Tudeh, nobadi ku bee shoar how Paal mi akchwali luk. Soh di picha dehn eena wi poblikayshanz da jos art werk.

Bot, infamayshan deh weh tel wi how Paal mi luk. Fi egzampl, di Maach 1, 1902 Zionʼs Watch Tower, menshan dat di buk ‘Acts of Paul and Thecla,ʼ weh sombadi mi rait rong di yaa 150 A. D., gi wi infamayshan bowt how Paal maita mi luk. Da buk tel wi dat Paal da-mi wahn shaat man wid baal hed, ahn boa fut. Ih aalso tel wi dat ih mi luk schrapin, wid aiy broaz weh jain op az wan, ahn dat ih mi gat wahn lang noaz.

Wahn dikshineri weh naym The Oxford Dictionary of the Christian Church (1997 edition) seh dat di infamayshan fahn dis buk mi praabli gat een sohn chroot fahn hischri. The Acts of Paul and Thecla da-mi wahn buk weh peepl bak den mi rispek, ahn wi noa dat bikaaz 80 manyuskrip stil egzis. Soh den, di pichaz a Paal eena wi poblikayshanz goh lang wid weh hischri seh.

Bot memba dat dehn ga ada tingz weh moa impoatant dan how Paal mi luk. Di Baibl tel wi dat wen Paal mi deh eena ih minischri, sohn peepl mi kritisaiz ahn seh dat ih mi luk week, ahn dat di werd dehn weh ih seh noh meen notn. (2 Kor. 10:10) Da mi Jeezas mirakl weh mek Paal ton intu wahn Kristyan. Wi ku aalso tink bowt weh aal Paal mi du az ‘di wan weh [Jeezas] pik fi goh tel peepl weh da noh Joo bowt [hihn].ʼ (Aks 9:3-5, 15; 22:6-8) Lang wid dat, tink bowt humoch wi benifit fahn di Baibl buk dehn weh Paal mi rait.

Paal neva prayz ihself fi eniting weh ih mi du bifoa ih da-mi wahn Kristyan, an ih neva rait dong notn bowt how ih mi luk. (Aks 26:4, 5; Fil. 3:4-6) Hihn mi seh: “Ai da di lees a aal di ada apasl dehn. Ai noh eevn fit fi mek dehn kaal mee wahn apasl.” (1 Kor. 15:9) Den laytaraan ih seh: “Aala Gaad peepl beta dahn mee. Stilyet, Gaad bles mee ahn pik mee fi goh tel di peepl weh da noh Joo bowt aal di blesin dehn weh Krais di gi ih peepl. Dehn blesin soh gud dat wi kyaahn eevn andastan it.” (Ifee. 3:8) Soh den, di mesij weh Paal mi tel peepl mi faar moa impoatant dan eni kweschanz wi mait gat bowt how hihn mi akchwali luk.