1-2. Weh prablem wee goh chroo weh simila tu weh Lat mi gaahn chroo?

 WEN wi si di bad moaralz weh peepl ga tudeh, wi feel di saym way how Lat mi feel. Lat “kudn stan di laales way a laif di peepl mi-di liv ahn di brayzn way dehn mi-di bihayv,” bikaaz hihn mi noa dat Jehoava hayt dehndeh tingz. (2 Peet. 2:7, 8) Lat mi lov ahn rispek Jehoava, soh hihn mi rijek aala di imoaral tingz weh di peepl mi-di du. Jos laik eena Lat dayz, wee di liv monks peepl weh noh ga no rispek fi Jehoava raichos standadz. Eevn if dat da di kays, wi ku stil stay kleen eena wahn moaral way if wi kip wi lov ahn rispek fi Jehoava schrang.—Prov. 14:2.

² Jehoava help wi fi du dat chroo di inkorijment wi fain eena di buk a Proverbs. Az Kristyanz, aala wi ku benifit fahn dis kongsl, noh mata if wi yong er oal.

3. Bays pahn weh Proverbs 17:3 seh, wai wi need fi protek wi haat? (Koment pahn di picha.)

³ Wahn impoatant reezn wai wi mos protek wi haat da bikaaz Jehoava ku si weh deh een deh. Dis meenz dat hihn ku si moa dan weh adaz si ahn hihn reeli noa weh kaina persn wee pahn di eensaid. (Reed Proverbs 17:3.) b Jehoava wahn lov wi if wi kip aan di tink bowt ih advais weh ku help wi fi liv fareva. (Jan 4:14) If wi ful op wi main wid Jehoava wizdom, den wi noh wahn alow Saytan an ih wikid werl fi korop wi main, ahn wi noh wahn liv wahn loos laif laik peepl eena di werl. (1 Jan 5:18, 19) Az wi jraa kloasa tu Jehoava, wi laan fi lov ahn rispek ahn eevn moa. Bikaaz wi noh waahn hert Jehoava, wi nat eevn wahn tink bowt eniting weh ku kaaz wi fi sin. Wen temtayshan  kom op, wi ku aks wiself, ‘How Ah ku eevn tink bowt hert sohnbadi weh lov mi soh moch?ʼ—1 Jan 4:9, 10.

4. How lov ahn rispek fi Jehoava mi protek wahn sista mek ih noh giv een tu temtayshan?

⁴ Wahn sista fahn Croatia weh naym Marta weh mi geh temtid fi komit imoraliti seh: “Ah mi fain it haad fi fait di dizaiya fi du sohnting rang. Bot Ah mi ga lata rispek fi Jehoava, ahn dat mi protek mi.” c How rispek fi Jehoava mi help ahn? Marta seh dat shee mi tink bowt weh kuda mi hapm if ih mi du sohnting imoaral. Wee ku du di saym ting. Di wers ting weh ku hapm da dat wi ku mek Jehoava sad ahn looz di privilij fi wership ahn fareva.—Jen. 6:5, 6.

5. Weh wi ku laan fahn Leo egzampl?

⁵ Wen wi rispek Jehoava, wi wahn mek shoar dat wi noh du notn bad ner sopoat enibadi weh du bad tingz. Leo, hoo liv da Congo, mi laan da lesn. Foa yaaz afta ih mi geh baptaiz, hihn mi staat heng owt wid sohn frenz weh du bad tingz. Hihn mi tink dat bikaaz hihn noh di du bad tingz, dat meenz dat hihn noh di sin gens Jehoava. Bot noh lang afta dat, dehndeh saym bad kompani mi mek ih staat jrink wahn lat ahn komit imoraliti. Den hihn staat tu tink bowt weh ih payrents mi teech ahn, an bowt how hapi ih mi feel wen ih yoostu serv Jehoava. Wat da-mi di rizolt? Ih staat du tingz weh pleez Jehoava agen. Di eldaz mi help ahn, an hihn mi kohn bak tu Jehoava. Tudeh hihn di serv az wahn elda an az wahn speshal painyaa, an ih soh hapi.

