1. Weh sombadi mi haftu du if dehn mi waahn taak tu di king a Perzha?

IMAJIN dat yu yoostu liv da Perzha sohn 2,500 yaaz agoa. Ahn wan day, yu mi need fi taak tu di king bowt sohnting, soh yu mi chravl aal di way tu di siti a Shooshan, wehpaa di king mi liv. Bot bifoa yu kuda mi eevn taak tu di king, yu mi haftu geh ih permishan. Bikaaz if yu mi chrai taak tu di king widowt ih permishan, yu kuda mi geh kil!​—Esther 4:11.

2. How Jehoava waahn wi feel fi taak tu hihn?

² Wi soh tankful dat Jehoava da noh laik wahn Perzhan king! Jehoava faar moa powaful ahn moa impoatant dan eni hyooman roola, bot stil, wee ku taak tu hihn eni taim. Hihn waahn wi feel free fi taak tu hihn. Fi egzampl, eevn doa Jehoava ga taitl laik Kriyayta, Almaiti, ahn Sovrin Laad, hihn waahn wi taak tu ahn, ahn kaal ahn “Faada.” (Mach. 6:9) Ih mek wi hapi fi noa dat Jehoava waahn wi feel kloas tu hihn!

3. Wai wi ku kaal Jehoava “Faada,” ahn weh wi wahn diskos eena dis aatikl?

³ Ih rait fi kaal Jehoava “Faada” bikaaz da hihn gi wi laif. (Ps. 36:9) Bikaaz hihn da wi Faada, wee ga di rispansabiliti fi obay ahn. If wi du weh hihn aks wi fi du, wi wahn injai wandaful blesinz. (Heeb. 12:9) Wan a dehn blesin da evalastin laif, weda fi liv da hevn er pahn ert. Wi aalso injai som a di benifits now. Eena dis aatikl, wi wahn diskos how Jehoava shoa dat hihn da wi lovin Faada now ahn wai wi  ku bee shoar dat hihn wahn neva abandan wi eena di fyoocha. Bot fos, mek wi diskos wai wi ku bee shoar dat wi hevnli Faada lov wi wahn lat ahn waahn help wi.

4. Wai sohn peepl fain it haad fi si Jehoava az dehn Faada?

⁴ Yoo fain it haad fi tink a Jehoava az yu Faada? Sohn peepl mait tink dat Jehoava soh grayt dat dehn kuda neva bee impoatant tu hihn. Dehn dowt dat di Almaiti Gaad kay bowt eech wan a dehn. Stil, wi lovin Faada noh waahn wi feel da way. Hihn da di Wan weh gi wi laif an ih waahn mek wi ga wahn rilayshanship wid ahn. Afta di apasl Paal mi mek dis klyaa, ih mi eksplayn tu dehn wan weh mi-di lisn tu ahn da Atenz dat Jehoava “noh deh faar fahn non a wi.” (Aks 17:24-29) Gaad waahn eech wan a wi fi taak tu hihn jos laik how wahn pikni wuda taak tu ih payrents weh lov ahn, ahn weh waahn help ahn.

5. Weh wi laan fahn di ekspeeryens a wahn Kristyan sista?

⁵ Adaz mait fain it haad fi si Jehoava az dehn hevnli Faada bikaaz dehn oan faada neva shoa dehn lov an afekshan. Noatis weh wahn Kristyan sista seh. Shee seh: “Mi pa neva kain tu mi. Wen Ah mi fos staat stodi di Baibl, ih mi haad fi mek Ah feel kloas tu wahn hevnli Faada. Bot afta Ah mi geh fi noa Jehoava, aala dat mi chaynj.” Yoo feel da sayhn way? If yes, yoo ku bee shoar dat soon yu wahn ku aalso vyoo Jehoava az di bes Faada.

6. Akaadn tu Machyu 11:27, wat da wan way how Jehoava help wi fi vyoo hihn az wi lovin Faada?

⁶ Wan way how Jehoava help wi fi vyoo hihn az wi lovin Faada da fi mek Jeezas werdz an akshanz geh rait dong eena di Baibl. (Reed Machyu 11:27.) Jeezas mi kapi ih Faada persnaliti soh gud dat hihn kuda mi seh: “Enibadi weh don si mee don si mai Faada tu.” (Jan 14:9) Wahn lata taim, Jeezas mi diskraib Jehoava az wahn Faada. Jos eena di foa Gaspl aloan, Jeezas mi yooz di werd “Faada” bowt 165 taimz fi rifaa tu Jehoava. Wai Jeezas mi taak soh moch bowt Jehoava? Wan reezn da-mi fi kanvins peepl dat Jehoava da wahn lovin Faada.​—Jan 17:25, 26.

7. Weh wi laan bowt Jehoava fahn di way hihn mi chreet ih Son?

⁷ Mek wi luk pahn weh wi laan bowt Jehoava fahn di way ih mi chreet ih Son, Jeezas. Jehoava mi aalwayz hyaa Jeezas pryaaz. Bot hihn neva jos hyaa Jeezas pryaaz, hihn mi ansa dehn. (Jan 11:41, 42) Noh mata weh chraiyalz Jeezas mi gaahn chroo, hihn mi aalwayz feel ih Faada lov ahn sopoat.​—Look 22:42, 43.

