1. Weh Ecclesiastes 3:1, 7 teech wi?

SOM a wi laik taak wahn lat, wail som a wi jos laik kip kwaiyet. Di skripcha weh dis aatikl bays pan point owt dat wahn taim deh fi kip kwaiyet ahn wahn taim deh fi taak. (Reed Ecclesiastes 3:1, 7.) * Stil, wi wish dat som a wi bradaz ahn sistaz wuda taak moa ahn wi wish dat som a dehn wudn taak soh moch.

2. Hoo ga di rait fi set di standadz fi wen ahn how wi fi taak?

² Speech da wahn gif fahn Jehoava. (Ex. 4:10, 11; Rev. 4:11) Eena fi hihn werd di Baibl, Ih help wi fi andastan how fi yooz dis gif eena di rait way. Eena dis aatikl, wi wahn si sohn egzampl fahn di Baibl weh wahn help wi fi noa wen da wahn gud taim fi taak ahn wen da wahn gud taim fi kip kwaiyet. Wi wahn aalso laan weh Jehoava tink bowt weh wi seh tu adaz. Bot fers, mek wi tink bowt wen wi shuda taak.

3. Akaadn tu Roamanz 10:14, wen wi shuda taak?

³ Wi shuda aalwayz bee redi fi taak bowt Jehoava an ih Kingdom. (Mach. 24:14; reed Roamanz 10:14.) Wen wi du dis, wi di fala Jeezas egzampl. Wan a di mayn reezn wai Jeezas mi kohn pahn di ert da-mi fi teech di chroot bowt ih Pa. (Jan 18:37) Bot wi haftu memba dat da noh jos weh wi seh, bot how wi seh it impoatant tu. Soh wen wi di taak tu adaz bowt Jehoava, wi haftu du it “eena wahn nais way ahn wid rispek,” ahn wi fi aalso shoa dat wi kay bowt di ada persn feelinz ahn weh ih bileev eena. (1 Peet. 3:15, 16) Wen wi du  dis, wi noh wahn onli taak tu di persn, bot wi wahn aalso teech dehn ahn maybi wi mait reech dehn haat.

4. Laik weh Proverbs 9:9 seh, how weh wi seh ku help adaz?

⁴ If eldaz si dat wahn brada er sista need kongsl, dehn noh sopoas tu tek lang fi seh sohnting. Af koars, dehn wahn chooz di rait taim fi seh sohnting soh dat dehn noh shaym di persn. Di eldaz dehn wuda waahn wayt til adaz noh deh rong. Eldaz chrai haad fi taak tu peepl eena wahn way weh noh wahn mek di persn feel laik dehn noh wert eniting. Bot dehn stil noh hoal bak fahn shoa adaz Baibl prinsiplz weh ku help dehn du weh rait. (Reed Proverbs 9:9.) * Wai ih impoatant fi mek wi ga korij fi taak op wen wi haftu? Kansida too difrent egzampl: Eena wan egzampl, wahn man mi need fi karek ih son dehn, an eena di ada egzampl, wahn uman mi haftu tel wahn man, weh mi wahn bee king, dat ih mi mek wahn rang disizhan.

5. Wen di Hai Prees Eelai neva taak op wen hihn mi sopoaz tu?

⁵ Hai Prees Eelai mi ga too son weh hihn mi lov wahn lat. Bot dehnya too son neva ga no kaina rispek fi Jehoava. Dehn mi-di serv az prees da di tabernakl ahn dat da-mi wahn reeli impoatant rispansabiliti. Bot dehn mi tek advantij a di atariti weh dehn mi gat. Dehn mi shoa lata disrispek fi di sakrifais weh da-mi fi Jehoava, ahn dehn mi komit sekshwal imoraliti widowt shaym. (1 Sam. 2:12-17, 22) Akaadn tu di Laa weh Jehoava mi gi Moaziz, Eelai son dehn mi dizerv fi ded sayka weh dehn mi du, bot insteda dat, Eelai onli mi gi dehn wahn lee skoalin, ahn hihn mi stil alow dehn fi serv da di tabernakl. (Deut. 21:18-21) How Jehoava mi feel bowt di way Eelai mi deel wid da sichuwayshan? Hihn mi tel Eelai: “Da wai yu aana yu son dehn moa dan mee?” Jehoava mi disaid fi kil dehndeh too wikid man.—1 Sam. 2:29, 34.

