1. Weh ku help wi fi kip aan di serv Jehoava eevn wen wi di fays prablemz?

 DI BAIBL seh dat dehnya dayz wahn bee “daynjaros ahn laif wahn bee haad.” (2 Tim. 3:1) Lang wid aala di prablemz weh peepl haftu deel wid eena dehnya laas dayz, Jehoava peepl haftu deel wid persikyooshan. Weh wahn help wi fi kantinyu wership Jehoava eevn doa wi di goh chroo dehnya prablemz? Wan ting weh wahn help wi da fi noa dat Jehoava da “di livin Gaad.”—Jer. 10:10; 2 Tim. 1:12.

2. Weh mek wi noa dat Jehoava da di livin Gaad?

² Jehoava si aala di prablemz weh wi goh chroo ahn hihn aalwayz waahn help wi. (2 Chron. 16:9; Saa. 23:4) Wen wi memba dat Jehoava kay bowt wi an aalwayz waahn sopoat wi, wi geh di schrent fi goh chroo eni prablemz weh wi mait fays. Mek wi si how hihn mi help King Dayvid.

3. Weh Dayvid mi meen wen ih seh dat “Jehoava alaiv”?

³ Dayvid mi noa dat hihn ku pen pahn Jehoava. Wen King Saal an adaz mi-di chrai kil Dayvid, hihn mi pray tu Jehoava fi help. (Saa. 18:6) Afta Gaad mi ansa ih pryaa ahn sayv ahn, Dayvid mi seh: “Jehoava alaiv!” (Saa. 18:46) Dayvid mi noa dat Jehoava mi si weh mi-di hapm tu ahn, an hihn mi noa dat Jehoava redi fi help ahn. Dat mi inkorij Dayvid fi kantinyu serv ahn prayz Jehoava.—Saa. 18:​28, 29, 49.

4. How wee benifit wen wi si Jehoava az di livin Gaad?

 ⁴ Wen wi memba dat Jehoava da di livin Gaad, ih ku help wi serv Jehoava wid moa jai. Dat wahn gi wi di schrent fi goh chroo wateva prablemz wi mait fays an ih ku help wi fi kantinyu fi werk haad. Ih wahn aalso help wi soh dat notn ku stap wi fahn stay kloas tu Jehoava.

DI LIVIN GAAD WAHN GI WI DI SCHRENT WEH WI NEED

5. Bays pahn Filipiyanz 4:​13, weh ku gi wi kanfidens wen wi di goh chroo prablemz?

⁵ Wi ku get chroo eni chraiyal weh wi mait fays, weda ih big er smaal, wen wi memba dat Jehoava alaiv ahn redi fi help wi. Dehn noh ga no prablem weh Jehoava kyaahn handl. Hihn da di Almaiti ahn hihn ku gi wi di powa fi bayr op. (Reed Filipiyanz 4:13.) Bikaaz wi noa dat, wi noh haftu frayd wen wi di goh chroo prablemz. Wen wi si how Jehoava help wi chroo smaal prablemz, ih help wi fi bayr op ahn kanvins wi dat hihn wahn help wi chroo wateva els wi mait fays.

6. Weh ekspeeryens Dayvid mi ga wen hihn mi yong weh mi mek hihn ga moa kanfidens eena Jehoava?

⁶ Pahn too difrent okayzhan, Dayvid mi si how Jehoava mi help ahn. Wen Dayvid da-mi wahn yong shepad, wahn byaa ahn wahn laiyan mi chrai bak weh wan a ih pa sheep. Pahn dehndeh too okayzhan, Dayvid mi chays afta di byaa ahn di laiyan an ih mi sayv ih pa sheep. Bot Dayvid neva tink dat hihn mi du dis pahn ih oan. Hihn mi noa dat Jehoava da di wan weh mi giv ahn di powa fi du it. (1 Sam. 17:​34-37) Dayvid neva ferget di too taim weh Jehoava mi help ahn. Wen Dayvid mi tink bak tu wen Jehoava mi help ahn, dat mi gi ahn di schrent fi bayr op wid eniting weh ih mi wahn fays eena di fyoocha.

7. Weh Dayvid mi foakos pahn wen ih mi fait Golaiyat, ahn wai dat mi help ahn?

⁷ Wen Dayvid da-mi wahn yong bwai, hihn mi gaahn da di Izrelait dehn aami kyamp. Hihn mi fain owt dat di soalja dehn mi frayd bikaaz wahn Filisteen weh naym Golaiyat mi kohn fi “mek fon a Izrel aami.” (1 Sam. 17:​10, 11) Di soalja dehn mi frayd bikaaz dehn mi-di foakos pahn how big Golaiyat mi big ahn weh ih mi-di seh. (1 Sam. 17:​24, 25) Bot Dayvid mi foakos pahn sohnting els. Hihn mi-di foakos pahn Jehoava; hihn mi noa dat wen Golaiyat mi-di mek fon a di Izrelait aami ih akchwali mi-di mek fon a “di aami a di chroo Gaad.” (1 Sam. 17:26) Dayvid mi chros dat Jehoava mi wahn help ahn jos laik how ih mi help ahn wen hihn da-mi wahn shepad. Soh hihn gaahn fait gens Golaiyat, an ih win!—1 Sam. 17:​45-51.

