STODI AATIKL 12
Yoo Si Weh Zakaraiya Mi Si?
“‘Wid mai spirit, . . . Jehoava di Komanda a di hevnli aami seh.”—ZECH. 4:6.
SANG 73 Gi Wi Korij
WEH WI WAHN DISKOS? *
1. Weh eksaitin ting mi wahn soon hapm tu di Jooz weh mi deh da Babilan az priznaz?
DI JOOZ mi reeli eksaitid. Jehoava mi “kaaz” King Sairos a Perzha fi free di Izrelaits weh mi liv az priznaz da Babilan fi wahn lata yaaz. Di king mi mek wahn anonksment weh seh dat di Jooz kuda mi goh bak tu dehn hoam konchri ahn “bil op bak di hows a Jehoava, weh mi deh eena Jeroosalem.” (Ezra 1:1, 3) Dis da-mi wahn eksaitin anonksment! Dis mi meen dat di Jooz kuda mi wership di chroo Gaad agen eena di lan weh hihn mi gi dehn.
2. Wat da-mi di fers ting di Jooz weh mi gaahn bak da Jeroosalem kuda mi du?
2 Di fers set a Jooz weh mi deh da Babilan az priznaz mi reech da Jeroosalem, di kyapital a di sodan kingdom a Jooda, eena di yaa 537 B.C.E. Wen dehnya Jooz mi reech deh, dehn mi staat tu bil op bak di templ, ahn bai di yaa 536 B.C.E., dehn mi finish di fongdayshan aredi!
3. Hoo mi gaahn gens di Jooz, ahn how dehn mi du dat?
3 Afta di Jooz mi staat bil op bak di templ, wahn lata peepl mi-di goh gens dehn. Di nayshanz weh mi deh rong dehn “mi kantinyu fi diskorij di peepl a Jooda ahn fraitn dehn soh dat dehn wuda stap werk pahn di hows a Gaad.” (Ezra 4:4) Eevn doa di Jooz sichuwayshan mi bad, tingz mi onli geh wers fi dehn. Eena di yaa 522 B.C.E., Artazerkseez mi geh fi bee di nyoo king a Perzha. * Dehn wan weh mi deh gens di Jooz mi tink dat bikaaz dehn mi ga wahn nyoo king, ih wuda mi bee eeziya fi kompleetli stap di bildin werk weh di Jooz mi-di du. Dehn mi tink dat dehn kuda mi du dat if dehn mi “kaaz chrobl eena di naym a di laa.” (Ps. 94:20) Dehn mi sen wahn leta tu King Artazerkseez fi tel ahn dat di Jooz mi-di plan fi ribel gens ahn. (Ezra 4:11-16) Di king mi bileev di lai weh dehn mi tel ahn, an bikaaz a dat hihn mi put wahn ban pahn di kanschrokshan a di templ. (Ezra 4:17-23) Bikaaz a da ban, di Jooz mi looz dehn jai ahn dehn mi stap bil bak di templ.—Ezra 4:24.
4. Weh Jehoava mi du afta dehn mi stap di Jooz fahn bil op bak di templ? (Isaiah 55:11)
4 Di peepl a di lan weh neva serv Jehoava ahn som fahn eena di Perzhan govament mi disaid fi stap di Jooz fahn bil op bak di templ. Bot Jehoava mi waahn di Jooz bil op bak di templ, ahn hihn aalwayz mek shoar fi hihn perpos kohn chroo. (Reed Isaiah 55:11.) * Hihn mi chooz Zakaraiya fi bee wahn prafit an ih mi giv ahn ayt eksaitin vizhan. Den, Zakaraiya mi fi tel di Jooz bowt di vizhan dehn fi inkorij dehn. Dehndeh vizhan mi help di Jooz fi si dat dehn neva need fi frayd fi dehn wan weh mi deh gens dehn an ih mi aalso inkorij dehn fi kantinyu du di werk weh Jehoava mi waahn dehn du. Eena di fif vizhan, Zakaraiya mi si wahn lampstan ahn too aliv chree.
5. Weh aal wi wahn diskos eena dis aatikl?
5 Aala wi feel diskorij sohntaim. Soh wi ku benifit fahn di inkorijment weh Jehoava mi gi di Izrelaits chroo Zakaraiya fif vizhan. If wi andastan dis vizhan ih ku help wi fi stay faytful di serv Jehoava wen peepl goh gens wi, wen wi serkomstans chaynj, ahn wen wi geh inschrokshanz weh wi noh andastan.