8. Eena weh wayz Jehoava mi gi Jeezas weh ih mi need?

⁸ Jeezas mi seh: “Di Faada weh gi laif sen mee an Ai di liv sayka hihn.” (Jan 6:57) Wen Jeezas mi seh dis, ih shoa dat hihn mi rekonaiz dat ih Faada da di Wan weh giv ahn laif ahn di Wan weh mi-di kip ahn alaiv. Jeezas mi ga kompleet chros eena ih Faada, ahn hihn mi giv Jeezas evriting weh ih mi need fi liv. Bot moa impoatant, Jehoava mi help Jeezas fi stay faytful tu ahn.​—Mach. 4:4.

9. How Jehoava mi shoa dat hihn da wahn lovin Faada tu Jeezas?

⁹ Bikaaz Jehoava da wahn lovin Faada, hihn mi mek shoar dat Jeezas noa dat ih ga ih Faada sopoat. (Mach. 26:53; Jan 8:16) Aldoa Jehoava neva protek Jeezas fahn evriting weh kuda mi hert ahn, Hihn  mi help ahn fi bayr op anda chraiyalz. Jeezas mi noa dat eniting weh hihn maita mi sofa wuda mi onli bee fi wahn lee wail. (Heeb. 12:2) Bikaaz Jehoava mi lov Jeezas, hihn mi lisn tu ahn, provaid fi ahn, chrayn ahn, ahn help ahn. (Jan 5:20; 8:28) Now, mek wi si how wi hevnli Faada shoa da sayhn kaina lov tu wee.

10. Akaadn tu Psalm 66:19, 20, how Jehoava shoa dat ih lov wi?

¹⁰ Jehoava lisn tu wi pryaaz. (Reed Psalm 66:19, 20.) * Hihn noh waahn wi stap pray tu ahn, insted, hihn inkorij wi fi pray wahn lat. (1 Tes. 5:17) Wee ku pray tu wi Gaad eni taim, noh mata wehpaat wi deh. Jehoava neva tu bizi fi lisn tu wi; hihn aalwayz pay atenshan tu wi pryaaz. Wen wi riyalaiz dat Jehoava lisn tu wi pryaaz, wi lov fi ahn wahn groa eevn moa. Di saamis mi seh: “Ai lov Jehoava, bikaaz hihn hyaa mai vais.”​—Ps. 116:1.

11. How Jehoava ansa wi pryaaz?

¹¹ Wi Faada, Jehoava, noh onli lisn tu wi pryaaz bot ih aalso ansa dehn. Di apasl Jan mi seh: “If wi aks [Gaad] eniting akaadn tu weh hihn waahn, ih lisn tu wi.” (1 Jan 5:14, 15) Af koars, Jehoava mait noh ansa wi pryaaz eena di way weh wee ekspek. Hihn noa weh bes fi wi, soh sohntaimz ih ansa mait bee no er hihn mait waahn wi wayt.​—2 Kor. 12:7-9.

12-13. Eena weh wayz wi hevnli Faada provaid fi wi?

¹² Jehoava provaid fi wi. Hihn du di saym ting weh ih aks evri singl pa fi du. (1 Tim. 5:8) Hihn provaid weh ih chiljren dehn need fi liv. Hihn noh waahn wi wori bowt weh wi wahn eet, weh wi wahn wayr, er wehpaat wi wahn liv. (Mach. 6:32, 33; 7:11) Bikaaz Jehoava da wahn lovin Faada, hihn mi aalso mek shoar dat wi wahn ga weh wi need eena di fyoocha.

¹³ Bot moas impoatant, Jehoava provaid weh wi need fi ga wahn gud rilayshanship wid ahn. Eena di Baibl, hihn tel wi da hoo hihn, how hihn waahn evriting weh hihn kriyayt fi bee, wai hihn kriyayt wi, ahn weh wahn hapm eena di fyoocha. Hihn aalso yooz wi payrents er adaz fi teech wi bowt hihn. Ahn hihn yooz di kangrigayshan eldaz an ada machoar bradaz ahn sistaz fi help wi soh dat wi kantinyu bee fi hihn fren. Pahn tap a dat, Jehoava teech wi chroo wi kangrigayshan meetinz, wehpaat wi laan lang wid wi spirichwal bradaz ahn sistaz. Dehnya da jos som a di wayz how Jehoava shoa dat ih reeli kay fi wi ahn how ih proov fi bee wahn Faada tu aala wi.—Ps. 32:8.

