1. Weh yu laif mi stan laik bifoa yu mi staat stodi di Baibl?

 WEH yu laif mi stan laik bifoa yu mi staat stodi di Baibl wid Jehoava Witnisiz? Lata wi noh eevn waahn tink bowt it. Bikaaz wi mi fala di werl standadz a weh rait er rang, ih afek wi atichood ahn persnaliti. If dat da-mi di kays, wi “mi-di liv eena di werl widowt hoap, an [wi] neva noa Gaad.” (Ifee. 2:12) Bot afta wi staat stodi di Baibl, wi laif chaynj big taim!

2. Weh mi hapm afta yu mi staat stodi di Baibl?

² Afta yu mi staat stodi di Baibl, yu riyalaiz dat yu ga wahn hevnli Faada weh lov yu wahn lat. Yu mi andastan dat if yu mi waahn mek Jehoava hapi ahn bee paat a ih famili weh wership ahn, yu wuda haftu mek big chaynjiz eena yu laif an eena di way how yu tink. Yu wuda haftu laan fi du weh Jehoava seh rait an avoid eniting weh hihn noh pleez wid.—Ifee. 5:3-5.

3. Akaadn tu Koloashanz 3:9, 10, weh Jehoava waahn wi du, ahn weh wi wahn diskos eena dis aatikl?

³ Jehoava, wi Kriyayta ahn hevnli Faada, ga di rait fi disaid how di peepl weh da paat a fi hihn famili fi bihayv. Ahn hihn waahn dat bifoa wi geh baptaiz, wi du wi bes fi “geh rid a di oal persn weh [wi] yoostu bee ahn di tingz weh [wi] yoostu du eena di paas,” jos laik how wi tek aaf wi doti kloaz. * (Reed Koloashanz 3:9, 10.) Dis aatikl wahn help dehn wan weh waahn geh baptaiz fi ansa dehnya  chree kweschan: (1) Wat da “di oal persn”? (2) Wai Jehoava koman wi fi geh rid a di oal persn? (3) Ahn how wi ku geh rid a di oal persn? Dis stodi wahn help wee weh don baptaiz fi noh ak er tink di way wi yoostu bifoa wi geh rid a di oal persn.

4. How wahn persn ak wen ih di liv laik “di oal persn”?

⁴ Wahn persn weh stil di liv laik “di oal persn” naamali tink an ak eena wahn sinful way. Hihn praabli selfish, geh beks kwik, noh tankful, ahn prowd. Hihn praabli injai di wach poarnografi, an imoaral ahn vailent moovi. Fi shoar hihn mait ga sohn gud kwaliti, an ih mait eevn feel gilti bowt di bad ting dehn weh ih seh ahn du. Bot fi hihn dizaiya fi chaynj ih tinkin ahn kandok noh schrang inof.—Gal. 5:19-21; 2 Tim. 3:2-5.

5. Yu tink wi ku kompleetli geh rid a di oal persn? (Aks 3:19)

⁵ Non a wi perfek, soh non a wi ku kompleetli geh rid a wi bad tinkin ahn dizaiyaz fahn wi main ahn haat. Sohntaim wi wahn seh er du tingz weh wi wahn rigret. (Jer. 17:9; Jay. 3:2) Bot wen wi geh rid a di oal persn, wi noh liv akaadn tu wi sinful atichood ahn dizaiyaz. Wi akchwali geh fi bee wahn difrent persn.—Isa. 55:7; reed Aks 3:19.

6. Wai Jehoava koman wi fi geh rid a di rang tinkin ahn bad habits a di oal persn?

⁶ Jehoava koman wi fi geh rid a di rang tinkin ahn bad habits a di oal persn bikaaz hihn lov wi wahn lat an ih waahn wi injai laif. (Isa. 48:17, 18) Hihn noa dat dehn wan weh noh fait gens rang dizaiyaz noh onli hert dehnself, bot dehn hert dehn wan weh lov dehn tu. An ih hert Jehoava haat fi si dat wee di hert wiself ahn di peepl weh lov wi.

