1. How yu wuda diskraib sohnbadi weh shoa mersi, ahn weh iloschrayshan Jeezas yooz fi help wi andastan wat da mersi?

WEN wi tink bowt sohnbadi weh shoa mersi, wi mait tink bowt wahn persn weh kain, frenli, ahn jenaros. Yu mait aalso tink bowt Jeezas iloschrayshan bowt di kain Samaritan man. Da man mi help wahn Joo weh sohn teef beet op bad ahn lef ahn pahn di road haaf-ded. Di Samaritan man “haat gaan owt tu ahn,” an kwik-wan ih help di Joo an araynj evriting soh dat ih kuda mi ga evriting weh ih need. (Look 10:29-37) Dis iloschrayshan teech wi bowt mersi, wahn byootiful kwaliti weh Jehoava gat. Bikaaz hihn lov wi, ih mersiful tu wi. Ahn hihn shoa dis kwaliti tuwaadz wi evri day an eena lata difrent wayz.

2. Eena weh ada way wi ku shoa mersi?

² Wahn nada way deh how wahn persn ku shoa mersi. Wahn mersiful persn ku disaid noh fi ponish sohnbadi eevn doa di persn dizerv da ponishment. Wen wi tink bowt it da way deh, wi ku si how Jehoava reeli mersiful wid wi, noh chroo? Di saamis Dayvid mi seh dat Jehoava “noh deel wid wi akaadn tu wi sin dehn ner gi wi weh wi dizerv wen wi mek mistayk.” (Ps. 103:10) Bot sohntaim, Jehoava gi schrang disiplin tu sohnbadi weh komit wahn seeryos sin.

3. Wat da sohn kweschan wi wahn diskos eena dis aatikl?

³ Eena dis aatikl, wi wahn ansa dehnya chree kweschan: Wai Jehoava shoa mersi? Ih pasabl fi gi schrang disiplin tu sohnbadi ahn stil shoa mersi? Ahn weh ku help wi fi shoa mersi? Mek wi si how di Baibl ansa dehndeh kweschan.

4. Wai Jehoava shoa mersi?

⁴Jehoava lov fi shoa mersi. Di apasl Paal mi rait dat Gaad ga “soh moch mersi.” Eena dis kanteks, Paal mi-di eksplayn  dat Gaad mersiful bikaaz hihn gi ih imperfek anointid servants di hoap fi liv da hevn. (Ifee. 2:4-7) Bot Jehoava noh shoa mersi onli tu ih anointid servant dehn. King Dayvid mi seh: “Jehoava gud tu evribadi, ahn yu ku si ih mersi eena evriting weh ih du.” (Ps. 145:9) Bikaaz Jehoava lov peepl, hihn redi fi shoa mersi weneva ih fain reezn fi du it.

5. How Jeezas mi laan bowt Jehoava mersi?

⁵ Moa dan enibadi els, Jeezas noa dat Jehoava lov fi shoa mersi. Jehoava ahn Jeezas mi deh tugeda da hevn fi wahn lang taim bifoa Jeezas mi kohn pahn ert. (Prov. 8:30, 31) Lata taimz, Jeezas mi si how Jehoava mi shoa mersi tu imperfek hyoomanz. (Ps. 78:37-42) Wen Jeezas mi teech, hihn mi aalwayz taak bowt dis byootiful kwaliti weh ih Faada gat.

