1. Wai wi hapi ahn prowd fi bee wan a Jehoava Witnisiz?

WI VERI hapi ahn prowd fi bee wan a Jehoava Witnisiz! Wee da Jehoava peepl, ahn wi proov dat wee da fi hihn Witnisiz wen wi preech ahn teech adaz bowt hihn. Wi rijais wen wi help sohnbadi weh “ga di rait haat kandishan fi get evalastin laif” fi bee wahn bileeva. (Aks 13:48) Wi feel di sayhn way Jeezas mi feel. Hihn mi “rijais” wen ih disaipl dehn mi tel ahn bowt aala di gud ekspeeryens weh dehn mi geh wail dehn mi-di preech.—Look 10:1, 17, 21.

2. How wi ku shoa dat wi preechin werk veri impoatant tu wi?

² Wi preechin werk veri impoatant tu wi. Di apasl Paal mi tel Timoti: “Du yu bes fi bee wahn gud egzampl ahn fi bee wahn gud teecha.” Ih mi aalso tel ahn: “If yu du dis, yu wahn sayv yuself ahn di peepl weh lisn tu yu.” (1 Tim. 4:16) Soh wi preechin werk sayv peepl laif. Wi du wi bes fi bee wahn gud egzampl bikaaz wee da sitiznz a Gaad Kingdom. Wi aalwayz waahn bihayv eena wahn way weh bring prayz tu Jehoava ahn weh shoa dat wi bileev eena di gud nyooz weh wi di preech. (Fil. 1:27) Wi shoa dat wi di du wi bes ‘fi bee wahn gud teechaʼ wen wi pripyaa gud fi di minischri ahn wen wi aks Jehoava fi help wi bifoa wi preech tu adaz.

3. Yoo tink evribadi wahn bee inchrestid eena di Kingdom mesij? Pleez gi wahn egzampl.

³ Eevn wen wi chrai wi bes fi preech tu adaz, wi mait stil fain wahn lata peepl weh noh inchrestid eena di Kingdom mesij. Kansida di ekspeeryens a Brada Georg Lindal, hoo mi preech aal bai ihself eena difrent paats a Iceland fahn 1929 tu 1947. Hihn mi giv owt towznz a poblikayshanz, bot  nobadi mi aksep di chroot. Hihn mi seh: “Sohn peepl mi deh gens di Baibl mesij, bot moas a dehn jos neva inchrestid.” Mishineriz hoo mi grajuayt fahn Gilyad Skool mi gaahn help wid di preechin werk eena da ayrya. Bot dehn mi aalso preech fi wahn lata yaaz ahn peepl stil neva shoa inchres. Fainali, afta nain yaaz, sohn peepl mi disaid fi dedikayt dehn laif tu Jehoava ahn geh baptaiz. *

4. How wi feel wen peepl noh shoa inchres eena di gud nyooz?

⁴ Wi feel disapointid wen peepl noh shoa inchres eena di gud nyooz. Di apasl Paal mi feel da sayhn way wen moas a di Jooz neva waahn bileev dat Jeezas da-mi di Mesaiya. Di Baibl seh dat Paal mi feel “lata saro, ahn di payn . . . eena [ih] haat neva stap.” (Roam. 9:1-3) Maybi yu di stodi di Baibl wid sohnbadi ahn yu di werk haad fi bee wahn gud teecha. Yu pray wahn lat fi yu styoodent, bot ih noh di yooz weh ih laan eena ih laif, soh yu haftu stap stodi wid ahn. Er maybi yu neva yet stodi wid sohnbadi weh en op di geh baptaiz. Yu tink dis meenz dat Jehoava noh di bles yu minischri? Eena dis aatikl, wi wahn ansa dehnya too kweschan: (1) Weh proov dat wi ga sokses eena di minischri? (2) Weh wee fi ekspek wen wi preech tu adaz?

5. Wai wi servis tu Jehoava noh aalwayz ton owt di way wee waahnt?

⁵ Di Baibl seh dat wahn persn weh du evriting weh Gaad waahn “wahn ga sokses.” (Ps. 1:3) Bot dat noh meenz dat evriting weh wi du fi Jehoava wahn ton owt di way wee waahnt. Bikaaz wi imperfek ahn wi liv eena wahn imperfek werl, wi laif “ful op a prablemz”. (Job 14:1) Aalso, peepl weh deh gens wi mait chrai stap wi fahn preech tu adaz. (1 Kor. 16:9; 1 Tes. 2:18) Soh how Jehoava noa if wi di ga sokses eena di minischri? Mek wi luk pahn sohn Baibl prinsipl weh wahn help wi ansa da kweschan.