7. Akaadn tu Roamanz 12:1, 2, weh disizhan aala wi ga fi mek?

⁷ Sohntaim, wi famili ahn frenz mait mek fon a wi bikaaz wi di chrai mek chaynjiz eena wi persnaliti. (1 Peet. 4:3, 4) Dehn mait tel wi dat wi ga di rait fi du wateva wi waahn ahn dat wi shudn mek adaz tel wi weh fi du. Bot dehn wan weh rijek Jehoava standadz noh free  ataal, bikaaz dehn stil alow di werl weh Saytan kanchroal fi afek dehn persnaliti. (Reed Roamanz 12:1, 2.) Aala wi ga wahn disizhan fi mek: Eeda wi kip aan di oal persn, weh sin ahn Saytan di kanchroal, er wi mek Jehoava chaynj wi fi bee di bes persn wee kuda eva bee eena dis sistem.—Isa. 64:8.

8. Weh wahn help wi fi geh rid a rang tinkin ahn bad habits?

⁸ Jehoava noa dat ih wahn tek taim an efoat fi mek wi avoid rang tinkin ahn bad habits. (Ps. 103:13, 14) Bot Jehoava yooz ih Werd, ih hoali spirit, an ih aaganaizayshan fi gi wi di wizdom, schrent, ahn di sopoat weh wi need fi chaynj hoo wee pahn di eensaid. Fi shoar hihn don help yoo aredi. Now, mek wi kansida som a di tingz yoo ku du fi kantinyu geh rid a di oal persn ahn kwalifai fi geh baptaiz.

9. How Gaad Werd ku help yu?

⁹ Yooz di Baibl fi egzamin yuself. Gaad Werd da laik wahn miro; ih ku help yu fi si di way how yu tink, taak, an ak. (Jay. 1:22-25) Yu Baibl teecha an ada spirichwali machoar Kristyanz ku gi yu advais. Fi egzampl, dehn ku yooz di Skripchaz fi help yu noa wat da som a yu schrent ahn weeknis. Dehn ku teech yu how fi fain infamayshan fahn di Baibl weh ku help yu geh rid a bad habits. Ahn Jehoava aalwayz redi fi help yu. Hihn da di bes wan fi help yu bikaaz hihn noa weh deh eena yu haat. (Prov. 14:10; 15:11) Soh mek it wahn habit fi pray tu ahn, an stodi fi hihn Werd eech day.

10. Weh yu mi laan fahn Elie ekspeeryens?

¹⁰ Bee kanvins dat Jehoava standadz da di bes. Wee ku benifit fahn evriting weh Jehoava aks wi fi du. Di peepl weh liv akaadn tu fi hihn standadz geh fi rispek dehnself, dehn fain wat da dehn perpos eena laif, ahn dehn fain reel hapinis. (Ps. 19:7-11) Pahn di ada han, dehn wan weh goh gens Jehoava standadz sofa bikaaz dehn giv een tu weh dehn sinful badi waahn. Noatis weh wahn man weh naym Elie seh hapm wen sohnbadi rijek Gaad standadz. Elie payrents mi rayz ahn fi lov Jehoava, bot wen ih da-mi wahn teenayja, ih mi chooz bad kompni. Hihn mi staat tu abyooz jrogz, liv wahn imoaral laif, an ih yoostu teef. Elie seh dat hihn mi noatis dat ih mi-di geh moa ahn moa beks ahn vailent. Hihn seh: “Akchwali, Ah mi-di du evriting weh Ah noa Ah neva shuda mi du az wahn Kristyan.” Bot Elie neva ferget weh ih mi laan wen ih mi yong. Hihn mi staat stodi di Baibl agen an ih mi werk haad fi geh rid a ih bad habit dehn, an ih geh baptaiz eena 2000. How Jehoava standadz benifit Elie? Hihn seh: “Now Ai feel kaam an Ah ga wahn kleen kanshans.” * Elie egzampl shoa wi dat dehn wan weh rijek Jehoava standadz hert dehnself. Bot Jehoava stil wilin fi help dehn fi chaynj.

