1. Wai wahn lata peepl kanfyooz?

DEHN ga wahn lata rilijan tudeh weh klaym seh dat dehn da Kristyanz ahn dat dehn wership Gaad eena wahn way weh hihn pleez wid. Dat da wai lata peepl soh kanfyooz! Dehn wuda aks, “Onli wan chroo rilijan deh, er aal rilijan pleez Gaad?” Wee reeli kanvins dat, az Jehoava Witnisiz, wi di teech di chroot ahn dat di way wi wership Jehoava da di rait way? Ih reeli pasabl fi bee kanvins a dehnya tingz? Mek wi luk pahn sohn faks.

2. Wai di apasl Paal mi kanvins dat ih ga di chroot? (1 Tesaloanyanz 1:5)

² Di apasl Paal mi kanvins dat ih ga di chroot. (Reed 1 Tesaloanyanz 1:5.) Hihn neva bileev it jos bikaaz ih mek ih feel gud. Rada, Paal mi kyaafuli stodi Gaad Werd. Hihn mi bileev dat “evriting weh deh eena di Skripchaz kohn fahn Gaad.” (2 Tim. 3:16) Weh hihn mi laan? Eena di Skripchaz, Paal mi fain salid proof dat Jeezas da-mi di Mesaiya, sohnting weh di Jooish rilijos leedaz mi chooz fi ignoar. Dehn mi klaym seh dat dehn mi-di teech di peepl di chroot bowt Gaad bot dehn mi du tingz weh Gaad hayt. (Taitos 1:16) Paal da neva laik dehndeh rilijos leedaz. Hihn neva pik ahn chooz weh hihn mi waahn bileev fahn Gaad Werd. Hihn mi redi fi teech ahn put eena praktis evriting weh Gaad seh.—Aks 20:27.

3. Yoo tink wi need fi ga di ansaz tu aala wi kweschanz fi bee shoar dat wi ga di chroot? (Koment pahn di baks “ Jehoava Wandaful Werks ahn Tinkin—‘Dehn Da Tu Moch fi Mek Ah Tel Evribadi.ʼ”)

³ Sohn peepl feel dat di chroo rilijan shuda bee aybl fi  ansa evri singl kweschan, eevn kweschanz weh di Baibl noh ansa. Yoo tink dat reeznabl? Mek wi luk pahn Paal egzampl. Hihn mi inkorij ih bradaz fi “chek evriting fi mek shoar ih karek,” bot hihn mi aalso admit dat dehn ga lata tingz weh hihn ihself neva andastan. (1 Tes. 5:21) Paal mi rait seh: “Wi noh noa evriting. . . Da laik if wi di luk eena wahn miro weh mek owta metal, ahn wi noh di si tingz klyaa.” (1 Kor. 13:9, 12) Jos laik Paal, wee noh andastan evriting needa. Bot wi ku laan fahn fi hihn egzampl. Hihn mi did andastan di baysik chroots bowt Jehoava. Hihn mi noa inof fi bee shoar dat weh hihn mi bileev eena da-mi di chroot!

4. How wee ku bee reeli kanvins dat wi ga di chroot, ahn weh wi wahn diskos eena dis aatikl?

⁴ Wan way wi ku bee reeli kanvins dat wi ga di chroot da wen wi laan fahn Jeezas egzampl bowt di rait way fi wership Jehoava, ahn kompyaa it tu how Jehoava Witnisiz di wership Jehoava tudeh. Eena dis aatikl, wi wahn si dat chroo Kristyanz (1) noh wership aidol, (2) rispek Jehoava naym, (3) lov di chroot, ahn (4) lov wan anada fahn dehn haat.

5. Weh wi ku laan fahn Jeezas teechinz bowt di rait way fi wership Gaad, ahn how wi ku yooz weh hihn teech wi eena wi laif?