6. Weh iloschrayshan Jeezas yooz fi help wi andastan Jehoava mersi?

⁶ Laik weh di laas aatikl mi taak bowt, Jeezas mi yooz di iloschrayshan bowt di prodigal son fi help wi andastan humoch Jehoava lov fi shoa mersi. Di son mi lef hoam an “ih spen owt aala ih moni di liv wahn wail laif.” (Look 15:13) Laytaraan, ih mi sari bowt di kaina imoaral laif ih mi-di liv soh ih ripent fan ih wayz, ih hombl ihself, an ih gaahn bak hoam. How di pa mi riyak wen ih si ih son kohn bak hoam? Di son neva haftu wayt lang fi fain owt. Jeezas seh: “Wail ih mi stil deh wahn distans fahn di hows, ih pa kech sait a ahn an ih mi feel sari far ahn; soh ih ron ahn hog ahn tait an ih giv ahn wahn tenda kis.” Di pa neva shaym op ih son. Insteda dat, ih mi redi fi shoa ahn mersi. Ih fergiv ahn an ih welkom ahn bak tu di famili. Dis son mi komit wahn seeryos sin, bot bikaaz ih mi ripent, ih pa mi fergiv ahn. Wi ku kompyaa di pa eena dis iloschrayshan wid Jehoava. Wid dis iloschrayshan Jeezas reeli help wi fi si dat Jehoava redi fi fergiv enibadi weh ripent wid dehn hoal haat.—Look 15:17-24.

7. How di way Jehoava shoa mersi proov dat hihn reeli waiz?

⁷Jehoava shoa mersi bikaaz hihn waiz. Jehoava aalwayz mek disizhanz weh benifit ih kriyayshan. Di Baibl seh dat “di wizdom weh kohn fahn hevn . . . ful a mersi, an ih du lata gud.” (Jay. 3:17) Jos laik wahn payrent weh lov ih pikni, Jehoava noa dat wen ih shoa wi mersi, wee benifit. (Ps. 103:13; Isa. 49:15) Bikaaz a dis mersi, wi ga wahn hoap fi di fyoocha eevn doa wi  noh perfek. Soh bikaaz Jehoava veri waiz, hihn aalwayz shoa mersi wen hihn fain reezn fi du it. Bot Jehoava aalso noa wen fi hoal bak fahn shoa mersi. Bikaaz Jehoava waiz, hihn noh wahn shoa mersi if dat meenz dat ih wahn di talarayt rangdooin.

8. Sohntaim weh eldaz haftu du, ahn wai?

⁸ Weh wi shuda du if sohnbadi eena di kangrigayshan chooz fi liv wahn kaina laif weh goh gens Jehoava standadz? Jehoava mi tel Paal fi tel di kangrigayshan dat dehn need fi “stap spen taim wid” sohnbadi laik dat. (1 Kor. 5:11) Enibadi weh komit wahn seeryos sin ahn rifyooz fi ripent wahn geh disfeloship fahn di kangrigayshan. Ih impoatant fi mek di eldaz du dis bikaaz ih protek di bradaz an sistaz eena di kangrigayshan an ih kip Jehoava naym kleen. Bot sohn peepl mait tink dat wen sohnbadi geh disfeloship, Gaad neva mersiful tu da persn. Yu tink dat da chroo? Mek wi si.

9-10. Akaadn tu Heebrooz 12:5, 6, wai wi ku seh dat wen sohnbadi geh disfeloship, Jehoava di shoa mersi? Yooz di iloschrayshan eena di paragraaf.

⁹ Wen wi hyaa wahn anonksment da wi Kristyan meetin dat sohnbadi weh wi noa ahn lov “da noh wan a Jehoava Witnisiz,” wi feel reeli sad. Wi mait eevn wanda if da persn mi need fi geh disfeloship. Soh, wen sohnbadi geh disfeloship, yu tink dis reeli di shoa mersi? Yes. Akchwali, if wi hoal bak disiplin fahn sohnbadi weh reeli need it, wi noh di bee waiz, mersiful, er lovin. (Prov. 13:24) Wen sohnbadi geh disfeloship, ih ku help ahn ripent fan ih sinful wayz. Wahn lata bradaz ahn sistaz hoo mi-di praktis seeryos sin ahn geh disfeloship seh dat dat da egzakli weh dehn mi need fi help dehn si how bad dehn mi sin gens Jehoava. Dis mi help dehn fi ripent ahn kohn bak tu Jehoava.—Reed Heebrooz 12:5, 6.

