1. Weh Kristyan payrents waahn bee shoar a bifoa dehn chiljren geh baptaiz?

WAHN sista weh naym Blossom Brandt mi eksplayn weh mi leed op tu ih baptizm. Shee seh: “Fi monts Ah mi kip aan di tel Dadi ahn Mami dat Ah mi waahn geh baptaiz, ahn wahn lata taimz dehn mi taak tu mi bowt it. Dehn mi waahn mek shoar Ah andastan how seeryos mi disizhan. Pahn Disemba 31, 1934, di speshal day eena mi laif mi fainali kohn.” Kristyan payrents tudeh feel di saym way, dehn waahn help dehn chiljren mek waiz disizhanz. Fi put aaf baptizm er wayt tu lang ku afek chiljren eena wahn spirichwal way. (Jay. 4:17) Ih waiz fi mek payrents bee shoar dat bifoa dehn chiljren geh baptaiz, dehn redi fi tek aan di rispansabiliti az wahn disaipl a Krais.

2. (a) Weh sohn serkit oavaseeya kansaan bowt? (b) Weh wi wahn diskos eena dis aatikl?

² Sohn serkit oavaseeya seh dehn kansaan bowt di yong peepl weh dehn meet weh da don teenayja er deh eena dehn erli 20ʼs ahn weh groa op wid Kristyan payrents bot dehn noh baptaiz yet. Fi di moas paat, dehnya yong peepl goh da  meetinz ahn goh owt eena di minischri. Dehn si dehnself az wan a Jehoava Witnisiz. Yet, fi sohn reezn dehn hoal bak fahn dedikayt dehn laif tu Jehoava ahn geh baptaiz. Weh ku bee di reezn fi dis? Sohntaim, da di payrents diskorij dehn fahn geh baptaiz. Eena dis aatikl, wi wahn diskos foa tingz weh mek Kristyan payrents hoal bak dehn chiljren fahn geh baptaiz.

3. Weh Blossom payrents mi-di wori bowt?

³ Wi ku andastan wai Blossom payrents mi-di wori; dehn mi waahn bee shoar dat dehn daata mi oal inof fi andastan how seeryos baptizm ahn weh ih meen fi bee wahn baptaiz servant a Jehoava. How payrents ku noa if dehn chiljren redi fi geh baptaiz?

4. How Jeezas werdz da Machyu 28:19, 20 help payrents wen dehn di teech dehn chiljren?

⁴ Reed Machyu 28:19, 20. Di laas aatikl wi diskos tel wi dat di Baibl noh giv wahn spesifik ayj fi geh baptaiz. Bot payrents ku benifit wen dehn tink bowt weh ih meen fi mek wahn disaipl. Machyu 28:19 seh dat wi fi chrayn peepl fi bee Jeezas disaipl. Dis help wi fi andastan dat wen wahn persn teech, ih fi ga di goal fi help da styoodent bee wahn disaipl a Krais. Di res a Baibl vers tel wi dat wahn disaipl da wahn persn weh laan an andastan di teechin dehn fahn Jeezas, ahn den ih noh mek notn stap ahn fahn fala dehn. Soh den, di goal fi Kristyan payrents shud bee fi help dehn chiljren fahn smaal fi geh baptaiz az wahn disaipl a Krais. Af koars, wahn reeli yong pikni noh kwalifai fi geh baptaiz. Bot di Baibl shoa dat eevn yong chiljren kud geh fi andastan di chroot fahn di Baibl.

5, 6. (a) Weh wi laan bowt Timoti baptizm fahn di Baibl? (b) How payrents ku help dehn chiljren?

