dehn. Bot Ah yoostu noatis dat di atenshan mi deh pahn mee insteda pahn di Baibl er Jehoava.” Timothy mi riyalaiz dat hihn mi need fi chaynj di way ih teech soh dat di atenshan neva deh pahn hihn. (Prov. 27:21) Weh mi hapm afta ih mi chaynj di way ih teech? Hihn seh: “Now, bradaz ahn sistaz wuda tel mi dat mi taak help dehn fi deel wid wahn prablem, bayr op chroo wahn chraiyal, er help dehn fi jraa kloasa tu Jehoava. Wen Ah hyaa dehndeh koments, ih mek Ah feel way moa hapiya dan wen di atenshan yoostu deh pahn mee.”

9. Weh mi mek it haad fi Gidiyan bee obeedyant ahn shoa dat ih ga korij? (Koment pahn di picha pahn di kova.)

⁹ Afta Gidiyan mi geh di asainment fi serv az joj fi di nayshan a Izrel, hihn mi need fi bee obeedyant ahn ga korij. Jehoava mi giv ahn wahn daynjaros asainment fi dischrai aala di alta dehn weh ih pa mi yooz fi wership Bayal. (Judg. 6:25, 26) Lee wail afta dat, Gidiyan mi geh wahn aami, bot Jehoava tel ahn too taimz fi mek da aami smaala. (Judg. 7:2-7) Fainali, Jehoava mi koman Gidiyan fi atak di enimi kyamp eena di midl a di nait.—Judg. 7:9-11.

10. How wahn elda ku fain it haad fi obay?

¹⁰ Eldaz shuda bee “redi fi obay.” (Jay. 3:17) Wahn elda weh obeedyant aalwayz redi fi fala weh di Baibl seh ahn di dairekshan fahn Jehoava aaganaizayshan. Hihn chrai ih bes fi set  wahn gud egzampl. Bot ih ku bee haad fi mek ih obay. Fi egzampl, ih mait fain it haad fi kip op wid di dairekshan weh ih get, er sohntaim ih mait wanda if di dairekshan weh ih geh reeli mek sens er if ih waiz. Dehn mait aks ahn fi du wahn asainment weh mait mek ih en op eena jayl. How eldaz ku kapi di way how Gidiyan mi obay inschrokshanz eena dehnya kaina sichuwayshan?

11. Weh ku help eldaz fi obay?

¹¹ Lisn gud wen yu geh dairekshan fahn Jehoava aaganaizayshan ahn du weh ih seh. Jehoava mi tel Gidiyan how fi dischrai ih pa alta dehn, wehpaat fi bil wahn nyoo alta far Ahn, an weh animal ih shuda sakrifais. Gidiyan neva kweschan Jehoava dairekshan. Hihn jos fala weh Jehoava tel ahn fi du. Tudeh day, di eldaz geh dairekshan fahn Jehoava aaganaizayshan chroo letaz an anonksments. Dehn aalso geh ada inschrokshanz weh help wi fi bee sayf ahn stay kloas tu Jehoava. Wi lov wi eldaz bikaaz dehn du dehn bes fi obay teeyokratik dairekshan. Sayka dat, di hoal kangrigayshan benifit.—Ps. 119:112.

12. How Heebrooz 13:17 ku help di eldaz if Jehoava aaganaizayshan tel dehn fi chaynj di way dehn du tingz?

¹² Bee wilin fi ajos tu chaynjiz. Memba dat Jehoava mi tel Gidiyan fi sen hoam moa dan 99 persent a ih aami. (Judg. 7:8) Hihn mosi mi tink tu ihself, ‘Ai reeli need fi mek dis chaynj? Dis wahn eevn werk?ʼ Bot stilyet, Gidiyan mi obay weh Jehoava mi tel ahn. Tudeh, eldaz kapi Gidiyan egzampl wen dehn obay weh di aaganaizayshan tel dehn fi chaynj di way dehn du tingz. (Reed Heebrooz 13:17.) Fi egzampl, eena 2014 di Govanin Badi mi chaynj di way how dehn pay fi Kingdom Haal an Asembli Haal kanschrokshan. (2 Kor. 8:12-14) Bifoa, di aaganaizayshan yoostu len moni tu di kangrigayshan dehn fi bil ahn di kangrigayshan dehn mi haftu pay bak di loan. Bot now, di kangrigayshan dehn noh need fi pay bak wahn loan. Di aaganaizayshan yooz di kanchribyooshan fahn aala di kangrigayshan dehn rong di werl fi bil Kingdom Haal an Asembli Haal, eevn if di loakal kangrigayshan onli ku kanchribyoot wahn lee bit a moni. Wen José mi hyaa bowt dis chaynj, hihn neva tink dat ih mi wahn werk, an ih tink tu ihself: ‘Dehn wahn kyaahn bil nat eevn wan Kingdom Haal. Da noh soh tingz werk rong ya.ʼ Weh mi help José fi sopoat dis nyoo dairekshan? Hihn seh: “Di skripcha da Proverbs 3:5, 6 rimain mi fi chros eena Jehoava. An evriting mi werk owt gud! Dehn noh onli di bil moa Kingdom Haal, bot wi laan fi kanchribyoot eena difrent wayz soh dat evribadi ku geh weh dehn need.”

