Ai mi baan da Quebec Siti, eena di paat a Canada weh peepl taak French. Mi payrents, Louis ahn Zélia, mi kain ahn lovin tu mi. Mi pa da-mi wahn shai persn an ih mi lov fi reed. Ai mi injai fi rait an Ah mi hoap dat wan day Ah kuda mi bee wahn nyooz ripoata.

Wen Ai mi bowt 12 yaaz oal, wan a mi pa koa-werka, Rodolphe Soucy, mi kohn vizit da wi hows lang wid ih fren. Dehn da-mi Jehoava Witnisiz. Ah neva noa moch bowt di Witnisiz an Ah neva inchrestid fi geh fi noa bowt dehn rilijan eeda. Bot, Ah mi impres bai di kain ahn simpl way how di Witnisiz mi ansa wi kweschanz fahn di Baibl. Mi payrents mi feel di sayhn way tu, soh wi mi aksep wahn Baibl stodi.

Dehn taim deh, Ah mi-di goh da wahn Kyaatlik skool. Evri now an agen, Ah doz taak tu mi klaasmayt dehn bowt weh Ah mi-di laan pahn mi Baibl stodi. Til mi teechaz, hoo da-mi prees, mi fain owt bowt it. Insteda dehn mi yooz di Skripchaz fi proov dat weh Ah mi-di seh mi rang, wan Ah di teecha mi tel mi fronta di hoal klaas dat Ai da-mi wahn rebl! Dat mi bada mi wahn lat, bot ih mi bring gud rizolts. Ih mi help mi fi si dat weh di skool mi-di teech bowt Gaad neva gree wid weh di Baibl seh. Ah mi riyalaiz dat Ah mi need fi stap goh da da skool. Wid mi payrents permishan, Ah mi staat goh da wahn neks skool.

Ah mi kantinyu fi stodi di Baibl, bot Ah neva mi-di mek spirichwal proagres bikaaz Ah mi frayd fi goh preech fahn hows tu hows. Di Kyaatlik Cherch mi veri powaful ahn  dehn mi-di chrai fi stap di preechin werk. Maurice Duplessis, di politikal leeda a Quebec, da-mi kloas fren wid di cherch. Wid fi hihn sopoat, di peepl dehn doz haraas di Witnisiz an eevn atak dehn. Di Witnisiz mi reeli need korij fi preech bak den.

Wahn brada weh mi help mi fi get oava mi fyaa da-mi Jan Rae, hihn mi grajuayt fahn di naint klaas a Gilyad. Jan mi ga wahn lata ekspeeryens, ahn hihn mi hombl an eezi fi taak tu. Hihn mi kongsl mi jos wahn fyoo taimz, bot fi hihn gud egzampl da weh mi reeli help mi. Jan doz fain it haad fi taak French, soh Ah doz goh wid ahn eena servis ahn help ahn wid di langwij. Di taim weh Ah mi spen wid Jan mi help mi fi mek op mi main fi bee wan a Jehoava Witnisiz. Ah mi geh baptaiz pahn May 26, 1951, ten yaaz afta Jehoava Witnisiz mi fos nak pahn wi doa.

Wi smaal kangrigayshan da Quebec mi mek op a moasli painyaaz. Fi dehn gud egzampl mi help mi fi waahn bee wahn painyaa. Bak den, wi doz yooz onli di Baibl wen wi di preech fahn hows tu hows. Bikaaz a dat, wi mi haftu laan how fi yooz di Baibl reeli gud. Soh Ah mi chrai fi laan sohn Baibl vers weh wuda mi help mi fi difen di chroot. Bot, wahn lata peepl mi rifyooz fi reed eni verzhan a di Baibl if da neva wan weh di Kyaatlik Cherch mi aproov a.

Eena 1952, Ah mi marid Simone Patry, wahn faytful sista fahn mi kangrigayshan, ahn wi mi moov tu Montreal. Jos wan yaa afta wi mi geh marid, wi daata, Lise, mi baan. Eevn doa Ah mi stap painyaa wahn lee wail bifoa wi mi geh marid, mee ahn Simone mi chrai fi kip wi laif simpl soh dat wi kuda mi du az moch az pasabl az wahn famili eena di kangrigayshan.

Afta ten yaaz, Ah mi staat tu tink bowt fi painyaa agen. Eena 1962, wen Ah mi deh da di Kingdom Minischri Skool fi eldaz da di Betel da Canada, dehn mi asain mee ahn wahn brada weh naym Camille Ouellette fi stay eena di saym room. Di zeel weh Camille mi ga fi di minischri mi reeli impres mi, espeshali sins hihn mi aalso marid ahn ga chiljren. Bak den, onli wahn fyoo bradaz ahn sistaz da Quebec mi-di rayz wahn chail ahn painyaa at di saym taim; bot stil, dat da-mi Camille goal. Joorin di taim weh wi mi spen tugeda, hihn mi inkorij mi fi tink bowt mi sichuwayshan. An afta jos wahn fyoo monts, Ah mi riyalaiz dat Ah kuda mi staat tu regyula painyaa agen.  Som a di bradaz mi seh dat dehn noh tink dis da-mi wahn gud aidyaa. Bot Ah mi disaid fi staat tu painyaa agen bikaaz Ah mi shoar dat Jehoava wuda mi help mi fi preech moa.

