1. Weh mi hapm eena Joazef famili bikaaz ih breda dehn mi ga red aiy?

JAYKOP mi lov aala ih son dehn, bot hihn mi ga speshal afekshan fi ih 17-yaa-oal son, Joazef. How Joazef breda dehn mi feel? Dehn mi red dehn aiy aata Joazef bikaaz a di afekshan weh dehn pa mi shoa hihn. Ahn dat mi mek dehn staat tu hayt Joazef. Joazef neva du notn fi mek ih breda dehn mi hayt ahn. Bot stil, dehn mi sel Joazef ahn lai tu dehn pa seh dat wahn wail bees mi kil ih fayvrit son. Bikaaz dehn mi soh red aiy, dehn mi disterb di pees a dehn famili ahn dehn mi mek dehn pa feel reeli sad.—Gen. 37:3, 4, 27-34.

2. Akaadn tu Galayshanz 5:19-21, wai ih daynjaros fi ga red aiy?

² Eena di Baibl, red aiy * da wan a di ting dehn weh ku stap wahn persn fahn bee paat a Gaad Kingdom. (Reed Galayshanz 5:19-21.) Wahn lata taim, red aiy da di mayn reezn wai peepl ton enimi wid wan anada, kyaahn gree wid wan anada, ahn ga bad tempa.

3. Weh wi wahn diskos eena dis aatikl?

³ Di egzampl a Joazef breda dehn shoa wi dat if wi red aiy, er greedi, wi ku damij wi rilayshanship wid adaz ahn disterb  di pees eena wi famili. Aldoa wee wuda neva du weh Joazef breda dehn mi du, wee need fi memba dat wi noh perfek ahn dat wi ga wahn chriki haat. (Jer. 17:9) Dat da wai sohntaim wi mait red aiy adaz ahn waahn weh dehn gat. Mek wi luk pahn sohn egzampl eena di Baibl weh ku help wi fi si how red aiy ku afek wi haat. Wi wahn aalso diskos how wi ku fait gens da bad kwaliti ahn how wi ku promoat pees.

4. Wai di Filisteen dehn mi red dehn aiy aata Aizak?

⁴ Sombadi weh rich. Di Filisteen dehn mi red aiy Aizak bikaaz hihn da-mi wahn rich man. (Gen. 26:12-14) Dehn mi eevn stap op di wel dehn weh Aizak doz geh waata fram fi gi ih animal dehn. (Gen. 26:15, 16, 27) Laik di Filisteen dehn, sohn peepl tudeh jelos adaz bikaaz dehn oan moa tingz dan dehn. Peepl weh greedi laik dis noh onli waahn di tingz weh adaz gat bot dehn noh waahn dehn gat it eeda.

5. Wai di rilijos leedaz mi red aiy Jeezas?

⁵ Sombadi weh lata peepl laik. Di Jooish rilijos leedaz mi red aiy Jeezas bikaaz wahn lata peepl mi laik ahn. (Mach. 7:28, 29) Jeezas da-mi di wan weh Gaad mi sen, ahn hihn mi-di teech di chroot. Bot stil, dehnya rilijos leedaz mi-di spred lata lai ahn slanda Jeezas gud naym. (Maak 15:10; Jan 11:47, 48; 12:12, 13, 19) Weh lesn wi ku laan fahn dis? Wi waahn mek shoar dat wi noh jelos dehn wan eena di kangrigayshan weh ada bradaz ahn sistaz lov bikaaz a dehn gud kwalitiz. Insted, wi shuda chrai kapi fi dehn kwalitiz.—1 Kor. 11:1; 3 Jan 11.

6. How Daiyachrifeez mi shoa dat hihn mi red aiy?

⁶ Sombadi weh geh wahn asainment eena di kangrigayshan. Eena di taim a di apasl dehn, Daiyachrifeez mi shoa dat hihn mi red aiy dehn wan weh mi-di tek di leed eena di Kristyan kangrigayshan. Hihn mi waahn “set op ihself az leeda” oava ih bradaz. Soh hihn mi taak bad bowt di apasl Jan an ada bradaz soh dat adaz eena di kangrigayshan wuda looz dehn rispek fi dehn. (3 Jan 9, 10) Eevn doa wee wuda neva du weh Daiyachrifeez mi du, wee ku staat tu jelos wi brada er sista if dehn geh wahn asainment weh wee wuda mi waahn get. Dis ku hapm espeshali if wi feel dat wee ku du di asainment jos az gud az dehn er eevn beta.

7. If wi red aiy, how dat ku afek wi?

⁷ Sombadi weh red aiy da jos laik wahn plaant weh ga wahn vain di choak it. Wans da bad kwaliti tek root eena wi haat, ih ku bee haad fi geh rid a it. Ih feed pahn ada negitiv feelinz, laik praid ahn selfishnis. Jos laik how wahn vain choak wahn plaant ahn stap it fahn groa, da rait soh if wi red aiy, ih ku stap wi fahn divelop gud kwalitiz, laik lov, kompashan, ahn kainis. Soh az soon az wi si da bad kwaliti staat tu sprowt, wi need fi root it owt fahn wi haat. Bot weh ku help wi fi noh red aiy weh adaz gat?

