1. Wai Jeezas mi aks Jehoava fi protek fi hihn disaiplz?

PAHN di laas nait a Jeezas laif pahn di ert, hihn mi-di tink bowt di chalenjiz weh ih disaipl dehn mi wahn fays. Hihn mi lov fi hihn disaiplz, soh hihn mi aks ih Faada fi “protek dehn fahn Saytan.” (Jan 17:14, 15) Jeezas mi noa dat afta hihn goh bak da hevn, Saytan di Devl mi wahn kantinyu fait gens enibadi weh waahn serv Jehoava. Soh Jehoava peepl wuda need protekshan.

2. How wi ku bee shoar dat Jehoava wahn ansa wi pryaaz?

² Jehoava mi ansa Jeezas pryaa bikaaz Hihn lov Ih Son. If wi chrai wi bes fi pleez Jehoava, hihn wahn lov wee tu, an ih wahn pay atenshan wen wi pray an aks ahn fi help ahn protekshan. Jehoava da wahn lovin Faada, soh hihn wahn kantinyu fi tek kayr a ih chiljren. If hihn noh du dat, hihn wuda spail ih oan repyutayshan!

3. Wai wi need Jehoava protekshan?

³ Wee need Jehoava protekshan moa dan eva bifoa. Saytan don geh kik owt fahn hevn, “an ih beks bad.” (Rev. 12:12) Hihn manij fi kanvins som a di peepl weh persikyoot wi dat dehn di du “wahn hoali servis tu Gaad.” (Jan 16:2) Ada peepl weh noh bileev eena Gaad, persikyoot wi bikaaz wee da noh laik dehn. Bot noh mata wai peepl persikyoot wi, wee noh frayd. Wai? Bikaaz Gaad Werd seh: “Di Laad faytful, ahn hihn wahn schrentn unu ahn protek unu fahn di wikid wan.” (2 Tes. 3:3) Mek wi diskos too wayz how Jehoava protek wi.

4. Akaadn tu Ifeezhanz 6:13-17, weh Jehoava gi wi fi protek wi?

⁴ Jehoava gi wi wahn soot weh ku protek wi fahn Saytan wen hihn atak wi. (Reed Ifeezhanz 6:13-17.) Dis spirichwal soot schrang an ih werk gud! Bot da soot onli wahn protek wi if wi put aan eech pees a it ahn kip di wayr it. Mek wi diskos weh aala di paats a dis soot stan fa.

5. Weh belt wi haftu wayr, ahn wai?

⁵ Wayr di chroot rong yu ways laik wahn belt. Da belt stan fi di chroot weh wi fain eena Gaad Werd di Baibl. Wai wi haftu wayr da belt? Bikaaz Saytan da “di faada a di lai dehn.” (Jan 8:44) Hihn di tel lai fi towznz a yaaz ahn hihn di “fool op di hoal ert”! (Rev. 12:9) Bot di chroot weh deh eena di Baibl protek wi fahn fi hihn chriks. How wi wayr dis spirichwal belt? Wi du dat wen wi laan di chroot bowt Jehoava, wen wi wership hihn “wid spirit ahn chroot,” ahn wen wi aanis eena evriting weh wi du.—Jan 4:24; Ifee. 4:25; Heeb. 13:18.

6. Weh ves wi haftu wayr, ahn wai?

⁶ Wayr raichosnis pahn yu ches laik wahn ves. Da ves stan fi Jehoava raichos standadz. Wai wi haftu wayr da ves? Jos laik how di aiyan ves weh wahn soalja wayr protek ih haat, Jehoava raichos standadz ku protek fi wee haat, er hoo wee pahn di eensaid, soh dat di wikid tingz eena di werl noh korop wi. (Prov. 4:23) Jehoava ekspek wi fi lov ahn, an serv ahn wid aala wi haat. (Mach. 22:36, 37) Soh Saytan chrai get wi fi lov tingz eena di werl—tingz weh Jehoava hayt—soh dat wi stap serv Jehoava wid aala wi haat. (Jay. 4:4; 1 Jan 2:15, 16) An if dat noh werk, hihn wahn persikyoot wi fi si if ih ku get wi fi du sohnting weh goh gens Jehoava standadz.

7. How wi ku wayr raichosnis laik wahn ves?

⁷ Wi wayr raichosnis laik wahn ves wen wi aksep Jehoava standadz a weh rait ahn weh rang, ahn wen wi liv akaadn tu dehndeh standadz. (Ps. 97:10) Som peepl feel laik Jehoava standadz tu schrik. Bot if wi stap fala Baibl prinsiplz eena wi laif, wee wuda bee laik wahn soalja weh tek aaf ih aiyan ves eena di midl a wahn waar bikaaz hihn tink ih tu hevi. Dat wuda bee veri foolish! Bot if wi lov Jehoava, den wi wahn si fi hihn komanment dehn az wahn protekshan fi wi. Wi noh wahn tink dat dehn “haad fi obay.”—1 Jan 5:3.