⁵ Timoti da-mi wahn disaipl weh mi mek di chroot ih oan fahn yong. Di apasl Paal mi seh dat Timoti mi laan di chroot fahn smaal. Eevn doa Timoti pa neva wership Jehoava, fi hihn Jooish ma ahn grama mi help ahn apreeshiayt di chroot fahn di Skripchaz, di way di Jooish peepl mi andastan dehn. Sayka dat, hihn mi gat schrang fayt. (2 Tim. 1:5; 3:14, 15) Bai di taim hihn da-mi wahn teenayja er deh eena ih erli 20ʼs, Timoti da-mi wahn Kristyan disaipl weh mi don kwalifai fi speshal privilij eena di kangrigayshan.—Aks 16:1-3.

⁶ Af koars, evri pikni difrent; noh aala dehn machoar di saym taim. Som a dehn fahn di way dehn tink an ak shoa dat dehn machoar ahn seh dat dehn waahn geh baptaiz fahn yong. Adaz mait need fi wayt lee langa bifoa dehn geh baptaiz. Sayka dat, payrents noh fi presha dehn chiljren fi geh baptaiz. Insteda dat, dehn help eech wan a dehn pikni fi mek proagres. Payrents ku feel hapi wen dehn pikni tek tu haat weh di Baibl seh fi ak eena wahn waiz way. (Reed Proverbs 27:11.) * Pahn di ada han, payrents noh waahn faget wat da dehn goal—fi mek dehn chiljren bee wahn Kristyan disaipl. Soh den, payrents fi aks dehnself dis kweschan, ‘Mi pikni ga inof nalij fahn di Baibl fi mek wahn dedikayshan tu Gaad ahn geh baptaiz?ʼ

7. Wahn persn weh waahn geh baptaiz need fi ga wahn lata nalij fahn di Baibl?

⁷ Sins payrents da di teecha dehn eena di famili, dehn waahn mek shoar dat dehn chiljren ga wahn salid fongdayshan a nalij bifoa dehn dedikayt dehnself. Bot wahn persn noh need fi gat wahn lata nalij bifoa ih ku dedikayt ihself ahn geh baptaiz. Afta wahn persn geh baptaiz, ih stil need fi kantinyu fi tek een nalij fahn di Baibl. (Reed Koloashanz 1:9, 10.) Humoch nalij wahn persn need fi gat?

8, 9. Weh wi ku laan fahn di stoari bowt Paal ahn di jayla?

⁸ Di ekspeeryens a wahn famili eena di Baibl help payrents fi noa humoch nalij wahn persn need fi gat. (Aks 16:25-33) Wen Paal mi deh pan ih sekant mishineri chrip, bowt di yaa 50 C.E., ih mi vizit Filipai. Wail dehn mi dehdeh, dehn mi ares Paal ahn Sailas ahn chroa dehn eena jayl. Eena di nait, wahn ertkwayk shayk di jayl rait dong tu di fongdayshan ahn di doa dehn oapm op. Di jayla mi tink dat aala di prizna dehn mi get weh, soh ih mi wahn kil ihself, bot saym taim Paal mi hala aata ahn. Paal ahn Sailas mi preech di werd a Gaad tu di jayla an ih famili. Dehn mi apreeshiayt di chroot weh dehn mi laan bowt Jeezas, ahn dis mi moov dehn fi geh baptaiz. Weh wi ku laan fahn dis stoari?

⁹ Ih pasabl dat dis jayla yoostu bee wahn soalja weh mi ritaiya fahn di aami. Hihn neva noa di Skripchaz gud. Soh, fi get di nalij fahn di Skripchaz, hihn mi need fi laan di baysik chroot a di Baibl, andastan weh ih meen fi bee wahn servant a Gaad, ahn den obay di teechin dehn fahn Jeezas. Eena wahn shaat taim, hihn mi kohn fi apreeshiayt di baysik nalij weh ih mi get fahn di Skripchaz ahn dis mi moov ahn fi geh baptaiz. Wi ku bee shoar dat afta ih mi geh baptaiz ih mi kantinyu fi tek een nalij bowt Gaad. Wen payrents tink bowt dis egzampl, weh dehn ku du wen dehn pikni shoa dat dehn apreeshiayt di baysik chroot fahn di Baibl ahn shoa dat dehn andastan weh ih meen fi dedikayt dehnself ahn geh baptaiz? Kristyan payrents ku inkorij dehn pikni fi taak tu di eldaz eena di kangrigayshan fi si if dehn kwalifai fi geh baptaiz. * Laik ada baptaiz disaipl, ih wahn kantinyu fi laan moa bowt di perpos a Jehoava fi di res a ih laif.—Roam. 11:33, 34.

