1-2. Akaadn tu Aks 8:27-31, 35-38, weh mi mek di Eetiyopyan govament ofishal waahn geh baptaiz?

YOO wuda waahn geh baptaiz az wan a Krais disaipl? Lov da weh mek wahn lata peepl mek dis chois. Mek wi kansida di egzampl a wahn govament ofishal hoo doz serv di kween a Eetiyopya.

² Di Eetiyopyan govament ofishal mi geh baptaiz az soon az ih mi laan fahn di Skripchaz dat dat da weh hihn mi need fi du. (Reed Aks 8:27-31, 35-38.) Weh mi mek hihn waahn geh baptaiz? Fi shoar, hihn mi apreeshiayt Gaad Werd. Hihn mi-di reed sohn vers fahn di buk a Isaiah az ih mi-di raid eena wahn chariyat. Ahn wen Filip mi taak tu ahn, di Eetiyopyan man mi graytful fi weh Jeezas mi du fi hihn. Bot da wai hihn mi gaahn da Jeroosalem? Da bikaaz hihn don mi-di geh fi lov Jehoava. How wi noa dat? Hihn mi jos kohn fahn wership Jehoava da Jeroosalem. Ih luk laik dis man mi chaynj ih rilijan ahn jain di onli nayshan weh mi bilangz tu Jehoava. Owta lov fi Jehoava, hihn mi disaid fi du wahn nada impoatant ting. Hihn mi geh baptaiz az wahn disaipl a Krais.​—Mach. 28:19.

3. Weh mait stap wahn persn fahn geh baptaiz? (Si di baks “ Weh Kaina Persn Yoo Eena Yu Haat?”)

³ Lov fi Jehoava ku mek yu waahn geh baptaiz. Bot lov ku aalso stap yu fahn geh baptaiz. How? Noatis sohn egzampl. Yu mait reeli lov yu famili ahn frenz weh da noh Jehoava Witnisiz, ahn yu mait wori dat if yu geh  baptaiz, dehn wahn hayt yu. (Mach. 10:37) Er yu mait stil lov du tingz weh yu noa Gaad hayt, ahn yu mait fain it haad fi stap du dehn. (Ps. 97:10) Er maybi yu mi groa op di selibrayt faals rilijos haliday. Yu mait lov di hapi memriz weh yu ga fahn wen yu doz du dehn tingz eena di paas. Bikaaz a dat, yu mait fain it haad fi stap selibrayt dehn haliday weh Jehoava noh pleez wid. (1 Kor. 10:20, 21) If dat da soh, yu need fi aks yuself: “Wat er hoo Ai lov di moas?”

4. Wat da di moas impoatant reezn fi geh baptaiz?

⁴ Wi ga wahn lata tingz fi lov ahn bee graytful fa. Fi egzampl, eevn bifoa wi mi staat tu stodi wid Jehoava Witnisiz, wi maita mi ga wahn lata rispek fi di Baibl. Ahn wi maita mi staat fi geh fi lov Jeezas. Now dat wi geh fi noa Jehoava Witnisiz, wi mait lov fi spen taim wid dehn. Bot noh bikaaz wi lov dehn gud tingz meenz dat wi wahn dedikayt wiself tu Jehoava ahn geh baptaiz. Di moas impoatant reezn fi mek wi geh baptaiz da bikaaz a wi lov fi Jehoava Gaad. Wen wi lov Jehoava moa dan eniting els, wi noh wahn mek enibadi er eniting stap wi fahn serv ahn. Lov fi Jehoava wahn mek wi geh baptaiz, an ih wahn aalso mek wi stay faytful tu ahn afta wi geh baptaiz.

5. Weh kweschan wi wahn ansa eena dis aatikl?

⁵ Jeezas seh dat wi mos lov Jehoava wid wi hoal haat, wid wi hoal soal, wid wi hoal main, ahn wid wi hoal schrent. (Maak 12:30) How wi ku laan fi lov ahn rispek Jehoava fahn wi haat? If wi tink bowt humoch Jehoava lov wi, ih wahn help wi fi lov hihn bak. (1 Jan 4:19) Soh eena dis aatikl wi wahn diskos weh yu ku du fi mek yu lov fi Jehoava groa ahn fi mek yu geh baptaiz. *

6. Akaadn tu Roamanz 1:20, wat da wan way wi ku laan bowt Jehoava?

⁶ Laan bowt Jehoava fahn kriyayshan. (Reed Roamanz 1:20; Rev. 4:11) Tink bowt di plaants an animalz weh Jehoava mek ahn how dehn proov dat hihn reeli waiz. Laan bowt di wandaful way how hihn mek yu badi. (Ps. 139:14) Ahn tink bowt di powa weh Jehoava put eena di son weh deh eena di skai. Ahn di son da jos wan owta bilyanz a staarz. * (Isa. 40:26) Wen yu tink bowt Jehoava kriyayshan, yu wahn rispek ahn moa ahn moa. Ih impoatant fi noa dat Jehoava waiz ahn powaful. Bot if wi waahn schrentn wi lov fi Jehoava ahn bee fi hihn kloas fren wi need fi laan moa bowt ahn.