8. Wat da di shooz weh Paal tel wi fi wayr ahn weh ih meenz fi wayr it?

⁸ Paal aalso tel wi dat wi haftu bee redi fi preech di gud nyooz ahn mek dat bee laik di shooz weh wi wayr pahn wi fut. Dat meenz dat wi haftu aalwayz bee redi fi preech di Kingdom gud nyooz. Wen wi tel ada peepl weh di Baibl seh, wi schrentn wi oan fayt. Ih reeli inkorij wi wen wi si how Jehoava peepl aal oava di ert di tek eni chaans weh dehn get fi preech di gud nyooz. Fi egzampl, dehn preech da werk, da skool, fahn hows tu hows, eena bizniz teritori, wen dehn goh da shap, wen dehn vizit famili, wen dehn taak tu ada peepl weh dehn noa, an eevn wen dehn kyaahn lef dehn oan hows. If wee wuda giv een tu fyaa ahn stap preech, wee wuda bee laik wahn soalja weh tek aaf ih shooz wail ih di fait wahn waar. If wahn soalja wuda du dat, ih wuda bee haad fi difen ihself an ih mi wahn kyaahn fala di aadaz weh ih komanda giv ahn.

9. How wi fayt da laik wahn sheel?

 ⁹ Wi fayt eena Jehoava da laik wahn sheel weh protek wi. Wee chros dat hihn wahn du evriting weh hihn pramis fi du. Da fayt wahn help wi fi “blak aala di aro dehn weh bon wid faiya weh di wikid wan di shoot aata [wi].” Wai wi need fi kehr dis sheel? Bikaaz ih protek wi soh dat apastayt teechinz noh fool wi er soh dat wi noh geh diskorij wen peepl kritisaiz er mak weh wi bileev. Widowt fayt, wi noh wahn ga di schrent fi obay Jehoava wen ada peepl chrai mek wi ignoar fi hihn standadz. Pahn di ada han, eech taim wi stan op fi wi fayt da werk er da skool, wi sheel di protek wi. (1 Peet. 3:15) Eech taim wi rijek wahn jab wid beta pay weh wuda stap wi fahn put Jehoava fers, wi sheel di protek wi. (Heeb. 13:5, 6) An eech taim wi serv Jehoava, eevn anda persikyooshan, wi sheel di protek wi.—1 Tes. 2:2.

10. Wai wi haftu put aan di helmit weh da wi hoap a salvayshan?

¹⁰ Di helmit da di hoap a salvayshan weh Jehoava gi wi. Dis da di hoap dat hihn wahn riwaad enibadi weh du fi hihn wil. An eevn if wi ded, hihn wahn rezorek wi.  (1 Tes. 5:8; 1 Tim. 4:10; Taitos 1:1, 2) Jos laik how wahn helmit protek wahn soalja hed, di hoap a salvayshan protek wi tinkin. How? Da hoap help wi fi foakos pahn Gaad pramis dehn an ih help wi fi bee aybl fi deel wid wi prablemz. Ahn wi wayr dis helmit wen wi mek shoar dat wee feel di saym way Gaad feel bowt tingz. Fi egzampl, wee put fi wee hoap eena Gaad, noh eena richiz weh noh laas.—Ps. 26:2; 104:34; 1 Tim. 6:17.

11. Wat da di soad a di spirit, ahn wai wi need fi yooz it?

¹¹ Di soad a di spirit da Gaad Werd di Baibl. Da soad ga di powa fi kot chroo aal kaina lai ahn fi set peepl free fahn faals teechin ahn bad habits. (2 Kor. 10:4, 5; 2 Tim. 3:16, 17; Heeb. 4:12) Wi laan fi yooz da soad eena di rait way wen wi du persnal stodi ahn wen wi geh chraynin fahn Gaad aaganaizayshan. (2 Tim. 2:15) Lang wid dis spirichwal soot ahn soad, Jehoava gi wi wahn nada kaina powaful protekshan. Mek wi fain owt da wat.

12. Wat els wi need, ahn wai?

¹² Wahn gud soalja noa dat hihn kyaahn fait wahn big aami bai ihself ahn win; hihn need help fahn ada soaljaz. Saym way soh, wee kyaahn fait gens Saytan an ih falowaz pahn wi oan an win. Dats wai Jehoava gi wi di sopoat a wi bradaz ahn sistaz. Ahn wee ga bradaz ahn sistaz “aal oava di werl.”—1 Peet. 2:17.

