1. Weh klyaa koman Jeezas mi gi tu ih disaiplz? (Koment pahn di picha pahn di kova.)

PAHN di nait bifoa Jeezas mi ded, ih mi giv ih disaiplz wahn klyaa koman. Hihn mi tel dehn: “Unu mos lov wan anada jos laik how Ai lov aala unu.” Den ih mi seh: “If unu lov wan anada, den evribadi wahn noa dat unu da fi mee disaipl.”—Jan 13:34, 35.

2. Wai ih impoatant fi shoa lov tu wan anada?

² Jeezas mi seh dat peepl mi wahn noa hoo da fi hihn chroo disaiplz if dehn mi shoa di sayhn kaina lov weh hihn shoa. Dat mi mek sens eena di fos senchri an eena fi wee taim tu. Dat da wai ih veri impoatant dat wi lov wan anada eevn wen ih noh eezi!

3. Weh wi wahn laan eena dis aatikl?

³ Aala wi imperfek, soh ih haad fi shoa dat wi lov wan anada wid aala wi haat. Bot, wi stil need fi kapi Krais egzampl. Eena dis aatikl, wi wahn laan how lov wahn help wi fi mek pees wid adaz, fi noh bee prejudis, ahn fi bee haspitabl. Az yu di stodi dis aatikl, aks yuself: ‘Weh Ai ku laan fahn bradaz ahn sistaz weh kip aan di shoa lov tu wan anada eevn doa ih noh eezi?’

4. Akaadn tu Machyu 5:23, 24, wai wi shuda mek pees wid wahn brada er sista weh ga sohnting gens wi?

⁴ Jeezas mi teech wi wai ih impoatant fi mek pees wid wahn brada er sista weh ga sohnting gens wi. (Reed Machyu 5:23, 24.) Hihn mi foakos pahn sohnting veri impoatant. Hihn mi seh dat if wi waahn pleez Gaad, wi need fi ga wahn gud rilayshanship wid adaz. Jehoava feel hapi wen wi  du aal weh wi kud fi mek pees wid wi bradaz ahn sistaz. Hihn noh wahn aksep fi wee wership if wi stay beks wid sombadi ahn noh eevn chrai fi mek pees wid dehn.—1 Jan 4:20.

5. Wai ih neva eezi fi mek Maak mek pees?

⁵ Wai wi mait fain it haad fi mek pees? Noatis weh mi hapm tu Maak. * Hihn mi feel soh bad wen wahn brada mi kritisaiz ahn, an seh bad tingz bowt ahn tu adaz eena di kangrigayshan. Weh Maak mi du? Hihn seh: “Ah mi geh beks an Ah mi showt aata di brada.” Bot aftawodz, Maak mi feel sari fi weh ih du, an ih mi chrai tel di brada dat ih sari, an chrai mek pees wid ahn. Bot di brada neva waahn mek pees wid Maak. Fers, Maak mi seh tu ihself, ‘Wai Ai shuda chrai mek pees if hihn noh waahn?’ Bot, Maak serkit oavaseeya mi inkorij ahn fi kantinyu du fi hihn paat fi mek pees. Weh Maak mi du?

6. (a) Weh Maak mi du fi kip di chrai mek pees? (b) How Maak mi aplai weh ih mi laan da Koloashanz 3:13, 14?

⁶ Maak mi tink bowt fi hihn oan atichood an ih mi riyalaiz dat ih neva hombl ahn sohntaim ih wuda tink dat hihn beta dan adaz. Hihn mi riyalaiz dat ih mi need fi chaynj ih oan atichood. (Kol. 3:8, 9, 12) Hihn mi gaahn bak tu di brada, bot dis taim ih mi hombl ihself an aks ahn fi fergivnis. Noh onli dat, Maak aalso rait letaz tu di brada, an ih tel ahn how sari ih sari bowt weh mi hapm, an ih aks ahn if evriting gud bitween dehn. Maak mi eevn giv di brada sohn smaal gif weh ih noa di brada wuda laik. Sad fi seh, di brada neva fergiv Maak ataal; ih mi stay beks wid Maak. Bot noh mata wat, Maak mi kantinyu fi obay Jeezas koman fi lov ih breda ahn fi bee fergivin. Maak mi noa dat hihn mi rispansabl fi fi hihn akshanz an ih mi riyalaiz dat hihn kyaahn foas nobadi fi fergiv ahn. (Reed Koloashanz 3:13, 14.) If wi lov  peepl laik Jeezas, wi wahn kip di fergiv dehn ahn pray dat wan day wi wahn ga pees wid dehn agen eevn if dehn noh redi fi mek pees wid wi.—Mach. 18:21, 22; Gal. 6:9.