7. Weh wi need fi bileev fi mek wi ku lov Jehoava fahn di haat?

⁷ Yu need fi bileev dat Jehoava reeli lov yoo. Yoo fain it haad fi bileev dat di Kriyayta a hevn ahn ert noatis yoo ahn kay bowt yoo? If yes, den memba dat Jehoava “noh deh faar fahn non a wi.” (Aks 17:26-28) Hihn “saach chroo evribadi haat,” ahn hihn pramis yu dat “if yu saach far ahn, hihn wahn mek yu fain ahn.” (1 Chron. 28:9) Az a mata a fak, di reezn wai yu di stodi di Baibl rait now da bikaaz Jehoava ‘jraa yu’ tu hihn. (Jan 6:44) Di moa yu andastan aal weh Jehoava du fi yu, di moa yu wahn lov hihn.

8. How yu ku shoa dat yu tankful fi di lov weh Jehoava shoa yoo?

 ⁸ Wan way yu ku shoa Jehoava dat yu tankful fi di lov weh hihn shoa yu da fi pray tu ahn. Wen yu tel Gaad bowt weh di bada yu ahn tank ahn fi evriting weh ih du fi yu, yu lov fi Gaad wahn groa. An az yu si how Jehoava ansa yu pryaaz, unu frenship wahn geh schranga. (Ps. 116:1) Yu wahn noa fi shoar dat ih andastan yu. Bot fi bee frenz wid Jehoava yu need fi andastan di way how hihn tink ahn weh hihn waahn fahn yoo. Di onli way yu wahn noa dat, da if yu stodi fi hihn Werd, di Baibl.

9. How yu ku shoa dat yu apreeshiayt di Baibl?

⁹ Laan fi apreeshiayt Gaad Werd, di Baibl. Onli di Baibl gat een di chroot bowt Jehoava ahn weh hihn ekspek fahn yu. Yu shoa dat yu apreeshiayt di Baibl if yu reed it eech day, if yu pripyaa fi yu persnal Baibl stodi, an if yu yooz weh yu laan eena yu laif. (Ps. 119:97, 99; Jan 17:17) Yoo ga wahn persnal Baibl reedin skejul? Yoo fala da skejul ahn reed di Baibl evri day?

10. Wat da sohnting weh mek di Baibl difrent fahn eni ada buk?

¹⁰ Sohnting weh mek di Baibl difrent fahn eni ada buk da dat ih gat een sohn akonk fahn peepl weh mi si Jeezas. Dis da di onli buk weh eksplayn di chroot bowt weh Jeezas du fi yu. Wen yu laan weh Jeezas mi seh ahn du, yu wahn waahn bee fi hihn fren.

11. How yu ku laan fi lov Jehoava?

¹¹ Laan fi lov Jeezas, ahn yu wahn lov Jehoava eevn moa. Wai? Bikaaz Jeezas mi kapi ih Pa egzampl eena wahn perfek way. (Jan 14:9) Soh di moa yu laan bowt Jeezas, di beta yu wahn andastan ahn lov Jehoava. Tink bowt humoch lov Jeezas mi shoa tu peepl weh adaz mi luk dong pan jos bikaaz dehn mi poa, sik, er week. Aalso, tink bowt di advais weh hihn gi yu ahn how yu laif geh beta  bikaaz yu lisn tu ahn.​—Mach. 5:1-11; 7:24-27.

12. Wen yu laan bowt Jeezas, weh yu wahn waahn du?

¹² Moa dan laikli, yu lov fi Jeezas wahn geh schranga wen yu reeli tink bowt di sakrifais weh hihn mek soh dat yu ku geh fergivnis fi yu sin dehn. (Mach. 20:28) Wen yu andastan dat Jeezas mi wilin fi ded fi yu, dat mait inkorij yu fi ripent an aks Jehoava fi fergivnis. (Aks 3:19, 20; 1 Jan 1:9) Di moa yu lov Jeezas ahn Jehoava, di moa yu wahn waahn bee wid peepl weh lov dehn tu.

13. Weh Jehoava gi yu?

¹³ Laan fi lov Jehoava famili. Yu famili weh noh di serv Jehoava ahn peepl weh yoostu bee yu fren mait noh andastan wai yu waahn dedikayt yuself tu Jehoava. Dehn mait eevn ton gens yu. Jehoava wahn help yu; hihn wahn gi yu wahn spirichwal famili. Yu wahn fain di lov ahn sopoat weh yu need if yu stay kloas tu da spirichwal famili. (Maak 10:29, 30; Heeb. 10:24, 25) Afta wahn wail, yu famili ahn frenz mait aalso kohn fi serv an obay Jehoava.​—1 Peet. 2:12.

