1. Akaadn tu Machyu 24:9, wai wi shudn bee sopraiz if di werl hayt wi?

JEHOAVA mek wi soh dat wi ku shoa lov tu ada peepl ahn fi mek ada peepl lov wi bak. Soh wen sohnbadi hayt wi, wi feel hert ahn wi mait eevn feel frayd. Fi egzampl, wahn sista weh naym Georgina, hoo liv da Europe, seh: “Mai ma mi hayt mi sayka weh Ah mi-di serv Jehoava. Dat mi mek Ai feel sad. Ah mi feel laik Ah deh pahn mi oan, an Ah mi staat tu tink dat Ai da neva wahn gud persn.” * Wahn brada weh naym Danylo seh: “Wen soaljaz mi beet mi, insolt mi, ahn chretn mi bikaaz Ai da wan a Jehoava Witnisiz, Ah mi feel fraitn ahn shaym.” Ih hert wi wen peepl hayt wi, bot ih noh sopraiz wi. Jeezas mi seh dat peepl mi wahn hayt wi.—Reed Machyu 24:9.

2-3. Wai di werl hayt Jeezas falowaz?

² Di werl hayt Jeezas falowaz. Wai? Bikaaz, laik Jeezas, wee da noh laik “di peepl a dis werl.” (Jan 15:17-19) Soh aldoa wi rispek di hyooman govament dehn, wi rifyooz fi wership dehn er eniting weh reprizent dehn. Wee wership onli Jehoava. Wee sopoat Gaad rait fi rool oava hyoomanz, bot Saytan ahn fi hihn pikni seh dat Gaad noh ga da rait. (Gen. 3:1-5, 15) Wee preech dat Gaad Kingdom da di onli solooshan fi aala di prablemz weh peepl gat an ih wahn soon dischrai enibadi weh deh gens it. (Dan. 2:44; Rev. 19:19-21) Da mesij da gud nyooz fi hombl peepl  bot da bad nyooz fi wikid peepl.—Ps. 37:10, 11.

³ Peepl aalso hayt wi bikaaz wi liv akaadn tu Gaad standad a weh rait ahn weh rang. Gaad standadz veri difrent fahn di werl standadz. Fi egzampl, lata peepl tink notn rang wid di disgostin sekshwal imoraliti weh peepl praktis tudeh, bot dat da egzakli weh Gaad mi dischrai Sadam ahn Gomora fa! (Jood 7) Lata peepl insolt wi ahn tel wi dat wi tu schrik bikaaz wi obay weh di Baibl seh bowt dehndeh tingz.—1 Peet. 4:3, 4.

4. Weh kwalitiz help wi fi bayr op wen peepl hayt wi?

⁴ Weh ku help wi fi bayr op wen peepl hayt wi an insolt wi? Wi haftu ga schrang fayt dat Jehoava wahn help wi. Wi fayt da laik wahn sheel weh wi ku yooz fi ‘blak aala di aro dehn weh di bon wid faiya weh di wikid wan di shoot aata wi.ʼ (Ifee. 6:16) Bot wi need moa dan fayt. Wi aalso need lov. Wai? Bikaaz lov “noh eezi fi geh beks.” Ih “bayr op anda evriting . . . an ih noh giv op noh mata weh hapm.” (1 Kor. 13:4-7, 13) Mek wi si how lov fi Jehoava, fi wi bradaz ahn sistaz, an eevn fi wi enimi dehn wahn help wi fi bayr op wen peepl hayt wi.

5. Weh Jeezas kuda mi du bikaaz hihn lov ih Faada?

⁵ Pahn di nait bifoa Jeezas enimi dehn mi kil ahn, hihn mi tel ih laayal falowaz: “Ai du egzakli weh di Faada koman mi fi du, soh dat di werl ku noa dat Ai lov di Faada.” (Jan 14:31) Jeezas kuda mi bayr op anda sohn haad chraiyalz bikaaz hihn mi lov Jehoava. Wee ku du di saym ting if wee lov Jehoava tu.

