FI SOHN yaaz, sohn peepl weh kritisaiz di Baibl doz klaym seh dat King Belshazar, weh geh menshan eena di buk a Daniel, neva did egzis. (Dan. 5:1) Dehn mi bileev dis bikaaz saiyentis neva fain no evidens dat hihn mi akchwali egzis. Bot dat mi chaynj eena 1854. Wai?

Eena da yaa, wahn British man weh mi naym J. G. Taylor mi saach sohn rooinz eena di aynshent siti a Er, weh da now sodan Iraq. Dehsoh, ih mi fain sohn klay stoan eena wahn big towa. Di klay stoan dehn mi bowt foa inch (10 cm) lang, ahn dehn mi ga sohn aynshent raitin pahn dehn. Di raitin pahn wan a dehn mi inklood wahn pryaa fi di lang laif a Babiloanyan King Nabonaidos an ih oaldis son, Belshazar. Eevn dehn wan weh kritisaiz di Baibl mi haftu agree dat dat da-mi proof dat Belshazar mi did egzis.

Bot, di Baibl noh onli seh dat Balshazar mi egzis, ih seh dat hihn da-mi aalso wahn king. Agen, sohn peepl mi dowt dis. Fi egzampl, rong di yaa 1875, wahn saiyentis weh mi naym William Talbot mi rait dat sohn peepl seh dat “Bel-sar-ussur [Belshazar] mi rool joorin di saym taim az ih pa, Nabonaidos. Bot dehn noh ga no proof a dis.”

Bot da dibayt mi geh setl wen di raitin pahn som a di ada klay stoan mi shoa dat sohntaim Belshazar pa, King Nabonaidos, neva deh da Babilan fi sohn yaaz. Hoo mi rool di konchri wen hihn neva dehdeh? Di Encyclopaedia Britannica seh dat wen Nabonaidos mi deh eena wahn nada konchri, hihn mi tern oava di chroan ahn di bigis paat a ih aami tu Belshazar. Soh, wi ku seh dat Belshazar mi rool az king joorin da taim. Bikaaz a dis, Alan Millard, hoo da wahn saiyentis ahn langwij profesa, mi seh dat ih mi rait fi “di Buk a Daniel kaal Belshazar ‘king.ʼ”

Af koars, fi servants a Gaad, di fak dat di buk a Daniel da paat a di Baibl ahn wahn lata ada buk eena di Baibl taak bowt di prafit Daniel, da proof dat wi ku chros di buk a Daniel az di Werd a Gaad.​—2 Tim. 3:16.