13. (a) Weh Gidiyan mi shoar bowt? (b) How eldaz ku kapi fi hihn egzampl?

¹³ Shoa korij wen yu di du weh Jehoava aks yu fi du. Gidiyan mi obay Jehoava eevn wen ih mi frayd ahn di asainment mi daynjaros.  (Judg. 9:17) Afta Jehoava mi shoa Gidiyan dat ih mi wahn help ahn, Gidiyan mi noa fi shoar dat Jehoava mi wahn help ahn protek Fi Hihn peepl. Eldaz weh liv wehpaat di werk deh anda ban kapi Gidiyan egzampl. Eevn doa dehnya eldaz mait geh beet op, looz dehn jab, er polees mait ares er kweschan dehn, dehn bradaz stil di tek di leed da di meetin dehn an eena di preechin werk. c Joorin di grayt chribyulayshan, eldaz wahn need korij fi obay di inschrokshanz weh dehn wahn get, eevn wen dat put dehn laif eena daynja. Fi egzampl, wi mait geh inschrokshanz pahn how fi preech wahn jojment mesij ahn weh wi need fi du fi servaiv wen Gag a Maygag atak wi.—Ezek. 38:18; Rev. 16:21.

14. Wai ih mi haad fi mek Gidiyan bayr op?

¹⁴ Gidiyan mi haftu werk haad fi serv az wahn joj. Wen di Midyanait dehn mi-di ron weh fahn di waar joorin di nait, Gidiyan mi chays afta dehn fahn Jezriyel Vali way tu di Jaadn Riva. Wen dehn reech bai di riva dehn mi praabli haftu ron chroo lata bush. (Judg. 7:22) Yu tink Gidiyan mi stap chays dehn wen ih mi reech di Jaadn Riva? No! Eevn doa dehn mi taiyad, hihn ahn di 300 man dehn mi kraas oava di Jaadn ahn dehn mi kantinyu chays afta dehn. Fainali, dehn mi kech op wid di Midyanait dehn ahn dehn mi win di waar.—Judg. 8:4-12.

15. Wai ih ku bee haad sohntaim fi mek wahn elda bayr op?

¹⁵ Sohntaim, eldaz ku feel taiyad bikaaz dehn di tek kayr a di kangrigayshan ahn dehn famili. Wen wahn elda feel da way, how dehn ku kapi Gidiyan egzampl?

16-17. Weh mi help Gidiyan fi bayr op, ahn weh eldaz ku bee shoar bowt? (Isaiah 40:28-31) (Koment pahn di picha.)

¹⁶ Chros dat Jehoava wahn gi yu di schrent weh yu need. Gidiyan mi chros dat Jehoava mi wahn giv ahn di schrent weh ih need, ahn Jehoava neva let ahn dong. (Judg. 6:14, 34)  Wahn taim, Gidiyan an ih aami mi haftu ron fi chays dong too Midyanait king weh praabli mi-di raid pahn kyamil. (Judg. 8:12, 21) Bot Gaad mi help di Izrelaits fi kyapcha di Midyanait king dehn ahn win di waar. Eldaz ku pen pahn Jehoava tu bikaaz hihn “noh geh taiyad ner giv op.” Hihn wahn gi dehn di schrent wen dehn need it.—Reed Isaiah 40:28-31. d

¹⁷ Mek wi luk pahn di egzampl a Matthew, wahn brada weh serv pahn wahn Hospital Liaison Committee. Da weh mi help hihn fi bayr op? Matthew seh: “Ai geh fi ekspeeryens how Filipiyanz 4:13 gi mi di schrent weh Ah need. Lata taimz wen Ah feel taiyad ahn laik Ah kyaahn goh nohmoh, Ah wuda poar owt mi haat tu Jehoava ahn bayg ahn fi gi mi di schrent weh Ah need soh dat Ah ku dehdeh fi help mi bradaz ahn sistaz. Afta Ah don pray, Ah feel laik Jehoava gi mi di schrent weh Ah need fi bayr op.” Jos laik Gidiyan, wi eldaz werk haad fi tek kayr a Jehoava peepl eevn doa ih noh aalwayz eezi. Af koars, dehn need fi noa dehn limits ahn riyalaiz dat dehn kyaahn du evriting. Bot dehn ku chros dat Jehoava wahn lisn tu dehn wen dehn bayg ahn fi help ahn dat hihn wahn gi dehn di schrent fi bayr op.—Ps. 116:1; Fil. 2:13.

18. How eldaz ku kapi Gidiyan egzampl?

¹⁸ Eldaz ku laan wahn lat fahn Gidiyan egzampl. Eldaz need fi bee reeznabl ahn hombl bowt humoch werk dehn ku handl. Dehn aalso need fi shoa dat dehn reeznabl ahn hombl eena di way dehn rispan wen peepl prayz dehn er joj dehn. Ahn moa dan eva bifoa, dehn need fi shoa dat dehn obeedyant ahn dat dehn ga korij, bikaaz wi liv kloas tu di en. Dehn need fi bee shoar dat noh mata weh dehn di goh chroo, Jehoava wahn help dehn. Wi reeli apreeshiayt di haad werk weh di eldaz di du ahn wi aalwayz waahn “aana bradaz laik [dehn].”—Fil. 2:29.