6. Akaadn tu Roamanz 5:3-5, how Jehoava servant dehn feel wen dehn haftu bayr op bikaaz peepl a di werl hayt dehn?

⁶ Jehoava servant dehn ku bayr op anda persikyooshan bikaaz a di lov weh dehn ga far ahn. Fi egzampl, wen di Jooish Sopreem Koat mi aada di apasl dehn fi stap preech, dehn mi ga di schrent fi “obay Gaad az . . . roola insteda man,” bikaaz dehn mi lov Gaad. (Aks 5:29; 1 Jan 5:3) Da saym schrang lov di schrentn wi bradaz ahn sistaz tudeh. Dehn aalso aybl fi stay faytful bikaaz a da schrang lov, eevn doa lata dehn di fays persikyooshan fahn sohn kruwil ahn powaful govament. Soh wen di werl hayt wi, wee noh geh diskorij, wi feel hapi.—Aks 5:41; reed Roamanz 5:3-5.

7. Weh wi shuda du wen wi famili chrai stap wi fahn serv Jehoava?

⁷ Wan a di haadis tingz fi mek wi deel wid da wen wi oan famili chrai stap wi fahn serv Jehoava. Wen dehn noatis dat wi waahn laan moa bowt Jehoava, dehn mait tink wi geh braynwash. Er som a dehn mait tink dat wi kech krayzi. (Kompyaa Maak 3:21.) Dehn mait eevn geh vailent wid wi. Bot wi shudn bee sopraiz if dehn goh aan laik dat. Jeezas mi seh: “Wahn man enimi wahn bee fan ih oan famili.” (Mach. 10:36) Af koars, noh mata weh wi famili tink bowt wi, wee wahn neva hayt dehn er chreet dehn bad. Insteda dat, di moa wi lov Jehoava, di moa wi wahn lov peepl. (Mach. 22:37-39) Bot wi wuda neva stap obay di laa ahn prinsipl dehn weh deh eena di Baibl jos fi pleez wahn nada hyooman.

8-9. Weh mi help wahn sista fi stay schrang eevn wen ih famili chrai stap ahn fahn serv Jehoava?

⁸ Georgina mi aybl fi stay schrang eevn wen ih ma mi chrai haad fi mek shee  stap serv Jehoava. Georgina seh: “Mee ahn mai ma mi staat stodi di Baibl wid di Witnisiz. Bot siks monts layta wen Ah mi waahn goh da meetin, shee chrai stap mi. Ah mi fain owt dat shee mi-di taak tu apastayts, an ih mi staat tu ripeet weh dehn seh bowt di Witnisiz wen ih taak tu mi. Shee wuda insolt mi, pul mi hyaa, choak mi, ahn chroa weh mi lichricha. Afta Ah mi ton 15, Ah mi geh baptaiz. Mai ma mi put mi eena wahn hoam fi teenayjaz weh du tingz laik tek jrogz ahn komit kraim. Shee du dis jos fi chrai stap mi fahn serv Jehoava. Ih reeli haad fi bayr op anda persikyooshan wen ih kohn fahn sombadi weh shuda lov yu ahn kay bowt yu.”

⁹ Weh mi help Georgina fi bayr op? Shee seh: “Di day mai ma mi ton gens mi, Ah mi jos finish reed di hoal Baibl. Ai mi shoar dat Ah mi fain di chroot, an Ah mi feel veri kloas tu Jehoava. Ah mi pray tu hihn wahn lat, ahn hihn hyaa mi pryaaz. Wen Ah mi-di liv eena da hoam, wahn sista mi invait mi da fi shee hows, ahn wi mi stodi di Baibl tugeda. Joorin da taim, di bradaz ahn sistaz da di Kingdom Haal mi-di schrentn mi. Dehn mi mek Ai feel laik paat a dehn famili. Ai mi si fi miself dat Jehoava schranga dan enibadi weh deh gens wi, noh mata da hoo.”

10. Weh wi ku chros wi Gaad Jehoava fi aalwayz du?

¹⁰ Di apasl Paal mi rait dat notn “ku stap Gaad fahn lov wi.” (Roam. 8:38, 39) Eevn doa wi mait sofa fi wahn wail, Jehoava wahn aalwayz deh wid wi fi gi wi komfert ahn schrent. Ahn Georgina ekspeeryens shoa wi dat Jehoava ku yooz wi bradaz ahn sistaz fi help wi tu.

