AALA wi waahn adaz tink dat wee da gud peepl. Bot ih haad fi bee wahn gud persn tudeh. Wahn lata peepl “hayt evriting weh gud.” (2 Tim. 3:3) Dehn rijek Jehoava standadz. Weh hihn seh da gud, dehn seh “da bad” ahn weh hihn seh da bad, dehn seh “da gud.” (Isa. 5:20) Ih aalso haad fi du gud bikaaz a wi paas mistayks ahn bikaaz wi noh perfek. Wi mait feel laik Anne, * wahn sista hoo di serv Jehoava fi yaaz now weh seh, “Ah schrogl fi bileev dat Ai ku bee wahn gud persn.”

Bot di gud ting bowt it da di fak dat aala wi ku bee gud. Gudnis kohn fahn Gaad hoali spirit, ahn fi hihn spirit moa powaful dan eniting er enibadi eena dis werl. Ih moa powaful dan wi sinful flesh ahn wi paas. Mek wi laan weh ih meen fi bee wahn gud persn ahn how wi ku shoa it.

How wi ku diskraib wahn gud persn? Wahn gud persn kip hai moaral standadz, ih kleen ahn pyoar, no badnis ner wikidnis deh eena ahn. Di gudnis weh dis persn shoa afek adaz eena wahn pazitiv way. Ih luk fi wayz how ih ku help owt ahn how fi du gud tu adaz.

Yu praabli noatis dat som peepl wilin fi du gud tingz fi dehn famili ahn frenz. Bot fi bee wahn reeli gud persn eena Gaad sait, wi kyaahn jos di du gud tingz fi di peepl wi lov ahn noa. Wi haftu du moa dan dat. Da chroo dat wi noh perfek ahn kyaahn du gud aal di taim. Eevn di Baibl seh: “No raichos persn deh pahn di ert hoo aalwayz du gud ahn neva sin.” (Eccl. 7:20) Ahn di apasl Paal mi aanis wen ih seh: “Ah noa dat notn gud noh liv eena mi.” (Roam. 7:18) Soh ih mek sens den, dat if wi waahn noa weh ih meen fi bee gud, wi haftu luk tu Jehoava.

Jehoava Gaad set di standad fi weh gud ahn weh bad. Di Baibl seh bowt Gaad: “Yoo gud ahn yu werks dehn gud. Teech mi yu laa dehn.” (Ps. 119:68) Mek wi si weh dis skripcha meen wen ih seh dat Jehoava gud ahn fi hihn werks gud.

Jehoava gud. Jehoava soh gud dat ih impasabl fi mek hihn du bad. Aala fi hihn ada kwaliti dehn kanek tu ih gudnis. Noatis weh mi hapm wen Jehoava mi shoa Moaziz ih gloari weh inklood ih gudnis. Moaziz mi hyaa wahn vais di seh: “Jehoava, Jehoava, wahn Gaad weh mersiful ahn kompashanayt, weh noh eezi fi geh beks, wahn Gaad wid lata lov ahn chroot. Hihn di shoa laayal lov tu towznz a peepl, ih di fagiv dehn mistayk ahn sin dehn, bot fi shoar hihn wahn ponish di gilti wan dehn.” (Ex. 33:19; 34:6, 7) Soh den, dis mek it klyaa dat Jehoava gud eena evri single way. Eevn doa Jeezas da-mi wahn perfek egzampl a gudnis eena wahn hyooman, hihn mi seh: ‘Nobadi noh gud; onli Gaad wan gud.ʼ—Look 18:19.

 Jehoava werks dehn gud. Evriting weh Jehoava du gud. Di Baibl seh: “Jehoava gud tu evribadi, ahn yu ku si ih mersi eena evriting weh ih du.” (Ps. 145:9) Bikaaz Jehoava gud, ih noh prejudis gens enibadi. Hihn giv laif tu aala wi an ih gi wi weh wi need fi liv. (Aks 14:17) Wi ku si di amonk a gudnis weh hihn gat wen ih fagiv wi. Di saamis seh: “Yoo, Oa Jehoava, gud ahn redi fi fagiv.” (Ps. 86:5) Wi ku bee shoar dat “Jehoava noh wahn hoal bak eniting gud fahn di wan dehn weh di bee laayal tu hihn.”—Ps. 84:11.

Jehoava mek wi eena fi hihn imij. Dis meenz dat wi ku bee gud peepl ahn du gud tingz. (Gen. 1:27) Bot dat noh hapm rait soh. Jehoava tel wi dat wi haftu “laan fi du gud.” (Isa. 1:17) Bot how wi ku laan fi bee gud? Wel, mek wi kansida chree tingz weh wi ku du.

Fos, wi need fi pray fi hoali spirit bikaaz ih wahn help Kristyanz fi bee gud eena Gaad sait, noh jos gud tu wi famili ahn frenz. (Gal. 5:22) Gaad spirit ku help wi fi laan fi lov weh gud ahn hayt weh bad. (Roam. 12:9) In fak, di Baibl shoa wi dat Jehoava ku ‘mek wi schrang fi du ahn seh di rait ting aal di taim.ʼ—2 Tes. 2:16, 17.

Sekant, wi need fi reed di Werd a Gaad. Wen wi reed di Baibl, Jehoava ku teech wi fi “andastan weh rait ahn jos ahn fyaa, an evriting weh gud.” Di Baibl pripyaa wi “fi du evri gud werk.” (Prov. 2:9; 2 Tim. 3:17) Wi haat da laik wahn chrezha baks. Jos laik how wi wuda ful op wahn chrezha baks wid preshos tingz weh wi ku yooz laytaraan, wen wi reed di Baibl ahn tink bowt weh wi reed, wi di put gud tingz eena wi haat.—Look 6:45; Ifee. 5:9.

