1. Weh di fos senchri Kristyanz mi-di goh chroo?

BITWEEN di yaa 62 ahn 64 C.E., di apasl Peeta mi rait tu di Kristyanz weh mi-di “liv laik aylyan aal oava di ayrya weh dehn kaal Pontus, Galaysha, Kapadosha, Aysha ahn Bitinya.” (1 Peet. 1:1) Laik how aala dehn kolcha mi difrent, di bradaz mi need inkorijment ahn gaidans. Dehn mi-di goh chroo lata sofarin, ahn peepl yoostu insolt dehn. Dehn mi-di goh chroo sohn tof chraiyalz. Peeta mi rait seh: “Di en a di werl di kohn soon,” soh dehn mi-di liv eena sohn haad taimz. Jeroosalem mi wahn soon geh dischrai eena les dan ten yaaz. Weh kuda mi help Kristyanz goh chroo dehndeh haad taimz?—1 Peet. 4:4, 7, 12.

2, 3. Wai Peeta mi tel di bradaz dat ih impoatant fi oapm dehn hoam tu wan anada? (Koment pahn di picha da di biginin a dis aatikl.)

² Wan a di tingz weh Peeta mi tel di bradaz, da-mi fi mek dehn invait adaz da dehn hows. (1 Peet. 4:9) Eena Baibl taimz, wen peepl yoostu invait adaz tu dehn hoam da neva onli peepl weh dehn mi noa bot schraynjaz tu. Noatis doh dat Peeta mi koman ih Kristyan bradaz ahn sistaz fi oapm dehn hoam tu wan anada—dat meenz dehn oan Kristyan bradaz ahn sistaz. How di Kristyan dehn mi benifit wen dehn oapm dehn hoam tu wan anada?

³ Ih wuda mek dehn geh kloasa tu wan anada. Tink bowt yu  oan ekspeeryens. Sombadi eva invait yu da dehn hoam? Yu ku memba di gud memriz weh stay wid yu fahn da taim? Wen yu invait frenz fahn yu kangrigayshan oava, yu noatis how unu frenship geh schranga? Wen wi oapm wi hoam tu wi bradaz ahn sistaz, da wahn gud apachooniti fi reeli geh fi noa dehn. Kristyanz weh mi liv eena di apasl Peeta taim mi need fi geh kloasa tu wan anada sins tingz mi-di geh wosa. Ahn Kristyanz weh di liv eena dehnya “laas dayz” need fi du di sayhn ting.—2 Tim. 3:1.

4. Weh kweschanz wi wahn diskos eena dis aatikl?

⁴ Weh apachooniti wi ga fi welkom wan anada? Weh mait stap wi fahn fala di koman weh di apasl Peeta mi gi Kristyanz? Weh ku help wi bee wahn gud ges?

5. How wi ku welkom peepl da di Kristyan meetin dehn?

⁵ Da di meetin dehn: Wi welkom evribadi weh kohn da wi Kristyan meetin dehn. Wi chreet dehn laik speshal ges weh kohn fi eet spirichwal food. Da Jehoava ahn fi hihn aaganaizayshan invait aala wi. (Roam. 15:7) Bot wen nyoo wanz kohn da di meetin dehn, da laik wee jain op wid Jehoava an ih aaganaizayshan fi invait dehn. Wen peepl kohn fi di fos taim, wi shuda put wahn ekschra efoat fi welkom dehn noh mata how dehn jres. (Jay. 2:1-4) If sombadi weh di vizit noh fain wahn seet yet, yu tink yu kuda invait ahn fi sidong wid yu? Hihn wuda apreeshiayt if yu help ahn fain di skripchaz soh dat ih ku fala di proagram. Dis wuda bee wahn gud way fi welkom peepl.—Roam. 12:13.

6. Hoo shuda bee pahn di tap a wi lis fi invait da wi hoam?

⁶ Fi wahn lee snak er wahn meel: Eena Baibl taimz, fi welkom peepl mi meen fi invait dehn hoam an aafa dehn wahn meel. (Gen. 18:1-8; Judg. 13:15; Look 24:28-30) Dat mi shoa dat dehn waahn bee frenz. Hoo shuda deh pahn di tap a wi lis? Wi bradaz ahn sistaz eena wi kangrigayshan. Da onli dehn wi wahn ku pen pahn wen haad taimz kom. Wee need laayal frenz ahn wi need fi bee eena pees wid dehn. Eena 2011 di Govanin Badi mi chaynj di taim fi di Wachtowa stodi fi di United States Betel famili fahn 6:45 p.m. tu 6:15 p.m. Wai dehn mi du dis? Dehn mi seh dat sins di meetin finish erliya, dis mi wahn bee wahn apachooniti fi mek di Betelaits invait wan anada tu dehn room. Ada branch aafis rong di werl mi du di sayhn ting. Dis nyoo araynjment help mek di bradaz da Betel geh kloasa tu wan anada.