6. Weh too “laydi” wi wahn taak bowt now?

⁶ Mek wi luk pahn Proverbs chapta 9, wehpaat wi wahn reed bowt too laydi; wan stan fi wizdom ahn di ada wan stan fi foolishnis. d  Wail wi diskos dehnya egzampl, wi haftu memba dat Saytan werl ful peepl main wid seks ahn poarnografi. (Ifee. 4:19) Soh ih veri impoatant dat wi kantinyu ga wahn lata rispek fi Jehoava ahn ton weh fahn tingz weh bad. (Prov. 16:6) Fi shoar, noh mata if wi da man er wuman, aala wi ku benifit fahn weh dis chapta ku teech wi. Eech wan a di laydi dehn weh wi di taak bowt mi aafa wahn invitayshan tu dehn wan “weh noh ga gud sens.” Da laik eech wan a dehn mi seh, ‘Kom eena mi hows kohn eet ahn jrink.ʼ (Prov. 9:1, 5, 6, 13, 16, 17) Weh mi hapm tu dehn wan weh aksep di invitayshan fahn di waiz laydi ahn dehn wan weh aksep di invitayshan fahn di foolish laydi? Tingz mi werk owt difrent fi dehn.

7. Akaadn tu Proverbs 9:13-18, weh hapm tu dehn wan weh aksep di invitayshan fahn di schupid laydi? (Koment pahn di picha.)

⁷ Now mek wi taak bowt di foolish, er “schupid laydi” invitayshan. (Reed Proverbs 9:13-18.) e Shee hala owt tu dehn wahn weh foolish ahn seh, “Kohn,” kohn eet wid mi. Bot weh mi hapm tu di peepl weh mi gaahn eet wid shee? “Fi shee hows ful op a ded peepl weh kyaahn du notn fi dehnself.” Sohn ada chapta eena di buk a Proverbs aalso taak bowt sohnting simila. Ih waan wi bowt wahn laydi weh noh “liv op tu Gaad standadz” ahn weh “imoaral.” Soh da noh wahn gud aidyaa fi spen taim wid shee bikaaz: “Enibadi weh goh da fi shee hows di luk fi ded.” (Prov. 2:11-19) Proverbs 5:3-10 aalso waan wi bowt wahn nada laydi weh noh “liv op tu Gaad standadz” ahn dat “ih wahn en op di ded.”

8. Weh disizhan wi haftu mek?

⁸ Dehn wan weh lisn tu di “schupid laydi” haftu mek wahn disizhan: Dehn eeda aksep ih invitayshan er rijek it. Eena wahn simila way, wee haftu mek wahn disizhan tu. Fi egzampl, weh yoo wuda du if poarnografi pap op pahn yu skreen er if sohnbadi temp yu fi du sohnting sekshwali imoaral?

9-10. Wat da sohn reezn wai wi fi avoid sekshwal imoraliti?

⁹ Dehn ga lata gud reezn wai wi fi stay weh fahn sekshwal imoraliti. Di “schupid laydi” weh wi mi taak bowt erliya seh: “Waata weh yu  teef tays sweet.” Bot weh ih meen wen ih seh “waata weh yu teef”? Di Baibl kompyaa seks bitween hozban ahn waif tu fresh waata, sohnting weh dehn ku injai. (Prov. 5:15-18) Seks bitween wahn man ahn wahn wuman hoo leegali marid tu eech ada bring lata jai. Bot ih difrent wid “waata weh yu teef.” Dis rifaa tu eni kaina sekshwal ak owtsaida wahn leegal marij. Peepl weh komit sekshwal imoraliti chrai haid it fahn adaz, jos laik how wahn teef chrai haid weh ih du. Di ‘waata weh dehn teefʼ tays sweet tu dehn bikaaz dehn feel laik dehn di get weh wid it ahn nobadi wahn noa. Bot dehn onli di fool dehnself if dehn tink Jehoava noh si dehn. If wi looz wi rilayshanship wid Jehoava, notn “sweet” bowt dat. Dat da di wers ting weh ku hapm. (1 Kor. 6:9, 10) Bot dat da noh aal.