6. Weh wi laan fahn Eelai?

⁶ Wi laan wahn impoatant lesn fahn Eelai. If wi fain owt dat wan a wi famili memba er wan a wi fren disobay Jehoava, wi haftu taak tu dehn ahn rimain dehn bowt Jehoava standadz. Den wi haftu mek shoar dat di persn geh di help weh ih need fahn di eldaz. (Jay. 5:14) Wi wuda neva waahn bee laik Eelai an aana wi fren er famili memba moa dan how wi aana Jehoava. Wi need fi  ga wahn lata korij fi taak tu sombadi weh need kongsl, bot if wi mek di efoat wi wahn ga gud rizolts. Mek wi luk pahn di difrens bitween Eelai egzampl ahn di egzampl a wahn Izrelait uman weh naym Abigayl.

7. Wai Abigayl mi taak tu Dayvid?

⁷ Abigayl da-mi Naybal waif, ahn Naybal da-mi wahn rich man weh mi oan lata lan. Wen Dayvid an ih soalja dehn mi-di ron weh fahn King Saal, dehn mi spen sohn taim wid Naybal shepadz ahn dehn mi help protek Naybal sheep fahn teef tu. Yu tink Naybal mi tankful fi dehn help? No. Wen Dayvid mi aks Naybal fi sohn food ahn waata fi hihn an ih soalja dehn, Naybal mi geh beks bad ahn hihn mi hala op aata dehn. (1 Sam. 25:5-8, 10-12, 14) Sayka dat, Dayvid mi disaid fi kil evri man weh mi liv eena Naybal hows. (1 Sam. 25:13, 22) How dehn kuda mi avoid da bad sichuwayshan? Abigayl mi disaid dat shee mi haftu seh sohnting, soh shee mi shoa korij ahn gaahn meet Dayvid ahn 400 a fi hihn soalja dehn weh mi hongri ahn beks.

8. Weh wi laan fahn Abigayl egzampl?

⁸ Wen Abigayl gaahn taak tu Dayvid, shee mi taak tu ahn eena wahn way weh shoa dat shee ga korij, ahn dat mi mek Dayvid agree fi du weh shee seh. Eevn doa da neva Abigayl kaaz dis prablem, shee mi stil tel Dayvid sari. Shee mi seh dat shee noa dat Dayvid da-mi wahn gud persn. Aalso, shee mi noa dat hihn mi wahn du di rait ting ahn shee mi rilai pahn Jehoava fi help shee. (1 Sam. 25:24, 26, 28, 33, 34) Jos laik Abigayl, if wi si dat sombadi bowt fi mek wahn seeryos mistayk, wi need fi ga di korij fi taak op. (Ps. 141:5) Wi haftu taak tu dehn wid rispek, bot wi kyaahn frayd fi taak tu dehn needa. If wi aafa kongsl tu sombadi owta lov, wi proov dat wee da wahn chroo chroo fren.—Prov. 27:17.

9-10. Wat eldaz shuda memba wen dehn di kongsl sombadi?

 ⁹ Ih reeli impoatant fi mek eldaz ga di korij fi taak tu di wan dehn eena di kangrigayshan weh du sohnting rang. (Gal. 6:1) Eldaz rekonaiz dat dehn noh perfek, ahn dehn need fi bee hombl, ahn sohntaim dehn wahn need kongsl tu. Bot eldaz noh mek dat stap dehn fahn karek dehn wan weh need disiplin. (2 Tim. 4:2; Tai 1:9) Wen eldaz chrai fi kongsl sombadi, dehn chrai fi du it eena wahn payshent ahn kain way. Di lov weh dehn ga fi dehn brada er sista moov dehn fi help dehn brada er sista. (Prov. 13:24) Bot fi aana ahn sopoat Jehoava standadz moa impoatant tu dehn ahn dehn du dis wen dehn protek di kangrigayshan fahn chrobl.—Aks 20:28.