11. Wat da sohn tingz weh Jehoava hayt?

¹¹ Laan fi hayt weh Jehoava hayt. (Ps. 97:10) Di Baibl seh dat Jehoava hayt “wahn hai ahn maiti atichood, mowt weh laik tel lai, ahn han weh goh tek inosent blod.” (Prov. 6:16, 17) Hihn aalso “hayt peepl weh vailent ahn peepl weh chrik adaz.” (Ps. 5:6) Jehoava hayt dehnya bad kwalitiz ahn tingz weh peepl du soh moch dat hihn mi dischrai aal wikid peepl eena  Noawa dayz bikaaz dehn mi ful op di ert wid vailens. (Gen. 6:13) Kansida wahn neks egzampl. Jehoava mi yooz di prafit Malakai fi tel ih peepl dat Hihn hayt enibadi weh noh faytful tu ih marij paadna ahn weh mek aal kaina ekskyoos fi divoas ahn. Gaad noh aksep dehn wership an ih wahn joj dehn fi weh dehn du.—Mal. 2:13-16; Heeb. 13:4.

12. Weh ih meenz fi “reeli ahn chrooli hayt eniting weh wikid”?

¹² Jehoava waahn mek wi “reeli ahn chrooli hayt eniting weh wikid.” (Roam. 12:9) Di werdz “reeli ahn chrooli hayt” meenz dat yu kansida sohnting fi bee disgostin; yu noh jos noh laik it bot yu reeli ahn chrooli hayt it. Imajin how yu wuda feel if sohnbadi aks yu fi eet ratn food. Jos fi tink bowt it mek yu feel sik, noh chroo? Sayhn way soh, jos fi tink bowt du sohnting weh Jehoava seh bad shuda mek wi feel sik; wi shuda kansida it fi bee disgostin.

13. Wai wi shuda rijek bad taats?

¹³ Rijek bad taats. Wi yoozhwali du tingz bays pahn weh deh eena wi main. Dat da wai Jeezas mi teech wi fi rijek bad taats weh ku mek wi komit wahn seeryos sin. (Mach. 5:21, 22, 28, 29) Af koars wi waahn mek wi hevnli Faada hapi. Soh ih veri impoatant fi rijek eni bad taats weh kohn tu wi main!

14. Weh di tingz weh wi taak bowt seh bowt wi, ahn weh kweschanz wi waahn aks wiself?

¹⁴ Kanchroal di tingz weh yu taak bowt. Jeezas mi seh: “Weh kom owta wahn persn mowt di kohn fan ih haat.” (Mach. 15:18) Di tingz weh wi taak bowt diskraib hoo wee pahn di eensaid. Soh aks yuself dehnya kweschan: ‘Ai chrai tel di chroot, eevn if ih wuda put mee eena chrobl? Az wahn marid persn, Ai chrai mi bes noh fi flert wid enibadi? Ai aalwayz rifyooz fi taak bowt imoaral tingz? If sohnbadi get mi beks, Ai ansa bak eena wahn kaam way?ʼ Yu wahn noatis dat ih reeli helpful fi tek taim ahn tink bowt dehndeh kweschanz. Di way wi taak da laik di stich dehn weh hoal kloaz tugeda. If wi waahn geh rid a di oal persn, jos laik how wi tek aaf doti kloaz, ih wahn bee eeziya if wi stap yooz werdz weh hert er ofen adaz, stap lai, ahn stap taak bowt imoaral tingz.

15. Weh ih meen fi heng di oal persn “pahn di stayk”?

 ¹⁵ Bee wilin fi du wateva yu need fi du. Di apasl Paal mi yooz wahn iloschrayshan fi teech wi dat ih veri impoatant fi chaynj di way how wi liv wi laif. Hihn mi seh dat wi fi heng di oal persn “pahn di stayk.” (Roam. 6:6) In ada werdz, wi waahn fala Krais egzampl. Jeezas mi wilin fi geh heng pahn wahn stayk fi pleez Jehoava. Sayhn way soh, wi pleez Jehoava wen wi wilin fi geh rid a eni dizaiya er habit weh Jehoava hayt. Wi fi du dehnya tingz soh dat wi ku ga wahn kleen kanshans ahn ga di hoap fi liv fareva. (Jan 17:3; 1 Peet. 3:21) Memba dat da noh Jehoava fi chaynj fi hihn standadz fi mek wee hapi, bot da wee need fi chaynj hoo wee ahn fala fi hihn standadz.—Isa. 1:16-18; 55:9.