8. Weh kwalitiz ku help wi fi noh red aiy adaz?

⁸ If wi hombl ahn satisfai wid weh wi gat, ih ku help wi fi noh red aiy adaz. Wen wi hombl, ih help wi fi noh tink tu moch a wiself. Wahn hombl persn noh wahn feel laik hihn dizerv moa dan evribadi els. (Gal. 6:3, 4) Sombadi weh satisfai wid weh dehn gat noh wahn kompyaa dehnself wid adaz. (1 Tim. 6:7, 8) Wen wahn persn weh hombl ahn satisfai wid weh ih gat si sombadi geh sohnting gud, hihn hapi fi dehn.

9. Akaadn tu Galayshanz 5:16 ahn Filipiyanz 2:3, 4, weh hoali spirit ku help wi fi du?

 ⁹ Wi need Gaad hoali spirit fi help wi noh fi ga red aiy ahn fi help wi fi bee hombl ahn satisfai wid weh wi gat. (Reed Galayshanz 5:16; Filipiyanz 2:3, 4.) Jehoava hoali spirit ku help wi fi egzamin wi tinkin ahn di reezn wai wi du weh wi du. Gaad ku help wi fi stap red aiy weh ada peepl ga, an ih ku aalso help wi fi divelop gud kwalitiz. (Ps. 26:2; 51:10) Mek wi kansida di too egzampl a Moaziz ahn Paal, ahn wi wahn si dat eevn doa dehn kuda mi ga reezn fi red aiy adaz, dehn mi aybl fi fait da feelin.

10. Weh sichuwayshan kuda mi tes Moaziz? (Koment pahn di picha pahn di kova.)

¹⁰ Moaziz mi ga wahn lata atariti oava Gaad peepl, bot hihn neva chrai fi stap adaz fahn ga da saym privilij. Fi egzampl, Jehoava mi tek som a ih hoali spirit fahn Moaziz ahn giv it tu wahn groop a Izrelait eldaz hoo mi-di stan op bai di tent a meetin. Lee wail afta dat, Moaziz mi hyaa dat too eldaz weh neva gaan bai di tent a meetin mi aalso geh hoali spirit ahn dehn mi-di ak laik prafit. Weh Moaziz mi du wen Jashwa mi aks ahn fi stap di too eldaz? Moaziz neva feel jelos a di atenshan weh dehnya too man mi-di geh fahn Jehoava. Insted, Moaziz mi hombl ahn hihn mi hapi fi dehn. (Num. 11:24-29) Weh lesn wi ku laan fahn Moaziz?

11. How eldaz ku kapi Moaziz egzampl?

¹¹ If yoo da wahn elda, sombadi eva aks yu fi chrayn sombadi els eena di kangrigayshan fi tek kyaa a wahn rispansabiliti weh yoo reeli lov fi du? Fi egzampl, yoo mait lov di privilij fi kandok di Wachtowa Stodi evri week. Bot wat if dehn aks yu fi chrayn wahn nada brada fi handl dis privilij? Wel, if yu hombl laik Moaziz, yu noh wahn feel laik yu wahn bee les impoatant. Insted, yu wahn bee hapi fi help yu brada.

12. How wahn lata Kristyanz tudeh di shoa dat dehn hombl ahn satisfai wid weh dehn ga?

¹² Tink bowt wahn nada sichuwayshan weh wahn lata oalda bradaz di goh chroo. Wahn lata dehn di serv fi yaaz az di koardinayta a di badi a eldaz. Bot wen dehn reech 80 yaaz oal, dehn wilin fi giv op dehn asainment. Ahn wen di serkit oavaseeya dehn reech 70 yaaz oal, dehn wilin fi giv op da privilij an aksep wahn nyoo asainment. Aalso, kopl a yaaz agoa, wahn lata Betelaits rong di werl mi geh asain bak owt tu di feel. Dehnya faytful bradaz ahn sistaz noh jelos dehn wan weh en op wid di asainment weh dehn yoostu gat.

13. Wai Paal kuda mi fain lata reezn fi red ih aiy aata di 12 apasl dehn?

¹³ Di apasl Paal da wahn nada gud egzampl a sombadi weh mi hombl an satisfai wid weh ih mi gat. Hihn neva red aiy di ada bradaz. Eevn doa hihn mi werk haad eena di minischri, hihn mi hombl. Hihn mi seh: “Ai da di lees a aal di ada apasl dehn. Ai noh eevn fit fi mek dehn kaal mee wahn apasl.” (1 Kor. 15:9, 10) Joorin Jeezas minischri pahn ert, di 12 apasl dehn mi fala hihn. Bot Paal neva ton wahn Kristyan til afta Jeezas mi ded ahn rezorek. Aldoa laytaraan hihn mi geh apointid fi bee ‘wahn apasl tu peepl weh da noh Joo,ʼ hihn neva kwalifai fi di speshal privilij a bee wan a di 12 apasl dehn. (Roam. 11:13; Aks 1:21-26) Stil, Paal neva jelos di kloas rilayshanship weh dehnya 12 man mi injai wid Jeezas; hihn mi satisfai wid weh hihn mi ga.