Eena 1964, mee ahn Simone mi geh asain fi serv az speshal painyaaz da Quebec Siti, wi hoamtong, ahn wi mi serv deh fi sohn yaaz. Bai dis taim, wi mi ga les prablemz fi preech, bot peepl mi stil deh gens di werk weh wi mi-di du.

Wan Satideh aftanoon, Ah mi geh ares da Sainte Marie, wahn smaal tong noh tu faar fahn Quebec Siti. Wahn polees aafisa mi ares mi ahn put mi eena wahn sel da di polees stayshan bikaaz Ah mi-di preech fahn hows tu hows widowt wahn permit. Laytaraan, dehn mi kehr mi fronta wahn schrik joj weh mi naym Baillargeon. Hihn mi aks mi hoo mi wahn bee mi laaya. Wen Ah mi seh Glen How, * hihn mi geh nervos ahn seh: “Glen hoo? Oa, no! Noh hihn!” Glen How da-mi wahn veri gud laaya weh evribadi mi noa, hihn doz help difen di Witnisiz bak den. Soon afta dat, di joj mi mek Ah noa dat di koat mi jrap di chaajiz gens mi.

Bikaaz a di persikyooshan weh wi mi fays da Quebec, ih mi aalso haad fi wi fain wahn plays fi rent fi ga wi meetinz. Wi lee kangrigayshan kuda mi onli fain wahn lee oal garaaj weh neva ga wahn heeta. Fi mek wi kuda mi stay lee bit waam joorin winta taim, di bradaz doz yooz wahn heeta weh ron pahn ail. Dehn doz gyada rong it fi wahn fyoo owaz bifoa di meetin dehn staat fi shayr dehn inkorijin ekspeeryens.

Ih soh wandaful fi si di gud rizolts a di preechin werk oava di yaaz. Bak eena di 1960ʼs, bitween di ayrya a Quebec Siti, di Côte-Nord reejan, ahn di Gaspé Peninsula, dehn mi onli ga wahn fyoo smaal kangrigayshan. Tudeh, dehn ga moa dan too serkit eena dehnya ayrya, ahn di bradaz meet eena sohn byootiful Kingdom Haal.

Eena 1970, mee ahn Simone mi geh invaitid fi serv eena di serkit werk. Den, eena 1973, wi mi geh asain tu di dischrik werk. Joorin dehn yaaz, Ah mi laan wahn lat fahn bradaz laik Laurier Saumur * ahn David Splane. * Dehn too bradaz mi serv eena di chravlin werk. Afta evri asembli, mee ahn David wuda gi eech ada sojeshanz pahn how fi du beta eena wi teechin skilz. Ah memba wan taim David mi tel mi: “Léonce, Ah mi injai yu laas taak. Ih mi gud, bot Ai wuda mi mek chree taak owta aala da infamayshan!” Ai mi ga di habit fi put tu moch infamayshan eena mi taak dehn. Ah mi need fi laan how fi kot bak pahn di amonk a infamayshan Ah yooz.

 Dischrik oavaseeyaz mi ga di rispansabiliti fi inkorij serkit oavaseeyaz. Bot, wahn lata poblishaz da Quebec mi noa mi gud. Dehn doz aalwayz waahn werk wid mi eena servis wen Ah doz vizit di serkit oavaseeya dehn. Eevn doa Ah mi injai fi preech wid dehn, Ah neva mi-di spen inof taim wid di serkit oavaseeya. Wahn taim, wahn lovin serkit oavaseeya mi seh tu mi: “Ih nais dat yu tek taim fi spen wid di bradaz, bot noh ferget dat yu mi kohn ya fi vizit mee dis week. Ai need fi geh inkorij tu!” Ai mi laan wahn lat fahn da kain kongsl.

Sad fi seh, eena 1976, sohnting weh Ah neva ekspek mi hapm. Mi dyaa waif, Simone, mi geh reeli sik an ih mi ded. Shee da-mi wahn wandaful waif bikaaz shee neva tink onli bowt ihself ahn shee mi lov Jehoava. Bikaaz Ah mi spen wahn lata taim eena di minischri, Ah kuda mi bayr op chroo dis sad taim, an Ah tank Jehoava fi fi hihn lovin sopoat. Layta, Ah mi marid Carolyn Elliott, wahn sista weh reeli lov Jehoava ahn weh taak Inglish. Shee mi kohn da Quebec fi serv wehpaat dehn mi need moa help. Carolyn da sombadi weh eezi fi taak tu, ahn shee ga wahn reel inchres eena adaz, espeshali dehn wan weh shai ahn loanli. Wen shee mi jain mi eena di chravlin werk, shee mi help mi wahn lat.