6. How Jehoava noa if wi ga sokses eena di minischri?

⁶Jehoava pay atenshan tu how haad wi werk an ih si dat wi noh giv op. Jehoava hapi wid wi wen wi eega fi kantinyu preech bikaaz wi lov hihn, eevn wen peepl noh waahn lisn tu wi. Paal mi seh: “Gaad da wahn raichos Gaad, ahn hihn noh wahn ferget di lov weh unu shoa fi ih naym. Hihn si how unu du unu bes fi help owt di hoali wan dehn ahn how unu kantinyu fi du dis, an ih noh wahn ferget dat.” (Heeb. 6:10) Jehoava memba di werk weh wi du fi hihn ahn di lov weh wi shoa, eevn if wi noh ga wahn Baibl styoodent weh geh baptaiz. Soh weh Paal mi rait tu di Korintyanz inklood yoo tu.  Hihn mi seh: “Wen [yu] werk fi di Laad [yu] werk noh wahn bee fi notn,” eevn if yu noh geh di rizolts weh yu mi waahnt.—1 Kor. 15:58.

7. Weh wi ku laan fahn weh di apasl Paal mi seh bowt ih minischri?

⁷ Di apasl Paal da-mi wahn amayzin mishineri. Hihn mi staat op nyoo kangrigayshanz eena lata difrent siti. Bot wen sohn peepl mi staat tu kritisaiz Paal ahn seh dat hihn da neva wahn gud teecha, hihn neva taak bowt humoch peepl hihn mi help fi bee wahn Kristyan. Insted, Paal mi seh: “Ai du moa werk.” (2 Kor. 11:23) Laik Paal, wi fi memba dat weh Jehoava valyu di moas da fi mek wi werk haad ahn noh giv op.

8. Weh wi fi memba bowt wi minischri?

⁸Wi minischri mek Jehoava hapi. Jeezas mi sen owt 70 disaiplz fi preech di Kingdom mesij, ahn wen dehn mi finish dehn preechin kampayn, dehn mi “kohn bak ahn dehn mi hapi.” Wai dehn mi feel soh hapi? Dehn mi seh: “Eevn di deemon dehn mi obay wi wen wi yooz yu naym.” Bot Jeezas mi karek dehn tinkin an ih tel dehn: “Noh bee hapi jos bikaaz di deemon dehn mi obay unu, bot bee hapi bikaaz Gaad don rait unu naym eena hevn.” (Look 10:17-20) Jeezas mi noa dat dehn noh wahn aalwayz ga gud ekspeeryens eena di minischri. In fak, wee noh eevn noa humoch a di peepl weh Jeezas disaiplz mi taak tu mi geh fi bee Kristyanz. Di disaiplz mi need fi andastan dat hapinis noh kohn onli bikaaz peepl lisn tu dehn, bot bikaaz dehn noa dat Jehoava pleez wid di haad werk weh dehn du fi hihn.

9. Weh Galayshanz 6:7-9 seh wahn hapm if wi noh giv op eena wi minischri?

⁹If wi noh giv op eena wi minischri, wi wahn get evalastin laif. Wen wi du wi bes fi preech ahn teech di gud nyooz, wi di “plaant akaadn tu weh di hoali spirit waahn.” Wai wi seh dat? Bikaaz wen wi tek paat eena di minischri, wi shoa dat wi waahn di hoali spirit gaid wi laif. If wi noh “giv op” er “taiyad owt,” Jehoava pramis wi dat hihn wahn gi wi evalastin laif, eevn if wi neva help wahn persn fi geh baptaiz.—Reed Galayshanz 6:7-9.

