STODI AATIKL 14
“Evribadi Wahn Noa Dat Unu Da Mai Disaipl”
“Evribadi wahn noa dat unu da mai disaipl if unu lov wan anada.”—JAN 13:35.
SANG 106 Wi Aalwayz Shoa Lov
WEH WI WAHN DISKOS? a
Weh peepl tink wen dehn si di lov weh Jehoava peepl ga monks dehnself? (Paragraaf 1)
1. Weh wahn lata peepl noatis wen dehn goh da wi meetin dehn? (Koment pahn di picha.)
IMAJIN dat wahn marid kopl deh da wahn Kingdom Haal a Jehoava Witnisiz fi di fers taim. Dehn sopraiz bai di lov weh dehn si monks di Witnisiz eena di kangrigayshan ahn bai how di bradaz ahn sistaz welkom dehn. Afta di meetin, wen dehn di goh hoam, di waif tel ih hozban, ‘Sohnting difrent bowt Jehoava Witnisiz. Ah mi injai deh wid dehn.ʼ
2. Wai sohn peepl stap serv Jehoava?
2 Di lov weh deh monks Jehoava peepl da sohnting reeli speshal. Bot af koars, Jehoava Witnisiz noh perfek. (1 Jan 1:8) Soh di moa wi spen taim wid wi bradaz ahn sistaz eena di kangrigayshan, di moa wi wahn ku si dehn mistayks. (Roam. 3:23) Ih sad fi si dat som peepl alow di mistayks weh adaz mek fi stap dehn fahn serv Jehoava.
3. Bays pahn Jan 13:34, 35, how wi ku noa hoo da Jeezas chroo falowaz?
3 Mek wi luk pahn di teem skripcha fi dis aatikl agen. (Reed Jan 13:34, 35.) How wi ku noa hoo da Krais chroo falowaz? Di Baibl seh dat dehn wahn shoa lov monks eech ada, ih noh seh dat dehn wahn perfek. Pahn tap a dat, noatis dat Jeezas neva seh: ‘Unu wahn noa dat unu da mai disaipl.ʼ Rada, ih mi seh: “Evribadi wahn noa dat unu da mai disaipl.” Jeezas mi-di seh dat eevn peepl owtsaida di Kristyan kangrigayshan mi wahn rekonaiz fi hihn chroo falowaz bai di chroo lov weh dehn shoa fi eech ada.
4. Wat da sohn kweschanz weh peepl mait aks bowt chroo Kristyanz?
4 Peepl weh da noh Jehoava Witnisiz mait aks: ‘How lov aidentifai Jeezas chroo falowaz? How Jeezas mi shoa lov tu ih disaipl dehn? Ahn how wee ku kapi Jeezas egzampl tudeh?ʼ Eevn Jehoava Witnisiz shuda tink bowt di ansaz tu dehndeh kweschanz. Dis wahn help wi fi lov eech ada eevn moa, espeshali wen wi haftu deel wid eech ada mistayks.—Ifee. 5:2.
WAI LOV DA WAHN SPESHAL WAY FI AIDENTIFAI JEEZAS CHROO FALOWAZ?
5. Eksplayn weh Jeezas mi meen eena Jan 15:12, 13.
5 Jeezas mi eksplayn dat fi hihn chroo falowaz mi wahn shoa wahn speshal kaina lov. (Reed Jan 15:12, 13.) Jeezas mi koman dehn: “Unu mos lov wan anada jos laik how Ai lov unu.” Weh hihn mi meen? Jeezas mi eksplayn dat dehn fi lov adaz moa dan how dehn lov dehnself, ahn dat dis kaina lov wuda mek wahn Kristyan wilin fi ded fi dehn bradaz ahn sistaz if dehn haftu. b
6. How di Baibl help wi fi si dat lov da sohnting weh reeli impoatant?
6 Di Baibl teech wi dat lov da sohnting reeli impoatant. Dehnya da sohn peepl fayvrit vers: “Gaad da lov.” (1 Jan 4:8) “Yu fi lov yu nayba jos laik how yu lov yuself.” (Mach. 22:39) “Di persn weh ga lov aalwayz wilin fi fergiv adaz.” (1 Peet. 4:8) “Lov wahn neva fayl.” (1 Kor. 13:8) Dehnya vers an adaz mek it playn fi si dat ih veri impoatant fi werk haad fi ga lov ahn fi shoa it.