11. How di lov weh Jeezas mi taak bowt da Jan 15:12, 13 wuda mi help ih disaipl dehn? Yooz di egzampl eena di paragraaf.

¹¹ Di nait bifoa Jeezas mi ded, hihn mi rimain ih disaipl dehn fi lov wan anada. (Reed Jan 15:12, 13.) Hihn mi noa dat chroo chroo lov wuda help dehn fi stay yoonaitid ahn fi bayr op wen peepl eena di werl hayt dehn. Kansida di egzampl a di kangrigayshan da Tesalonaika. Fahn di taim da kangrigayshan mi staat, di bradaz ahn sistaz mi fays persikyooshan. Stilyet, di bradaz ahn sistaz deh da wahn gud egzampl fi adaz bikaaz dehn mi stay faytful, dehn mi bayr op, ahn dehn mi  shoa lov. (1 Tes. 1:3, 6, 7) Paal mi inkorij dehn fi kantinyu shoa lov “moa ahn moa.” (1 Tes. 4:9, 10) Lov wuda help dehn fi komfert dehn wan weh dipres ahn help dehn wan weh week. (1 Tes. 5:14) Dehn mi fala Paal advais, kaaz eena fi hihn sekant leta, weh ih mi rait bowt wahn yaa layta, Paal kuda mi seh: “Unu lov fi wan anada di geh schranga ahn schranga.” (2 Tes. 1:3-5) Dehn lov mi help dehn fi bayr op wen dehn gaahn chroo haad taimz ahn wen dehn fays persikyooshan.

12. How di bradaz ahn sistaz da wan konchri mi shoa lov fi wan anada wen dehn konchri mi deh da waar?

¹² Kansida weh mi hapm tu Danylo an ih waif. Wen wahn waar eena fi dehn konchri mi spred tu di tong weh dehn mi liv, dehn mi kantinyu fi goh da meetin, fi preech az moch az dehn kud, ahn fi shayr eni food weh dehn mi ga wid dehn bradaz ahn sistaz. Den wan day, sohn soaljaz gaahn da Danylo hows. Danylo seh: “Dehn aada mi fi stap bee wahn Witnis. Wen Ah mi rifyooz, dehn beet mi ahn dehn play laik dehn mi wahn shoot mi, bot dehn onli faiya dehn gon oava mi hed. Bifoa dehn lef, dehn mi chretn fi kom bak ahn rayp mi waif. Bot di bradaz hori put wi pahn wahn chrayn fi goh da wahn neks tong. Ah wahn neva ferget di lov weh dehn dyaa bradaz mi shoa. Ahn wen wi mi reech, di loakal bradaz gi wi food ahn help mi fi fain wahn jab ahn wahn plays fi liv! Sayka dat, wee mi aybl fi help ada Witnisiz weh mi-di ron fahn di waar ahn gi dehn wahn plays fi stay.” Dehndeh kaina ekspeeryens shoa dat di lov weh wi ga fi wan anada ku help wi fi bayr op wen ada peepl hayt wi.

13. How hoali spirit help wi fi bayr op eena wi servis tu Jehoava eevn wen peepl hayt wi?

¹³ Jeezas mi tel ih falowaz fi lov dehn enimi dehn. (Mach. 5:44, 45) Dat noh aalwayz eezi fi du, bot ih pasabl wid di help a Gaad hoali spirit. Di froot a Gaad spirit inklood lov lang wid payshens, kainis, wahn jentl haat, ahn self-kanchroal. (Gal. 5:22, 23) Dehnya kwalitiz help wi fi bayr op wen peepl hayt wi. Lata peepl stap persikyoot wi bikaaz dehn hozban, waif, pikni, er nayba shoa dehndeh gaadli kwalitiz, ahn lata dehn da wi bradaz ahn sistaz now. Soh if yoo fain it haad fi lov peepl  weh hayt yu bikaaz yu di serv Jehoava, den pray fi hoali spirit. (Look 11:13) An aalwayz chros dat di bes ting fi du da fi obay Gaad.—Prov. 3:5-7.

14-15. How Roamanz 12:17-21 mi help Yasmeen fi shoa lov tu ih hozban eevn doa hihn mi chrai haad fi stap shee fahn serv Jehoava?

¹⁴ Kansida di egzampl a Yasmeen, wahn sista weh liv da di Middle East. Wen shee mi kom eena di chroot, ih hozban mi tink shee geh braynwash, ahn hihn mi chrai stap ahn fahn serv Gaad. Hihn mi insolt ahn, an ih mi get ih faamli lang wid wahn prees ahn wahn oabya man fi chretn ahn, an akyooz ahn dat shee di brok op ih famili. Ih hozban mi eevn hala aata di bradaz an insolt dehn op joorin wahn kangrigayshan meetin! Yasmeen mi krai wahn lat sayka weh ih hozban mi chreet ahn soh bad.

