1-2. How di apasl Paal egzampl ku help eldaz tudeh?

 DI APASL Paal mi lov ih bradaz ahn sistaz. Hihn mi werk reeli haad fi tek kayr a dehn. (Aks 20:31) Dat da wai di bradaz ahn sistaz mi lov Paal wahn lat. Wan taim, wen di eldaz fahn Efisos mi fain owt dat dehn neva mi wahn si Paal agen “dehn staat tu krai ahn krai.” (Aks 20:37) Jos laik Paal, wi eldaz dehn werk haad ahn dehn lov dehn bradaz ahn sistaz wahn lat ahn dehn du aal weh dehn kud fi help dehn. (Fil. 2:16, 17) Bot sohntaim, ih noh mait eezi fi mek eldaz du weh dehn haftu du. Da weh ku help dehn?

² Wi haad-werkin eldaz ku fala Paal egzampl. (1 Kor. 11:1) Paal neva ga di saym abiliti laik di aynjelz. Hihn da neva wahn perfek man, ahn sohntaim hihn mi schrogl fi du weh rait tu. (Roam. 7:18-20) Hihn mi aalso ga wahn lata prablemz. Bot Paal neva stap bee hapi, an ih neva stap werk haad fi ih bradaz ahn sistaz needa. Wen eldaz fala Paal egzampl, dehn ku kantinyu serv Jehoava ahn bee hapi eevn wen dehn ga prablemz. Mek wi diskos how di eldaz ku du dat.

3. Weh wi wahn diskos eena dis aatikl, ahn wat els wi wahn laan?

³ Eena dis aatikl wi wahn diskos foa tingz weh mait haad fi mek eldaz du: (1) fain taim fi preech ahn du di ada tingz weh dehn need fi du, (2) fain taim fi inkorij di bradaz ahn sistaz, (3) deel wid fi dehn oan imperfekshan, ahn (4) werk lang wid adaz weh noh perfek. Wi wahn diskos weh mi help di apasl Paal fi deel wid dehnya chalenjiz ahn how eldaz ku fala fi hihn egzampl tudeh.

4. Wai ih mait bee haad sohntaim fi mek eldaz tek di leed eena di preechin werk?

⁴ Wai ih ku bee haad? Eldaz ga wahn lata rispansabiliti ahn dehn aalso haftu tek di leed eena di preechin werk. Fi egzampl, wahn lata dehn mait haftu bee di chyaaman fi di midweek meetin er dehn mait haftu kandok di Kangrigayshan Baibl Stodi. Som a dehn mait haftu gi taak da difrent kangrigayshanz. Dehn aalso ga di rispansabiliti fi chrayn ministeeryal servant ahn kip di inkorij di bradaz ahn sistaz. (1 Peet. 5:2) Sohn eldaz help owt di bil ahn mantayn Kingdom Haal an ada bildin weh wi yooz fi wership Jehoava. Bot jos laik evribadi eena di kangrigayshan, di moas impoatant ting fi eldaz da fi preech di gud nyooz.—Mach. 28:19, 20.

5. Weh eldaz ku laan fahn Paal minischri?

⁵ Weh eldaz ku laan fahn Paal egzampl? Eena Filipiyanz 1:10, Paal tel wi wai hihn mi ga sokses wen hihn mi-di preech di gud nyooz. Hihn seh: “Unu mek shoar a di moa impoatant tingz.” Paal mi fala fi hihn oan advais. Hihn mi geh di asainment fi preech di gud nyooz, ahn fi wahn lata yaaz dat da-mi di moas impoatant ting eena ih laif. Hihn mi preech “eena poblik ahn fahn hows tu hows.” (Aks 20:20) Hihn neva onli preech wahn sertn taim a di day er jos wan taim fi di week. Hihn mi tek advantij a eni apachooniti ih get fi preech! Fi egzampl, wail ih mi-di wayt fi sohn bradaz da Atenz, hihn mi preech di gud nyooz tu wahn groop a impoatant peepl, ahn som a dehn mi aksep di gud nyooz. (Aks 17:16, 17, 34) Eevn wen Paal mi deh da “prizn,” hihn mi preech tu evribadi weh mi deh rong ahn.—Fil. 1:13, 14; Aks 28:16-24.

