STODI AATIKL 7
Wi Lov Wi Faada, Jehoava, Wahn Lat
“Di reezn wai wee lov, da kaa hihn mi lov wee fos.”—1 JAN 4:19.
SANG 3 Gi Wi Schrent, Hoap, ahn Kanfidens
WEH WI WAHN DISKOS? *
1-2. Wai ahn how Jehoava mi mek it pasabl soh dat wi ku bee paat a ih famili?
JEHOAVA invait wi fi bee paat a ih famili weh wership ahn. Dat da wahn wandaful invitayshan! Di membaz a dis famili da peepl weh don dedikayt dehn laif tu Hihn ahn weh put fayt eena di ransom sakrifais a ih Son. Wee da wahn hapi famili. Wi injai di bes laif now ahn wi rijais bikaaz wi ga di hoap fi liv fareva—weda da hevn er eena Paradais pahn ert.
2 Bikaaz Jehoava lov wi wahn lat, hihn mek it pasabl soh dat wi ku bee paat a fi hihn famili. Bot fi du dat, Jehoava mi haftu mek wahn big sakrifais. (Jan 3:16) Gaad mi “pay wahn hai prais” fi wi. (1 Kor. 6:20) Jehoava mi mek it pasabl fi wi ga wahn kloas rilayshanship wid ahn chroo di ransom sakrifais a ih Son, Jeezas. Wee ga di aana fi kaal di graytis Persn eena di yoonivers fi wee Faada. Ahn laik weh wi mi diskos eena di aatikl bifoa dis wan, Jehoava da di bes Faada.
3. Wen wi tink bowt aala di gud tingz weh Jehoava don du, weh kweschanz wi mait aks? (Si di baks “ Jehoava Noatis Mee?”)
3 Wi mait agree wid weh di Baibl raita mi aks: “Wid wat Ah wahn pay Jehoava bak fi aala di gud tingz weh ih du fi mi?” (Ps. 116:12) Di ansa da dat wi kuda neva pay bak wi hevnli Faada. Bot di lov weh hihn shoa wee mek wi lov ahn bak. Di apasl Jan mi rait: “Di reezn wai wee lov, da kaa hihn mi lov wee fos.” (1 Jan 4:19) Eena weh wayz wi ku shoa wi hevnli Faada dat wi lov ahn?
KIP KLOAS TU JEHOAVA
Wi shoa humoch wi lov wi hevnli Faada, Jehoava, wen wi kip kloas tu ahn eena pryaa, wen wi obay ahn, ahn wen wi help adaz fi lov ahn (Paragraaf 4-14)
4. Akaadn tu Jaymz 4:8, wai wi shuda chrai fi geh kloas tu Gaad?
4 Jehoava waahn wi fi kohn kloas tu hihn ahn fi kamyoonikayt wid hihn. (Reed Jaymz 4:8.) Hihn inkorij wi fi “pray aal di taim,” ahn hihn aalwayz lisn tu wi. (Roam. 12:12) Jehoava neva tu bizi er tu taiyad fi lisn tu wi. Ahn wee lisn tu hihn wen wi reed fi hihn Werd, di Baibl, lang wid ada poblikayshanz weh help wi fi andastan di Baibl beta. Wi aalso lisn tu wi hevnli Faada wen wi pay kloas atenshan da wi Kristyan meetinz. Jos laik how regyula kamyoonikayshan help chiljren fi kip kloas tu dehn payrents, sayhn way soh, regyula kamyoonikayshan wid Jehoava help wi kip kloas tu hihn.
Paragraaf 5
5. How wi ku du beta eena di way wi pray?
5 Tink bowt how fi yoo pryaaz tu Jehoava stan. Jehoava waahn yu poar owt yu haat tu hihn eena pryaa. Hihn waahn yu tel ahn how yu feel ahn weh yu tink. (Ps. 62:8) Wi shuda aks wiself dis kweschan: ‘Mai pryaaz song laik Ah di ripeet di sayhn ting oava an oava, er ih song laik dehn reeli di kohn fahn mi haat?ʼ Moa dan laikli, yu lov Jehoava wahn lat, ahn yu waahn kip yu rilayshanship wid hihn schrang. Bot if yu waahn du dat, yu need fi kamyoonikayt wid hihn regyula. Tel hihn yu persnal feelinz. Tel hihn weh mek yu hapi ahn weh mek yu sad. Bee kanfident dat yu ku aks Jehoava fi help yu.
