Kweschanz Weh Peepl Aks
Eena Saam 12:7 wen ih seh “Yu wahn wach oava dehn;” weh ih di rifaa tu? Ih di rifaa tu peepl “weh di sofa” (vers 5) er tu “evriting weh Jehoava seh” (vers 6)?
Di vers dehn bifoa vers 7 help wi fi andastan dat ih di rifaa tu peepl.
Da Saam 12:1-4 ih seh dat “aal di faytful peepl dehn disapyaa.” Now mek wi luk pahn weh Saam 12:5-7 seh.
“Dehn chreet dehn wan weh di sofa eena wahn kruwil way,
Ahn di poa wan dehn di krai owt fi help,
Soh Ah wahn tek akshan ahn sayv dehn.
Ah wahn sayv dehn fahn dehn wan weh chreet dehn wid loan haychrid.”
Evriting weh Jehoava seh pyoar;
Ih werdz da laik silva weh dehn melt sevn taimz eena wahn klay fernis fi mek ih bee pyoar.
Oa Jehoava, yu wahn wach oava dehn;
Yu wahn protek eech wan a dehn fahn dis wikid jenarayshan fareva.
Vers 5 taak bowt weh Gaad wahn du fi “dehn wan weh di sofa.” Ih seh dat hihn wahn sayv dehn.
Den vers 6 seh dat “evriting weh Jehoava seh pyoar,” ‘laik silva weh dehn melt sevn taimz.ʼ Dis da egzakli how wee feel bowt Gaad Werd.—Saa. 18:30; 119:140.
Now mek wi luk pahn di neks vers da Saam 12:7: “Oa Jehoava, yu wahn wach oava dehn; yu wahn protek eech wan a dehn fahn dis wikid jenarayshan fareva.” Weh ih di rifaa tu wen ih seh “dehn”?
Bikaaz vers 6 di rifaa tu “evriting weh Jehoava seh,” sohn peepl mait tink dat di “dehn” eena vers 7 di rifaa tu evriting weh Gaad seh. Wi noa dat eevn doa lata peepl chrai dischrai di Baibl, Gaad mek shoar hihn protek it soh dat nobadi ku dischrai it.—Isa. 40:8; 1 Peet. 1:25.
Bot weh vers 5 seh da aalso chroo. Eena di paas, Jehoava mi help dehn wan weh “di sofa” ahn dehn wan weh dehn chreet kruwil, an ih wahn kantinyu fi help peepl weh di goh chroo di sayhn ting tudeh.—Joab 36:15; Saa. 6:4; 31:1, 2; 54:7; 145:20.
Soh weh di “dehn” eena vers 7 di rifaa tu?
Wen wi luk pahn di res a Saam 12, ih klyaa fi si dat di “dehn” eena vers 7 di rifaa tu peepl.
Saam 12:1 di taak bowt di “faytful peepl” an ih tel wi di sichuwayshan weh dehn mi eena. Ih tel wi dat di wikid peepl mi-di tel di faytful peepl loan lai. Den eena vers 3, ih tel wi weh Jehoava wahn du tu di wikid peepl weh di seh loan bad tingz. Wi ku chros dat Jehoava wahn du sohnting fi protek ih peepl bikaaz evriting weh hihn seh pyoar.
Soh eena vers 7 wen ih seh dat Jehoava wahn wach oava ahn protek “dehn,” ih di rifaa tu di faytful peepl weh di sofa bikaaz a wikid peepl.
Eena di Heebroo Masoretic teks, di werd “dehn” eena vers 7 aalso di rifaa tu peepl. Eena di Greek Septuagint ih yooz di werd “wee” too taimz eena vers 7. Soh dis shoa wi dat ih di rifaa bak tu di sayhn faytful peepl weh di sofa bikaaz a wikid peepl. Now, eena vers 7 ih tel wi weh Jehoava wahn du fi ih faytful peepl. Ih seh dat hihn wahn protek “eech wan a dehn fahn dis wikid jenarayshan fareva.” (Saa. 12:7, 8) Eena di Aramaic Targum, vers 7 seh: “Yoo, Oa LAAD, wahn protek di raichos peepl, yu wahn gyaad dehn fahn dis eevl jenarayshan fareva.” Dis jos proov eevn moa dat Saam 12:7 noh di taak bowt evriting weh Jehoava seh.
Insted a dat, dis vers di gi hoap tu “faytful peepl” dat Gaad wahn ak soon