¹⁰ Sekshwal imoraliti ku kaaz pregnansi weh wahn persn neva waahn, mek di persn feel shaym, laik ih noh wert notn, an ih eevn brok op famili. Fi shoar di bes ting fi du da fi noh aksep di invitayshan fahn di schupid laydi fi goh da ih hows an eet. Peepl weh praktis sekshwal imoraliti ku looz dehn frenship wid Jehoava ahn pahn tap a dat, dehn ku kech wahn dizeez weh ku kil dehn. (Prov. 7:23, 26) Chapta 9 vers 18 en aaf di seh: “Aala fi shee ges dehn deh eena di Grayv.” Bot wai peepl stil aksep fi shee invitayshan eevn doa dehn noa dehn ku ded?—Prov. 9:13-18.

11. How poarnografi ku hert wi?

¹¹ Poarnografi da wahn kaman ting weh wi haftu stay weh fram. Som peepl tink dat fi wach poarnografi noh daynjaros. Bot dat da noh chroo. Ih ku mek wi looz rispek fi wiself an adaz. An ih ku bee haad fi stap wach it. Wans wi luk pahn eniting weh gat een poarnografi, ih noh wahn eezi fi ferget it. Ahn weh wers, da dat poarnografi noh help wahn persn fi geh rid a dehn rang imoaral dizaiyaz. Insteda dat, ih mek ih tink bowt dehn eevn moa. (Kol. 3:5; Jay. 1:14, 15) Lata peepl hoo kantinyu fi wach poarnografi en op di komit sekshwal imoraliti.

12. How wi ku shoa dat wi di protek wiself fahn imoaral pichaz weh mek wi tink bowt rang dizaiyaz?

¹² Fi egzampl, weh yu wuda du if poarnografi pap op pahn yu divais? Rait away wi shuda stap luk pan it. Ih wahn eeziya fi du dis if wi memba dat di moas impoatant ting da wi rilayshanship wid Jehoava. Eevn doa di picha weh wi si mait noh bee poarnografi, ih ku stil mek wi tink bowt seks. Bot wai wi fi stap luk pan dehn? Bikaaz wi noh waahn eevn tink bowt eniting weh imoaral, soh dat wi noh komit adolchri nat eevn eena wi haat. (Mach. 5:28, 29) Wahn elda fahn Thailand weh naym David seh: “Ah wuda aks miself: ‘Eevn if di picha dehn da noh poarnografi, Jehoava wuda hapi if Ah stay di luk pan dehn?ʼ Wen Ah tink dis way, ih help mi mek gud disizhanz.”

13. Weh ku help wi fi ak eena wahn waiz way?

¹³ Wen wi frayd fi du eniting weh ku hert Jehoava, dis help wi fi ak eena wahn waiz way. Rispek fi Jehoava da “di biginin a wizdom.” (Prov. 9:10) Wi ku si dis eena di biginin a Proverbs chapta 9, weh taak bowt di neks laydi weh reprizent “chroo wizdom.”

14. Weh difrent invitayshan wi reed bowt da Proverbs 9:1-6?

¹⁴ Reed Proverbs 9:1-6. f Eena dehnya vers, wi reed bowt wahn invitayshan fahn Jehoava, hoo da wi Kriyayta ahn weh aal wizdom kohn  fram. (Prov. 2:6; Roam. 16:27) Eena dis kays, wi reed bowt wahn big hows wid sevn poas. Dis iloschrayshan tel wi dat Jehoava noh stinji, ahn wee ku laan fahn hihn ahn bee waiz tu.

15. Weh Jehoava invait wi fi du?

¹⁵ Proverbs chapta 9 taak bowt di laydi hoo da “chroo wizdom.” Ih teech wi dat Jehoava jenaros an ih gi wi lata gud tingz. Dis akonk tel wi dat di laydi mi kuk sohn meet, miks sohn wain, ahn set evriting pahn wahn taybl eena ih hows. (Prov. 9:2) Soh eena vers 4 ahn 5 “shee [chroo wizdom] tel dehn wan weh noh ga gud sens: ‘Kohn, eet mi food.ʼ” Wai yu tink wee shuda aksep di invitayshan fahn dis laydi? Bikaaz Jehoava waahn mek aala fi hihn pikni bee waiz ahn sayf. Hihn noh waahn mek dehn du wahn mistayk weh ku hert dehn laytaraan. Dat da wai hihn “stoar op wizdom fi dehn wan weh waahn du weh rait.” (Prov. 2:7) Wen wi ga deep rispek fi Jehoava, wi wahn aalwayz waahn pleez ahn. Soh wi lisn tu weh ih seh ahn wi hapi fi obay ahn.—Jay. 1:25.