10. Wai sohn peepl lisn wen wi preech tu dehn an adaz noh lisn?

¹⁰Weh deh eena peepl haat da weh mek dehn rispan di way dehn rispan tu di chroot. Jeezas mi eksplayn dis chroot eena ih iloschrayshan bowt di faama weh mi plaant sohn seed eena difrent taip a soil. Onli di seed weh mi jrap pahn di gud soil mi bayr froot. (Look 8:5-8) Jeezas mi seh dat di difrent soil dehn mi stan fi peepl haat kandishan ahn how dehn mi rispan tu di “werd a Gaad.” (Look 8:11-15) Laik di faama, wee kyaahn mek sohnting groa eena di haat a di peepl weh wi preech tu. Fi wee rispansabiliti da fi kantinyu plaant di seed a di Kingdom mesij. Di apasl Paal mi seh, “eech persn wahn geh ih oan riwaad akaadn tu di werk weh ih du,” noh akaadn tu di rizolts a ih werk.—1 Kor. 3:8.

11. Wai Noawa mi ga sokses az “wahn preecha a raichosnis”? (Koment pahn di picha pahn di kova.)

¹¹ Aal chroo hischri, lata servants a Jehoava mi preech tu peepl weh neva waahn lisn. Fi egzampl, Noawa da-mi “wahn preecha a raichosnis,” fi bowt 40 er 50 yaaz. (2 Peet. 2:5) Hihn mi reeli hoap dat peepl wuda lisn tu ahn wen ih preech, bot Jehoava neva seh dat dat wuda hapm. Insted,  wen Gaad mi tel Noawa fi bil di aak, Hihn mi tel ahn: “Yu mos goh eena di aak lang wid yu son dehn, ahn yu waif, ahn yu son waif dehn tu.” (Gen. 6:18) Ahn wen Jehoava mi tel ahn di saiz a di aak, Noawa mosi mi riyalaiz dat wahn lata peepl neva mi wahn lisn tu ahn, bikaaz di aak neva ga lata spays. (Gen. 6:15) Az wi noa, nat wan persn fahn da vailent werl mi lisn tu Noawa. (Gen. 7:7) Yu tink Jehoava mi feel laik di werk weh Noawa mi du neva gud inof? Non ataal! Jehoava mi veri hapi wid Noawa bikaaz hihn mi du egzakli weh Jehoava mi tel ahn fi du.—Gen. 6:22.

12. How di prafit Jerimaiya mi fain jai eena di minischri eevn doa peepl mi deh gens ahn an neva waahn lisn tu ahn?

¹² Di prafit Jerimaiya mi preech fi bowt 40 yaaz eevn doa peepl mi deh gens ahn an neva waahn lisn. Sayka weh peepl mi-di “insolt [hihn] op ahn laaf aata [hihn] aal day,” ih mi feel soh diskorij dat ih mi waahn giv op. (Jer. 20:8, 9) Bot Jerimaiya neva giv op! Weh mi help ahn fi kantinyu fain jai eena di minischri? Hihn mi foakos pahn dehnya too impoatant faks. Fers, Gaad mesij weh Jerimaiya mi tel di peepl wuda gi dehn “wahn fyoocha ahn wahn hoap.” (Jer. 29:11) Sekant, Jehoava mi chooz Jerimaiya fi taak fi Hihn ahn fi shayr fi Hihn mesij tu di peepl. (Jer. 15:16) Wee aalso di shayr wahn mesij a hoap tu peepl, ahn wee da Jehoava Witnisiz. Wen wi foakos pahn dehnya too impoatant faks, wi ku fain jai eena di minischri noh mata how peepl rispan tu di mesij.

13. Weh wi ku laan fahn Jeezas iloschrayshan da Maak 4:26-29?

¹³Ih tek wahn lang taim fi mek wahn persn ga fayt. Jeezas mi teech dis chroot eena ih iloschrayshan bowt di faama weh goh sleep. (Reed Maak 4:26-29.) Afta di faama plaant sohn seed, ih tek taim fi mek dehn groa ahn di faama kyaahn du notn fi mek dehn groa faasa. Yoo tu mait haftu wayt fi wahn lang taim bifoa yu si dat yu Baibl styoodent yooz weh ih laan eena ih laif. Jos laik how wahn faama kyaahn mek ih plaant dehn groa az faas az ih wuda waahn, wee kyaahn mek wi Baibl styoodent fayt groa az faas az wi wuda waahn needa. Soh, jos laik wahn faama, wi need fi ga payshens ahn wayt til wi Baibl styoodent mek di disizhan fi geh baptaiz.—Jay. 5:7, 8.