¹⁰ Tink bowt dis iloschrayshan: Wahn shepad noatis dat wan a ih sheep sik. Hihn noa dat fi help dis sheep geh beta, ih need fi separayt ahn fahn di res a di flak. Bot dis ku bee haad bikaaz sheep laik deh wid di res a di flak, dehn noh laik deh separaytid fahn eech ada. Bot yu tink di shepad di bee kruwil bikaaz ih separayt da wan sheep fahn di res a di flak soh dat ih ku feel beta? Af koas nat! Di shepad aalso noa dat if hihn lef di sheep weh sik wid di ada sheep dehn, di hoal flak ku geh sik. Soh wen hihn separayt dehn, hihn akchwali di protek di hoal flak.—Kompyaa Leviticus 13:3, 4.

11. (a) Eena weh wayz wahn persn weh geh disfeloship da laik wahn sheep weh sik? (b) Weh wahn persn weh disfeloship ku du, ahn weh kaina help ih ku get?

¹¹ Wahn Kristyan weh geh disfeloship da laik wahn sheep weh sik. Bikaaz ih rilayshanship wid Jehoava damij, ih sik eena wahn spirichwal way. (Jay. 5:14) Jos laik peepl weh ga wahn siknis weh eezi fi mek adaz kech, sohnbadi weh sik eena wahn spirichwal way ku inkorij adaz fi du bad tingz. Bikaaz a dis, sohnbadi weh spirichwali sik eena di kangrigayshan mait need fi geh disfeloship ahn bee separaytid fahn di res a di kangrigayshan. Dis kaina disiplin shoa Jehoava lov fi faytful peepl eena di kangrigayshan an ih ku help di persn weh komit dis seeryos sin fi riyalaiz weh ih mi du ahn fi ripent. Sohnbadi weh disfeloship ku aten di meetin dehn. Rait deh ih ku laan moa fahn di Baibl an ih ku mek ih fayt geh schrang agen. Ih ku geh lichricha fi reed ahn stodi, an ih ku aalso wach JW Braadkyaastin. Ahn wen di eldaz si dat ih di mek chaynjiz, dehn mait giv ahn  sohn kongsl fahn taim tu taim fi help ahn bil op bak ih rilayshanship wid Jehoava soh dat ih ku kohn bak ahn bee paat a di kangrigayshan agen. *

12. Wat da di moas lovin ahn mersiful ting di eldaz ku du fi sohnbadi weh sin ahn rifyooz fi ripent?

¹² Ih impoatant fi memba dat da onli dehn wan hoo komit wahn seeryos sin ahn rifyooz fi ripent geh disfeloship. Di eldaz noa dat da wahn seeryos disizhan dehn haftu mek if wahn persn haftu geh disfeloship. Dehn aalso noa dat wen Jehoava disiplin, ih du it owta lov an eena di rait way. Soh hihn waahn dehn du di sayhn ting. (Jer. 30:11) Di eldaz lov dehn bradaz ahn sistaz ahn dehn noh waahn du notn weh ku damij dehn bradaz ahn sistaz rilayshanship wid Jehoava. Bot sohntaim, dehn need fi disfeloship sohnbadi fahn di kangrigayshan. Wen dehn du dis, dehn di shoa lov an mersi.

13. Wai wahn Kristyan da Korint mi need fi geh disfeloship?

¹³ Kansida weh di apasl Paal mi du wid sohnbadi da Korint hoo mi-di liv wahn imoaral laif wid ih oan pa waif. Dat mi disgostin! Paal mi noa dat eena di paas Jehoava mi tel di Izrelait dehn: “Wahn man hoo sleep wid ih pa waif di shaym ih faada. Dehn fi kil di man an di uman.” (Lev. 20:11) Af Koars, Paal kudn tel di kangrigayshan fi kil di man. Bot hihn mi tel di bradaz fi disfeloship ahn. Da disgostin bihayvya mi-di afek adaz eena di kangrigayshan. Som a dehn neva eevn tink dat dat da-mi wahn seeryos sin!—1 Kor. 5:1, 2, 13.