7. Wai ih noh pasabl fi mek Saytan teech peepl fi lov eech ada?
7 Lata peepl wanda: ‘How wi ku noa wich wan da di chroo rilijan? Evri rilijan klaym seh dat dehn di teech di chroot, bot eech wan a dehn teech sohnting difrent bowt Gaad.ʼ Saytan mek wahn lata faals rilijan soh dat ih ku bee haad fi noa wich wan da di chroo rilijan. Bot hihn wahn neva mek wahn groop a peepl fahn aal oava di werl laan fi lov eech ada. Onli Jehoava Gaad ku du dat. Dis mek sens, bikaaz chroo lov kohn fahn Jehoava. Fi hihn peepl ga lov monks dehnself bikaaz hihn bles dehn ahn gi dehn fi hihn hoali spirit. (1 Jan 4:7) Dat da wai Jeezas seh dat onli fi hihn falowaz wuda ga chroo lov monks dehnself.
8-9. How di lov weh Jehoava Witnisiz shoa monks dehnself help peepl?
8 Jos laik weh Jeezas mi prafesai, lata peepl geh fi noa hoo da fi hihn chroo falowaz bikaaz a di lov weh dehn shoa fi wan anada. Fi egzampl, wahn brada weh naym Ian memba wen ih mi gaahn da ih fers kanvenshan da wahn staydyom weh mi deh kloas tu ih hows. Wahn fyoo monts bifoa dat, Ian mi deh da da saym staydyom fi wach wahn gaym. Hihn seh: “Di peepl weh mi deh da di kanvenshan mi bihayv kompleetli difrent fahn how di peepl weh mi-di wach di gaym mi bihayv. Di Witnisiz mi kain, dehn mi jres prapa, ahn dehn pikni mi bihayv gud. Dehn mi reeli luk hapi, an Ai mi waahn dat fi miself. Ah noh memba non a di taak dehn, bot Ah wahn aalwayz memba di way dehn mi ak.” c Jehoava Witnisiz ak laik dat bikaaz a di chroo lov weh dehn ga fi eech ada. Bikaaz wi lov wi bradaz ahn sistaz, wi shoa dehn lata rispek ahn kainis.
9 Wahn brada weh naym John mi noatis di saym ting bowt Jehoava Witnisiz wen ih mi staat goh da di kangrigayshan meetinz. Ih seh: “Ah mi shak fi si how evribadi mi soh frenli. Dehn mi soh lovin ahn kain dat Ah mi feel laik dehn perfek. Di chroo lov weh dehn shoa monks dehnself mi kanvins mi dat Ah mi fain di chroo rilijan.” d Dehnya ekspeeryens proov dat Jehoava peepl da chroo Kristyanz.
10. Wen wi ku shoa chroo lov? (Koment pahn di futnoat.)
10 Laik weh wi menshan erliya, non a wi bradaz ahn sistaz perfek. Sohntaim, dehn wahn seh er du tingz weh hert wi. e (Jay. 3:2) Wen tingz laik dat hapm, wi geh di chaans fi shoa wi bradaz ahn sistaz humoch wi lov dehn bai di way wi rispan. Weh wi ku laan fahn Jeezas egzampl wen sohnbadi seh er du sohnting weh hert wi?—Jan 13:15.
HOW JEEZAS MI PROOV DAT IH LOV IH APASLZ?
Jeezas mi shoa lov fi ih apasl dehn eevn wen dehn mi shoa bad kwalitiz (Paragraaf 11-13)
11. Weh bad kwalitiz Jaymz ahn Jan mi shoa? (Koment pahn di picha.)
11 Jeezas neva ekspek ih falowaz fi bee perfek. Insteda dat, hihn mi help dehn fi chrai geh rid a eni bad kwaliti weh dehn mi gat soh dat dehn ku pleez Jehoava. Wahn taim, Jaymz ahn Jan mi mek dehn ma aks Jeezas fi gi dehn wahn hai pozishan eena di Kingdom. (Mach. 20:20, 21) Dat mi shoa dat dehn mi prowd ahn dat dehn mi waahn bee beta dan adaz.—Prov. 16:18.