7. (a) Weh Jeezas mi koman wi fi du? (b) Weh sichuwayshan wahn sista mi haftu fays?

⁷ Jeezas mi koman wi fi kip di chreet peepl di way wee waahn dehn chreet wi. Hihn mi aalso seh dat wi noh onli fi lov dehn wan weh wi noa wahn lov wi bak. (Look 6:31-33) Eevn doa dis noh naamali hapm eena di kangrigayshan, wat if sombadi noh hayl yu ahn dehn ak laik yu noh eevn dehdeh? Dat da weh Laara mi gaahn chroo. Shee seh: “Wahn sista wuda paas mi ahn noh eevn hayl mi, Ai noh eevn noa wai shee wuda ak laik dat. Dis mi mek Ah feel schres owt, an Ah neva hapi fi goh da di meetin dehn.” Fers, Laara mi figa: ‘Ai neva du ahn notn. Da shee da di prablem. An adaz eena di kangrigayshan komplayn bowt di way di sista goh aan tu.’

8. Weh Laara mi du fi mek pees, ahn weh wi ku laan fahn fi shee egzampl?

⁸ Laara mi du sohnting fi mek pees. Shee mi pray tu Jehoava ahn da soh ih mi disaid fi taak tu di sista. Dehn mi taak bowt di prablem, hog eech ada, ahn mek pees. Op tu da point, evriting mi luk okay. Laara seh: “Bot layta, di sista mi shoa di saym atichood laik bifoa. Dat mi mek Ah feel soh diskorij.” Laara mi feel laik shee kuda mi onli bee hapi if di sista mi chaynj ih atichood. Bot layta, Laara mi riyalaiz dat di bes ting shee kuda du da-mi fi kantinyu chreet di sista wid lov ahn fi “fergiv” ahn. (Ifee. 4:32–5:2) Laara mi memba dat wen yu ga chroo Kristyan lov “yu noh wahn di kip chrak a hoo aal du yu ting. If unu lov peepl, unu wahn neva giv op. Unu fayt wahn aalwayz schrang. Unu wahn laayal ahn noh wahn looz hoap. Unu wahn bee redi fi bileev gud tingz bowt peepl. Unu wahn ku bayr evriting.” (1 Kor. 13:5, 7) Laara neva wori bowt di prablem nohmoh. Afta wahn wail, di sista  mi lee bit moa frenli wid Laara. Wen yu werk haad fi ga pees wid yu bradaz ahn sistaz ahn kantinyu fi lov dehn, yu ku bee shoar dat “di Gaad a lov ahn pees wahn deh wid [yu].”—2 Kor. 13:11.

9. Akaadn tu Aks 10:34, 35, wai wi noh fi bee prejudis?

⁹ Jehoava chreet evribadi di saym way. (Reed Aks 10:34, 35.) Wen wi chreet peepl di way Jehoava chreet dehn, wi shoa dat wee da fi hihn pikni. Wi obay di koman fi lov wi nayba sayhn laik how wi lov wiself, ahn wi kip di pees wid wi bradaz ahn sistaz.—Roam. 12:9, 10; Jay. 2:8, 9.

10-11. How wahn sista mi fait negitiv feelinz?