13. Akaadn tu Heebrooz 10:24, 25, how wi meetin dehn help wi?

¹³ Wan way wi geh da sopoat fahn wi bradaz ahn sistaz da wen wi goh da meetin. (Reed Heebrooz 10:24, 25.) Aala wi feel diskorij sohntaim. Wen dat hapm, wi meetin dehn ku inkorij wi. Wi feel inkorij wen wi hyaa wi bradaz ahn sistaz koment fahn dehn haat. Di taak ahn demonschrayshan dehn weh bays pahn di Baibl moov wi fi waahn serv Jehoava eevn moa. Ahn wi feel inkorij wen wi get fi taak wid wi bradaz ahn sistaz bifoa an afta di meetin. (1 Tes. 5:14) Pahn tap a dat, wi meetin dehn gi wi di chaans fi help adaz, ahn dat mek wi feel hapi. (Aks 20:35; Roam. 1:11, 12) Wi meetin dehn help wi eena ada wayz tu. Dehn help wi fi du beta eena di preechin ahn teechin werk. Fi egzampl, wi laan fi mek gud yoos a di toolz eena wi Teechin Toolbaks. Soh pripyaa gud fi di kangrigayshan meetin dehn. Joorin di meetin, lisn gud. Afta di meetin, yooz di chraynin weh yu get. Wen yu du aala dehndeh tingz, yu wahn bee “wahn chroo soalja a Krais Jeezas.”—2 Tim. 2:3.

14. Hoo els di help wi?

¹⁴ Wi aalso ga di sopoat a milyanz ahn milyanz a powaful aynjelz. Tink bowt weh jos wan aynjel ku du! (Isa. 37:36) Now tink bowt weh wahn aami a aynjelz kuda du. Jehoava da di moas powaful persn eena di hoal yoonivers. Soh wen Jehoava deh pahn fi wee said, wi wahn aalwayz bee schranga dan wi enimi dehn, noh mata humoch a dehn kohn gens wi. (Judg. 6:16) Wee ku bee shoar a dat! Aalwayz memba dehnya tingz wen sohnbadi weh yu werk wid, sohnbadi weh yu goh da skool wid, er sohnbadi eena yu famili weh da noh wahn Witnis seh er du sohnting weh mek yu feel diskorij. Noh ferget dat yu noh di fait bai yuself. Yu di fala Jehoava dairekshan.

15. Akaadn tu Isaiah 54:15, 17, wai nobadi kyaahn stap Gaad peepl fahn preech?

¹⁵ Dis werl weh deh anda Saytan kanchroal hayt wi fi lata difrent reezn. Wi noh geh involv eena palitiks ahn wi noh fait eena no waar. Wi teech peepl Gaad naym, wi promoat fi hihn Kingdom az di onli hoap fi pees, ahn wi obay fi hihn raichos standadz. Wi proov tu peepl dat di roola a dis werl da wahn wikid merdara weh onli laiyad. (Jan 8:44) Ahn wee preech dat Saytan werl wahn soon geh dischrai. Stilyet, wee wahn kip di prayz Jehoava eena evri way weh wi kud. Eevn doa Saytan powaful, hihn kyaahn stap wi fahn preech di gud nyooz a di Kingdom tu peepl aal oava di ert. Dat onli pasabl bikaaz wi ga Jehoava protekshan.—Reed Isaiah 54:15, 17. *

16. How Jehoava wahn sayv ih peepl joorin di grayt chribyulayshan?

¹⁶ Weh wahn soon hapm? Joorin di grayt chribyulayshan, Jehoava wahn sayv wi eena too amayzin way. Fers, hihn wahn sayv ih laayal servant dehn joorin di taim wen hihn kaaz aala di govament dehn pahn di ert fi dischrai Babilan di Grayt, weh stan fi aala faals rilijan. (Rev. 17:16-18; 18:2, 4) Ahn sekant, hihn wahn sayv ih peepl wen ih dischrai di res a Saytan sistem joorin Armagedon.—Rev. 7:9, 10; 16:14, 16.

17. How wi benifit wen wi stay kloas tu Jehoava?

¹⁷ Wen wi stay kloas tu Jehoava, Saytan kyaahn du wi notn weh ku kaaz wi permanent damij. In fak, hihn da di wan weh wahn geh dischrai fareva. (Roam. 16:20) Soh put aan di hoal soot weh Gaad gi wi fi protek wi ahn noh tek it aaf fi notn! Noh chrai fait dis waar bai yuself. Sopoat yu bradaz ahn sistaz. Ahn fala Jehoava dairekshan. Den yu ku bee shoar dat yu lovin hevnli Faada wahn schrentn yu ahn protek yu.—Isa. 41:10.