WEN WI DI DEEL WID PEEPL WEH DEH GENS WI
Zakaraiya mi si wahn vizhan bowt too aliv chree weh giv ail tu wahn lampstan weh ga sevn lamp (Si paragraaf 6)
6. How di vizhan bowt di lampstan ahn di too aliv chree da Zechariah 4:1-3 mi gi di Jooz korij? (Koment pahn di picha pahn di kova.)
6 Reed Zechariah 4:1-3. * Di vizhan bowt di lampstan ahn di too aliv chree mi gi di Jooz korij fi kantinyu dehn werk eevn doa dehn mi ga peepl weh mi deh gens dehn. How di vizhan mi inkorij dehn? Yoo mi noatis dat di lampstan mi aalwayz ga ail fi bon? Ail fahn too aliv chree mi floa dong intu di bowl, den di ail fahn di bowl mi floa intu eech a di sevn lamp weh mi deh pahn di lampstan. Dis ail mi mek di lamp dehn aalwayz di bon. Zakaraiya mi aks: “Weh dehnya ting meen?” Di aynjel mi ansa wid dis mesij fahn Jehoava: “‘Ai wahn du dehnya tingz wid mai spirit, noh wid wahn aami ner wid hyooman powa,ʼ dis da weh Jehoava di Komanda a di hevnli aami seh.” (Zech. 4:4, 6) Di ail fahn di chree mi reprizent Jehoava powaful hoali spirit weh wahn neva ron owt. Gaad hoali spirit mi moch moa powaful dan di Perzhan aami. Bikaaz Jehoava mi-di help di Jooz weh mi-di bil bak di templ, dehn kuda mi finish di werk weh dehn mi-di du eevn doa peepl mi deh gens dehn. Dat da-mi wahn reeli inkorijin mesij! Aal weh di Jooz mi need fi du da-mi fi chros eena Jehoava ahn staat tu bil di templ agen. Ahn dat da egzakli weh dehn mi du eevn doa di bildin werk mi stil deh anda ban.
7. Weh mi help di Jooz fi mek dehn kuda mi kantinyu bil di templ?
7 Sohnting mi hapm weh mi help di Jooz weh mi-di bil op bak di templ. Weh mi hapm? Eena di yaa 520 B.C.E., Daraiyos I da-mi di nyoo king a Perzha. Eena di sekant yaa wen hihn mi-di rool, hihn mi fain owt dat di ban weh dehn mi gat pahn di kanschrokshan a di templ neva leegal. Soh Daraiyos mi gi di Jooz permishan fi mek dehn mi finish di werk weh dehn mi-di du. (Ezra 6:1-3) Dis disizhan weh di king mi mek mi sopraiz evribadi. Bot di king mi du moa dan dat. Di king mi aada aala di nayshan dehn weh mi deh kloas bai fi mek dehn stap deh gens di Jooz ahn fi gi dehn moni an evriting weh dehn mi need fi finish bil op bak di templ! (Ezra 6:7-12) Bikaaz a dat, lee bit oava foa yaaz layta, eena di yaa 515 B.C.E., di Jooz mi finish bil op bak di templ.—Ezra 6:15.
Pen pahn Jehoava powa wen peepl deh gens yu (Paragraaf 8)
8. Wai wi ku ga korij wen peepl deh gens wi?
8 Tudeh, wahn lata Jehoava peepl haftu deel wid peepl weh deh gens dehn. Fi egzampl, som a dehn liv eena sohn konchri wehpaat di govament chrai fi limit wi fahn wership Jehoava. Eena dehndeh konchri, dehn mait ares wi bradaz ahn “bring dehn fronta govna ahn king” fi gi dehn wahn witnis. (Mach. 10:17, 18) Sohntaim di govament chaynj, ahn dat mait gi wi bradaz ahn sistaz moa freedom fi wership Jehoava. Er wahn joj weh kain mait mek wahn disizhan weh alow wi fi bee free fi wership Jehoava. Ada Witnisiz haftu bayr op eena wahn difrent way. How? Wel, dehn mait liv eena wahn konchri wehpaat dehn free fi wership Jehoava, bot dehn stil haftu deel wid famili membaz weh deh gens dehn ahn weh waahn stap dehn fahn serv Jehoava. (Mach. 10:32-36) Wahn lata taim, wi famili membaz stap deh gens wi wen dehn riyalaiz dat dehn kyaahn stap wi fahn serv Jehoava. Az a mata a fak, sohntaim dehn wan weh yoostu hayt wi en op di bee faytful servants a Jehoava. Wen peepl deh gens yu, noh stap serv Jehoava! Ga korij. Yoo ga Jehoava ahn fi hihn powaful hoali spirit pahn fi yoo said, soh yu noh haftu frayd fi notn!