14. How Paal mi shoa mersi tu di man weh mi geh disfeloship da Korint, ahn wai? (2 Korintyanz 2:5-8, 11)

¹⁴ Afta sohntaim mi paas, Paal mi andastan dat di man mi mek sohn big chaynjiz an ih mi ripent fan ih sin! Eevn doa fi hihn bihayvya mi bring shaym pahn di kangrigayshan, Paal mi tel di eldaz dat ih neva “waahn seh tu moch” bot ih mi tel dehn fi ‘fergiv ahn fahn dehn haat ahn giv ahn komfert.ʼ Noatis wai Paal mi seh dehn fi du dis: “Soh dat [di man] noh geh soh sad ahn giv op.” Paal haat mi gaan owt tu di man bikaaz ih mi ripent. Hihn neva waahn di man feel soh sad bowt weh ih mi du dat ih wuda giv op ahn noh eevn chrai geh fergivnis.—Reed 2 Korintyanz 2:5-8, 11.

15. How eldaz ku gi schrang disiplin ahn shoa mersi sayhn taim?

 ¹⁵ Jos laik Jehoava, di eldaz lov fi shoa mersi tu adaz. If dehn haftu, dehn wahn gi schrang disiplin tu sohnbadi weh komit wahn seeryos sin, bot dehn wahn aalso shoa az moch mersi az pasabl tu da persn wen dehn fain reezn fi du it. If di eldaz noh disiplin di persn weh komit wahn seeryos sin ataal, dehn noh di shoa mersi tu da persn. Insteda dat, ih wahn bee laik if dehn di talarayt rangdooin. Bot yoo tink onli di eldaz fi shoa mersi?

16. Akaadn tu Proverbs 21:13, weh Jehoava wahn du tu dehn wan weh rifyooz fi shoa mersi?

¹⁶ Aala wi waahn shoa mersi jos laik Jehoava. Wai? Wan reezn da bikaaz Jehoava noh wahn lisn tu enibadi weh rifyooz fi shoa mersi tu adaz. (Reed Proverbs 21:13.) * Wi waahn Jehoava lisn tu wi pryaaz, soh wi wahn du aal wi kud fi shoa mersi. Wi redi fi lisn tu wi bradaz ahn sistaz weh “di krai fi help.” Wi aalso waahn du wi bes fi fala dis advais fahn di Baibl: “Enibadi weh noh praktis mersi wahn geh joj widowt mersi.” (Jay. 2:13) If wi hombl ahn memba humoch wee need mersi, moa dan laikli wi wahn redi fi shoa mersi tu adaz. Wi waahn bee redi fi du dis espeshali wen sohnbadi hoo mi komit wahn seeryos sin kohn bak tu di kangrigayshan.

17. How King Dayvid mi shoa chroo mersi?

¹⁷ Sohn egzampl fahn di Baibl ku wi help fi shoa mersi tu adaz ahn noh bee rof wid dehn. Mek wi luk pahn King Dayvid egzampl. Lata taimz hihn mi shoa mersi. Eevn doa Saal mi waahn kil ahn, Dayvid neva eevn tink bowt get bak aata ahn an chrai kil ahn. Insteda dat, Dayvid mi veri mersiful tuwaadz Saal.—1 Sam. 24:9-12, 18, 19.

18-19. Wen Dayvid neva shoa mersi?

¹⁸ Bot Dayvid neva aalwayz shoa mersi. Fi egzampl, wen Naybal, hoo da-mi wahn mizarabl man, mi disrispek Dayvid an ih soalja dehn ahn rifyooz fi gi dehn food, Dayvid mi geh soh beks dat ih mi mek op ih main fi kil Naybal an aal hoo mi liv eena ih hows. Bot Naybal waif, Abigayl, mi kain ahn payshent, ahn shee mi hori gaahn gi Dayvid an ih soalja dehn food. Soh tanks tu Abigayl, Dayvid neva merda Naybal an evribadi els eena ih hows.—1 Sam. 25:9-22, 32-35.