7, 8. How wi ku welkom bradaz weh di vizit?

⁷ Aala wi injai wen bradaz fahn ada kangrigayshanz kohn gi poblik taak da wi kangrigayshan, er wen di serkit oavaseeya vizit wi kangrigayshan, er eevn wen bradaz vizit fahn di branch. Dehnya okayzhan gi wi wahn apachooniti fi welkom di bradaz weh di vizit. (Reed 3 Jan 5-8.) Wahn gud way fi du dis da fi invait dehn oava fi wahn lee snak er wahn meel. Yoo tink yu kuda du dat?

⁸ Wahn sista weh liv da Stayts seh dat oava di yaaz shee an ih hozban mi ga di apachooniti fi welkom tu dehn hoam wahn lata eldaz ahn dehn waif weh kohn gi taak da dehn kangrigayshan. Shee seh dat evri ekspeeryens inchrestin an inkorijin ahn dat da sohnting weh dehn wahn neva rigret.

9, 10. (a) Hoo mait need lajin? (b) Hoo aal ku aafa dehn hoam tu vizitaz?

⁹ Wen bradaz need lajin: Eena di paas, fi welkom wahn vizita mi inklood fi gi dehn lajin. (Job 31:32; Fai. 22) Eevn tudeh wee need fi du dat. Wen di serkit  oavaseeya dehn vizit wahn kangrigayshan, dehn yoozhwali need lajin. Styoodents da di difrent teeyokratik skool dehn ahn bradaz weh valantyaa fi kanschrokshan werk mait need wahn plays fi stay. Wen nachral dizaasta hapm, som a wi bradaz mait lef widowt wahn hoam til help kohn. Wi noh fi feel laik onli bradaz weh ga wahn nais komfatabl hoam ku help; dehn mosi don help wahn lata taimz. Yu tink ih pasabl fi mek yu aafa di bradaz wahn plays fi stay eevn if yu tink yu hows tu smaal?

¹⁰ Wahn brada da South Korea rimemba wen ih mi oapm ih hoam tu di bradaz weh mi geh invaitid tu di difrent teeyokratik skool dehn. Ih seh: “Fos, Ah neva shoar bikaaz wi mi jos geh marid ahn wi mi-di liv eena wahn smaal hows. Bot wi mek op wi main fi aafa di bradaz lajin. Wi mi ga wahn reeli nais taim wid dehn. Dis da-mi wahn gud ting fi du kaaz wi mi jos geh marid, wi geh fi si how hapi wi ku bee wen wi werk pahn spirichwal goalz tugeda az wahn kopl.”

11. Wai wi fi shoa kainis tu di bradaz weh moov eena wi kangrigayshan?

¹¹ Nyoo eena di kangrigayshan: Bradaz mait moov eena yu ayrya bikaaz dehn waahn help owt eena di minischri, er som painyaaz mait geh invaitid fi help owt eena yu kangrigayshan. Dehnya bradaz ahn sistaz lef dehn hoam, kangrigayshan, ahn maybi eevn dehn langwij ahn kolcha, fi kohn help owt. Wi ku shoa kainis tu dehnya bradaz wen wi invait dehn oava fi wahn lee snak er wahn meel er eevn fi wahn lee owting. Ih ku help dehn mek nyoo frenz an ajos tu dehn nyoo laif.

12. Gi wahn ekspeeryens weh shoa dat wen wi waahn shoa kainis tu adaz ih noh meen dat wi haftu du tu moch ting.

¹² Wen wi waahn shoa kainis tu peepl, ih noh meen dat wi haftu du tu moch ting. (Reed Look 10:41, 42.) Wahn brada memba ih yonga dayz az wahn mishineri. Ih seh: “Wi mi yong, ahn wi neva ga no ekspeeryens, ahn wi mi mis hoam. Wan eevnin mi waif mi reeli mis hoam, an Ah mi-di chrai help ahn bot notn neva werk. Bowt 7:30 da sayhn eevnin, wi hyaa wahn nak pahn di doa. Da-mi wahn Baibl styoodent weh mi kohn welkom wi an ih bring wi chree areenj. Wi mi invait ahn eensaid ahn wi mi gi ahn sohn waata fi jrink. Den wi mi mek hat chaaklit ahn tee. Wi neva noa fi taak di Swaheeli langwij yet, ahn shee neva noa fi taak Inglish eeda. Bot sins da day, wi mi staat tu mek nyoo frenz wid di bradaz eena wi nyoo asainment.”