6. Weh Paal mi chrayn adaz fi du?

⁶ Paal mi yooz ih taim eena wahn waiz way. Hihn wuda invait adaz fi jain ahn wen ih mi-di preech. Fi egzampl, pan ih fers mishineri toar, ih mi kehr Jan Maak wid ahn; an pan ih sekant toar, ih mi kehr Timoti. (Aks 12:25; 16:1-4) Wi ku bee shoar dat Paal mi du ih bes fi teech dehnya bradaz how fi tek kayr a di kangrigayshan ahn how fi bee gud teechaz.—1 Kor. 4:17.

7. How eldaz ku du weh Paal mi seh da Ifeezhanz 6:14, 15?

⁷ Wat da di lesn? Eldaz ku fala Paal egzampl, noh onli wen dehn preech fahn hows tu hows, bot wen dehn redi fi preech weneva dehn kud ahn tu hooeva dehn kud. (Reed Ifeezhanz 6:14, 15.) Fi egzampl dehn ku preech wen dehn  goh da shap er wen dehn deh da werk. Dehn ku aalso preech wen dehn di help bil Kingdom Haal er ada bildin weh wi yooz fi wership, ahn dehn ku preech di gud nyooz tu peepl weh liv er sel rong di ayrya. Jos laik Paal, eldaz ku yooz di taim weh dehn spen eena di minischri fi chrayn adaz, inkloodin ministeeryal servants.

8. Weh wahn elda mait haftu du sohntaim?

⁸ Eldaz shuda neva bee soh bizi wid dehn werk eena di kangrigayshan er eena di serkit dat dehn noh ga no taim fi preech. Fi mek eldaz ku ga taim fi du di tingz weh dehn need fi du, sohntaim dehn noh mait aksep sertn asainments. Afta dehn pray ahn tink bowt di asainment, dehn mait riyalaiz dat if dehn aksep it dehn wahn kyaahn tek kayr a di moa impoatant tingz. Som a di moa impoatant tingz da fi kandok famili wership eech week, fi tek paat eena di preechin werk, er fi teech dehn pikni fi preech. Som mait fain it haad fi noh aksep moa rispansabiliti, bot dehn ku bee shoar dat Jehoava andastan dat dehn waahn bee balans eena evriting weh dehn du.

9. Weh sohn eldaz mait fain haad fi du bikaaz dehn ga wahn lata tingz fi du?

⁹ Wai ih ku bee haad? Jehoava peepl goh chroo wahn lata prablem. Joorin dehnya laas dayz, aala wi need inkorijment, help, ahn komfert. Ahn som mait need help fi noh du sohnting weh rang. (1 Tes. 5:14) Af koars, eldaz kyaahn tek weh aal di prablemz weh Jehoava peepl fays. Bot, Jehoava waahn mek eldaz du aal weh dehn kud fi inkorij ahn protek fi hihn peepl. How eldaz weh bizi ku fain taim fi gi di bradaz ahn sistaz di help weh dehn need?

10. Weh 1 Tesaloanyanz 2:7 seh Paal mi du fi tek kayr a Jehoava peepl?

¹⁰ Weh eldaz ku laan fahn Paal egzampl? Paal mi aalwayz redi fi komen an inkorij adaz. Ih gud fi mek eldaz fala fi hihn egzampl ahn bee lovin ahn kain tu di bradaz ahn sistaz. (Reed 1 Tesaloanyanz 2:7.) Paal mi tel di bradaz ahn sistaz dat hihn mi lov dehn ahn dat Jehoava mi lov dehn tu. (2 Kor. 2:4; Ifee. 2:4, 5) Paal mi chreet dehn wan eena di kangrigayshan laik ih frenz ahn hihn mi spen taim wid dehn. Hihn mi shoa dat hihn chros dehn wen ih mi tel dehn bowt ih oan imperfekshan ahn weh ih mi-di wori bowt. (2 Kor. 7:5; 1 Tim. 1:15) Bot, Paal neva foakos pahn fi hihn oan prablemz. Insteda dat, hihn mi waahn help ih bradaz ahn sistaz.

11. Wai Paal mi kongsl ih bradaz ahn sistaz?

¹¹ Sohntaim, Paal mi need fi kongsl ih bradaz ahn sistaz. Bot hihn neva du it bikaaz ih mi beks wid dehn. Hihn mi gi dehn  kongsl bikaaz ih mi lov dehn ahn bikaaz ih mi waahn protek dehn fahn di daynja weh mi deh rong dehn. Hihn mi kongsl dehn eena wahn way weh eezi fi andastan ahn hihn mi waahn dehn aksep di kongsl. Fi egzampl, eena ih leta tu di Korintyanz, Paal mi gi dehn schrang kongsl. Afta ih mi rait da leta, ih mi sen Taitos tu dehn. Paal mi-di wori bowt how di bradaz mi wahn rispan tu ih leta. Hihn mi reeli hapi wen ih hyaa dat dehn mi aksep di kongsl an aplai it!—2 Kor. 7:6, 7.

