Joorin Werl Waar II, mi ma ahn mi pa mi moov fahn Estonia ahn gaahn da Germany, ahn da rait deh Ah mi baan. Afta Ah baan, mi payrents mi staat geh redi fi moov tu Canada. Di fers plays wi mi moov tu mi deh kloas tu Ottawa, Canada. Wi mi liv eena wahn smaal bildin weh dehn mi yooz az chikin koop. Wi mi poa bad, bot at lees wi mi ga eg fi eet evri maanin.

Wan day, Jehoava Witnisiz mi reed Revilayshan 21:3, 4 tu mi ma. Da skripcha mi toch ih haat soh moch dat shee mi eevn staat tu krai. Mi ma ahn pa mi staat stodi di Baibl, ahn lee wail afta, dehn mi geh baptaiz.

Mi payrents neva noa how fi taak English gud, bot dehn mi stil du dehn bes fi serv Jehoava. Mi pa mi werk da Sudbury, Ontario, eena wahn fakchri wehpaat dehn melt nikl. Eevn doa hihn wuda werk aal nait, mi pa wuda stil kehr mee ahn mi lee sista, Sylvia, fi goh preech aalmoas evri Satideh. An evri week wi wuda stodi Di Wachtowa az wahn famili. Mi ma ahn mi pa mi help mi fi ga schrang lov fi Jehoava. Soh Ah mi disaid fi geh baptaiz eena 1956 wen Ah mi 10 yaaz oal. Wen Ah tink bowt humoch dehn mi lov Jehoava, ih inkorij mi fi kantinyu serv ahn.

Afta Ah finish hai skool, Ah neva put Jehoava fers eena mi laif. Ah yoostu tink dat if Ah mi staat painyaa, Ah neva mi wahn ga inof moni fi fala mi jreemz fi flai eena wahn playn ahn chravl rong di werl. Soh Ah mi staat werk da wahn loakal rayjo stayshan wehpaat Ah yoostu DJ, an Ah mi lov mi jab. Ah mi haftu werk eena di eevnin, soh Ah yoostu mis wahn lata meetin. Ah mi aalso staat heng owt wid peepl weh neva lov Jehoava. Bot mi kanshans mi staat bada mi, soh Ah staat tu mek sohn chaynjiz eena mi laif.

Afta dat Ah mi gaahn liv da Oshawa, Ontario. Da rait deh Ah mi geh fi meet Ray Norman, ih sista Lesli, ahn sohn ada painyaaz. Aala dehn mi shoa mi dat dehn mi kay fi mi. Wen Ah si how hapi dehn mi luk, ih mi mek Ah tink bowt weh Ah waahn du wid mai laif. Dehn mi inkorij mi fi staat painyaa, an Ah mi du it. Ah staat painyaa eena Septemba 1966, an Ah mi inja it wahn lat. Bot dehn mi ga sohn big chaynjiz weh Ah neva di ekspek weh mi wahn soon kom op eena mi laif.

Wail Ah stil mi-di goh da hai skool, Ah mi aplai fi goh da Betel da Toronto, Canada. Laytaraan, wail  Ah mi-di painyaa, Ah mi geh invaitid fi goh serv da Betel fi foa yaaz. Bot Ah mi reeli laik Lesli, an Ah mi feel laik if Ah aksep dis invitayshan Ah neva mi wahn si ahn agen. Afta Ah mi poar owt mi haat tu Jehoava, Ah mek op mi main dat Ah gwehn da Betel, bot Ah mi sad fi tel Lesli gudbai.

Ah mi werk da di laanjri dipaatment ahn laytaraan Ah mi werk az wahn sekiteri da Betel. Joorin da taim, Lesli mi-di serv az wahn speshal painyaa da Gatineau, Quebec. Ah aalwayz yoostu wanda how shee mi-di du an if Ah mi mek di rait disizhan. Den Ah mi geh wahn reeli nais sopraiz. Lesli breda, Ray, mi geh invaitid fi werk da Betel tu, ahn hihn da-mi mai room mayt. Sayka dat, mee ahn Lesli mi staat taak agen. Wi mi geh marid Febiweri 27, 1971, pahn di laas day a mi foa-yaaz asainment da Betel.

