1, 2. (a) How sohn Kristyan payrents feel wen dehn pikni waahn geh baptaiz? (b) Wai di brada aks di nyoo disaipl dehn if dehn don dedikayt dehn laif tu Jehoava? (Koment pahn di picha da di biginin a dis aatikl.)

WAHN yong gyal weh naym Maria ahn sohn ada bradaz mi-di stan op eena di front roa a di aadyans redi fi geh baptaiz. Eena wahn lowd ahn klyaa vais dehn ansa di too kweschan weh di brada aks. Rait afta dat, dehn geh baptaiz.

² Maria payrents mi prowd a dehn lee gyal disizhan fi dedikayt ih laif tu Jehoava ahn geh baptaiz. Bot stilyet, ih ma mi-di wanda if Maria mi tu yong fi geh baptaiz, er if shee reeli andastan how seeryos dis disizhan weh shee di mek, er if ih wuda bee beta mek ih wayt lee langa? Dehnya da som kweschanz weh lata payrents aks dehnself wen dehn pikni shoa di dizaiya fi geh baptaiz. (Eccl. 5:5) Aftaraal, dedikayshan ahn baptizm da di moas impoatant steps wahn  Kristyan need fi mek.—Koment pahn di baks “ Yu Don Dedikayt Yu Laif tu Jehoava?”

3, 4. (a) How di apasl Peeta mi shoa dat baptizm da wahn impoatant step? (b) Wai di skripcha seh dat baptizm da laik di aak weh Noawa mi bil?

³ Wen di apasl Peeta mi-di taak bowt baptizm, ih mi akchwali di taak bowt di aak fahn eena Noawa day. Ih mi seh: ‘Baptizm di sayv yu.ʼ (Reed 1 Peeta 3:20, 21.) Di aak da-mi wahn proof dat Noawa mi dedikayt ihself fi du weh Gaad mi waahn ih du. Noawa mi faytful tu di asainment weh Jehoava mi gi ahn. Da mi dehnya tingz weh Noawa mi du weh mi mek hihn ahn ih famili geh sayv joorin di Flod. Weh wi ku laan fahn weh Peeta mi seh?

⁴ Di aak weh Noawa mi bil mi shoa humoch fayt Noawa mi gat. Wen wi geh baptaiz, wi di gi proof dat wi don dedikayt wi laif tu Jehoava ahn dat wi ga fayt eena ih son, Jeezas Krais. Peepl weh don dedikayt dehn laif tu Gaad di fala Noawa egzampl ahn du weh Gaad tel dehn fi du. Jos laik how Gaad mi sayv Noawa joorin di Flod, laayal servants weh don baptaiz wahn geh sayv wen dis wikid werl kohn tu wahn en. (Mk 13:10; Rev. 7:9, 10) Dats wai dedikayshan ahn baptizm veri impoatant. Wahn persn weh put aaf baptizm ku looz owt pahn di apachooniti fi liv fareva eena di fyoocha.

5. Weh wi wahn diskos eena dis aatikl?

⁵ Bikaaz wi noa dat baptizm impoatant, wi shuda aks wiself dehnya chree kweschanz: ‘Weh di Baibl ga fi seh bowt baptizm? Wat da di step dehn wi fi tek bifoa wi geh baptaiz? Wai wahn Baibl teecha need fi noa dat baptizm  impoatant espeshali wen ih di teech ih pikni er wahn Baibl styoodent?ʼ

6, 7. (a) Wai Jan mi baptaiz peepl? (b) Wat da-mi di moas impoatant baptizm weh Jan mi du?

⁶ Di fos taim wi reed bowt baptizm eena di Baibl da di wan wid Jan di Baptis. (Mach. 3:1-6) Di peepl weh Jan mi baptaiz mi shoa dat dehn ripent fahn dehn sinz gens di laa weh Gaad mi gi Moaziz. Bot di moas impoatant baptizm weh Jan mi du neva ga notn fi du wid sin. Jan mi ga di privilij fi baptaiz Jeezas, di perfek Son a Gaad. (Mach. 3:13-17) Jeezas neva ga no sin, soh hihn neva need fi ripent. (1 Peet. 2:22) Fi hihn baptizm mi meen dat hihn wilin fi du weh Gaad waahn ih du.—Heeb. 10:7.

⁷ Wail Jeezas mi deh pahn di ert, fi hihn disaipl dehn yoostu baptaiz peepl tu. (Jan 3:22; 4:1, 2) Jos laik di peepl weh Jan mi baptaiz, di peepl weh di apasl dehn mi baptaiz mi shoa dat dehn ripent fahn dehn sinz weh dehn komit gens di laa weh Gaad mi gi Moaziz. Bot afta Jeezas mi rezorek ahn gaan bak da hevn, fi hihn falowaz mi baptaiz fi wahn difrent reezn.

8. (a) Weh Jeezas mi koman ih falowaz fi du bifoa hihn gaan bak da hevn? (b) Eksplayn wai wahn Kristyan geh baptaiz.

