Wan a di jooti a som a di membaz a di chraib a Leevai, weh da neva prees, da-mi fi faam wahn polees foas. Dehn mi deh anda di koman a di kyaptin a di templ. Wahn Jooish raita weh naym Philo diskraib di jooti a dehnya aafisa. Hihn seh: “Som a dehnya Leevait doz gyaad di doa wehpaat peepl doz goh fi enta di templ ayrya. Adaz doz gyaad di front a di templ. Dehn doz mek shoar dat nobadi weh neva bizniz eena di templ mi goh een deh, nat eevn bai mistayk. Som a dehn doz pachroal di templ ayrya fi gyaad it. Dehn doz du dis eena too shif, wan da day ahn wan da nait.”

Di Jooish Kongsl kuda mi aks dehnya aafisa fi help dehn. Dis da-mi di onli Jooish groop weh di Roaman govament doz alow fi bak wepanz.

Profesa Joachim Jeremias eksplayn dat wen di aafisa dehn mi ares Jeezas, hihn mi aks dehn wai dehn neva ares ahn wen ih mi-di teech eena di templ. (Mach. 26.55) Jeezas neva mi wahn aks dis kweschan if dehnya aafisa da neva paat a di templ polees. Da saym profesa tink dat di aafisa dehn weh mi waahn ares Jeezas bifoa dat da-mi aalso sohn templ poleesman. (Jan 7:32, 45, 46) Laytaraan, di Jooish Kongsl mi sen di templ kyaptin wid sohn aafisa fi bring Jeezas disaiplz tu dehn. Da mi praabli di templ polees weh mi aalso jreg di apasl Paal owta di templ.—Aks 4:1-3; 5:17-27; 21:27-30.