Terd, wi need fi chrai wi bes fi fala gud egzamplz. (3 Jan 11) Eena di Baibl, wi ku fain gud egzampl fi fala. Af koars, di bes egzampl da Jehoava ahn Jeezas. Bot wi ku fain egzampl a adaz hoo mi du gud tingz. Yu mait tink bowt too peepl rait away—Tabita ahn Baanabas. (Aks 9:36; 11:22-24) Yoo ku benifit fahn fi dehn byootiful egzampl if yu stodi weh di Baibl seh bowt dehn. Joorin yu stodi, noatis weh dehn mi du fi help adaz. Den tink weh yoo ku du fi help yu famili ahn yu Kristyan bradaz ahn sistaz. Noatis wat da som gud tingz weh mi hapm tu Tabita ahn Baanabas bikaaz dehn mi gud tu adaz. Yoo ku benifit jos laik dehn tu.

Wi ku aalso tink bowt peepl tudeh hoo du gud tingz. Fi egzampl, tink bowt di eldaz  hoo di werk soh haad eena di kangrigayshan; dehn lov weh gud. Aalwayz memba wi faytful sista dehn hoo seh ahn du gud tingz. Dehn “teech weh gud ahn prapa.” (Taitos 1:8; 2:3) Wahn sista weh naym Roslyn seh: “Mi fren mek wahn speshal efoat fi help an inkorij adaz eena di kangrigayshan. Shee tink bowt dehn sichuwayshan an aalwayz gi dehn sohn lee gif er help dehn owt eena ada wayz. Ai tink shee da wahn reeli gud persn.”

Jehoava inkorij ih peepl fi “saach fi weh gud.” (Amos 5:14) If wi du dat, ih wahn help wi fi lov weh Jehoava seh gud, ahn ih wahn aalso help wi fi reeli waahn du weh gud.

Fi bee gud, wi noh haftu du lata big tingz fi peepl er gi dehn ekspensiv gifs. Tink bowt dis: Imajin wahn kuk di mek rais ahn beenz. Ih noh put jos rais ahn beenz eena di pat, insted ih put lata ada tingz een deh fi mek it nais, laik koakanat milk ahn soh. Jos laik dat, di gud tingz weh wi du ku bee lata smaal gud tingz weh wahn shoa dat wee da wahn gud persn.

Di Baibl inkorij wi fi bee “redi fi du aal kaina gud” ahn fi “du lata gud.” (2 Tim. 2:21; Taitos 3:1) If wi pay atenshan tu weh di hapm rong wi, wi mait si wayz fi help sombadi. Eena dis way, wi wahn di ‘help da persn, an ih wahn geh schranga eena ih fayt.ʼ (Roam. 15:2) Wi ku shayr weh wi gat wid da persn. (Prov. 3:27) Wi ku eevn invait sombadi oava fi ga wahn lee meel wid wi, er fi inkorij eech ada. If wi noa sombadi sik, wi ku sen ahn wahn lee kyaad, vizit ahn, er giv ahn wahn lee foan kaal. Fi shoar, wi ku fain lata wayz ‘fi seh werdz weh wahn help ada peepl soh dat wi werdz bil dehn op, akaadn tu weh dehn need fi yehr. Eena da way, wi wahn bee wahn blesin tu peepl weh di yehr wi.ʼ—Ifee. 4:29.

Jos laik Jehoava, wee fain wayz fi du gud tu peepl. Wi noh prejudis gens dehn, bot wi wahn bee fyaa. Di bes way fi du dis da chroo di preechin a di gud nyooz bowt di Kingdom. Wi shayr dis gud nyooz wid evribadi. Jeezas inkorij wi fi du gud eevn tu peepl hoo mait hayt wi. (Look 6:27) Ih noh rang fi bee kain ahn fi du weh gud tu adaz, kaaz yu ‘noh wahn di brok no laa wen yu du dehn ting deh.ʼ (Gal. 5:22, 23) Wen wi du gud eevn wen peepl chreet wi bad, er wen wi di fays som kaina chraiyal, wi ku stil help adaz laan di chroot ahn bring aana tu Jehoava.—1 Peet. 3:16, 17.

“Di gud man reep di riwaad a fi hihn wayz.” (Prov. 14:14) Wat da som a di riwaad dehn? Wen wi chreet adaz gud, dehn wahn chreet wi gud tu. (Prov. 14:22) Eevn if adaz noh gud tu yu, noh giv op. Kantinyu fi du gud tingz tu dehn kaaz dehn mait chaynj dehn atichood ahn chreet yu beta.—Roam. 12:20.

Wen wi du gud ahn stap du bad, wi persnali benifit. Wahn lata bradaz ahn sistaz seh dis mi hapm tu dehn. Tek fi egzampl Nancy, shee seh: “Wen Ah mi-di groa op, Ah mi liv wahn kyaalis an imoaral laif. Ah neva ga no rispek. Bot Ah laan weh Gaad seh da gud an obay hihn. Now, Ah feel hapiya ahn Ah rispek miself.

Di moas impoatant reezn fi ga gudnis da bikaaz ih mek Jehoava hapi. Eevn if adaz noh si weh wi du, Jehoava seeʼt. Hihn noa bowt evri gud ting weh wi du ahn tink bowt. (Ifee. 6:7, 8) How hihn riwaad wi? Di Baibl seh: “Di gud persn geh Jehoava blesinz.” (Prov. 12:2) Soh mek wi kantinyu fi werk haad fi bee gud. Wen wi du dat, Jehoava pramis wi ‘prayz, aana, ahn pees.ʼ—Roam. 2:10.