¹⁰ Fi noh bee prejudis mait noh bee eezi fi som peepl. Fi egzampl, kansida weh mi hapm tu wahn sista weh naym Root. Wen shee da-mi wahn teenayja, shee mi ga wahn bad ekspeeryens wid sombadi fahn wahn difrent konchri. How dat mi afek shee? Root seh: “Ai mi hayt evriting bowt da konchri. Ai mi tink dat evribadi fahn da plays da-mi di saym, eevn di bradaz ahn sistaz.” How Root mi deel wid dis feelin?

¹¹ Root mi riyalaiz dat ih mi haftu stap tink da way deh. Shee mi reed ekspeeryens ahn ripoat fahn di Yearbook bowt da konchri. Shee seh: “Ah mi mek wahn big efoat fi staat tu tink pazitiv tingz bowt peepl fahn da konchri. Ah mi noatis dat di bradaz ahn sistaz mi reeli reeli lov Jehoava. Ah mi riyalaiz dat dehn da paat a wi big spirichwal famili weh deh aal rong di werl.” Afta sohn taim, Root mi andastan dat shee mi haftu shoa humoch ih lov ih bradaz ahn sistaz. Shee seh: “Enitaim Ah wuda meet di bradaz ahn sistaz fahn da konchri, Ah wuda mek shoar fi bee frenli wid dehn. Ah wuda taak tu dehn fi get fi noa dehn beta.” How Root mi benifit? Root seh: “Afta wahn wail, mi negitiv feelinz mi disapyaa.”

12. Wat prablem wahn sista weh naym Saara mi ga?

¹² Som peepl mait bee prejudis ahn nat eevn noa it. Fi egzampl, Saara mi tink dat shee neva prejudis bikaaz shee neva joj peepl bays pahn dehn kolcha er skin kala, weda dehn ga moni er nat, er weh kaina rispansabiliti dehn mait ga eena di aaganaizayshan. Bot shee seh: “Ah mi staat tu si dat Ah mi reeli prejudis.” Eena weh way? Saara mi kohn fahn wahn wel-ejukaytid famili, an ih mi prifaa fi spen taim wid peepl weh mi wel-ejukaytid tu. Wan taim shee mi eevn tel ih fren: “Ai onli spen taim wid peepl weh wel-ejukaytid, Ai noh si wai Ai fi spen taim wid dehn wan weh noh ga no kaina ejukayshan.” Fi shoar, Saara mi need fi chaynj ih atichood. Weh shee mi need fi du?

13. Weh wi ku laan fahn how Saara mi chaynj ih atichood?

¹³ Wahn serkit oavaseeya mi help Saara fi si weh shee mi need fi chaynj. Shee seh: “Di brada mi komen mi fi mi faytful servis, mi nais koments da meetin, ahn fi how gud Ah noa di Baibl. Den hihn mi eksplayn dat az wi geh moa ahn moa nalij, wi aalso need fi werk pahn wi Kristyan kwalitiz. Hihn mi seh dat Ah need fi put adaz heda miself, dat Ah need fi noa mi plays, ahn dat Ah need fi ga mersi pahn adaz.” Saara mi fala di advais weh di serkit oavaseeya mi giv ahn. Shee seh: “Ah mi riyalaiz dat weh reeli impoatant da-mi fi bee lovin  ahn kain.” Dat mi mek shee staat tu si ih bradaz ahn sistaz eena wahn difrent way. Shee seh: “Ai mi chrai fi si weh kwalitiz Jehoava laik bowt dehn.” How bowt wee? Wi wuda neva waahn feel dat wi beta dan adaz bikaaz a di levl a ejukayshan weh wi gat! If wi reeli “shoa speshal lov fi [wi] bradaz ahn sistaz weh da bileeva,” wi noh wahn bee prejudis.—1 Peet. 2:17.

14. Akaadn tu Heebrooz 13:16, how Jehoava feel wen wi haspitabl wid adaz?

¹⁴ Jehoava pleez wen wi du gud ahn shayr weh wi gat wid adaz weh need it. (Reed Heebrooz 13:16.) Wen wi du dis, hihn see’t az paat a wi wership tu hihn. (Jay. 1:27; 2:14-17) Soh, di Skripchaz tel wi fi “welkom dehn bileeva weh da schraynja eena [wi] hows.” (Roam. 12:13) Wen wi haspitabl wid adaz, wi shoa dehn dat wi kay fi dehn, dat wi lov dehn, ahn dat wi waahn bee dehn fren. Jehoava hapi wen wi shayr weh wi ga wid adaz, noh mata if da wahn lee snak, sohnting fi jrink, wahn meel, er wi taim an atenshan. (1 Peet. 4:8-10) Bot dehn mait ga sohn tingz weh mait mek it haad fi wi bee haspitabl.