10, 11. (a) Weh sohn payrents tink da di bes ting fi dehn pikni du? (b) Wat payrents fi mek shoar kom fos eena dehn pikni laif?

¹⁰ Sohn payrents feel laik di bes ting fi dehn son er daata du da fi put aaf baptizm ahn den geh wahn haiya ejukayshan ahn wahn gud jab. Dehn mait meen gud, bot yu tink dat wahn help dehn pikni fi ga reel sokses? Yu tink dat da weh di Baibl teech? Weh Jehoava inkorij wi fi du?—Reed Ecclesiastes 12:1. *

¹¹ Ih impoatant fi memba dat dis werl, ahn di tingz dehn weh eena di werl, goh gens Jehoava ahn di way hihn tink. (Jay. 4:7, 8; 1 Jan 2:15-17; 5:19) Wahn  kloas rilayshanship wid Jehoava da di bes ting fi help yu pikni stan op gens Saytan an ih werl. Wen wahn payrent put weh dis werl ga fi aafa fos eena fi dehn laif, ih ku kanfyooz ih pikni. An ih ku afek dehn pikni rilayshanship wid Jehoava. Lovin Kristyan payrents wudn waahn dis werl teech dehn pikni wat da sokses. Wi onli ku gat reel jai ahn sokses wen wi put Jehoava fos eena wi laif.—Reed Psalm 1:2, 3. *

12. Wai sohn payrents diskorij dehn pikni fahn geh baptaiz?

¹² Wahn sista mi eksplayn di reezn wai ih mi diskorij ih daata fahn geh baptaiz. Shee seh: “Ah feel shaym fi seh dat di mayn reezn Ah diskorij mi daata fahn geh baptaiz, da bikaaz Ah frayd dat ih geh disfeloship.” Laik da sista, sohn payrents feel laik ih beta fi dehn pikni put aaf baptizm til dehn groa op ahn geh machoar. (Gen. 8:21; Prov. 22:15) Sohn payrents mait seh, ‘Az lang az mai pikni noh geh baptaiz, ih kyaahn geh disfeloship.ʼ Wai dis kaina tinkin ku fool wi?—Jay. 1:22.

13. Da wen wahn persn rispansabl tu Jehoava fi ih akshanz?

¹³ Wi kud andastan wai payrents noh waahn dehn pikni geh baptaiz til dehn machoar inof fi dedikayt dehnself. Bot, ih wuda bee wahn mistayk fi tink dat yu pikni noh rispansabl tu Jehoava fi ih akshanz til ih geh baptaiz. Wai wi seh dat? Weda er nat wahn persn rispansabl tu Jehoava fi ih akshanz, noh pen pan if ih baptaiz er nat. Wi pikni rispansabl fi dehn akshanz tu Jehoava az soon az dehn noa weh rait fahn weh rang akaadn tu Jehoava. (Reed Jaymz 4:17.) Soh insteda diskorij dehn pikni fahn geh baptaiz, payrents chrai haad fi teech dehn pikni bai dehn gud egzampl. Ahn fahn dehn pikni smaal, payrents werk haad fi teech dehn fi apreeshiayt Jehoava hai moaral standadz. (Look 6:40) Da wahn protekshan fi yu pikni wen dehn liv di way Jehoava tel dehn fi liv.—Isa. 35:8.

