Wi need fayt fi pleez Jehoava, bot “da noh evribadi ga fayt.” (2 Tes. 3:2) Wen di apasl Paal mi seh dat, ih mi-di taak bowt “wikid peepl weh kaaz haam,” hoo mi-di persikyoot ahn. Bot weh ih mi seh bowt fayt aplai tu ada peepl tu. Sohn peepl noh waahn bileev dat wahn Gaad deh weh kriyayt evriting. (Roam. 1:20) An ada peepl bileev eena sohnting er sombadi weh ga wahn haiya powa. Bot dat da noh chroo fayt.

Wi need fi kanvins wiself dat Jehoava egzis ahn dat hihn wahn “bles” dehn wan weh ga schrang fayt eena ahn. (Heeb. 11:6) Fi geh dis kaina fayt, wi need Gaad hoali spirit. Wen wi pray tu Jehoava dat ku help wi fi geh Jehoava hoali spirit. (Look 11:​9, 10, 13) Wahn way wi ku geh Jehoava hoali spirit da wen wi reed di Baibl. Den wi ku tek taim fi tink bowt weh wi reed ahn chrai aplai weh wi laan eena wi laif. Wen wi du dat wi di alow Jehoava hoali spirit fi gaid wi laif ahn dat shoa dat wi ga fayt.