¹⁵ Di bradaz ahn sistaz da di Kingdom Haal mi schrentn Yasmeen ahn komfert ahn. Di eldaz mi inkorij ahn fi du weh Roamanz 12:17-21 seh. (Reed.) Yasmeen seh: “Ih mi haad, bot Ah mi aks Jehoava fi help mi, an Ah mi du mi bes fi du weh di Baibl seh. Soh wen mi hozban mi chroa dert eena di kichin jos fi spait, Ah kleen it op. Wen hihn mi insolt mi, Ah ansa eena wahn jentl way. Ahn wen ih mi sik, Ah tek kayr a ahn.”

16-17. Weh yu laan fahn Yasmeen egzampl?

¹⁶ Yasmeen geh lata blesinz kaaz shee shoa lov tu ih hozban. Shee seh: “Mi hozban staat tu chros mi moa kaaz hihn noa dat Ah wuda aalwayz tel di chroot. Hihn staat tu shoa rispek ahn lisn tu mi wen wi taak bowt rilijan, ahn hihn agree fi mek pees eena di hoam. Now hihn akchwali inkorij mi fi goh da meetin. Mee ahn mi hozban ga wahn moch beta rilayshanship now, ahn wi hoam peesful. Ai hoap dat wan day mi hozban wahn aksep di chroot ahn serv Jehoava lang wid mi.”

¹⁷ Yasmeen egzampl shoa dat lov “bayr op anda evriting, . . . hoap eena evriting, an ih noh giv op noh mata weh hapm.” (1 Kor. 13:4, 7) Hayt ku bee powaful an ih ku kaaz lata payn, bot lov moch schranga. If wee shoa lov fi peepl, dehn mait chaynj di way dehn feel bowt wi ahn di way dehn feel bowt Jehoava. Ahn wen wi kip di shoa lov fi adaz, ih mek Jehoava hapi. Bot eevn if peepl kantinyu fi hayt wi, wi ku stil bee hapi. How wi ku du dat?

18. Wai wi ku bee hapi eevn wen peepl hayt wi?

¹⁸ Jeezas mi seh: “If peepl hayt unu, . . . unu wahn stil bee hapi.” (Look 6:22) Wee noh chooz fi mek peepl hayt wi, ahn wi noh injai it wen peepl persikyoot wi bikaaz a wi fayt. Soh wai wi ku bee hapi wen peepl hayt wi? Mek wi luk pahn chree reezn. Fers, wen wi bayr op, Gaad wahn pleez wid wi. (1 Peet. 4:13, 14) Sekant, wi fayt geh schranga ahn soh ih ga moa valyu. (1 Peet. 1:7) Ahn terd, wi wahn geh di bes riwaad wi kuda eva get—evalastin laif.—Roam. 2:6, 7.

19. Wai di apasl dehn mi hapi afta dehn mi geh wahn beetn?

¹⁹ Wahn lee wail afta Jeezas mi geh rezorek, di apasl dehn mi feel da hapinis weh hihn mi taak bowt. Afta dehn mi geh wahn beetn ahn di Jooish Sopreem Koat mi aada dehn fi stap preech, dehn mi rijais. Wai? “Bikaaz dehn mi feel dat da mi wahn privilij fi sofa shaym sayka Jeezas naym.” (Aks 5:40-42) Di lov weh dehn mi ga fi dehn Maasta mi schranga dan di fyaa weh dehn mi feel fi dehn enimiz. Ahn dehn mi shoa dehn lov wen dehn mi preech di gud nyooz “widowt stap.” Wahn lata wi bradaz ahn sistaz tudeh kantinyu fi bee faytful eevn wen dehn di goh chroo chraiyalz. Dehn noa dat Jehoava wahn neva ferget di werk weh dehn du ahn di lov weh dehn shoa fi ih naym.—Heeb. 6:10.

20. Weh wi wahn diskos eena di neks aatikl?

²⁰ Az lang az wi liv eena dis sistem, di peepl a dis werl wahn hayt wi. (Jan 15:19) Bot wi noh haftu bee frayd. Di neks aatikl wahn help wi fi si how Jehoava “wahn schrentn . . . ahn protek” fi hihn laayal servant dehn. (2 Tes. 3:3) Soh mek wi kantinyu fi lov Jehoava, lov wi bradaz ahn sistaz, an eevn lov wi enimi dehn. Wen wi fala dis kongsl, wi wahn stay yoonaitid, wi fayt wahn bee schrang, wi wahn bring aana tu Jehoava, ahn wi wahn proov dat lov faar moa powaful dan hayt.