⁸ Afta Jeezas det ahn rezorekshan, hihn mi apyaa tu wahn krowd a moa dan 500 peepl, fahn man tu pikni mi dehdeh. Da mosi pahn da okayzhan weh hihn mi seh: “Soh unu goh ahn chrayn peepl fahn owta aala di nayshan dehn fi bee mi disaipl dehn. Baptaiz dehn eena di naym a di Faada, di Son ahn di Hoali Spirit, ahn teech dehn fi du evriting weh Ah tel unu.” (Mach. 28:19, 20; 1 Kor. 15:6) Ih pasabl dat honjridz a Jeezas disaipl mi dehdeh wen Jeezas giv di koman fi goh preech ahn baptaiz peepl. Da rait dehsoh Jeezas mi seh dat baptizm da sohnting weh evribadi weh waahn bee wahn futstep falowa a Krais shuda du. (Mach. 11:29, 30) Enibadi weh waahn serv Gaad eena di rait way haftu get fi noa Jeezas an aksep how hihn wahn mek Gaad perpos kohn chroo. Wen da persn du dat, den ih kwalifai fi geh baptaiz. Dis da di onli kaina baptizm weh Gaad aksep. Di Baibl ga nof proof dat di bradaz weh mi liv eena di fos senchri mi andastan di meenin a baptizm. Ahn soh, dehn neva hoal bak fahn geh baptaiz.—Aks 2:41; 9:18; 16:14, 15, 32, 33.

9, 10. Weh wi ku laan fahn di baptizm a di man weh da-mi fahn Ethiopia ahn fahn di apasl Paal?

⁹ Reed Aks 8:35, 36. Tek fi egzampl, di man weh da-mi fahn Ethiopia weh mi-di goh bak hoam fahn Jeroosalem. Jehoava aynjel mi mek Filip taak tu di man “ahn tel ahn bowt di Gud Nyooz a Jeezas Krais.” Di ansa weh di man mi giv, mi shoa humoch hihn mi apreeshiayt di Baibl chroot weh ih mi laan. Hihn mi waahn du tingz di way Gaad mi waahn, soh rait away hihn geh baptaiz.

¹⁰ Di sekant egzampl da di apasl Paal. Bifoa Jeezas apoint ahn az wahn apasl, hihn da-mi paat a wahn nayshan weh mi bilangz tu Gaad. Bot di Jooz mi looz dehn speshal rilayshanship wid  Jehoava. Paal mi tek ih Jooish rilijan tu haat bot ih laan sohnting weh mi beta dan dat. Afta Jeezas mi don gaan bak da hevn, ih apyaa tu Paal. How ih mi rispan? Ih mi aksep help fahn wahn disaipl weh naym Ananaiyas. Den weh Paal du? Di Baibl ansa seh: “Ih get op ahn geh baptaiz.” (Aks 9:17, 18; Gal. 1:14) Wen Paal mi laan di chroot bowt Jeezas, ih neva ways taim. Rait away ih geh baptaiz.—Reed Aks 22:12-16.

11. (a) Weh ku help wahn Baibl styoodent fi waahn geh baptaiz? (b) How wi feel wen wi si di nyoo disaipl dehn di geh baptaiz?

¹¹ Da di saym wid Baibl styoodents tudeh, noh mata if dehn yong er oal. Dehn wan weh ga fayt ahn reeli apreeshiayt di chroot fahn di Baibl, redi fi dedikayt dehn laif tu Jehoava ahn kyaahn wayt fi geh baptaiz. Wi luk faawod fi di baptizm taak da evri asembli ahn kanvenshan. Jehoava Witnisiz hapi wen wahn Baibl styoodent aksep di chroot ahn mek proagres fi geh baptaiz. Ahn Kristyan payrents feel da sayhn hapinis wen dehn si dehn chiljren eena di front roa a di aadyans, redi fi geh baptaiz lang wid di ada nyoo disaiplz. Joorin di 2017 servis yaa, moa dan 284,000 peepl mi geh baptaiz. (Aks 13:48) Dehndeh nyoo disaiplz mi andastan klyaa-wan, dat wahn chroo Kristyan haftu geh baptaiz. Wat da di step dehn weh dehn need fi tek fi geh baptaiz?

12. Wat da sohn step wahn Baibl styoodent need fi tek bifoa ih geh baptaiz?

¹² Bifoa wahn Baibl styoodent ku geh baptaiz ih fi bil op ih fayt eena di chroo nalij a Gaad, Ih perpos, an Ih provizhan fi sayv wi. (1 Tim. 2:3-6) Da kaina fayt help mek di styoodent rijek eni rang kandok weh Gaad hayt, ahn bihayv di way Gaad ekspek. (Aks 3:19) Soh ih klyaa dat nobadi ku reeli dedikayt dehn laif tu Gaad if dehn di praktis tingz weh noh wahn mek dehn bee paat a Gaad kingdom. (1 Kor. 6:9, 10) Bot dehn haftu du moa dan jos stik tu Jehoava hai moaral standadz. Sombadi weh waahn du gud wahn deh da di kangrigayshan meetin dehn ahn tek paat eena di preechin werk fi bring een nyoo disaiplz. Jeezas mi seh dat ih chroo disaipl dehn mi wahn du dis werk. (Aks 1:8) Da onli afta sombadi don tek dehnya steps, ih ku dedikayt ih laif tu Jehoava ahn geh baptaiz.