8. Weh wahn schrentn yu chros dat Jehoava wahn aalwayz help yu? (Koment pahn di picha.)

⁸ Jos laik Dayvid yoo ku fays eni prablem weh mait kom op bikaaz yu noa dat Jehoava da di livin Gaad weh redi fi help yu. (Saa. 118:6) Yu ku bil op yu schrent wen yu reed eena di Baibl bowt how Jehoava mi sayv fi hihn peepl dehn bak den, ahn wen yu reed er wach pahn di JW websait bowt how Jehoava help di bradaz ahn sistaz eena fi wee day. (Isa. 37:​17, 33-37) Yu ku aalso tink bowt how Jehoava don help yu eena yu laif. Yu mait feel laik Jehoava noh du sohnting az amayzin az weh ih mi du fi Dayvid wen ih mi sayv ahn fahn wahn laiyan  er wahn byaa, bot noh wori bowt dat. Fi shoar Jehoava don du lata amayzin tingz fi yoo eena yu laif. Hihn invait yu fi bee ih fren! (Jan 6:44) Bikaaz Jehoava help wi ih mek it pasabl fi mek wi serv ahn. Soh aks Jehoava fi help yu memba aala di taimz wen hihn ansa yu pryaaz, gi yu egzakli weh yu mi need wen yu mi need it, er wen ih mi tek kayr a yu wen yu mi-di goh chroo wahn tof sichuwayshan. Wen yu tink bowt dat, ih wahn help yu schrentn yu chros dat Jehoava wahn kantinyu help yu.

9. Weh wi need fi memba wen wi fays prablemz? (Proverbs 27:11)

⁹ Wen wi si Jehoava az wahn livin persn, ih help wi si wi prablemz eena di rait way. Weh dat meen? Ih meenz dat wen wi ga prablemz, wi wahn foakos pahn weh moa impoatant. Di Devl seh dat wi wahn lef Jehoava wen wi staat ga prablemz eena laif. (Joab 1:​10, 11; reed Proverbs 27:11.) Soh wen wi stay laayal tu Jehoava eevn wen wi di goh chroo prablemz, wi shoa dat wi lov Jehoava ahn wi proov dat Saytan laiyad. Maybi weh yoo liv di govament di persikyoot yu, er yu di ga moni prablemz, er peepl weh yu preech tu noh waahn lisn tu di gud nyooz, er maybi yu di fays sohnting els. If yoo di goh chroo eni a dehndeh tingz, rimemba dat how yu rispan ku mek Jehoava hapi. Ahn rimemba dat hihn neva wahn mek tingz geh soh bad dat yu kyaahn bayr it. (1 Kor. 10:13) Hihn wahn gi yu di schrent fi goh chroo di prablemz.

DI LIVIN GAAD WAHN BLES YU

10. Weh Jehoava wahn du fi dehn wan weh wership ahn?

¹⁰ Jehoava aalwayz bles dehn wan weh wership ahn. (Heeb. 11:6) Hihn gi wi pees ahn bles wi wid wahn lata tingz weh gi wi jai ahn hihn wahn gi wi evalastin laif eena di fyoocha. Wi chros dat Jehoava  waahn bles wi ahn dat hihn ga di powa fi du dat. Dat da wai wi kantinyu du wi bes fi serv Jehoava, jos laik fi hihn servant dehn eena Baibl taimz. Dat da weh Timoti mi du.—Heeb. 6:​10-12.

11. Weh mi help Timoti fi werk haad eena di kangrigayshan? (1 Timoti 4:10)

¹¹ Reed 1 Timoti 4:10. Timoti mi chros dat Jehoava mi wahn bles ahn, an dat da wai hihn mi werk haad fi Jehoava ahn fi adaz. Weh Timoti mi du? Di apasl Paal mi inkorij Timoti fi bee wahn beta teecha eena di minischri an eena di kangrigayshan. Paal mi aalso tel Timoti fi bee wahn gud egzampl fi di bradaz ahn sistaz. Hihn mi ga di rispansabiliti fi gi schrang ahn lovin kongsl tu di bradaz weh mi need it. (1 Tim. 4:​11-16; 2 Tim. 4:​1-5) Timoti mi shoar dat Jehoava mi wahn bles ahn fi aal weh ih mi du eevn if adaz neva si weh ih mi du er if dehn neva tankful far it.—Roam. 2:​6, 7.

12. Wai di eldaz kantinyu fi werk haad eena di kangrigayshan? (Koment pahn di picha.)

¹² Jos laik Timoti, eldaz tudeh ku bee shoar dat Jehoava si evriting weh dehn di du ahn hihn apreeshiayt it. Eldaz luk afta di kangrigayshan, dehn teech, ahn dehn preech. Pan tap a dat wahn lata dehn werk pahn kanschrokshan proajeks ahn dehn aalso help wen dehn ga wahn dizaasta. Som a dehn serv pahn di Patient Visitation Groups er di Hospital Liaison Committees. Bikaaz dehn noa dat di kangrigayshan bilangz tu Jehoava ahn noh tu hyoomanz, dehn werk haad eena di kangrigayshan ahn chros dat Gaad wahn bles aal weh dehn du.—Kol. 3:​23, 24.