Mee ahn Lesli mi geh asain fi serv eena wahn French kangrigayshan da Quebec. Sohn yaaz layta, wen Ah mi 28 yaaz oal, Ah mi geh asain fi serv az wahn serkit oavaseeya. Ah neva ekspek dat non ataal! Ah mi feel laik Ah mi tu yong ahn dat Ah neva kwalifai fi bee wahn serkit oavaseeya. Bot Jeremiah 1:7, 8 mi inkorij mi wahn lat. Eena di paas, Lesli mi get eena moa dahn wan kaar aksident, soh shee mi ga chrobl fi sleep. Soh wi mi tink dat ih mi wahn bee haad fi mek wi du serkit werk. Bot Lesli mi seh, “If da Jehoava di invait wi fi du sohnting, yu noh tink wi shuda chrai du it?” Soh wi mi aksep di asainment ahn wi mi injai di serkit werk fi 17 yaaz.

Az wahn serkit oavaseeya, mi laif mi bizi an Ah neva aalwayz ga taim fi Lesli. Ah memba erli wahn Mondeh maanin sombadi mi ring mi doabel, bot wen Ah gaahn chek nobadi mi dehdeh. Aal weh Ah mi si da wahn baaskit wid wahn taybl klaat, cheez, froots, bred, wahn batl a wain wid sohn wain glaas, ahn wahn lee noat wid no naym weh seh, “Kehr yu waif owt fi wahn lee piknik.” Eevn doa da mi wahn reeli nais day fi wahn piknik, Ah mi tel Lesli dat Ah mi kyaahn goh bikaaz Ah mi haftu pripyaa sohn taak. Shee mi lee bit sad bot ih mi andastan. Wen Ah gaahn bak gaahn sidong, mi kanshans staat bada mi. Soh Ah mi staat tink bowt Ifeezhanz 5:25, 28 an Ah mi feel laik dehndeh vers da wahn way how Jehoava mi-di rimain mi fi tek kayr a mi waif feelinz. Afta Ah mi pray, Ah tel mi waif, “Mek wi goh,” ahn shee mi hapi fi hyaa dat. Wi mi fain wahn nais lee spat bai wahn riva, soh wi mi spred owt di taybl klaat, ahn wi mi spen wan a di bes dayz a wi laif. An Ah mi stil manij fi pripyaa mi taak dehn.

Wi mi ga wahn lata fon eena di serkit werk di chravl fahn British Columbia tu Newfoundland. Mi jreemz fi chravl mi-di fainali kohn chroo. Ah mi-di tink bowt aplai fi goh da Gilyad Skool bot Ah neva reeli waahn goh serv da wahn nada konchri. Ah mi feel laik onli speshal peepl kuda mi bee mishineriz an Ah neva feel laik Ah mi kwalifai. Ah mi aalso frayd dat dehn sen wi da Africa wehpaat peepl  mi-di sofa bikaaz a waar ahn dizeez. Ah mi hapi wehpaat Ah mi deh.

Eena 1992, Jehoava Witnisiz kuda mi staat preech eena poblik agen eena som a di konchriz weh yoostu bee paat a di Soviet Union. Soh di bradaz mi aks wi if wee wuda waahn bee mishineriz da Estonia. Wi neva mi-di ekspek dis non ataal, bot wi mi pray bowt it. Wi mi tink di saym ting az bifoa, “If Jehoava invait wi fi du sohnting, yu noh tink wi shuda du it?” Wi mi aksep di asainment an Ah tel miself, ‘Wel, at lees wi noh di goh da Africa.ʼ

Rait afta dat wi mi staat laan Estonian. Kopl monts afta wi mi reech di konchri, dehn mi aks wi fi du serkit werk. Wi mi sopoas tu goh vizit 46 kangrigayshan ahn sohn groop eena Estonia, Latvia, Lithuania, ahn Kaliningrad weh da paat a Russia. Dis mi meen dat wi mi wahn haftu laan how fi taak Latvian, Lithuanian, ahn Russian. Dat mi haad. Bot di bradaz ahn sistaz mi hapi dat wi mi-di chrai laan dehn langwij ahn dehn mi help wi. Eena 1999, dehn mi bil wahn branch aafis da Estonia ahn dehn mi asain mi fi serv az paat a di branch komiti lang wid Toomas Edur, Lembit Reile, ahn Tommi Kauko.