16. Weh help Alain fi mek wahn waiz disizhan, ahn how fi hihn egzampl mi help adaz?

¹⁶ Mek wi luk pahn how Alain mi mek wahn waiz disizhan bikaaz ih mi ga wahn lata rispek fi Jehoava. Alain da wahn elda eena di kangrigayshan, ahn hihn da wahn skool teecha. Dis da weh hihn seh: “Lata di teechaz Ah werk wid tink ih okay fi wach veedyo ahn moovi weh gat een poarnografi bikaaz dehn seeʼt az paat a seks ejukayshan.” Bot Alain mi noa dat dis tinkin mi rang. Hihn mi seh: “Bikaaz Ah lov ahn rispek Jehoava, Ah rifyooz fi wach eniting weh gat een poarnografi. An Ah mi aalso tel di ada teechaz wai Ah noh wach dehndeh kaina tingz.” Hihn mi tek di advais fahn di laydi weh reprizent “chroo wizdom” weh seh fi “shoa andastandin eena di way yu liv yu laif.” (Prov. 9:6) Bikaaz hihn da wahn gud egzampl, wahn lata di teechaz di stodi di Baibl ahn goh da meetinz now.

17-18. Weh blesinz wi ku injai if wi aksep di invitayshan fahn “chroo wizdom,” ahn weh wi ku luk faawod tu? (Koment pahn di picha.)

¹⁷ Jehoava yooz di egzampl a di too laydi fi shoa wi how wi ku bee reeli hapi eena di fyoocha. Dehn wan weh aksep di “schupid laydi” invitayshan ahn goh gens Jehoava standadz onli di tink bowt how fi pleez dehnself. Bot dehn di fool dehnself bikaaz dehn noh tink bowt how dis wahn afek dehn fyoocha ahn mek dehn en op “eena di Grayv.”—Prov. 9:13, 17, 18.

¹⁸ Dehn wan weh aksep di invitayshan fahn “chroo wizdom” wahn ga wahn difrent fyoocha. An aala fi shee ges hapi bikaaz dehn gat  aala di spirichwal food weh dehn need fi kip dehn frenship wid Jehoava schrang. (Isa. 65:13) Dis da weh Jehoava mi tel Aizaiya: “Lisn tu mi gud, ahn eet gud tingz, ahn unu wahn fain lata jai eena di naisis a food.” (Isa. 55:1, 2) Wi di laan fi lov weh Jehoava lov ahn hayt weh hihn hayt. (Ps. 97:10) Wi hapi wen wi help adaz fi laan how dehn ku benifit fahn “chroo wizdom.” Da laik wee da wan a di servant dehn weh di “hala owt fahn di tap a wahn hil eena di siti ahn seh: ‘Evribadi weh foolish, kohn.ʼ” Wee an enibadi weh aksep dis invitayshan wahn injai blesinz weh wahn laas noh onli fi now bot aalso eena di fyoocha. Dehndeh blesinz wahn mek it pasabl fi “liv” fareva az wi ‘shoa andastandin eena di way wi liv wi laif.ʼ—Prov. 9:3, 4, 6.

19. Laik weh Ecclesiastes 12:13, 14 seh, weh wi shuda mek op wi main fi du? (Koment pahn di baks weh naym “ Wi Geh Lata Blesinz Wen Wi Shoa Deep Rispek fi Gaad.”)

¹⁹ Reed Ecclesiastes 12:13, 14. g If wi kantinyu shoa lata rispek fi Jehoava, dis wahn protek wi ahn help wi fi noh du notn weh ku hert ahn. Ih wahn aalso help wi kip wahn kloas rilayshanship wid ahn joorin dehnya wikid laas dayz. Rispek ahn lov fi Jehoava wahn moov wi fi kantinyu invait lat moa peepl fi laan fahn “chroo wizdom.”