13. How wee benifit wen wi oapm wi hoam tu adaz?

¹³ Yu eva hezitayt fahn oapm yu hoam tu adaz? If dat don hapm tu yu, ih ku bee dat yu mis owt fahn wahn nais taim ahn fahn di apachooniti fi mek gud frenz. Wen wi oapm wi hoam tu adaz, da wahn gud way fi mek wi noh feel loanli. Bot yu mosi di wanda, ‘Wai enibadi wuda hoal bak fahn du dat?ʼ Ih inchrestin fi noa dat lata reezn deh.

14. Weh wi ku du if wi feel laik wi tu bizi fi invait adaz er aksep dehn invitayshan?

¹⁴ Taim an enerji: Jehoava servant dehn aalwayz bizi ahn moas a di taim dehn ga lat fi du. Som mait feel dat dehn jos noh ga di taim ner di enerji fi welkom an oapm dehn hoam tu adaz. If dat da how yoo feel, ih ku bee dat yu need fi ajos yu skejul. Da way yu ku mek shoar dat yu ga di taim an enerji fi aksep wen bradaz invait yu, er yoo invait dehn oava. Di Baibl seh dat ih impoatant fi wahn Kristyan welkom adaz. (Heeb. 13:2)  Ih noh rang fi mek di taim fi dis; akchwali, da di rait ting fi du. Af koars, yu mait haftu put wan said som tingz weh yu yoozhwali laik du.

15. Wai sohn peepl hoal bak fahn oapm dehn hoam tu adaz?

¹⁵ How yu feel bowt yuself: Yu eva waahn invait adaz oava bot yu feel laik yu kyaahn? Som peepl feel shai er frayd dat dehn noh ga notn fi taak bowt er dehn feel dat dehn ges mait staat tu feel boarin. Som a dehn weh ga lee bit a moni mait tink dat dehn kuda neva giv laik adaz eena di kangrigayshan. Rimemba, di moas impoatant ting bowt yu hows da noh if ih big ahn fansi bot dat evriting deh neet ahn kleen.

16, 17. Weh ku help mek wi noh feel nervos wen wi invait peepl oava?

¹⁶ If yu feel nervos fi invait peepl oava, da noh yoo wan feel soh. Wahn elda weh liv da Britain seh: “Yu mait feel nervos wen yu di pripyaa fi yu ges dehn, bot wans da sohnting weh gat fi du wid wi servis tu Jehoava, di benifits wi geh faar beta dan eniting els. Ah injai deh wid mi frenz, eevn if da jos fi sidong ahn jrink wahn lee kaafi ahn chat wid dehn.” Rimemba dat ih aalwayz gud fi put di needz a yu vizita dehn heda yu oan. (Fil. 2:4) Nayli evribadi injai fi shayr dehn laif stoari. If dehn ga wahn lee get tugeda, dat mait bee di onli okayzhan wen dehn mait aks fi hyaa yu ekspeeryens dehn. Wahn neks elda seh: “Wen Ah invait di frenz fahn di kangrigayshan da mi hows, ih help mi fi andastan dehn beta, Ah geh di apachooniti fi noa how dehn get fi laan bowt di Baibl.” Wen yu ga lov fi yu bradaz, yu injai di taim yu spen wid dehn.

¹⁷ Wahn painyaa sista weh mi oapm ih hoam tu sohn styoodents weh mi-di aten di difrent teeyokratik skool dehn mi seh: “Eena di biginin Ah mi-di wori bikaaz mi hows noh fansi; di fernicha weh Ah gat da sekant han. Bot di waif a wan a di inschroktaz fahn di skool dehn mi mek Ah feel les nervos. Shee mi seh dat wen shee an ih hozban mi-di chravl fahn kangrigayshan tu kangrigayshan az serkit oavaseeya, dehn mi lov di taim weh dehn mi spen wid spirichwal peepl weh mait noh ga wahn lat fi aafa bot ga di sayhn goal az dehn—fi serv Jehoava ahn liv wahn simpl laif. Dis rimain mi a weh mi ma yoostu tel wi wen wee da-mi lee pikni. Ih yoostu seh: ‘Ih beta fi ga wahn bowl a vejitablz weh lov deh.ʼ” (Prov. 15:17) Mek shoar lov bee di reezn yu oapm yu hoam tu yu bradaz, ahn yu noh wahn need fi wori.

18, 19. How kainis ku help wi fi tink gud bowt adaz?