Wi mi geh fi meet wahn lata Witnisiz weh geh kik owta dehn konchri ahn weh geh sen da Siberia. Eevn doa dehn mi rof dehn op da prizn ahn dehn mi deh faar fahn dehn famili, dehn neva geh beks er mizarabl. Dehn mi hapi ahn dehn mi eega fi preech. Fi dehn egzampl mi teech wi fi bayr op ahn fi bee hapi noh mata weh sichuwayshan wi mait goh chroo.

Wi mi werk haad fi yaaz ahn wi neva tek moch taim aaf fi res. Sayka dat, Lesli mi geh soh taiyad dat ih staat tu geh sik. Wi neva noa dat di reezn wai shee mi aalwayz soh taiyad da-mi bikaaz shee mi-di sofa fahn wahn siknis weh naym fibromyalgia. Wen dis mi hapm, wi mi waahn goh bak da Canada. Wen dehn mi invait wi fi goh da di branch skool da Patterson, New York, Ah neva tink dat wi mi wahn mek it. Bot afta wi mi pray bowt it, wi mi aksep di invitayshan, ahn Jehoava mi bles wi. Wail wi mi deh da di skool, Lesli mi geh di prapa chreetment weh shee mi need. Afta dat, wi laif mi gaahn bak tu naamal.

Wail wi mi stil deh da Estonia, Ah mi geh wahn kaal fahn werl hedkwaataz di aks if wi mi wilin fi goh serv da Congo. Ah mi reeli shak espeshali bikaaz Ah mi need fi gi dehn wahn ansa di neks day. Ah neva tel Lesli notn da day bikaaz Ah mi noa dat shee mi wahn kyaahn sleep if Ah tel ahn. Bot Ai da-mi di wan weh mi kyaahn sleep bikaaz Ah mi-di pray bowt difrent tingz weh Ah mi-di wori bowt fi dis nyoo asainment da Africa.

Di neks day wen Ah tel Lesli bowt wi nyoo asainment, wi mi taak bowt it tugeda ahn seh, “Jehoava di invait wi fi goh da Africa. How wi wahn noa dat wi kyaahn du it, if wi noh chrai it?” Wi mi deh  da Estonia fi 16 yaaz, den afta dat wi flai gaahn da Kinshasa, Congo. Di branch aafis mi ga wahn priti gyaadn an ih mi kaam ahn peesful. Di fers ting Lesli mi put op eena wi room da wahn kyaad weh di bradaz ahn sistaz fahn Canada mi gi wi. Di kyaad mi seh: “Bee hapi wehpaat yu deh.” Wen wi geh fi meet di bradaz ahn sistaz, staat tu kandok Baibl stodiz, ahn injai di privilij fi bee mishineriz, wi jai fi serv Jehoava mi groa eevn moa. Lee wail afta dat, wi mi geh di privilij fi du branch vizit da 13 ada African konchriz. Dat mi help wi fi laan moa bowt di kolcha ahn di peepl. Ah neva frayd fi deh da Africa nohmoh. An Ah mi hapi dat Jehoava mi gi wi da privilij.

Da Congo, wi mi geh fi tays difrent kaina food. Wi mi geh fi eet sohn insek, sohnting wi neva tink wi wuda mi eva eet. Bot afta wi mi si humoch di bradaz mi-di injai eet dehn, wi mi waahn chrai it. An wi mi hapi dat wi chrai it.

Wi geh fi chravl tu di ees said a Congo fi inkorij ahn help di bradaz ahn sistaz wid wateva dehn mi need. Rait deh dehn mi ga sohn rebl soalja weh mi-di atak di vilij ahn hert di laydi ahn pikni dehn. Lata di bradaz ahn sistaz mi poa. Eevn doa dehn mi-di goh chroo aala dehndeh tingz, dehn mi ga schrang hoap eena di rezorekshan, ahn wi kuda mi si humoch dehn lov Jehoava ahn how dehn mi laayal tu ih aaganaizayshan. Dat mi onli toch wi haat. Fi dehn egzampl mi mek wi tink bowt wai wi di serv Jehoava ahn how wi ku schrentn wi fayt eena ahn. Som a di bradaz mi looz dehn hows ahn di difrent food weh dehn mi plaant. Wen Ah si dat, ih mi rimain mi dat di moas impoatant ting eena wi laif da wi rilayshanship wid Jehoava bikaaz wi ku looz mateeryal tingz sodn-wan. Eevn doa dehn mi-di goh chroo haad taimz, di bradaz ahn sistaz neva reeli komplayn. Fi dehn egzampl mi inkorij wi fi deel wid wi prablemz ahn helt ishuz wid korij.