14. Weh wee wahn du if wi hombl ahn satisfai wid weh wi gat?

¹⁴ If wi hombl ahn satisfai wid weh wi ga, wi wahn bee laik Paal ahn shoa rispek tu dehn wan weh Jehoava put fi tek di leed.  (Aks 21:20-26) Jehoava mek shoar dat dehn ga eldaz fi tek di leed eena di Kristyan kangrigayshan. Eevn doa dehn noh perfek, Jehoava si dehn az “gif tu peepl.” (Ifee. 4:8, 11) Wen wi rispek dehnya man weh Jehoava apoint, ahn fala dehn dairekshan, ih help wi fi stay kloas tu Jehoava ahn fi injai pees wid wi bradaz ahn sistaz.

15. Weh wi need fi du?

¹⁵ Wi noh wahn ga pees wid wan anada if wi jelos adaz er red wi aiy aata weh dehn gat. Wi need fi root owt dehn feelinz fahn wi haat, an avoid du tingz weh mait kaaz adaz fi red dehn aiy aata wee tu. Wi need fi du dehnya impoatant tingz soh dat wee ku obay Jehoava koman fi “aalwayz chrai ahn du dehn ting weh wahn bring pees ahn weh wahn help wi mek wan anada fayt geh schranga.” (Roam. 14:19) Weh wee ku du fi help adaz weh mait ga red aiy, ahn how wi ku promoat pees?

16. How wee ku help adaz weh mait ga red aiy?

¹⁶ Wi atichood an akshanz ku afek adaz big taim. Di werl waahn wi shoa aaf di tingz weh wi oan. (1 Jan 2:16) Bot da atichood noh promoat pees, ih kaaz adaz fi red aiy di tingz wi gat. Wi ku help adaz fi noh red dehn aiy if wi stap taak bowt di tingz weh wi oan er di tingz weh wi plan fi bai. Wahn nada way how wi ku help adaz fi noh red dehn aiy da bai di way wi bihayv wen wi geh wahn privilij eena di kangrigayshan. If wi kip di taak bowt weh wi di  du, wi ku kaaz adaz fi staat tu jelos wi. Bot wen wi shoa dat wi reeli inchrestid eena adaz ahn wi komen dehn fi di gud tingz weh dehn du, wi di help dehn fi feel satisfai wid weh dehn gat, ahn wi di promoat yooniti ahn pees eena di kangrigayshan.

17. Weh Joazef breda dehn mi aybl fi du, ahn wai?

¹⁷ Wee ku laan fi promoat pees ahn stap red aiy adaz! Mek wi kansida di egzampl a Joazef breda dehn. Yaaz afta dehn mi chreet Joazef bad, dehn mi meet ahn agen da Eejip. Bifoa Joazef mi tel ih breda dehn da hoo hihn, hihn mi tes dehn owt fi si if dehn mi chaynj. Hihn mi araynj wahn meel an ih mi gi Benjamin moch moa food dan weh ih mi gi di adaz. (Gen. 43:33, 34) Bot dis neva kaaz ih breda dehn fi jelos Benjamin. Insted, dehn mi shoa kansaan fi dehn breda ahn fi dehn pa, Jaykop. (Gen. 44:30-34) Bikaaz Joazef breda dehn mi laan fi stap ga red aiy, dehn mi aybl fi ga pees eena dehn famili agen. (Gen. 45:4, 15) Soh da di saym wid wee, if wee root owt eni feelinz weh wi mait ga eena wi haat fi bee jelos er greedi, wi wahn di help fi promoat pees eena wi famili an eena wi kangrigayshan.

18. Akaadn tu Jaymz 3:17, 18, weh wahn hapm if wi help fi promoat pees?

¹⁸ Jehoava waahn wi fi promoat pees ahn fait gens eni feelinz a jelosi, red aiy, er greedinis weh wi mait gat. Wi haftu werk haad fi du dis. Az wi mi diskos eena dis aatikl, wi noh perfek ahn wi ten fi bee red aiy. (Jay. 4:5) Di werl rong wi noh promoat pees. Insted, ih inkorij wi fi waahn weh adaz gat. Bot if wi hombl, if wi shoa apreeshiayshan, ahn if wi satisfai wid weh wi ga, wi noh wahn ga red aiy. Insted, wi wahn help fi promoat pees soh dat wi ku divelop gud kwalitiz.—Reed Jaymz 3:17, 18.