Wen sohn peepl reed dis Baibl akonk, dehn noh reeli andastan it soh dehn aks dehnself da kweschan. Bot eena 2 Samuel 21:7-9, dehn ga too difrent man weh naym Mefiboshet, ahn wi ku laan sohnting fahn weh mi hapm.

King Saal a Izrel mi ga sevn son ahn too daata. Janatan da-mi Saal fers son. Bot layta, di king mi ga wahn son wid ih ada waif Rizpa. Ih son mi naym Mefiboshet. Bot Janatan mi aalso ga wahn son weh naym Mefiboshet. Soh, King Saal mi ga wahn son an wahn granson wid da saym naym.

King Saal mi staat tu hayt di Gibiyanaits weh liv monks di Izrelaits an ih mi chrai fi kil aala dehn. Ih luk laik ih mi kil wahn lata dehn. Wai dat da neva wahn gud ting fi du? Bikaaz eena Jashwa taim, di cheef dehn a Izrel mi mek wahn kovenant a pees wid di Gibiyanaits.—Josh. 9:3-27.

Eevn op tu wen King Saal mi-di rool, di Izrelaits mi fi stil kip da kovenant. Bot King Saal mi gaahn gens da kovenant an ih mi chrai fi kil owt di Gibiyanaits. Bikaaz a dat, “Saal an evribadi eena ih famili mi blodgilti.” (2 Sam. 21:1) Fainali, Dayvid mi geh fi bee king. Ahn di Gibyanaits weh mi servaiv gaahn taak tu Dayvid bowt di wikid ting weh Saal mi du. Dayvid mi aks di Gibiyanaits weh ih shuda du fi mek Jehoava fergiv weh Saal mi du ahn mek ih staat tu bles di lan agen. Insteda aks fi moni, di Gibiyanaits mi aks Dayvid fi han oava di sevn son dehn a di man weh “mi chrai fi kil dehn owt” soh dat dehn kuda mi kil dehn. (Num. 35:30, 31) Dayvid mi gi dehn weh dehn aks fa.—2 Sam. 21:2-6.

Bai den, Saal ahn Janatan mi don ded eena waar, bot Janatan son Mefiboshet mi stil alaiv. Hihn mi kripl bikaaz a wahn aksident weh mi hapm tu ahn wen ih mi yong, ahn hihn neva ga notn fi du wid di prablem weh ih grampa mi ga gens di Gibiyanaits. Dayvid mi don mek wahn kovenant wid ih fren, Janatan, weh mi wahn benifit aala Janatan pikni, ahn dat mi inklood Janatan son Mefiboshet. (1 Sam. 18:1; 20:42) Di Baibl seh: “Di king [Dayvid] mi shoa kompashan fi Mefiboshet, di son a Janatan hoo da Saal son, bikaaz a di pramis weh dehn mi mek fronta Jehoava.”—2 Sam. 21:7.

Bot Dayvid mi stil kip ih werd. Hihn mi han oava faiv a Saal granson ahn too a Saal son, ahn wan a ih son mi naym Mefiboshet. (2 Sam. 21:8, 9) Bikaaz a weh Dayvid mi du, di lan a Izrel neva blodgilti agen.

Wi ku laan sohnting impoatant fahn dis Baibl akonk. Gaad laa mi klyaa. Ih mi seh dat “chiljren noh fi pay fi di sinz a dehn pa.” (Deut. 24:16) Jehoava neva mi wahn aksep weh mi hapm tu Saal too son an ih faiv granson dehn if dehn mi inosent. Di laa mi aalso seh: “Wahn persn shuda geh kil onli fi ih oan sin dehn.” Ih luk laik Saal son dehn an ih granson dehn weh mi ded mi tek paat di kil owt di Gibiyanaits. Bikaaz a dat, dehn mi pay fi di rang weh dehn mi du.

Dis Baibl akonk teech wi dat wahn persn kyaahn mek ekskyoos ahn seh dat ih mi du sohnting rang bikaaz ih jos mi-di fala inschrokshanz. Hihn haftu tek rispansabiliti fi ih akshanz. Dat da wai di Baibl seh: “Eech persn wahn bak ih oan load.”—Gal. 6:5; Ifee. 5:15.