¹⁹ Wahn nada taim, di prafit Naytan mi tel Dayvid bowt wahn man hoo mi rich an weh mi teef ih nayba sheep weh ih mi onli lov. Wel, dis mi mek Dayvid geh bloo beks dat ih seh: “Az lang az Jehoava livin, di man hoo du dis dizerv fi ded!” (2 Sam. 12:1-6) Dayvid mi noa weh di Laa a Moaziz mi seh. Sohnbadi weh mi teef wahn sheep need fi pay bak foa taimz di valyu a weh ih teef. (Ex. 22:1) Bot fi seh dat di man weh mi teef “dizerv fi ded,” dat da-mi  wahn hevi jojment fahn Dayvid. Naytan jos mi-di yooz da iloschrayshan fi help Dayvid andastan dat di sin dehn weh hihn du faar wers dan weh di man eena di iloschrayshan mi du! An Jehoava mi shoa way moa mersi tuwaadz Dayvid dan weh Dayvid wuda mi shoa tu di man weh mi teef di sheep eena Naytan iloschrayshan!—2 Sam. 12:7-13.

20. Weh wi ku laan fahn Dayvid egzampl?

²⁰ Noatis dat wen Dayvid mi giv een tu anga, hihn mi disaid dat Naybal an evribadi els eena ih hows dizerv fi ded. Ahn laytaraan, Dayvid mi seh dat di man eena Naytan iloschrayshan dizerv fi ded tu. Bot wen yu tink bowt it, Dayvid da-mi wahn kain man, soh wai hihn wuda seh dat dis man weh mi teef di sheep dizerv fi ded? Tink bowt weh mi jos hapm eena Dayvid laif. Bikaaz a weh ih mi du, hihn mi ga wahn gilti kanshans. If sohnbadi joj adaz eena wahn rof way laik weh Dayvid mi du, ih akchwali di shoa dat ih noh ga wahn schrang rilayshanship wid Jehoava. Az a mata a fak, Jeezas mi waan ih falowaz: “Stap joj adaz, ahn Gaad noh wahn joj unu; kaaz di saym way unu joj adaz, Gaad wahn joj unu.” (Mach. 7:1, 2) Soh mek wi du wi bes noh fi hori joj adaz eena wahn rof way. Insteda dat, mek wi bee laik wi Gaad hoo ga “soh moch mersi.”

21-22. Eena weh wayz wee ku shoa mersi?

²¹ If wee mersiful, den dat meenz dat wi noh jos feel sari fi peepl, wi wahn du sohnting fi help dehn. Soh den, aala wi ku tek wahn lee taim ahn tink bowt enibadi eena wi famili, wi kangrigayshan, ahn wi kamyooniti weh need help. Fi shoar, wi wahn fain sohnbadi weh wee ku shoa mersi tu! Enibadi deh weh need komfert? Sohnbadi deh weh mait need food er weh need wi fi du sohnting fi dehn? Sohnbadi jos geh riyinstaytid eena di kangrigayshan weh need wahn gud fren hoo ku inkorij ahn? Wee ku shayr di gud nyooz wid adaz ahn komfert dehn? Dehnya da som a di bes tingz weh wee ku du fi shoa mersi tu enibadi hoo wi mait noa er meet.—Job 29:12, 13; Roam. 10:14, 15; Jay. 1:27.

²² If wee noa dat adaz need help, wi wahn si dat lata apachooniti deh rong wi fi shoa mersi. Ahn wen wi shoa mersi, dis mek Jehoava hapi bikaaz hihn da wi Gaad hoo ga “soh moch mersi”!