6. Weh wi need fi du fi kip kloas tu wi hevnli Faada?
6 Fi kip kloas tu wi hevnli Faada, wi need fi shoa ahn dat wi tankful. Wi agree wid di saamis weh mi rait: “Yu don du wahn lata tingz, Oa Jehoava mi Gaad, yu wandaful werk ahn weh yu tink bowt wi. Notn ku kompyaa tu yoo; if Ai wuda chrai tel adaz bowt dehn er taak bowt weh yu don du, dehn wuda bee tu moch fi mek a ripeet!” (Ps. 40:5) Wee noh onli feel tankful tu Jehoava, wee du ahn seh tingz weh shoa dat wi tankful. Dis shoa dat wi difrent fahn wahn lata peepl tudeh. Moas peepl tudeh noh tankful fi aal weh Gaad du fi dehn. In fak, wan sain weh proov dat wi di liv eena “di laas dayz” da dat peepl noh wahn gi tanks fi notn. (2 Tim. 3:1, 2) Noh mek wi eva divelop da kaina atichood!
7. Weh Jehoava waahn wi du, ahn wai?
7 Payrents noh waahn dehn chiljren fi fait op wid wan anada, insted dehn waahn dehn chiljren fi bee frenz. Jos laik dat, Jehoava waahn aala ih chiljren fi get lang wid wan anada. In fak, di lov weh wi ga fi wan anada da weh shoa dat wee da chroo Kristyanz. (Jan 13:35) Wi agree wid di saamis weh mi rait: “Da wahn gud ahn plezant ting wen bradaz liv tugeda eena yooniti!” (Ps. 133:1) Wen wi lov wi bradaz ahn sistaz, wi shoa Jehoava dat wi lov hihn. (1 Jan 4:20) Ih soh wandaful fi bee paat a wahn famili a bradaz ahn sistaz weh “gud tu wan anada” ahn weh ga “wahn waam, kain haat fi wan anada”!—Ifee. 4:32.
WEN YU OBEEDYANT, IH SHOA DAT YU LOV JEHOAVA
Paragraaf 8
8. Akaadn tu 1 Jan 5:3, wat da di moas impoatant reezn wai wi obay Jehoava?
8 Jehoava waahn chiljren fi obay dehn payrents, ahn hihn waahn wee fi obay hihn tu. (Ifee. 6:1) Hihn dizerv wi obeedyans bikaaz hihn da di Wan weh kriyayt wi ahn hihn da di Wan weh di kip wi alaiv. Bot, di moas impoatant reezn wai wi obay Jehoava da bikaaz wi lov ahn. (Reed 1 Jan 5:3.) Eevn doa wi ga lat moa reezn wai wi shuda obay Jehoava, hihn noh foas wi fi obay ahn. Jehoava kriyayt wi wid di abiliti fi mek wi oan disizhanz, soh hihn hapi wen wi chooz fi obay hihn bikaaz wi lov ahn.
9-10. Wai ih impoatant fi mek wi noa Gaad standadz an obay dehn?
9 Payrents mek roolz fi protek dehn chiljren kaaz dehn waahn dehn chiljren fi bee sayf. Wen chiljren obay di roolz weh dehn payrents set, dehn shoa dat dehn chros ahn rispek dehn payrents. Soh ih eevn moa impoatant dat wee noa an obay wi hevnli Faada standadz. Wen wi du dat, wi shoa Jehoava dat wi lov ahn rispek ahn, ahn wi aalso protek wiself. (Isa. 48:17, 18) Bot, peepl weh rijek Jehoava ahn fi hihn standadz onli en op di hert dehnself.—Gal. 6:7, 8.
10 Wen wi liv eena wahn way weh pleez Jehoava, wi geh protekshan fahn tingz weh ku hert wi eena wahn fizikal an imoashanal way. Wi aalso geh protekshan fahn tingz weh ku damij wi rilayshanship wid Jehoava. Jehoava noa weh bes fi wi. Aurora, fahn di United States, seh: “Ai noa fi shoar dat wen wi obay Jehoava, wi wahn aalwayz ga di bes laif pasabl.” Weh Aurora mi seh da chroo fi aala wi. How yoo benifit wen yu obay Jehoava lovin dairekshanz?
11. Weh pryaa help wi fi du?
11 Pryaa help wi fi bee obeedyant eevn wen ih noh eezi fi du. Sohntaim, wi mait fain it haad fi obay Jehoava bikaaz wi da sinaz, bot wi need fi aalwayz chrai haad fi noh disobay ahn. Di saamis mi bayg Jehoava seh: “Ster op wahn wilin dizaiya eena mi fi obay yoo.” (Ps. 51:12) Denise, hoo da wahn regyula painyaa, seh: “Wen Ai fain it haad fi obay wan a Jehoava koman dehn, Ah pray fi di schrent fi du weh rait.” Wee ku bee shoar dat Jehoava wahn aalwayz ansa wahn pryaa laik dat.—Look 11:9-13.