12. Hoo els mi shoa bad kwalitiz? Pleez eksplayn yu ansa.
12 Eena da sichuwayshan, Jaymz ahn Jan da neva di onli wanz weh mi shoa bad kwalitiz. Noatis how di ada apasl dehn gaan aan: “Wen di ada ten disaipl dehn hyaa bowt it, dehn neva hapi ataal wid di too breda dehn.” (Mach. 20:24) Wi ku onli imajin how di ada apasl dehn mosi mi geh bloo beks ahn staat tel aaf Jaymz ahn Jan. Dehn praabli seh sohnting laik: ‘Da hoo unu fi mek unu aks fi wahn haiya pozishan dan wee eena di Kingdom? Unu da noh di onli wan weh di werk haad lang wid Jeezas. Wee dizerv wahn impoatant pozishan tu!ʼ Ih noh mata weh dehn mi seh er du, eena dis sichuwayshan, di apasl dehn mi ferget dat dehn mi fi aalwayz shoa lov ahn bee kain tu eech ada.
13. How Jeezas mi chreet ih apasl dehn? (Machyu 20:25-28)
13 How Jeezas mi deel wid di sichuwayshan? Hihn neva geh beks. An ih neva seh dat ih wahn luk fi sohn beta apasl weh moa hombl ahn weh shoa lov tu wan anada. Insteda dat, hihn mi payshent wid dehn bikaaz hihn mi noa dat dehn waahn du weh rait. (Reed Machyu 20:25-28.) Hihn mi kantinyu chreet dehn wid lov eevn doa dis da neva di fers ner di laas taim dehn mi aagyu bowt wich wan a dehn beta.—Maak 9:34; Look 22:24.
14. Weh kaina kolcha di apasl dehn mi groa op eena?
14 Jeezas mi memba dat di kolcha weh di apasl dehn mi groa op eena mi afek di way dehn tink. (Jan 2:24, 25) Di rilijos leedaz eena da taim mi teech dat peepl onli impoatant if dehn ga wahn hai pozishan. (Mach. 23:6; wach di veedyo weh naym The Front Seats in the Synagogue eena di stodi noat fi Machyu 23:6.) Di Jooish rilijos leedaz mi tink dat dehn beta dan adaz tu. f (Look 18:9-12) Jeezas mi andastan dat da kaina tinkin kuda mi afek di way di apasl dehn mi vyoo dehnself an adaz. (Prov. 19:11) Hihn neva ekspek dehn fi bee perfek, an ih neva geh beks wid dehn wen dehn mi mek mistayks. Hihn mi noa dat dehn mi ga wahn gud haat, soh ih mi payshent wid dehn. Ih mi help dehn fi bee moa hombl ahn fi chreet adaz wid lov, insteda aalwayz di chrai bee beta dan evribadi els.
HOW WI KU KAPI JEEZAS EGZAMPL?
15. Weh lesn wi ku laan fahn di sichuwayshan wid di apaslz?
15 Wi ku laan wahn lat fahn di sichuwayshan wid Jaymz ahn Jan. Ih neva rait fi mek dehn aks fi wahn hai pozishan eena di Kingdom. Bot di ada apasl dehn neva rait needa, bikaaz dehn geh beks ahn brok di pees monks dehnself. Bot stilyet, Jeezas mi chreet aala dehn eena wahn lovin ahn kain way. Wat da di lesn fi wee? Di way adaz chreet wi afek wi wahn lat, bot how wee rispan tu di sichuwayshan moa impoatant. Weh ku help wi? If sohnbadi du wi sohnting weh wi noh laik, wi ku aks wiself: ‘Wai dis di bada mi soh moch? Dis shoa dat Ah need fi werk pahn wahn sertn kwaliti? Ih pasabl dat di persn di goh chroo sohn prablemz? Eevn if Ah tink Ah ga gud reezn fi geh beks, weh Ah ku du fi stil shoa dat Ah lov ahn fergiv ahn?ʼ Wen wi shoa chroo lov tu eech ada, wi proov dat wee da Jeezas chroo falowaz.
16. Wat da wahn nada lesn wi ku laan fahn Jeezas egzampl?
16 Jeezas egzampl aalso teech wi dat ih impoatant fi chrai andastan wi bradaz ahn sistaz. (Prov. 20:5) Da chroo, Jeezas kuda mi reed peepl haat, wee kyaahnt. Bot wi ku bee payshent wid wi bradaz ahn sistaz wen dehn mek wahn mistayk. (Ifee. 4:1, 2; 1 Peet. 3:8) Ih eeziya fi du dat wen wi geh fi noa dehn. Mek wi luk pahn wahn egzampl.