¹⁰ Op tu now, wi don diskos wen wi shuda taak. Pahn di ada han, sohntaim ih bes fi mek wi jos kip kwaiyet. Wat da som a di chalenjiz wi mait haftu deel wid wen da taim kohn?

11. Wat da di iloschrayshan weh Jaymz mi yooz, ahn how dat aplai tu weh wi seh?

¹¹ Ih ku bee haad fi mek wi noa how fi kanchroal weh wi seh. Wan a di Baibl raita weh naym Jaymz mi yooz wahn gud egzampl fi diskraib how haad ih haad fi noa how fi kanchroal weh wi seh. Hihn seh: “If enibadi ku kanchroal dehn tong, den dehn perfek, ahn dehn ku kanchroal di hoal a dehn badi.” (Jay. 3:2, 3) Sombadi weh raid haas yoozhwali put wahn bit eena di haas mowt fi mek ih ku kanchroal di haas er fi mek di haas stap. If di persn weh di raid di haas noh hoal aan gud tu di braidl, di haas ku staat tu ron aal oava di plays er ih ku hert ihself ahn di persn weh deh pan ih bak. Jos laik di persn weh di raid di haas, if  wee noh kanchroal weh wi seh, ih ku kaaz wahn lata prablem. Mek wi luk pahn sohn sichuwayshanz wehpaat wi wahn need fi kanchroal wi tong ahn kip kwaiyet.

12. Da wen wi shuda kanchroal wi tong ahn kip kwaiyet?

¹² Weh yu du wen wahn brada er sista noa sohnting weh dehn noh fi tel adaz? Fi egzampl, sopoaz yu meet sombadi weh liv da wahn konchri wehpaat di preechin werk deh anda ban. Yu wuda aks ahn fi giv yu deetayl bowt how dehn du Jehoava werk eena da ayrya? Af koars yu noh wahn aks dehn dat, bikaaz yu noh waahn hert dehn. Wi lov wi brada ahn wi kay bowt dehn. Wi aalso wahn bee spesifik wen wi pray fi dehn. Bot dis da wahn taim wen wi shuda kanchroal wi tong ahn kip kwaiyet. If wi presha sombadi fi seh sohnting weh dehn noh fi tel nobadi, wee di shoa dat wi noh lov dehn er di bradaz ahn sistaz weh di pen pahn di persn fi kip kwaiyet bowt how di werk get don. Fi shoar, non a wi waahn mek tingz wers fi wi bradaz ahn sistaz weh liv da sohn konchri wehpaat wi werk deh anda ban. Saym way soh, no brada er sista weh di serv eena wahn konchri laik dat wuda waahn taak bowt how di Witnisiz du dehn minischri, meet tugeda, er du eniting els weh ga fi du wid dehn wership.

13. Akaadn tu Proverbs 11:13, weh eldaz haftu du ahn wai?

¹³ Ih reeli impoatant fi mek eldaz aplai di prinsipl weh deh da Proverbs 11:13. Dehn du dis wen dehn noh giv owt infamayshan tu peepl hoo noh ga no rait fi noa it. (Reed.) * Dis ku bee haad espeshali if wahn elda marid. Wahn marid kopl taak tu eech ada wahn lat ahn dat help fi kip dehn rilayshanship schrang. Dehn shayr dehn seekrit, how dehn feel, ahn dehn woriz. Bot wahn elda noa dat hihn noh fi infaam ih waif bowt tingz eena di kangrigayshan weh sopoas tu bee praivit. If hihn wuda du dat, nobadi wuda chros ahn, an dat ku damij fi hihn repyutayshan. Di bradaz ahn sistaz sopoas tu ku chros di bradaz weh di tek di leed eena di kangrigayshan, soh di apointid bradaz noh fi bee laiyad. (1 Tim. 3:8; ftn., NW.) Dat meenz dat dehn noh fi lai tu adaz er laik gasip bowt adaz. If wahn elda lov ih waif, hihn noh wahn tel ahn tingz weh shee noh need fi noa.