14. How eldaz ku help payrents fi inkorij dehn chiljren reech di goal fi geh baptaiz?

¹⁴ Wen kangrigayshan eldaz taak bowt spirichwal goalz eena wahn pazitiv way, dis ku help payrents wid dehn pikni. Wahn sista weh mi painyaa fi moa dahn 70 yaaz memba how di kanvasayshan shee mi gat wid Brada Charles T. Russel mi help ahn. Shee mi onli siks yaaz oal at di taim. Shee seh: “Hihn mi tek 15 minits fi taak tu mi bowt mi spirichwal goalz.” Soh, pazitiv werdz an inkorijment ku goh wahn lang way. (Prov. 25:11) Wen dehn ga werk fi du pahn di Kingdom Haal, eldaz kud invait payrents ahn dehn chiljren fi help owt.

15. How adaz eena di kangrigayshan ku inkorij di yong peepl dehn?

¹⁵ Adaz eena di kangrigayshan ku help wen dehn tek wahn inchres eena di yong wan dehn. Paat a dis wuda meen dat dehn need fi noatis wen wahn yong persn di proagres eena wahn spirichwal way. Wi hafu bee kwik fi komen dehn eena wahn sinsyaa way. Aks yuself: ‘Ai noatis wen wahn yong persn giv wahn gud ansa weh kohn fan ih haat, er if ih  gat wahn paat pahn di meetin? Ai noatis wen wahn yong persn noh giv een tu wahn tes a ih fayt, er wen ih noh frayd fi preech da skool?ʼ Wi shoa reel inchres wen wi mek it wi goal fi taak tu wahn yong persn bifoa er afta di meetin dehn. Wen wi du dehnya tingz, di yong peepl dehn wahn feel laik dehn da paat a di kangrigayshan.—Ps. 35:18.

16, 17. (a) How baptizm ku afek wi fyoocha? (b) Weh jai Kristyan payrents waahn ekspeeryens? (Koment pahn di picha da di biginin a dis aatikl.)

¹⁶ Di graytis privilij wahn payrent kud ga da fi rayz op dehn pikni eena di chroot di “teech dehn ahn chrayn dehn eena [Jehoava] way.” (Ifee. 6:4; Ps. 127:3) Di chiljren a Kristyan payrents tudeh da noh laik di chiljren a di Izrelait dehn weh, az dehn baan, dehn da-mi don paat a Gaad peepl. Pahn tap a dat, chiljren kyaahn inherit lov fi Gaad ahn fi di chroot fahn dehn payrents. Fahn di day dehn baybi baan, payrents waahn ga di goal fi help dehn pikni fi dedikayt dehnself ahn den geh baptaiz az wahn servant a Jehoava. Weh kuda bee moa impoatant dan dat? Wi memba dat da eech persn oan dedikayshan, baptizm, ahn faytful servis tu Jehoava da weh ku mek ih geh sayv joorin di grayt chribyulayshan.—Mach. 24:13.

¹⁷ Wen Blossom Brandt seh dat shee mi waahn geh baptaiz, ih payrents mi waahn mek shoar dat shee mi redi fi tek di moas impoatant step eena ih laif. Wen dehn mi shoar shee mi redi, dehn mi sopoat ahn. Pahn di nait bifoa shee mi geh baptaiz, ih pa mi du wahn byootiful ting far ahn. Blossom tel wi: “Hihn mi mek aala wi get dong pan wi nee, ahn den ih pray. Hihn mi tel Jehoava dat ih mi onli hapi bikaaz Ai mi-di dedikayt mi laif tu Ahn.” Moa dan 60 yaaz afta Blossom geh baptaiz, shee seh: “Yoo kud bee shoar dat noh mata humoch taim don paas, Ai wahn neva faget da nait!” Jehoava waahn payrents feel jai ahn satisfakshan weh kohn wen dehn pikni dedikayt dehnself ahn geh baptaiz az wan a fi hihn servant.