Eena Janiweri 1978, di branch aafis mi aks mi fi teech di fos Painyaa Servis Skool da Quebec. Ai mi feel reeli nervos bikaaz Ah neva gaahn da painyaa skool bifoa er eevn si di teksbuk. Soh evriting mi nyoo tu mee jos laik how ih mi nyoo tu di styoodents. Ah glad dat di klaas weh Ah mi teech mi mek op a painyaaz weh mi ga wahn lata ekspeeryens. Eevn doa Ai da-mi di teecha, Ah mi laan wahn lat fahn di styoodents!

Laytaraan, eena 1978, dehn mi ga di “Victorious Faith” Intanashanal Kanvenshan da di Olympic Staydyom da Montreal. Dat da-mi di bigis kanvenshan wi mi eva ga da Quebec,  oava 80,000 peepl mi aten. Ah mi geh asain fi werk wid di Nyooz Servis Dipaatment. Ah mi geh fi taak tu wahn lata di nyooz ripoata dehn an Ah mi hapi fi si weh dehn mi rait bowt di Witnisiz aftawodz. Dehn mi intavyoo wi pahn TV ahn pahn rayjo fi moa dan 20 owaz aal tugeda, ahn dehn mi rait honjridz a aatikl bowt di ivent. Bikaaz a dat, wahn lata peepl mi geh fi noa moa bowt Jehoava an ih peepl.

Eena 1996, wahn big chaynj mi hapm fi mi. Ah mi geh asain fi serv eena di Inglish serkit da Toronto az di dischrik oavaseeya. Fahn eva sins Ah mi geh baptaiz, Ah mi-di serv eena di French serkit da Quebec. Ai neva feel laik Ah mi kwalifai fi dis asainment, an Ah mi reeli frayd fi gi taak bikaaz Ah mi kyaahn taak Inglish gud. Ah mi need fi pray moa ahn pen pahn Jehoava eevn moa dan bifoa.

Bifoa Ah mi staat tu serv da Toronto, Ah mi reeli nervos, bot now Ah ku seh dat Ah mi injai dehn too wandaful yaaz weh Ah mi serv deh. Carolyn mi payshent wid mi az ih mi help mi fi taak Inglish beta, ahn di bradaz mi reeli sopoat mi an inkorij mi. Wi mi mek nyoo frenz reeli kwik.

Apaat fahn di ekschra aktiviti dehn ahn di preparayshan fi di serkit asembli, Ah doz naamali spen bowt wan owa eena servis pahn Fraideh eevnin. Som peepl maita mi tink, ‘Wat da di sens a goh owt eena servis rait bifoa wahn bizi asembli weeken?ʼ Bot, ih mi inkorijin fi mee fi ga gud kanvasayshanz eena di minischri. Eevn now, Ah aalwayz feel hapiya afta Ah don preech.

Eena 1998, mee ahn Carolyn mi geh asain fi goh bak da Montreal az speshal painyaaz. Fi sohn yaaz, mai asainment mi inklood fi aaganaiz speshal poblik witnisin ahn fi werk wid di nyooz meedya fi karek di rang aidyaaz weh peepl ga bowt Jehoava Witnisiz. Now, mee ahn Carolyn di injai fi preech tu farinaz weh moov tu Canada ahn weh eega fi laan moa bowt di Baibl.

Ah feel reeli bles az Ah luk bak pahn mi 68 yaaz a servis tu Jehoava. Ah aalso feel reeli hapi bikaaz Ah mi laan fi injai di preechin werk an Ah mi help wahn lata peepl fi kohn fi noa di chroot. Mi daata, Lise, an ih hozban mi staat tu regyula painyaa afta dehn mi rayz dehn chiljren. Wen Ah si di zeel weh shee stil ga fi di minischri, ih mek Ah feel reeli hapi. Ah espeshali tankful fi di bradaz weh mi gi mi waiz kongsl ahn weh mi set wahn gud egzampl fi mi. Dehn mi help mi fi ga wahn schrang frenship wid Jehoava ahn fi serv ahn eena lata difrent wayz. Ai fain dat wi ku onli kantinyu fi du weh Jehoava aaganaizayshan aks wi fi du if wi pen pahn Jehoava powaful hoali spirit. (Ps. 51:11) Evri day, Ai kantinyu fi tank Jehoava bikaaz hihn gi mee di preshos privilij fi prayz fi hihn wandaful naym!—Ps. 54:6.