⁵ Bikaaz Jeezas lov Jehoava wahn lat, hihn wership onli Jehoava. Hihn mi du dis wen ih mi deh da hevn ahn pahn ert. (Look 4:8) Jeezas mi teech ih disaiplz fi du di sayhn ting. Jeezas ner ih faytful disaiplz mi eva yooz aidol er wahn imij eena dehn wership. Sins wi kyaahn si Gaad, nobadi ku mek eniting weh luk laik hihn! (Isa. 46:5) Bot wat if sohnbadi mek sohn imij a peepl weh dehn kaal saynts ahn  pray tu dehn? Akaadn tu di Ten Komanments, Jehoava mi seh: “Yu noh fi kaav owt wahn imij fi yuself er eniting weh luk laik sohnting weh deh op eena di hevnz er laik sohnting weh deh pahn di ert er weh deh eena di waata anda di ert. Yu noh fi bow dong tu dehn.” (Ex. 20:4, 5) Peepl weh waahn pleez Gaad andastan dat wi noh fi wership aidol.

6. How Jehoava Witnisiz fala di egzampl a di fers-senchri Kristyanz wen ih kohn tu di rait way fi wership Gaad?

⁶ Peepl weh stodi hischri seh dat eena di taim a di apasl dehn, Kristyanz mi wership onli Gaad. Fi egzampl, di buk History of the Christian Church seh dat di erli Kristyanz “wuda mi hayt” di aidyaa fi yooz wahn aidol eena wahn plays a wership. Tudeh, Jehoava Witnisiz fala di egzampl a di fers-senchri Kristyanz wen ih kohn tu wership Gaad. Wi noh pray tu wahn imij a wahn “saynt” er wahn aynjel; wi noh eevn pray tu Jeezas. An aalso, wi noh saloot di flag er du eniting weh wuda gi wi wership tu wahn konchri er govament. Noh mata weh enibadi chrai mek wi du, wi waahn obay weh Jeezas seh: “Da Jehoava yu Gaad yu fi wership.”—Mach. 4:10.

7. Eena weh wayz Jehoava Witnisiz veri difrent fahn aal ada rilijan?

⁷ Tudeh, wahn lata peepl laik lisn tu preechaz weh faymos. Dehn admaiya dehndeh preechaz soh moch dat da laik if dehn di wership dehn. Wahn lata peepl goh da dehn cherch, bai buks weh dehn rait, ahn doanayt wahn lata moni tu dehn er di difrent aaganaizayshan weh dehn sopoat. Sohn peepl bileev evriting weh dehndeh preechaz seh. Dehn az hapi fi si dehn az dehn wuda bee if dehn wuda si Jeezas. Bot dehn wan weh wership Gaad di rait way noh fala man. Eevn doa wi rispek di bradaz weh di tek di leed, wi fala Jeezas teechin weh seh: “Aala unu da bradaz.” (Mach. 23:8-10) Wi noh wership man, noh mata if dehn da rilijos leedaz er politikal roolaz. Ahn wi noh sopoat dehn rilijos er politikal goalz needa. Insted, wi stay nyoochral ahn wi separayt wiself fahn dis werl. Soh ih klyaa fi si dat wi veri difrent fahn aal ada rilijan weh klaym seh dat dehn da Kristyanz.—Jan 18:36.

8. How wi noa dat Jehoava waahn wi aana ih naym ahn mek evribadi geh fi noa bowt it?

⁸ Wahn taim, Jeezas mi pray: “Faada, aana yu naym.” Jehoava mi ansa da pryaa wid wahn vais fahn hevn weh song lowd laik tonda. Hihn mi pramis dat Ih wahn aana Ih naym. (Jan 12:28) Aal chroo Jeezas minischri, hihn mi aana ih Pa naym. (Jan 17:26) Soh, chroo Kristyanz see it az wahn privilij fi yooz Gaad naym ahn mek evribadi noa bowt it.

9. How di fers-senchri Kristyanz proov dat dehn mi rispek Gaad naym?

⁹ Eena di fers senchri C.E., wahn lee wail afta di fers kangrigayshan mi staat op, Jehoava mi “aksep peepl a di nayshanz ahn kaal dehn bai fi hihn naym.” (Aks 15:14) Dehndeh fers-senchri Kristyanz mi prowd fi yooz Gaad naym ahn fi mek evribadi noa bowt it. Di apaslz ahn di disaiplz mi yooz Gaad naym wen dehn mi preech ahn wen dehn mi rait Baibl buks. * Eena dis way dehn mi proov dat dehn da-mi di onli peepl weh mek evribadi noa Gaad naym.—Aks 2:14, 21.