12. How eldaz ku schrentn dehn bradaz ahn sistaz?

¹² Wat da di lesn? Eldaz ku fala Paal egzampl wen dehn spen taim wid dehn bradaz ahn sistaz. Wan way how dehn ku du dis da wen dehn reech erli da di meetin soh dat dehn ku ga inkorijin kanvasayshan wid adaz. Ih noh tek wahn lata taim fi inkorij wahn brada er sista eena wahn lovin way. (Roam. 1:12; Ifee. 5:16) Wahn elda weh fala Paal egzampl wahn mek shoar dat ih yooz Gaad Werd fi schrentn ih brada er sista ahn mek dehn noa dat Hihn lov dehn wahn lat. Ih taak tu dehn regyula an ih luk fi reezn fi komen dehn. Wen eldaz gi kongsl, dehn shuda aalwayz bays it pahn Gaad Werd di Baibl. Wahn elda shuda aalso bee spesifik bot kain wen ih di gi kongsl bikaaz ih waahn di brada er sista aplai di kongsl.—Gal. 6:1.

13. How wahn elda ku feel bikaaz a ih oan imperfekshan?

¹³ Wai ih ku bee haad? Eldaz noh perfek. Soh jos laik evribadi els, dehn aalso mek mistayk. (Roam. 3:23) Ih ku bee haad fi mek eldaz ga di rait atichood tuwaadz dehn imperfekshan. Som a dehn mait wori bowt dehn imperfekshan soh moch dat dehn en op di geh diskorij. Adaz mait tink dat fi dehn imperfekshan noh dat impoatant ahn dehn noh need fi mek eni chaynjiz.

14. Akaadn tu Filipiyanz 4:13, how hyoomiliti mi help Paal fi ga di rait atichood bowt ih imperfekshan?

¹⁴ Weh eldaz ku laan fahn Paal egzampl? Bikaaz Paal mi hombl, ih mi riyalaiz dat ih mi need help fi deel wid ih imperfekshan. Hihn mi need di schrent weh kohn fahn Jehoava. Eena di paas, Paal mi mek op ih main fi persikyoot di Kristyanz, an ih mi du it. Bot laytaraan, hihn mi geh fi andastan dat weh hihn yoostu du mi rang, an ih mi wilin fi chaynj ih atichood ahn persnaliti. (1 Tim. 1:12-16) Jehoava mi help Paal fi bee wahn lovin elda weh hombl ahn weh shoa dat ih kay bowt adaz. Paal  mi noa dat ih ga lata imperfekshan fi deel wid. Bot hihn neva kip di tink bowt ih imperfekshan. Insted, hihn mi bileev ahn chros dat Jehoava mi fergiv ahn. (Roam. 7:21-25) Hihn noa dat ih neva perfek, soh hihn mi werk haad fi du beta az wahn Kristyan, an ih mi pen pahn Jehoava fi help ahn finish ih asainment.—1 Kor. 9:27; reed Filipiyanz 4:13.

15. How wahn elda ku ga di rait atichood bowt fi hihn oan imperfekshan?

¹⁵ Wat da di lesn? Jehoava noh apoint wahn brada fi bee wahn elda bikaaz ih perfek. Bot Jehoava ekspek di brada fi admit dat ih mek mistayk ahn werk pan ih Kristyan persnaliti. (Ifee. 4:23, 24) Wahn elda shuda stodi di Baibl ahn yooz weh ih laan fi mek eni chaynjiz weh ih need fi mek. Den, Jehoava wahn help ahn fi bee hapi ahn ga sokses eena ih asainment.—Jay. 1:25.

16. Weh ku hapm if wahn elda foakos pahn adaz imperfekshan?

¹⁶ Wai ih ku bee haad? Wen di eldaz eena wahn kangrigayshan spen wahn lata taim wid dehn bradaz ahn sistaz, ih mek it eeziya fi mek dehn si dehn bradaz ahn sistaz imperfekshan. If dehn noh kyaaful, eldaz ku yooz dat fi staat joj dehn bradaz ahn sistaz, chreet dehn eena wahn way weh noh kain, er eevn geh foschraytid wid dehn. Paal mi waan di Kristyanz dat Saytan wuda laik mek dehn bihayv laik dat.—2 Kor. 2:10, 11.