14. Wai Jehoava chrayn wi, ahn how hihn chrayn wi?

¹⁴ Jehoava chrayn wi. Wee da noh laik Jeezas, kaaz hihn mi perfek. Soh fi mek wi lovin Faada chrayn wi, hihn karek wi wen wi need it. Di Baibl seh dat Jehoava “karek dehn wan weh ih lov.” (Heeb. 12:6, 7) Jehoava karek er chrayn wi eena lata difrent wayz. Fi egzampl, wee mait reed sohnting eena di Baibl er hyaa sohnting da di meetin ahn riyalaiz dat wi need fi chaynj di way wi tink er ak. Er maybi di help weh wi need kohn fahn di eldaz. Noh mata how Jehoava karek wi, hihn aalwayz karek wi owta lov.—Jer. 30:11.

15. Eena weh wayz Jehoava help wi?

¹⁵ Jehoava help wi fi bayr op anda chraiyalz. Jos laik how wahn lovin faada  help ih pikni dehn joorin haad taimz, wi hevnli Faada dehdeh fi wi wen wi di goh chroo chraiyalz. Jehoava gi wi ih hoali spirit. Dis help fi protek wi fahn eniting weh mait damij wi rilayshanship wid hihn. (Look 11:13) Jehoava aalso help wi wen wi feel diskorij. Fi egzampl, hihn gi wi wahn wandaful hoap. Da hoap weh wi ga fi di fyoocha help wi fi bayr op anda chraiyalz. Tink bowt dis: Noh mata weh bad tingz hapm tu wi, wi lovin Faada wahn fiks eniting weh kaaz wi fi sofa. Wi prablemz noh wahn laas fareva, bot di blesinz weh Jehoava provaid wahn neva en.—2 Kor. 4:16-18.

16. Weh mi hapm wen Adam mi disobay ih hevnli Faada?

¹⁶ Wi si proof a Jehoava lov fi wi wen wi tink bowt weh ih mi du wen Adam mi disobay ahn. Wen Adam mi chooz fi disobay ih hevnli Faada, Adam an ih disendant dehn da-mi no langa paat a Jehoava famili. (Roam. 5:12; 7:14) Bot Jehoava mi du sohnting fi help Adam disendant dehn.

17. Afta Adam mi disobay Jehoava, weh Jehoava mi du rait away?

¹⁷ Jehoava mi ponish Adam, bot ih mi pramis fi help Adam disendant dehn. Jehoava mi rait away pramis dat hihn mi wahn provaid wahn way fi mek obeedyant hyoomanz bee paat a fi hihn famili agen. (Gen. 3:15; Roam. 8:20, 21) Jehoava mi mek dis pasabl chroo di ransom sakrifais a ih Son, Jeezas. Jehoava mi proov humoch ih reeli lov wi wen ih mi giv op ih Son fi sayv wi.—Jan 3:16.

18. Wai wi ku bee shoar dat Jehoava waahn wi az ih chiljren, eevn if wi mi schray fan ahn?

¹⁸ Aldoa wi noh perfek, Jehoava waahn wi eena ih famili, ahn hihn noh si wi az wahn berdn. Wi mait disapoint hihn er schray fahn hihn fi wahn wail, bot Jehoava  noh giv op pahn wi; hihn aalwayz hoap dat wi wahn kom bak tu ahn. Jeezas mi yooz di iloschrayshan a di prodigal son fi shoa humoch Jehoava lov ih chiljren. (Look 15:11-32) Di pa eena da iloschrayshan mi neva stap hoap dat wan day ih son wuda mi kom bak hoam. Wen di son mi fainali kohn bak hoam, di pa mi hapi fi welkom ahn bak. If wee mi schray fahn Jehoava bot wi ripentant, wee ku bee shoar dat wi lovin Faada redi ahn wilin fi welkom wi bak.

19. How Jehoava wahn fiks di damij weh Adam kaaz?

¹⁹ Wi Faada, Jehoava, wahn fiks aala di damij weh Adam kaaz. Afta Adam mi disobay Jehoava, Jehoava mi disaid fi adap 144,000 hyoomanz fi serv az king ahn prees da hevn wid ih Son, Jeezas. Eena di nyoo werl, Jeezas ahn di 144,000 wahn help obeedyant hyoomanz fi reech perfekshan. Afta dehn hyoomanz paas wahn fainal tes a obeedyans, Jehoava wahn mek dehn liv fareva. Wi Faada wahn bee hapi wen ih si di ert ful op wid ih perfek son ahn daata dehn. Dat wahn bee wahn reeli eksaitin taim!

20. Eena weh wayz Jehoava shoa wi dat hihn lov wi wahn lat, ahn weh wi wahn diskos eena di neks aatikl?

²⁰ Jehoava shoa dat ih lov wi wahn lat. Hihn da di bes Faada. Hihn lisn tu wi pryaaz, hihn provaid weh wi need fi liv, ahn hihn provaid weh wi need fi kip wahn kloas rilayshanship wid ahn. Hihn aalso chrayn ahn sopoat wi. Ahn pahn tap a dat, hihn wahn du wandaful tingz fi wi eena di fyoocha. Ih mek wi hapi fi noa dat wi Faada lov wi ahn waahn help wi! Eena di neks aatikl, wi wahn diskos sohn wayz how wee, az fi hihn chiljren, ku shoa dat wi tankful fi di lov weh hihn shoa wi.