10. How wi noa dat Jehoava Witnisiz da di onli peepl weh mek evribadi noa Gaad naym?

¹⁰ Jehoava Witnisiz da di onli peepl  weh mek evribadi noa Gaad naym. Mek wi luk pahn sohn faks. Tudeh, wahn lata rilijos leedaz du evriting eena dehn powa fi haid di fak dat Gaad ga wahn persnal naym. Dehn tek owt Gaad naym fahn dehn Baibl chranslayshan dehn an, eena sohn kays, dehn noh alow peepl fi yooz Gaad naym eena dehn cherch dehn. * Ih klyaa fi si dat Jehoava Witnisiz da di onli peepl weh shoa inof rispek fi Jehoava naym. Wee di mek evribadi noa Gaad naym. No ada rilijan di du dat! Wi di du wi veri bes fi liv op tu wi naym. Wee da Witnisiz a Jehoava! (Isa. 43:10-12) Wi don print oava 240 milyan kapi a di Nyoo Werl Chranslayshan a di Hoali Skripchaz. Ahn dis Baibl chranslayshan gat een Jehoava naym eena di vers dehn wehpaat ada Baibl chranslaytaz tek dehn owt. Ahn wi projoos wahn lata poblikayshanz eena moa dan 1,000 langwij weh bays pahn di Baibl ahn weh yooz Jehoava naym!

11. How di erli Kristyanz mi shoa dat dehn lov di chroot?

¹¹ Jeezas mi lov di chroot. Dat meenz dat hihn mi lov di chroot bowt Gaad an aal weh Gaad wahn du eena di fyoocha. Di way Jeezas mi liv ih laif shoa dat hihn mi bileev eena da chroot. Hihn mi mek adaz noa bowt da chroot tu. (Jan 18:37) Jeezas chroo falowaz mi aalso ga schrang  lov fi di chroot. (Jan 4:23, 24) In fak, di apasl Peeta mi rifaa tu di Kristyan rilijan az “di way a raichosnis.” (2 Peet. 2:2) Bikaaz di erli Kristyanz mi ga schrang lov fi di chroot, dehn mi rijek rilijos aidyaaz, chradishanz weh bays pahn kolcha, an eni kaina tinkin weh goh gens di chroot. (Kol. 2:8) Jos laik di Kristyanz bak den, chroo Kristyanz tudeh mek shoar dat weh dehn bileev ahn di way how dehn liv dehn laif da akaadn tu Jehoava Werd. Eena dis way dehn shoa dat dehn di “kip aan di liv akaadn tu di chroot.”—3 Jan 3, 4.

12. Weh hapm wen di bradaz weh di tek di leed riyalaiz dat dehn need fi chaynj di way wi andastan er du sohntingz, ahn wai dehn mek dehndeh chaynjiz?

¹² Jehoava Witnisiz noh seh dat dehn aalwayz andastan evriting weh deh eena di Baibl. Sohntaim, dehn mek mistayk eena di way dehn eksplayn wahn Baibl teechin er how dehn aaganaiz di kangrigayshan. Dat noh sopraiz wi doh. Di Baibl mek it klyaa dat Gaad peepl wahn andastan di chroot beta az taim paas bai. (Kol. 1:9, 10) Jehoava mek wi andastan di chroot lee bit bai lee bit, soh wi haftu bee payshent ahn wayt til wi ku andastan di chroot beta. (Prov. 4:18) Wen di bradaz weh di tek di leed riyalaiz dat dehn need fi chaynj di way wi andastan er du sohntingz, dehn mek di chaynj kwik-wan. Lata di cherch dehn chaynj dehn teechinz bikaaz dehn waahn pleez dehn membaz er bikaaz dehn waahn bee faymos. Bot wee, az Jehoava Witnisiz, mek chaynjiz bikaaz wi waahn bee kloasa tu Gaad ahn wi waahn wership hihn di way Jeezas mi wership ahn. (Jay. 4:4) Wen wee mek chaynjiz, da noh bikaaz wi waahn fala weh peepl tink ahn seh, bot bikaaz wi andastan di Baibl beta. Wee lov di chroot!—1 Tes. 2:3, 4.