16. Wai yoo fi mek op yu main fi kantinyu fait rang dizaiyaz?

¹⁶ Kantinyu fi fait rang dizaiyaz. Eevn afta yu geh baptaiz, yu wahn need fi kantinyu fait rang dizaiyaz. Tink bowt di ekspeeryens a wahn man weh naym Maurício. Wen hihn mi yong, hihn mi staat tu liv wahn homosekshwal laifstail. Afta sohn taim, hihn mi staat tu stodi wid Jehoava Witnisiz an afta ih mek sohn chaynjiz, ih geh baptaiz eena 2002. Dis da weh Maurício seh eevn afta ih di serv Jehoava fi lata yaaz: “Ai haftu admit dat sohntaim ih noh eezi fi fait rang dizaiyaz.” Bot hihn noh mek dis diskorij hihn. Insted, hihn seh: “Ai noa dat Ai di mek Jehoava hapi wen Ah chooz fi fait dehndeh dizaiyaz.” *

17. Weh yoo mi fain inkorijin eena Nabiha ekspeeryens?

¹⁷ Pray fi Jehoava help, ahn pen pahn fi hihn hoali spirit, noh pahn yu oan schrent. (Gal. 5:22; Fil. 4:6) Wi fi werk haad if wi waahn geh rid a di oal persn ahn kip it da way. Kansida di ekspeeryens a Nabiha. Fi shee pa mi abandan ahn wen ih mi jos siks yaaz oal. Shee seh: “Dis mi reeli hert mi deep eensaid.” Ih aalso seh dat az ih mi-di groa op, ih mi eezi fi geh beks an ih mi-di geh moa ahn moa faita. Ih mi staat tu sel jrogz, dehn mi ares ahn, an ih mi spen  sohn yaaz eena prizn. Sohn Witnisiz weh mi vizit di prizn mi staat tu stodi di Baibl wid ahn. Nabiha mi staat tu mek sohn big chaynjiz. Shee seh: “Ih mi eezi fi lef som a mi bad habit dehn, bot ih mi veri haad fi stap smoak.” Nabiha mi fait dis bad habit fi moa dan wahn yaa til ih mi geh rid a it. How ih mi du it? Shee seh: “Ah mi pray tu Jehoava aal di taim, ahn dat da weh mi reeli help mi fi geh rid a mi bad habit.” Dis da weh shee tel adaz: “Ai shoar dat if Ai kuda mi mek chaynjiz fi pleez Jehoava, enibadi ku du it!” *

18. Akaadn tu 1 Korintyanz 6:9-11, weh wahn lata Gaad servant dehn kuda mi du?

¹⁸ Eena di fers senchri, som a di man ahn uman weh Jehoava mi chooz fi rool wid Krais da hevn mi du veri bad tingz eena di paas. Fi egzampl, som a dehn mi komit adolchri, som a dehn mi liv wahn homosekshwal laifstail, ahn som a dehn da-mi teef. Bot wid di help a Gaad hoali spirit, dehn kuda mi mek chaynjiz eena dehn persnaliti. (Reed 1 Korintyanz 6:9-11.) Tudeh, di Baibl don help milyanz a peepl fi mek chaynjiz eena dehn laif. * Dehn geh rid a bad habits weh mi haad fi mek dehn let goh. Fi dehn egzampl proov dat yoo ku aalso mek chaynjiz eena yu persnaliti, get oava eni bad habit weh yu gat, ahn kwalifai fi geh baptaiz.

19. Weh wi wahn diskos eena di neks aatikl?

¹⁹ Sohnbadi weh waahn geh baptaiz shuda geh rid a di oal persn jos laik how ih tek aaf doti kloaz, bot ih fi aalso put aan di nyoo persn jos laik how ih put aan nyoo kloaz. Di neks aatikl wahn diskos how wi ku put aan di nyoo persn ahn how adaz ku help wi fi kip aan di nyoo persn.