Wi mi geh wahn nada sopraiz. Dehn mi invait wi fi goh serv da di branch da Hong Kong. Ih neva kraas wi main dat wi mi wahn liv da Asia! Wi mi aksep di invitayshan bikaaz wi mi don geh fi si how Jehoava mi help wi wid aala di ada asainment. Wen wi mi lef Africa eena 2013, wi mi soh sad  bikaaz wi mi-di lef wi dyaa frenz ahn wahn byootiful konchri. Wi aalso neva noa weh di fyoocha mi wahn bring.

Hong Kong, da-mi wahn big chaynj fi wee bikaaz da-mi wahn big siti wid lata peepl fahn aal oava di werl. Di Cantonese langwij mi haad fi laan, bot di bradaz ahn sistaz mi mek wi feel laik wi deh hoam ahn wi mi geh fi injai lata dehn food. Dehn mi ga lata werk fi du da Betel. Dis meen dat di Branch mi wahn need fi geh biga, soh wi mi wahn need moa lan. Bot saym taim, di prais fi bai wahn prapati mi gaahn op. Soh di Govanin Badi mi kom op wid wahn waiz disizhan. Dehn mi disaid fi sel owt wahn lata di branch prapati ahn dehn mi moov som a di werk weh dehn du deh sohnweh els. Lee wail afta, eena 2015 wi mi geh wahn nada invitayshan. Dis taim wi mi fi goh serv da South Korea, wehpaat wi deh rait now. Eena dis asainment, di langwij da-mi wahn chalenj tu. Eevn doa wi kyaahn taak Korean gud, di bradaz ahn sistaz tel wi dat wi di du wahn gud jab. Dat inkorij wi.

Ih noh aalwayz eezi fi mek frenz. Bot wi mi laan dat wen wi invait wi bradaz ahn sistaz da wi hows, dis mek it eeziya fi mek wi geh fi noa dehn. Az wi mi geh fi noa dehn, wi mi fain owt dat dehn neva difrent fahn wee, bot dehn mi laik som a di saym tingz weh wee laik. Dis mi aalso help wi fi si dat Jehoava mek wi eena wahn amayzin way weh noh set no limit pahn humoch peepl wi ku lov. Bot wi ku lov aala wi bradaz ahn sistaz.—2 Kor. 6:11.

Wi laan dat ih impoatant fi si peepl di saym way how Jehoava si dehn, ahn fi aalwayz luk fi wayz how Jehoava shoa dat ih lov ahn gaid wi. Weneva wi mi feel diskorij er wanda if di bradaz ahn sistaz laik wi, wi wuda reed wi kyaadz ahn letaz weh wi mi geh eena di paas fahn wi frenz. Jehoava mi ansa aala wi pryaaz, an ih rimain wi dat ih lov wi an ih gi wi di schrent weh wi need.

Oava di yaaz, mee ahn Lesli laan dat wi need fi spen taim wid eech ada, noh mata how bizi wi skejul mait bee. Wi laan dat ih gud fi laaf aata di mistayk dehn weh wi mek, espeshali wen wi di laan wahn nyoo langwij. Evri nait wi mi chrai wi bes fi fain sohnting weh wi ku tank Jehoava fa.

Fi tel unu di chroot, Ah neva tink dat Ah wuda mi eva bee wahn mishineri er goh liv da wahn nada konchri. Bot Ah geh fi laan dat wid Jehoava, eniting pasabl. Dis rimain mi a weh di prafit Jerimaiya mi seh: “Oa Jehoava, yoo chrik mi.” (Jer. 20:7) Jehoava gi wi wahn lata amayzin blesinz weh wi neva ekspek. Ih eevn mek mi jreem fi flai eena wahn playn kohn chroo. Wi geh fi flai da wahn lata konchri ahn du branch vizit pahn 5 difrent kantinent. Dis da-mi moa dan Ah kuda mi eva jreem bowt az wahn lee bwai. Ah reeli lov Lesli fi di sopoat weh ih gi mi eena aala wi asainment.

Wi aalwayz memba dat evriting weh wi du da owta lov fi Jehoava. Aala di gud tingz weh wi injai tudeh shoa wi how wandaful laif wahn bee wen wi geh fi liv fareva ahn wen Jehoava “oapm [ih] han ahn gi wi evriting weh wi waahn.”—Ps. 145:16.