14. How wahn elda waif ku help hihn fi ga wahn gud repyutayshan?

¹⁴ Wahn waif ku help ih hozban kip wahn gud repyutayshan. Shee du dis wen ih noh chrai fi foas ih hozban fi taak bowt tingz weh ih shuda kip kanfidenshal. Wen wahn waif du dis, shee noh onli di sopoat ih hozban, bot shee di shoa dat shee rispek enibadi weh tel ih hozban tingz weh praivit. Eevn moa impoatant dan aala dat, shee mek Jehoava hapi bikaaz shee di ad tu di pees ahn yooniti a di kangrigayshan.—Roam. 14:19.

15. How Jehoava mi feel bowt Joab chree soa-kaal frenz, ahn wai?

¹⁵ Wi ku laan wahn lat fahn di Baibl buk a Job bowt how ahn wen fi taak. Afta Joab mi gaahn chroo wahn lata haad taimz, foa man mi gaahn tu ahn fi komfert ahn, an giv ahn kongsl. Eevn doa dehnya chree man, Elifaz, Bildad, ahn Zoafar, mi kip kwaiyet fi lang, ih seem laik dehn neva spen da taim di tink bowt how dehn kuda mi help Joab. Insted, dehn mi-di tink bowt how dehn kuda mi proov dat Joab mi du sohnting rang. Som a di tingz weh dehn seh mi karek,  bot wahn lata di tingz weh dehn mi seh bowt Joab ahn bowt Jehoava da neva chroo ahn dehn neva nais fi seh needa. Dehn mi seh dat Joab da-mi wahn bad persn. (Job 32:1-3) Weh Jehoava mi du bowt dis? Hihn mi geh beks bad wid dehnya chree man. Hihn eevn kaal dehn fool fool, an ih mi mek dehn aks Joab fi mek Joab pray fi dehn.—Job 42:7-9.

16. Weh wi ku laan fahn di bad egzampl weh Elifaz, Bildad, ahn Zoafar set?

¹⁶ Wi laan wahn lata lesn fahn di bad egzampl weh Elifaz, Bildad, ahn Zoafar set. Fers, wi noh fi joj wi bradaz. (Mach. 7:1-5) Insted, wi shuda lisn tu dehn gud bifoa wi taak. Onli soh wi wahn ku andastan weh dehn di goh chroo. (1 Peet. 3:8) Sekant, wen wi taak, wi haftu mek shoar dat wateva wi seh kain ahn dat wi di tel di chroot. (Ifee. 4:25) Ahn terd, Jehoava pay kloas atenshan tu weh wi seh tu wan anada.

17. Weh wi ku laan fahn Ilaihyu egzampl?

¹⁷ Di foat man weh mi vizit Joab da-mi Ilaihyu hoo da-mi wan a Aybraham faamli. Hihn mi lisn tu Joab ahn di chree ada man weh mi taak tu Joab. Hihn mi lisn kyaafuli tu aal weh dehn mi seh. Dats wai hihn kuda mi gi Joab wahn kain bot aanis kongsl fi help ahn karek ih tinkin. (Job 33:1, 6, 17) Ilaihyu mayn foakos da neva fi prayz ihself er eni ada man, bot fi prayz Jehoava. (Job 32:21, 22; 37:23, 24) Wi laan fahn Ilaihyu egzampl dat dehn ga wahn taim fi kip kwaiyet ahn lisn. (Jay. 1:19) Wi aalso laan dat wen wi giv kongsl, wi mayn goal da fi aana Jehoava ahn noh wiself.

18. How wi ku shoa dat wi tankful fi di abiliti fi taak?

¹⁸ Wi ku shoa dat wi tankful fi di abiliti fi taak wen wi fala di Baibl advais pahn wen ahn how fi taak. Waiz King Salaman mi rait: “Wahn werd weh wi seh da di rait taim da jos laik aaplz weh mek owta goal ahn set eena silva kaavin.” (Prov. 25:11) Wen wi lisn kyaafuli tu weh adaz seh ahn tink bifoa wi taak, wi werdz wahn bee laik dehn aapl weh mek owta goal ahn priti ahn weh wert lata moni. Den eevn if wi taak wahn lat er lee bit, weh wi seh wahn inkorij adaz, an ih wahn mek Jehoava hapi wid wi. (Prov. 23:15; Ifee. 4:29) If wi du dis wi ku shoa jos how moch wi apreeshiayt dis gif weh Gaad gi wi!