WEN WI SERKOMSTANS CHAYNJ
9. Wai sohn Jooz mi sad wen dehn mi si di fongdayshan fi di nyoo templ?
9 Wen di fongdayshan fi di templ mi geh bil, som a di oalda Jooz dehn mi krai. (Ezra 3:12) Dehn mi si di byootiful templ weh Salaman mi bil, ahn dehn mi feel laik dis nyoo templ mi wahn bee “notn kompyaa” tu di wan weh mi dehdeh bifoa. (Hag. 2:2, 3) Di Jooz mi soh sad bikaaz dehn mi kompyaa di nyoo templ wid di oal wan. Zakaraiya vizhan mi wahn help dehn fi get bak dehn jai. How?
10. How Zechariah 4:8-10 mi help di Jooz fi get bak dehn jai?
10 Reed Zechariah 4:8-10. * Weh di aynjel mi meen wen ih mi seh dat di Jooz wuda “rijais ahn si di plom lain eena Zerobabel [di Jooish govna] han”? Wahn plom lain da wahn tool weh shoa weda sohnting schrayt fahn tap tu batam. Weh di aynjel seh mi shoa Gaad peepl dat eevn doa sohn peepl mi tink dat di templ neva az byootiful az di wan weh Salaman mi bil, di kanschrokshan a di templ mi wahn finish an ih mi wahn geh bil akaadn tu Jehoava standadz. Jehoava mi wahn bee hapi wid di templ, soh di Jooz shuda mi hapi wid it tu. Ih mi moa impoatant tu Jehoava fi mek di Jooz wership hihn eena di nyoo templ di way how hihn mi waahn. If di Jooz mi foakos pahn wership Jehoava di way how hihn mi waahn, ahn fi mek hihn hapi, dehn mi wahn get bak dehn jai.
Ga wahn pazitiv atichood wen yu serkomstans chaynj (Paragraaf 11-12) *
11. Weh chalenjiz som a Jehoava peepl fays tudeh?
11 Ih reeli haad fi wahn lata wi wen wi serkomstans chaynj. Som a Jehoava peepl hoo serv eena speshal ful-taim servis fi wahn lang taim maita mi geh wahn difrent asainment. Adaz mi haftu giv op wahn asainment weh dehn lov maybi bikaaz a dehn ayj. Ih naamal fi mek wi feel sad wen wi goh chroo dehndeh chaynjiz. Eena di biginin, wi mait noh reeli andastan di disizhan er wi mait noh gree wid it. Wi mait feel laik tingz mi moch beta bifoa. Ahn wi mait feel diskorij ahn tink dat now wi noh di du az moch fi Jehoava ahn wi noh az yoosful az bifoa. (Prov. 24:10) How Zakaraiya vizhan ku help wi fi kip aan di gi Jehoava wi bes?
12. How Zakaraiya vizhan ku help wi fi kip wi jai eevn wen wi serkomstans chaynj?
12 Ih eeziya fi mek wi geh yoostu wi nyoo serkomstans wen wi chrai wi bes fi si tingz di way how Jehoava seeʼt. Hihn di du wahn lata wandaful tingz tudeh, ahn wee ga di privilij fi werk lang wid hihn. (1 Kor. 3:9) Wi asainment dehn mait chaynj, bot di lov weh Jehoava ga fi wi wahn neva chaynj. Soh, if wahn chaynj eena di aaganaizayshan afek yoo persnali, noh spen wahn lata taim di tink bowt aala di reezn wai di chaynj kom op. Insteda waahn yu laif fi bee laik “bak den,” aks Jehoava fi help yu si di gud eena di chaynj. (Eccl. 7:10) Noh tink bowt di tingz weh yu kyaahn du, insteda dat, chrai tink bowt di tingz weh yu kud du. Fahn Zakaraiya vizhan, wi laan dat ih impoatant fi kip wahn pazitiv atichood. Da way deh, wi wahn stay hapi ahn faytful eevn wen wi serkomstans chaynj.