13. How Jehoava feel bowt di tingz weh wi du far ahn?

¹³ Noh evribadi ku bee wahn elda. Bot aala wi ku giv tu Jehoava ahn hihn apreeshiayt wen wi serv ahn. Hihn noatis  di kanchribyooshan weh wi giv, noh mata if da wahn lee bit. Ih mek hihn hapi wen wi rayz wi han fi gi wahn koment da meetin eevn if wi shai, an ih hapi wen wi fergiv adaz wen dehn hert wi. Eevn if yu feel laik yu kyaahn du az moch az yu wuda waahn du, neva ferget dat Jehoava apreeshiayt evriting weh yu ku du. Hihn lov yu fi aal weh yu du far ahn an hihn wahn bles yu far it.—Look 21:​1-4.

STAY KLOAS TU DU LIVIN GAAD

14. Wen wi da kloas fren wid Jehoava how dat help wi stay faytful? (Koment pahn di picha.)

¹⁴ If wi si Jehoava az wi kloas fren, ih wahn bee eeziya fi mek wi stay faytful tu ahn. Dis da weh Joazef mi du; hihn mi rifyooz fi komit sekshwal imoraliti. Hihn mi noa dat mi wahn hert Jehoava ahn hihn neva waahn du dat. (Jen. 39:9) Fi mek Jehoava ku bee wi kloas fren, wi need fi tek owt di taim fi pray tu ahn an stodi di Baibl. Jos laik Joazef, wen wi ga wahn kloas rilayshanship wid Jehoava, wi noh wahn du notn weh ku hert Ahn.—Jay. 4:8.

15. Weh lesn wi ku laan fahn weh mi hapm tu di Izrelait dehn eena di wildanes? (Heebrooz 3:12)

¹⁵ Dehn wan weh ferget dat Jehoava da di livin Gaad ku staat tu du tingz weh Jehoava noh pleez wid. Tink bowt weh mi hapm tu di Izrelait dehn eena di wildanes. Dehn mi noa dat Jehoava mi egzis, bot dehn mi staat dowt weda Jehoava wuda tek kayr a dehn er nat. Dehn mi eevn aks: “Jehoava deh wid wi er nat?” (Eks. 17:​2, 7) Sayka dat, dehn ribel gens Gaad. Fi shoar wi noh waahn kapi di Izrelait dehn bad egzampl.—Reed Heebrooz 3:12.

16. Weh ku tes wi fayt?

¹⁶ Bikaaz a di bad tingz weh di hapm eena di werl, ih haad fi mek wi stay kloas tu Jehoava. Wahn lata peepl noh tink Gaad egzis. Lata taimz, ih luk laik dehn wan weh noh obay Gaad da di wan dehn  weh ga wahn gud laif. Wen wi si dat di hapm, ih ku reeli tes wi fayt. Eevn doa wi noa dat Gaad egzis, wi mait staat tu dowt dat hihn wahn help wi. Eevn di persn weh mi rait Saam 73 mi feel da sayhn way. Hihn mi si dat evribadi rong hihn neva di obay Gaad bot dehn mi-di injai laif. Soh hihn staat wanda weda er nat ih mek sens fi kantinyu serv Gaad.—Saa. 73:​11-13.

17. Weh wahn help wi fi stay kloas tu Jehoava?

¹⁷ Weh mi help di saamis fi chaynj di way ih tink? Hihn mi tink bowt weh mi wahn hapm tu dehn wan weh mi stap serv Jehoava. (Saa 73:​18, 19, 27) Hihn mi aalso tink bowt aala di blesinz weh yu geh wen yu di serv Gaad. (Saa. 73:24) Jos laik di saamis, wee ku tink bowt aala di ways Jehoava bles wi. Imajin weh yu laif mi wahn bee laik if yu neva mi-di serv Jehoava. If wee rimemba wai ih gud fi serv Jehoava, ih ku help wi stay faytful tu ahn. Ahn wi ku seh di sayhn ting weh di saamis mi seh: “Di bes ting fi mek Ah du da fi jraa kloas tu Gaad.”—Saa. 73:28.

18. Wai wi noh need fi frayd fi di fyoocha?

¹⁸ Wee ku goh chroo wateva prablemz mait kom op joorin dehnya laas dayz bikaaz wee “slayv fi di livin ahn chroo Gaad.” (1 Tes. 1:9) Jehoava kay bowt wi ahn hihn wahn aalwayz help wi. Jos laik how hihn mi kay fi dehn wan eena Baibl taimz wi noa dat hihn wahn du di saym ting fi wee tudeh. Soon wi wahn di goh chroo di grayt chribyulayshan, bot wi noa dat wi noh deh bai wiself, Jehoava wahn deh wid wi. (Isa. 41:10) Mek aala wi “noh bee frayd. Insted mek wi seh: ‘Jehoava da di wan weh help mi, soh Ah noh wahn frayd.ʼ”—Heeb. 13:​5, 6.