13. Wat da di moas impoatant kwaliti weh wahn chroo Kristyan ga, ahn how Jehoava Witnisiz shoa it?

¹³ Di fers-senchri Kristyanz mi ga wahn lata gud kwalitiz, bot di moas impoatant kwaliti weh dehn mi ga da lov. Jeezas mi seh: “Evribadi wahn noa dat unu da mai disaipl if unu lov wan anada.” (Jan 13:34, 35) Tudeh, Jehoava Witnisiz aal oava di werl ekspeeryens chroo lov ahn yooniti. Wee difrent fahn aal ada rilijan bikaaz wi da laik wan famili eevn doa wi kohn fahn difrent konchri ahn kolcha. Wi si proof a dis lov da wi difrent meetin, asembli, ahn kanvenshan. Dis help wi fi bee shoar dat wi di wership Jehoava eena wahn way weh pleez hihn.

14. Akaadn tu Koloashanz 3:12-14, wat da wahn impoatant way how wi ku shoa dat wi lov wan anada fahn wi haat?

¹⁴ Di Skripchaz seh dat wi fi “lov wan anada fahn [wi] haat.” (1 Peet. 4:8) Wan way how wi shoa dat wi lov wan anada fahn wi haat da wen wi fergiv wan anada ahn wen wi put op wid wan anada. Wi aalso luk fi wayz fi bee jenaros ahn fi shoa haspitaliti tu evribadi eena di kangrigayshan, eevn tu peepl weh ofen wi. (Reed Koloashanz 3:12-14.) Wen wi shoa dis kaina lov, wi proov dat wee da chroo Kristyanz.

15. Eena weh ada wayz wi fala di egzampl a di fers-senchri Kristyanz wen ih kohn tu wi wership?

¹⁵ Wee fala di egzampl a di fers-senchri Kristyanz wen ih kohn tu wership Gaad eena ada wayz tu. Fi egzampl, eena di  way how wi aaganaiz. Jos laik dehn, wee ga chravlin oavaseeyaz, eldaz, ahn ministeeryal servants. (Fil. 1:1; Taitos 1:5) Ahn laik di fers-senchri Kristyanz, wi aalso rispek Jehoava laa dehn bowt seks ahn marij, weh Gaad seh bowt di yoos a blod, ahn wi protek di kangrigayshan fahn dehn wan weh noh waahn fala Gaad laa dehn.—Aks 15:28, 29; 1 Kor. 5:11-13; 6:9, 10; Heeb. 13:4.

16. Weh wi laan fahn Ifeezhanz 4:4-6?

¹⁶ Jeezas mi seh dat wahn lata peepl wahn klaym seh dehn da fi hihn disaipl bot da noh evribadi wahn bee ih chroo disaipl. (Mach. 7:21-23) Di Skripchaz aalso tel wi dat eena di laas dayz, lata peepl wahn “play laik dehn di wership Gaad wid aala dehn haat.” (2 Tim. 3:1, 5) Bot, di Baibl tel wi playn ahn schrayt dat onli “wan fayt deh” weh Gaad aproov a.—Reed Ifeezhanz 4:4-6.

17. Hoo di fala Jeezas ahn di wan chroo fayt tudeh?

¹⁷ Hoo di fala di wan chroo fayt tudeh? Wi mi egzamin di faks. Wi mi luk pahn di egzampl weh Jeezas set eena di way how fi wership Gaad, ahn wi mi si how di fers-senchri Kristyanz mi fala fi hihn egzampl tu. Tudeh, onli Jehoava Witnisiz di fala di wan chroo fayt. Da wahn grayt privilij fi bee wan a Jehoava Witnisiz ahn fi noa di chroot bowt Gaad ahn weh ih wahn du eena di fyoocha! Soh wi waahn du aal weh wi kud fi hoal aan tait tu di chroot ahn bee kanvins dat wee ga di chroot.