WEN IH HAAD FI FALA DAIREKSHAN
13. Wai som a di Izrelait dehn mi feel laik da mi wahn bad disizhan fi bil op bak di templ?
13 Di bildin a di templ mi deh anda ban. Bot stil, Hai Prees Jeshwa (Jashwa) ahn Govna Zerobabel, hoo da-mi di man dehn weh Jehoava mi apoint fi leed di peepl, “mi staat tu bil op bak di hows a Gaad.” (Ezra 5:1, 2) Som a di Jooz dehn mosi mi tink dat da disizhan da-mi wahn bad disizhan. Di Jooz dehn kudn haid dat dehn mi-di bil op bak di templ. Ahn dehn mi noa dat dehn enimiz mi wahn du aal weh dehn kud fi stap di bildin werk. Di too man weh Jehoava mi apoint, Jashwa ahn Zerobabel, mi need fi bee shoar dat Jehoava mi-di sopoat dehn. Ahn Jehoava mi mek dehn noa fi shoar dat hihn mi-di help dehn. How hihn mi du dat?
14. Akaadn tu Zechariah 4:12, 14, how Jehoava mi mek Hai Prees Jashwa ahn Govna Zerobabel noa fi shoar dat hihn mi-di sopoat dehn?
14 Reed Zechariah 4:12, 14. * Eena dis paat a Zakaraiya vizhan, di aynjel mi eksplayn tu Jehoava faytful prafit dat di too aliv chree dehn mi reprizent “di too anointid wanz,” weh da Jashwa ahn Zerobabel. Di aynjel mi seh dat da-mi laik if dehnya too man mi-di “stan op langsaid di Laad a di hoal ert,” hoo da Jehoava. Dat da wahn wandaful privilij! Jehoava mi chros dehnya man. Soh di Izrelaits kuda mi chros eniting weh dehnya man mi tel dehn fi du, bikaaz Jehoava mi-di yooz di too a dehn fi leed di Izrelaits.
15. How wi ku shoa dat wi rispek di dairekshan weh Jehoava gi wi chroo ih Werd di Baibl?
15 Tudeh, Jehoava kantinyu fi yooz ih Werd di Baibl fi leed ih peepl. Eena da saykrid buk, hihn tel wi how fi wership ahn eena wahn way weh hihn aksep. How wee ku shoa dat wi rispek di dairekshan weh Jehoava gi wi chroo ih Werd? Fi du dis, wi haftu tek owt di taim fi reed di Baibl an andastan it. Aks yuself: ‘Wen Ai reed di Baibl er wan a wi poblikayshanz, Ai stap ahn tink bowt weh Ah di reed? Ai du risaach fi chrai andastan di Baibl chroot dehn weh Ah noh ga wahn “gud andastandin bowt”? Er Ah jos reed chroo di poblikayshan kwik-wan?ʼ (2 Peet. 3:16) If wi tek di taim fi tink bowt weh Jehoava di teech wi, wi wahn ku fala fi hihn dairekshan ahn wi wahn ku geh di preechin werk don.—1 Tim. 4:15, 16.
Chros di dairekshan weh yu geh fahn di “faytful ahn waiz slayv” (Paragraaf 16) *
16. Wen wi geh dairekshan weh wi noh andastan fahn di “faytful ahn waiz slayv,” weh wahn help wi fi obay it?
16 Wahn nada way how Jehoava gi wi dairekshan da chroo di “faytful ahn waiz slayv.” (Mach. 24:45) Sohntaim, di faytful slayv mait gi wi dairekshanz weh wi noh reeli andastan. Fi egzampl, wi mait geh spesifik inschrokshanz fi help wi servaiv wahn nachral dizaasta weh wee tink mait noh hapm eena wi ayrya. Er wi mait feel laik di faytful slayv tu schrik joorin wahn pandemik. Weh wi shuda du if wi feel laik di dairekshan weh dehn gi wi noh waiz? Wi ku tink bowt how di Izrelait dehn mi benifit wen dehn mi obay di kongsl weh Jashwa ahn Zerobabel mi gi dehn. Wi ku aalso tink bowt ada egzamplz weh wi don reed eena di Baibl. Sohntaim Gaad peepl mi geh dairekshan weh neva luk laik da mi wahn gud aidyaa bot ih en op di sayv dehn laif.—Judg. 7:7; 8:10.