17. Weh mi hapm wen wahn serkit oavaseeya mi geh fi noa wahn brada beta?
17 Wahn serkit oavaseeya weh mi-di serv da East Africa mi meet wahn brada, an ih mi tink dat dis brada neva kain. Weh di serkit oavaseeya mi du? Ih seh: “Insteda stay faar fahn di brada, Ah mi disaid fi geh fi noa ahn beta.” Wen di serkit oavaseeya mi spen taim wid di brada, hihn mi geh fi noa wahn lat bowt di brada bakgrong ahn how dat mi afek ih persnaliti. Di serkit oavaseeya seh: “Wen Ah laan bowt aala di chaynjiz weh ih don mek ahn how haad ih mi werk fi geh kloas tu di bradaz, Ah geh fi admaiya ahn wahn lat. Now wi da gud frenz.” Ih eeziya fi shoa wi bradaz ahn sistaz humoch wi lov dehn wen wi chrai geh fi noa an andastan dehn.
18. Weh kweschanz wi ku aks wiself if wahn brada er sista du sohnting weh hert wi? (Proverbs 26:20)
18 Sohntaim, wi mait feel laik wi need fi karek wi brada er sista weh hert wi. Bot bifoa wi du dat, wi shuda aks wiself: ‘Ai noa di hoal stoari?ʼ (Prov. 18:13) ‘Wat if dehn neva meen it?ʼ (Eccl. 7:20) ‘Ai eva du dis tu sohnbadi els?ʼ (Eccl. 7:21, 22) ‘If Ai taak tu di persn bowt di sichuwayshan, Ah wahn mek tingz beta er wers?ʼ (Reed Proverbs 26:20.) g Kweschanz laik dehndeh ku help wi fi riyalaiz dat if wi lov wi brada er sista, dat wahn moov wi fi fergiv ahn an stap tink bowt weh mi hapm.
19. Wat da yu goal?
19 Jehoava Witnisiz di proov dat dehn da Jeezas chroo falowaz. Eech wan a wi shoa dat wi da Jeezas falowaz wen wi lov wi bradaz ahn sistaz eevn wen dehn mek mistayk. Di lov weh wi ga monks wiself help adaz fi fain di chroo rilijan, ahn dehn wahn ku jain wi ahn serv Jehoava, di Gaad a lov. Mek wi mek it wi goal fi kip aan di shoa chroo lov weh proov dat wi da chroo Kristyanz.
SANG 17 Laan Fahn Jeezas fi Bee Wilin
a Lata peepl waahn laan bowt Jehoava an ih Werd di Baibl bikaaz dehn si how wi shoa chroo lov monks wan anada. Bot bikaaz wi noh perfek, sohntaim ih mait haad fi aalwayz chreet wi bradaz ahn sistaz wid lov. Mek wi taak bowt wai ih impoatant fi shoa lov ahn how wi ku kapi Jeezas egzampl eena di way wi chreet adaz wen dehn mek mistayk.
c Si di aatikl weh naym “At Last, My Life Has a Purpose,” eena di Novemba 1, 2012, kapi a The Watchtower, payj 13-14.
d Si di aatikl weh naym “My Life Seemed Good,” eena di May 1, 2012, kapi a The Watchtower, payj 18-19.
e Dis aatikl noh di taak bowt seeryos sinz weh di eldaz need fi handl. Sohn egzampl a sohn seeryos sin deh eena 1 Korintyanz 6:9, 10.
f Dehn seh dat sohn yaaz afta di taim a di apasl dehn, wahn rabai mi seh: “Eena di werl, dehn ga at lees terti man weh az raichos az Aybraham. If dehn ga terti, den mee ahn mi son da too a dehn; if dehn ga ten, mee ahn mi son da too a dehn; if dehn ga faiv, mee ahn mi son da too a dehn; if dehn ga too, dat da mee ahn mi son; if dehn onli ga wan, da mee dat.”
g Proverbs 26:20: “If yu noh ga no wud, di faiya wahn owt, an if nobadi weh slanda noh dehdeh, di kwaaril wahn stap.”