17. How Paal mi feel bowt ih bradaz ahn sistaz?

¹⁷ Weh eldaz ku laan fahn Paal egzampl? Paal mi aalwayz tink gud bowt ih bradaz ahn sistaz. Hihn mi noa dat dehn mek mistayk tu. Sohntaim, dehn mi eevn du tingz weh mi hert hihn. Bot, Paal mi noa dat noh jos bikaaz sombadi mek mistayk dat meenz dat dehn da wahn bad persn. Hihn mi lov ih bradaz ahn sistaz an ih mi foakos pahn dehn gud kwalitiz. If ih bradaz ahn sistaz mi-di ga wahn haad taim di chrai du weh rait, hihn mi chooz fi tink dat da persn mi waahn du weh rait an ih mi jos need lee bit a help.

18. Weh wi ku laan fahn how Paal mi deel wid weh Yoadya ahn Sintiki mi-di goh chroo? (Filipiyanz 4:1-3)

¹⁸ Kansida di egzampl a how Paal mi deel wid too sistaz eena di kangrigayshan da Filipai. (Reed Filipiyanz 4:1-3.) Ih luk laik Yoadya ahn Sintiki mi ga sohnting weh dehn neva gree pan, ahn bikaaz a dat dehn da neva frenz agen. Insteda joj dehn ahn chreet dehn eena wahn bad way, Paal mi foakos pahn dehn gud kwalitiz. Paal mi noa dat Jehoava mi lov dehnya sistaz bikaaz dehn mi faytful tu Hihn fi wahn lang taim. Paal mi tink gud tingz bowt dehnya sistaz, ahn dats wai hihn mi inkorij  dehn fi mek pees wid wan anada. Paal mi foakos pahn di gud kwalitiz a adaz ahn dats wai hihn kuda mi kip fi hihn jai ahn ga wahn schrang frenship wid di bradaz ahn sistaz eena da kangrigayshan.

19. (a) How eldaz ku kip wahn pazitiv atichood tuwaadz dehn bradaz ahn sistaz? (b) Weh wi ku laan fahn di picha a di elda weh di kleen di Kingdom Haal?

¹⁹ Wat da di lesn? Eldaz, luk fi di gud kwalitiz weh di bradaz ahn sistaz gat. Dehn noh perfek, bot eech wan a dehn ga wahn kwaliti weh yu ku apreeshiayt. (Fil. 2:3) Sohntaim di eldaz mait need fi gi wahn brada er sista kongsl. Bot jos laik Paal, di eldaz noh foakos pahn di tingz weh sohnbadi seh er du weh dehn noh laik. Insteda dat, dehn foakos pahn di lov weh di persn ga fi Jehoava, dat ih bayr op eena ih servis tu Jehoava, ahn dat ih aalwayz waahn du weh gud. Eldaz weh foakos pahn di gud kwalitiz a adaz help di bradaz ahn sistaz feel di schrang lov eena di kangrigayshan.

20. How eldaz ku kantinyu fi benifit fahn Paal egzampl?

²⁰ Eldaz wahn benifit wahn lat if dehn kantinyu fi fala Paal egzampl. Eena di Watch Tower Publications Index, yu ku luk anda di mayn hedin “Paul” ahn den di sobhedin “example for elders.” Az yu reed som a di infamayshan weh dehdeh, aks yuself, ‘How Paal egzampl ku help mi fi kip mi jai az Ah kantinyu fi serv az wahn elda?ʼ

21. Weh eldaz ku bee shoar bowt?

²¹ Eldaz, memba dat Jehoava noh di aks unu fi bee perfek, bot ih di aks unu fi bee faytful. (1 Kor. 4:2) Jehoava mi hapi dat Paal mi faytful tu ahn, an dat ih mi werk haad. Unu ku bee shoar dat Jehoava aalso hapi wid di werk weh unu du fi hihn. Hihn wahn neva ferget di lov weh unu shoa fi ih naym. Hihn si how “unu du unu bes fi help owt di hoali wan dehn ahn how unu kantinyu fi du dis, an ih noh wahn ferget dat.”—Heeb. 6:10.