SI WEH ZAKARAIYA MI SI
17. How di vizhan bowt di lampstan ahn di too aliv chree mi help di Jooz?
17 Di fif vizhan weh Zakaraiya mi si mi shaat, bot ih mi help di Jooz fi ga wahn pazitiv atichood bowt di werk weh dehn mi-di du ahn dehn wership. Ahn wen dehn mi yooz weh dehn laan fahn Zakaraiya vizhan eena dehn laif, dehn mi feel how Jehoava mi-di sopoat dehn ahn dairek dehn. Jehoava mi yooz ih powaful hoali spirit fi help dehn fi kantinyu dehn werk ahn fi get bak dehn jai.—Ezra 6:16.
18. How Zakaraiya vizhan ku help yoo?
18 Zakaraiya vizhan bowt di lampstan ahn di too aliv chree ku help yu eena wahn powaful way. Laik weh wi don diskos, ih ku help yu geh di schrent weh yu need wen adaz deh gens yu, ih ku help yu geh di jai weh yu need fi deel wid chaynjiz eena yu laif, an ih ku help yu ga di chros weh yu need fi obay wen yu geh dairekshanz weh yoo noh andastan. Weh yoo shuda du wen yu di fays chalenjiz eena yu laif? Fers, si weh Zakaraiya mi si. Hihn mi si proof dat Jehoava mi-di tek kayr a fi Hihn peepl. Den, bays pahn weh yu si, chros eena Jehoava ahn kantinyu wership ahn wid aala yu haat. (Mach. 22:37) If yu du dis, Jehoava wahn help yu fi serv ahn wid jai fareva.—Kol. 1:10, 11.
SANG 7 Wi Schrent Kohn Fahn Jehoava
^ par. 5 Jehoava mi gi di prafit Zakaraiya wahn lata eksaitin vizhan. Weh Zakaraiya mi si mi gi hihn ahn Jehoava peepl di schrent fi deel wid di chalenjiz weh dehn mi-di fays az dehn mi-di schrogl fi bring bak chroo wership. Dehndeh vizhan ku aalso help wee fi stay faytful tu Jehoava noh mata weh chalenjiz wi di fays. Eena dis aatikl, wi wahn diskos sohn impoatant lesn weh wi ku laan fahn wan a Zakaraiya vizhan bowt wahn lampstan ahn sohn aliv chree.
^ par. 3 Yaaz layta, eena di dayz a Govna Nehimaiya, wahn difrent king weh mi aalso naym Artazerkseez mi reeli kain tu di Jooz.
^ par. 4 Isaiah 55:11: “Evriting weh kom owta mi mowt wahn kohn chroo. Ih noh wahn kohn bak tu mi widowt rizolts. Fi shoar ih wahn du wateva Ai dizaiya. Ahn fi shoar ih wahn ga sokses eena weh Ai sen it fi du.”
^ par. 6 Zechariah 4:1-3: “Di aynjel weh mi-di taak tu mi, kohn bak ahn wayk mi op, jos laik wen yu wayk op sombadi weh di sleep. 2 Den ih aks mi: ‘Weh yu di si?ʼ Soh Ah mi tel ahn: “Ah si, ahn wach ya! Wahn lampstan weh mek owta pyoar goal, wid wahn bowl pahn tap a it. Dehn ga sevn lamp pan it, yes, sevn, ahn di lamp dehn, weh deh tap a it, ga sevn paip. 3 Ahn rait neks tu it, dehn ga too aliv chree, wan pahn di rait said a di bowl ahn wan pahn di lef said.””
^ par. 10 Zechariah 4:8-10: “Di werd a Jehoava kohn tu mi agen; ih seh: 9 ‘Da Zerobabel mi put dong di fongdayshan a dis hows, ahn da hihn ihself wahn finish it. Ahn yoo wahn haftu noa dat Jehoava di Komanda a di hevnli aami da di wan weh sen mi tu yoo. 10 Da hoo hayt di day wen smaal tingz staat? Bikaaz dehn wahn rijais ahn si di plom lain eena Zerobabel han. Dehnya sevn da Jehoava aiy, weh di wach pahn evriting weh deh pahn di ert.ʼ”
^ par. 14 Zechariah 4:12, 14: “Ah aks ahn wahn sekant taim: ‘Weh di branch dehn fahn di too aliv chree weh di poar owt di goal likwid chroo di too goal paip meen?ʼ 14 Hihn seh: ‘Dehnya da di too anointid wanz weh di stan op langsaid di Laad a di hoal ert.ʼ”