14. Akaadn tu 1 Jan 5:3, weh yu laan bowt Jehoava standadz?

¹⁴ Laan fi rispek an obay Jehoava standadz. Bifoa yu mi geh fi noa Jehoava, yu yoostu mek yu oan disizhan az tu weh rait ahn weh rang. Bot now yu riyalaiz dat Jehoava standadz beta. (Ps. 1:1-3; reed 1 Jan 5:3.) Tink bowt di kongsl weh di Baibl giv fi hozban, waif, payrents, ahn chiljren. (Ifee. 5:22–6:4) Yoo si yu famili geh hapiya sins yu di obay dehnya kongsl? Yoo si dat yu geh fi bee wahn beta persn bikaaz yu obay Jehoava advais bowt weh kaina frenz yu shuda ga? Yoo da wahn hapiya persn? (Prov. 13:20; 1 Kor. 15:33) Moa dan laikli, yu ansa da yes.

15. Weh yu ku du if yu need help fi fala Baibl prinsiplz?

¹⁵ Sohntaim, yu mait fain it haad fi noa how fi obay di Baibl prinsipl dehn weh yu di laan. Dat da wai Jehoava yooz ih aaganaizayshan fi provaid yu wid poblikayshanz weh help fi eksplayn di Baibl ahn weh ku help yu fi andastan weh rait ahn weh rang. (Heeb. 5:13, 14) Wen yu reed ahn stodi dehnya infamayshan, yu wahn si how yoosful dehn yoosful. Ahn moa dan laikli yu wahn waahn bee paat a Jehoava aaganaizayshan.

16. How Jehoava aaganaiz ih peepl?

¹⁶ Laan fi lov ahn sopoat Jehoava aaganaizayshan. Jehoava mi aaganaiz ih peepl intu kangrigayshan, an ih Son, Jeezas, da di hed a di kangrigayshan. (Ifee. 1:22; 5:23) Jeezas mi chooz wahn smaal groop a anointid bradaz fi tek di leed fi aaganaiz di werk weh hihn gi dehn fi du tudeh day. Jeezas rifaa tu dis groop a bradaz az “di faytful ahn waiz slayv.” Dehn ga di rispansabiliti fi help yu geh kloas tu Gaad ahn fi help protek yu rilayshanship wid ahn, an dehn tek dehn rispansabiliti seeryos. (Mach. 24:45-47, NW) Wan a di wayz di faytful slayv help fi tek kayr a yu da fi mek shoar dat bradaz weh kwalifai geh apointid fi bee eldaz. Dehn eldaz ku gaid yu ahn protek yu. (Isa. 32:1, 2; Heeb. 13:17; 1 Peet. 5:2, 3) Di eldaz wilin fi du az moch az dehn kud fi komfert yu, ahn fi help yu geh eevn kloasa tu Jehoava. Bot wan a di moas impoatant  ting weh dehn ku du fi yu da fi help yu teech adaz bowt Jehoava.​—Ifee. 4:11-13.

17. Akaadn tu Roamanz 10:10, 13, 14, wai wi tel adaz bowt Jehoava?

¹⁷ Help adaz fi laan fi lov Jehoava. Jeezas mi tel ih falowaz fi teech adaz bowt Jehoava. (Mach. 28:19, 20) Ih pasabl fi obay da koman jos bikaaz wi feel laik wi haftu. Bot wen yu lov fi Jehoava geh schranga, yu wahn feel jos laik how di apasl Peeta ahn Jan mi feel. Dehn mi seh: “Wee hafu taak bowt weh wi si wid wi oan too aiy, ahn weh wi yehr wid wi oan too ayz.” (Aks 4:20) Ih wahn mek wi reeli hapi if wi ku help sombadi fi kohn fi lov Jehoava. Jos imajin humoch jai Filip mosi mi feel wen hihn mi help di Eetiyopyan govament ofishal fi laan di chroot fahn di Baibl ahn geh baptaiz! Wen wi kapi Filip egzampl an obay Jeezas koman fi preech, wi proov dat wi waahn bee wan a Jehoava Witnisiz. (Reed Roamanz 10:10, 13, 14.) Wen dat hapm, yu wahn praabli aks di saym kweschan laik weh di Eetiyopyan govament ofishal mi aks: “Da weh mek yu kyaahn baptaiz mi now?”​—Aks 8:36.

18. Weh wi wahn diskos eena di neks aatikl?

¹⁸ Wen yu geh baptaiz, yu wahn di mek di moas impoatant disizhan eena yu laif. Bikaaz da disizhan soh impoatant, yu need fi tink reeli gud bowt weh ih meen. Weh yu need fi noa bowt baptizm? Weh yu need fi du bifoa an afta yu geh baptaiz? Eena di neks aatikl wi wahn ansa dehndeh kweschanz.