13. Wai wahn Baibl teecha fi memba dat baptizm da sohnting wahn Kristyan need fi du?

¹³ Az wi help wi chiljren ahn Baibl styoodents fi proagres, wi shuda memba dat if sombadi waahn bee wahn chroo Kristyan ih haftu geh baptaiz. If da goal klyaa tu wi, den ih wahn bee klyaa wen wi di teech wi Baibl styoodent. Wen di tapik a dedikayshan ahn baptizm kom op, wi noh wahn hoal bak fahn tel dehn weh dehn need fi du. Wi du dis bikaaz wi waahn help wi chiljren ahn Baibl styoodents fi werk haad fi geh baptaiz!

14. Wai wi noh presha nobadi fi geh baptaiz?

¹⁴ Af koars, enibadi weh waahn geh baptaiz noh fi mek dehn payrent, Baibl teecha, er enibadi els eena di kangrigayshan presha dehn fi geh baptaiz. Dat da noh how Jehoava du tingz. (1 Jan 4:8) Insteda dat, wi fi teech dehn dat wahn persnal rilayshanship  wid Gaad veri veri impoatant. Wen wahn styoodent apreeshiayt di chroot fahn di Baibl, ahn ga di dizaiya fi help adaz, dat wahn help ahn fi waahn geh baptaiz.—2 Kor. 5:14, 15.

15, 16. (a) Peepl haftu ga wahn sertn ayj fi geh baptaiz? Eksplayn yu ansa. (b) Wai wahn Baibl styoodent haftu geh baptaiz az wan a Jehoava Witnisiz eevn if ih mi don baptaiz eena wahn difrent rilijan?

¹⁵ Baptizm noh bays pahn wahn persn ayj bikaaz som styoodent tek moa taim dan adaz fi machoar. Som geh baptaiz wen dehn yong yong ahn dehn stil stay faytful tu Jehoava. Ahn dehn ga adaz weh disaid fi geh baptaiz wen dehn lee oalda—som a dehn, oava 100 yaaz oal!

¹⁶ Wahn oalda Baibl styoodent mi aks ih teecha if ih impoatant fi mek ih geh baptaiz agen sins shee mi don baptaiz eena wahn difrent rilijan. Soh di teecha fain sohn spesifik skripchaz an ih gaan oava dehn wid di styoodent. Di styoodent mi geh fi andastan weh di Baibl ga fi seh bowt dat, soh ih disaid fi geh baptaiz eevn doa shee mi eena ih 70ʼs. Akaadn tu di Baibl, wi need fi ga chroo nalij a Gaad fi mek wi ku geh baptaiz. Soh nyoo disaiplz stil need fi geh baptaiz eevn if dehn mi don geh baptaiz eena wahn difrent rilijan.—Reed Aks 19:3-5.

17. Weh wi need fi tink bowt pahn di day wi geh baptaiz?

¹⁷ Da chroo, di day wi geh baptaiz da wahn hapi day fi wee ahn wi need fi tek taim fi meditayt pahn di pramis weh wi mek tu Jehoava. Dat da di reezn wai Jeezas mi seh dat fi bee wahn disaipl a Krais da laik wi di kehr wahn yoak. Jeezas disaipl dehn “noh wahn liv fi pleez dehnself nohmoh. Insteda dat, dehn wahn liv fi pleez Krais weh mi ded fi dehn, ahn rayz op bak fahn di ded fi sayka dehn.”—2 Kor. 5:15; Mach. 16:24.

18. Wat da sohn kweschanz wi wahn diskos eena di neks aatikl?

¹⁸ Maria mami mosi mi-di tink bowt aala dehnya tingz wen ih aks ihself di kweschan dehn weh deh da di biginin a dis aatikl. If yoo da wahn payrent, maybi yu aks yuself dehnya kweschan: ‘Mai pikni reeli redi fi geh baptaiz? Mai pikni ga inof nalij fahn di Baibl fi dedikayt ih laif tu Jehoava? Weh kaina goalz mai pikni ga wen ih kohn tu ejukayshan ahn werk? Wat if mai pikni geh baptaiz ahn den komit wahn seeryos sin?ʼ Eena di neks aatikl wi wahn diskos di ansaz tu dehnya kweschanz ahn wi wahn si how Kristyan payrents ku bee balans wen ih kohn tu baptizm.