HELP ADAZ FI LOV WI FAADA, JEHOAVA
12. Akaadn tu Ifeezhanz 5:1, weh wi shuda du?
12 Reed Ifeezhanz 5:1. Bikaaz wee da ‘Jehoava pikni weh ih lov fi chroo,ʼ wee du wi bes fi chrai kapi hihn. Wi kapi hihn wen wi shoa lov tu adaz, wen wi kain tu adaz, ahn wen wi fergiv adaz. Wen peepl weh noh noa Gaad si wi gud kandok, dat mait moov dehn fi waahn laan moa bowt Jehoava. (1 Peet. 2:12) Kristyan payrents ga gud reezn fi kapi Jehoava egzampl eena di way dehn chreet dehn chiljren. Wen payrents du dis, dehn chiljren mait aalso waahn bee Jehoava fren.
Paragraaf 13
13. Weh wi need fi du fi bee brayv?
13 Wahn chail naamali prowd ahn hapi fi taak bowt ih pa. Sayhn way soh, wee prowd a wi hevnli Faada, Jehoava, ahn wi waahn adaz noa bowt ahn. Deep dong, aala wi feel laik how King Dayvid mi feel. Hihn mi rait: “Ai wahn boas bowt Jehoava.” (Ps. 34:2) Bot wat if wi tu shai fi taak bowt Jehoava? How wi ku geh brayv? Wi ku geh brayv wen wi foakos pahn how hapi Jehoava wahn bee if wi taak bowt ahn. Wi ku aalso geh brayv wen wi tink bowt humoch adaz wahn benifit if dehn laan bowt Jehoava. Hihn mi help di Kristyanz eena Baibl taimz fi bee brayv, ahn hihn wahn help wee tu. Yes, Jehoava wahn gi wi di korij weh wi need.—1 Tes. 2:2.
14. Wat da sohn reezn wai ih impoatant fi mek disaiplz?
14 Jehoava noh prejudis, ahn hihn hapi wen ih si wi shoa lov tu adaz, noh mata wehpaa dehn kohn fram. (Aks 10:34, 35) Wan a di bes wayz fi shoa lov tu adaz da fi preech tu dehn. (Mach. 28:19, 20) Weh ku bee di rizolts if wi du dis werk? Peepl weh lisn tu wi ku mek dehn laif beta now ahn dehn ku ga di hoap fi liv fareva eena Paradais.—1 Tim. 4:16.
LOV WI FAADA AHN BEE HAPI
15-16. Weh reeznz wi ga fi bee hapi?
15 Jehoava da wahn lovin Faada soh hihn waahn ih famili fi bee hapi. (Isa. 65:14) Eevn doa wi di goh chroo haad taimz, wi ga wahn lata reezn fi bee hapi. Fi egzampl, wi shoar dat wi hevnli Faada lov wi wahn lat. Wee ga wahn karek andastandin a Gaad Werd, di Baibl. (Jer. 15:16) Ahn wi da paat a wahn speshal famili weh lov Jehoava, weh lov ih hai moaral standadz, ahn weh lov wan anada.—Ps. 106:4, 5.
16 Wee ku aalwayz bee hapi bikaaz wi shoar dat laif wahn geh beta eena di fyoocha. Wi noa dat soon Jehoava wahn geh rid a aal wikid peepl ahn dat hihn wahn yooz ih Kingdom fi mek di hoal ert wahn paradais. Wi aalso ga di wandaful hoap dat Jehoava wahn rezorek wi famili ahn frenz weh ded. (Jan 5:28, 29) Dat wahn bee wahn wandaful taim! Ahn moas impoatant, wi ku bee shoar dat soon evribadi da hevn ahn pahn ert wahn gi wi lovin Faada, Jehoava, di aana, di prayz, ahn di wership weh hihn dizerv.
SANG 12 Wi Grayt Gaad, Jehoava
^ párr. 5 Wi noa dat wi Faada, Jehoava, lov wi wahn lat ahn hihn mek wi bee paat a fi hihn famili weh wership ahn. Dat da wan reezn wai wi lov hihn. How wi ku shoa wi Faada dat wi lov ahn? Eena dis aatikl, wi wahn diskos sohn spesifik tingz weh wi ku du.
