Som Kristyanz yooz teknalaji fi kip in toch wid dehn famili ahn wid ada bradaz ahn sistaz. Af koars, wahn machoar Kristyan wahn aalwayz memba dis kongsl: “Di waiz persn si di daynja ahn haid ihself, bot di wan dehn weh noh ga ekspeeryens kip aan di hed fi daynja ahn sofa di en rizolt.”—Prov. 27:12.

Wi andastan dat Jehoava waahn protek wi. Soh dats wai wi noh spen taim wid peepl weh kaaz divizhan, peepl weh disfeloship, er peepl weh promoat rang teechinz. (Roam. 16:17; 1 Kor. 5:11; 2 Jan 10, 11) Som peepl eena di kangrigayshan noh mait aalwayz obay Baibl prinsiplz. (2 Tim. 2:20, 21) Wi haftu aalwayz memba dat wen wi di chooz hoo wahn bee wi frenz. Bot ih ku bee haad fi chooz gud frenz wen wi kamyoonikayt wid wahn mesij ap.

Wi haftu bee kyaaful wen wi jain wahn groop chat, espeshali if da wahn big groop. Som Kristyanz jain sohn big groop, ahn dat noh aalwayz ton owt gud. How wahn brada er sista ku bee kyaaful if dehn jain wahn groop weh gat een honjridz er eevn towznz a peepl? Ih wuda bee impasabl fi reeli noa evribadi eena di groop an if dehn spirichwali schrang. Psalm 26:4 seh: “Ah noh spen taim wid peepl weh tel lai. An Ah stay weh fahn enibadi hoo da wahn hipokrit.” Dat meenz dat di waiz ting fi du da fi onli mesij peepl weh wi noa.

Eevn if wahn Kristyan jain wahn smaala groop chat, ih stil haftu bee kyaaful humoch taim ih spen pan it ahn weh di peepl eena di groop di taak bowt. Wi shudn feel laik wi haftu ansa evri mesij weh wi get, noh mata weh dehn di taak bowt er humoch taim ih tek. Paal mi waan Timoti bowt peepl weh wuda “laik gasip an intafyaa eena ada peepl bizniz.” (1 Tim. 5:13) Wee ku du di saym ting wid wi ilekchranik divais.

No machoar Kristyan wuda taak bad bowt ih bradaz er lisn wen ada peepl taak bad bowt dehn. Ih wudn braadkyaas ada peepl bizniz an ih wudn lisn tu enibadi weh du dat needa. (Ps. 15:3; Prov. 20:19) Wen ih paas aan infamayshan, ih wudn ad aan hed ahn tayl jos fi mek it moa eksaitin, an ih wudn lisn tu ada peepl weh du dat needa. (Ifee. 4:25) Wi geh aal di spirichwal food weh wi need an infamayshan weh wi ku chros fahn wi jw.org websait ahn fahn wi JW Braadkyaastin proagram eech mont.

Som Witnisiz yooz ilekchranik mesij fi bai ahn sel, fi advataiz difrent tingz, er fi aafa werk tu ada peepl. Dehndeh da bizniz mataz ahn dehn noh ga notn fi du wid wi wership tu Jehoava. Wahn Kristyan weh noh lov moni wuda neva giv een tu di temtayshan fi mek moni aafa ih bradaz.—Heeb. 13:5.

Yu tink wi shuda yooz mesij ap fi aks fi moni fi bradaz ahn sistaz weh need help er weh di sofa afta wahn dizaasta? Wi lov wi bradaz ahn sistaz, ahn wi aalwayz di luk fi eni apachooniti fi help dehn, sopoat dehn, an inkorij dehn. (Jay. 2:15, 16) Bot if wi chrai du dat eena wahn big groop chat, wi mait akchwali di intafyaa wid di araynjments weh di loakal branch aafis er kangrigayshan di mek. (1 Tim. 5:3, 4, 9, 10, 16) An af koars, wi wudn waahn peepl tink dat wi ga sohn kaina speshal asainment fi tek kayr a Gaad sheep.

Wi waahn mek shoar dat evriting weh wi du bring gloari tu Gaad. (1 Kor. 10:31) Soh wen wi di disaid if wi wahn yooz wahn mesij ap er eni ada teknalaji, tink bowt di daynjaz, ahn bee kyaaful!