14. Weh egzampl shoa dat peepl mait tek wahn lang taim bifoa dehn staat tu lisn tu wi?

¹⁴ Eena sohn plays, ih tek wahn veri lang taim bifoa sohnbadi geh baptaiz. Kansida di ekspeeryens a Gladys ahn Ruby Allen, too sistaz weh mi geh asain az regyula painyaaz eena wahn tong da Quebec, Canada, eena 1959. * Peepl neva taak tu dehn bikaaz dehn mi soh frayd fi weh dehn nayba ahn di prees wuda seh er du if dehn mi taak tu di Witnisiz. Gladys seh: “Wi gaahn fahn doa tu doa fi ayt owaz evri day fi too yaaz, ahn nat wan persn mi oapm di doa fi taak tu wi! Dehn wuda kohn tu di doa, si dat da wee, ahn jos waak weh. Bot wi neva giv op.” Lee bit bai lee bit, di peepl mi geh fi bee moa frenli ahn som a dehn mi staat tu lisn tu wi. Now, dehn ga chree kangrigayshanz eena da tong.—Isa. 60:22.

15. Weh 1 Korintyanz 3:6, 7 teech wi bowt di werk weh wi di du fi mek disaiplz?

¹⁵Ih tek lata peepl fi help wahn persn fi bee wahn disaipl. Evribadi eena di kangrigayshan ku help sohnbadi fi geh baptaiz.  (Reed 1 Korintyanz 3:6, 7.) Tink bowt dis: Wahn brada lef wahn chrak er wahn magazeen wid sohnbadi weh shoa inchres. Bot den ih fain owt dat ih persnal skejul noh wahn alow ahn fi goh bak tu di persn, soh hihn aks wahn nada brada fi goh bak ahn vizit di persn. Di sekant brada geh fi staat wahn Baibl stodi wid di persn. Den, ih invait lata ada bradaz ahn sistaz fi goh wid ahn pahn di stodi, an evribadi inkorij di styoodent eena wahn difrent way. Evri brada er sista weh di styoodent meet wahn help ahn laan moa bowt Jehoava. Da way deh, jos laik weh Jeezas mi seh, evribadi weh mi werk haad fi help di persn ku rijais wen ih geh baptaiz.—Jan 4:35-38.

16. Wai yoo ku stil fain jai eena yu minischri eevn if yu ga helt prablemz er yu noh az schrang az bifoa?

¹⁶ Maybi yu kyaahn preech ahn teech az moch az bifoa bikaaz a helt prablemz er maybi bikaaz yu noh az schrang az yu yoostu bee. Yoo ku stil bee hapi bikaaz a weh yu kud du. Kansida di egzampl a King Dayvid wen hihn an ih soalja dehn mi sayv dehn famili ahn dehn bilanginz fahn di Amalekait dehn. Too honjrid soaljaz mi tu taiyad fi fait, soh dehn mi stay bihain fi protek dehn bilanginz. Dayvid an ih soalja dehn mi win di waar, ahn dehn mi tek lata tingz fahn di Amalekait dehn. Dayvid mi aada seh dat di wan dehn weh mi fait ahn di wan dehn weh mi stay bihain fi geh di saym amonk a tingz. (1 Sam. 30:21-25) Dis stoari teech wi sohnting bowt di werk fi mek disaiplz. Yu mait kyaahn du az moch az yu wuda waahn du een a di preechin ahn teechin werk. Bot if yu du aal weh yu kud, yu ku stil ga lata jai evritaim yu si wahn nyoo persn kohn fi noa Jehoava ahn geh baptaiz.

17. Weh wi shuda gi tanks tu Jehoava fa?

¹⁷ Wi gi tanks tu Jehoava fi di lovin way how hihn vyoo di werk weh wi du fi hihn. Hihn noa dat wi kyaahn foas peepl fi lisn tu wi er fi staat tu wership hihn. Bot hihn si how haad wi werk ahn humoch wi lov ahn, an ih bles wi. Hihn aalso teech wi how fi bee hapi wid wateva wi ku du eena di preechin werk. (Jan 14:12) Wi ku bee reeli shoar dat Jehoava wahn hapi wid wi if wi noh giv op!