15-16. (a) Wai som peepl mait feel laik dehn kyaahn shoa haspitaliti? (b) Weh mi help Eedit fi bee wilin fi shoa haspitaliti?

¹⁵ Wi mait hoal bak fahn shoa haspitaliti bikaaz a wi sichuwayshan eena laif. Kansida di egzampl a wahn wido weh naym Eedit. Bifoa shee mi geh baptaiz, shee mi rada kip tu ihself. Shee mi feel dat adaz praabli ga di meenz fi bee haspitabl ahn noh shee.

¹⁶ Afta shee mi get fi bee wahn Witnis, Eedit mi chaynj di way ih yoostu tink. Shee mi chrai fi bee haspitabl. Shee seh: “Wen wi nyoo Kingdom Haal mi geh bil, wahn elda mi taak tu mi bowt wahn marid kopl weh mi wahn kohn help wid di kanschrokshan, ahn hihn mi aks mi if dehn kuda mi stay da mi hows fi too weeks. Ah mi memba how Jehoava mi bles di  wido a Zerefat.” (1 Ki. 17:12-16) Eedit mi tek dehn een. Weh blesinz shee mi get? Wel, shee seh: “Too weeks mi ton intu too monts. Joorin da taim, wi mi get fi bee kloas frenz.” Eedit aalso mi geh fi bee kloas tu adaz eena di kangrigayshan. Now, shee di serv az wahn regyula painyaa, an ih onli hapi fi ga di frenz weh werk wid ahn pahn servis oava da ih hows fi wahn lee snak. Shee seh: “Wen Ah giv, Ah feel gud! An Ah geh bak way moa blesinz.”—Heeb. 13:1, 2.

17. Weh Look an ih waif mi riyalaiz dat dehn mi-di du?

¹⁷ Wi mait laik ga peepl oava da wi hows, bot yu tink wi ku du beta? Fi egzampl, Look an ih waif veri haspitabl. Dehn ga di habit fi invait dehn payrents, dehn relitiv, dehn kloas frenz, ahn di serkit oavaseeya an ih waif oava da dehn hows. Bot Look seh: “Wi mi riyalaiz dat wi onli mi-di invait peepl weh wi kloas tu.” How Look an ih waif mi du beta eena di way dehn shoa haspitaliti?

18. How Look an ih waif mi du beta di shoa haspitaliti?

¹⁸ Look an ih waif mi laan weh ih reeli meen fi bee haspitabl wen dehn mi tink bowt Jeezas werdz: “Weh mek yu tink Gaad wahn gi unu eni riwaad if unu oanli lov dehn wan weh lov unu?” (Mach. 5:45-47) Dehn mi andastan dat dehn mi need fi kapi Jehoava, wi Gaad weh jenaros wid evribadi. Soh dehn mi mek it wahn goal fi invait bradaz ahn sistaz weh dehn neva invait bifoa. Look seh: “Now aala wi injai dehnya taim tugeda wahn lat. An ih mek aala wi feel kloasa tu wan anada ahn tu Jehoava.”

19. How wee shoa dat wee da wan a Jeezas disaipl, ahn weh yoo mek op yu main fi du?

¹⁹ Wi don laan dat wen wi shoa dat wi reeli lov wan anada, ih help wi fi mek pees, fi noh bee prejudis, ahn fi bee haspitabl. Wi need fi get oava eni negitiv feelinz, ahn lov wi bradaz ahn sistaz wid aala wi haat. If wi du dis, wi wahn bee hapi ahn wi wahn shoa dat wi da Jeezas disaiplz fi chroo.—Jan 13:17, 35.