¹⁸ How yu feel bowt adaz: Dehn ga enibadi eena yu kangrigayshan weh yu mait noh get lang wid? Ih ku bee dat, fahn di biginin, yu neva laik da persn ahn yu neva du notn fi fiks di sichuwayshan. If dat hapm, di prablem ku laas lang. Dis ku eevn afek di efoat yu mek fi shoa kainis tu adaz. Er ih ku bee dat sohnbadi hert yu eena di paas ahn yu fain it haad fi fergiv ahn faget.

¹⁹ If wi waahn fiks wi prablemz, eevn wid wi enimi dehn, di Baibl inkorij wi fi shoa kainis. (Reed Roamanz 12:20.) Wen wi du dat, ih ku help wi fi shoa lov ahn ga pees insted. Den wi wahn ku si di tingz weh Jehoava si eena dehn, di gud kwalitiz weh mi jraa dehn kloasa tu hihn. (Jan 6:44) Wen lov da di reezn wai yu invait di persn oava, dis ku bee weh wahn fiks di prablem. Bot how yu ku mek shoar dat lov bee di reezn wai yu du dat? Wan way da if yu fala weh Filipiyanz 2:3 inkorij wi fi du. Ih seh: “Unu sopoas tu bee hombl ahn unu noh fi tink dat unu beta dan enibadi els.” Wen wi fain wayz how wi bradaz ahn sistaz beta dan  wee, weda da dehn fayt er payshens er korij er som ada Kristyan kwaliti, dat wahn mek wi reeli lov dehn an ih wahn help wi shoa kainis ahn welkom dehn da wi hoam.

20. Wai ahn how wi fi kip wi werd wen sombadi invait wi?

²⁰ Di saamis Dayvid mi aks dis kweschan: “Oa Jehoava, hoo ku bee wahn ges eena yu tent?” (Ps. 15:1) Afta ih aks da kweschan, ih taak bowt di spirichwal kwalitiz weh Gaad fain eena fi hihn ges dehn. Wan a di kwaliti dehn, da fi mek wi kip wi werd. Di Baibl seh: “Hihn noh ton bak fahn weh ih pramis, eevn if ih noh gud far ahn.” (Ps. 15:4) Wen wi seh yes tu wahn invitayshan, wi fi kip wi werd. Ih wudn shoa rispek if wi kyansl fi no reezn, espeshali bikaaz di persn weh invait wi don pripyaa ahn ga tingz redi fi gat wi oava da ih hows. (Mach. 5:37) Bot sohntaim, som a wi bradaz kyansl wahn invitayshan soh dat dehn ku aksep wan nada wan. Maybi dehn tink dat da wahn beta wan. Yoo tink dat di shoa rispek? Af koars nat, insteda dat, wi shuda apreeshiayt it wen frenz invait wi oava da dehn hoam, noh kay humoch dehn ga fi aafa wi. (Look 10:7) An if di day reeli kohn wen sohnting kom op ahn yu hafu kyansl, ih wuda bee nais fi tel di persn weh invait yu az soon az pasabl. Dat wahn shoa lov ahn rispek.

21. Wai ih impoatant fi mek wi rispek di kostom ahn kolcha rong weh wi liv?

²¹ Ih impoatant fi rispek di kostom ahn kolcha a di peepl rong weh wi liv. Eena sohn kolcha, peepl noh laik if yu shoa op widowt dehn invait yu. Eena sohn plays, wen wahn famili invait peepl oava, dehn aafa dehn di bes a di bes ahn mek dehn serv dehnself fos; den eena sohn ada plays enibadi ku serv dehnself fos. Da sohn plays, di invaitid ges wuda naamali bring wahn lee snak er wahn dish fi ad tu di okayzhan; ahn da ada ayryaz yu noh haftu du dat. Eena sohn ada kolcha, dehn ekspek dat if yu da wahn ges, yu fi seh no eena wahn kain way tu di fos er sekant invitayshan; bot if yu du dat eena wan nada kolcha, dehn wuda tink dat yu noh di shoa rispek. Mek wi du wi bes fi mek di bradaz weh invait wi oava, feel reeli hapi fi aal weh dehn du fi wi.

22. Wai ih impoatant fi shoa kainis an oapm wi hoam tu wan anada?

²² Now moa dan eva, wi di liv kloasa tu “di en a di werl.” (1 Peet. 4:7) Wi soon wahn fays di graytis chribyulayshan wi wahn eva goh chroo. Ahn sins wi wahn ga moa ahn moa prablemz, wi wahn need fi ga reel lov fi wi bradaz ahn sistaz. Tudeh moa dan eva, wi need fi aplai di kongsl weh Peeta mi gi di Kristyanz eena di paas. Wi need fi: “Oapm wi hoam tu wan anada.” Dis da wahn gud ahn wandaful ting fi staat du fahn now.—1 Peet. 4:9.