1-2. Wai yu shudn feel diskorij if yu noh redi fi geh baptaiz yet? (Koment pahn di picha pahn di kova.)

 IF YU goal da fi geh baptaiz, dat da di bes goal yu ku gat. Bot yu tink yu redi fi tek da impoatant step rait now? If yu reeli tink yu redi, ahn di eldaz tink soh tu, den noh hoal bak. Geh baptaiz az soon az pasabl. If yu du dat, yu wahn injai wahn hapi laif az yu serv Jehoava.

² Bot wat if sombadi tel yu dat yu need fi mek moa proagres bifoa yu ku kwalifai fi geh baptaiz? Er maybi, yoo feel dat yu need fi werk lee haada fi kwalifai fi geh baptaiz? If dat da di kays, noh feel diskorij. Kaaz noh mata if yu yong er oal, yu ku stil reech da goal.

3. Weh wahn hai ofishal fahn Eetiyopya mi aks Filip, ahn weh kweschan dis mait bring op? (Aks 8:36, 38)

³ Reed Aks 8:36, 38. Filip, wahn preecha a di gud nyooz, mi meet wahn hai ofishal fahn Eetiyopya weh mi aks ahn: “Wai Ai kyaahn geh baptaiz now?” Ih mi klyaa fi si dat di hai ofishal mi waahn geh baptaiz. Bot hihn mi reeli kwalifai fi geh baptaiz?

4. How di Eetiyopyan mi shoa dat ih mi reeli waahn laan moa?

⁴ Di hai ofishal fahn Eetiyopya mi gaahn da Jeroosalem fi wership Gaad. (Aks 8:27) Soh praabli hihn da-mi paat a di Jooish rilijan. Moa dan laikli hihn mi laan bowt Jehoava fahn di Heebroo Skripchaz, ahn hihn mi eega fi  laan moa. Weh hihn mi-di du wen Filip fain ahn pahn di road? Hihn mi-di reed fahn di buk a Isaiah. (Aks 8:28) Weh hihn mi-di reed da-mi sohn deep Baibl chroot. Di hai ofishal neva hapi wid di lee bit a Baibl teechin weh ih mi don laan, ih mi waahn kantinyu laan moa.

5. How di Eetiyopyan man mi yooz weh ih laan eena ih laif?

⁵ Di man da-mi wahn hai ofishal weh mi-di serv anda Kandaysi, di kween a Eetiyopya, ahn “hihn mi in chaaj a aala fi shee chrezhaz.” (Aks 8:27) Soh hihn da-mi praabli wahn bizi man wid lata rispansabiliti. Stil, hihn mi tek owt di taim fi wership Jehoava. Hihn neva jos waahn laan di chroot; hihn mi yooz weh ih laan eena ih laif. Hihn mi wilin fi chravl aal di way fahn Eetiyopya tu di templ da Jeroosalem fi wership Jehoava. Da jerni mosi mi tek wahn lata taim ahn moni, bot di man mi wilin fi wership Jehoava noh mata weh aal ih mi haftu du.

6-7. How di Eetiyopyan man mi mek ih lov fi Jehoava groa schranga?

⁶ Filip mi help di Eetiyopyan man laan sohn impoatant nyoo teechinz. Wan a di tingz weh hihn mi laan da dat Jeezas da-mi di Mesaiya. (Aks 8:34, 35) Di hai ofishal mi soh hapi fi laan bowt weh Jeezas mi du far ahn. Soh weh hihn mi du afta ih laan dehndeh tingz? Hihn kuda mi jos kantinyu du di saym ting laik bifoa, bot insted, ih mi mek ih lov fi Jehoava ahn Jeezas groa schranga. Dat mi moov ahn fi mek di impoatant disizhan fi geh baptaiz ahn bee wan a Jeezas Krais falowaz. Aala dis mi shoa Filip dat di man mi redi fi geh baptaiz, soh ih baptaiz ahn.

⁷ If yu fala di Eetiyopyan man egzampl, yu ku reech yu goal fi geh baptaiz. Den, jos laik hihn, yu wahn ku aks yuself, “Wai Ai kyaahn geh baptaiz now?” Mek wi si how yoo ku fala di steps weh hihn mi tek. Hihn mi kantinyu laan, ih mi yooz weh ih laan eena ih laif, an ih mi mek ih lov fi Jehoava groa schranga.

8. Weh Jan 17:3 seh yu need fi du?

⁸ Weh Jeezas mi seh eena Jan 17:3 mi help yu mek op yu main fi stodi di Baibl? (Reed.) Dat da weh mek wahn lata wi waahn stodi di Baibl. Bot dehndeh werdz aalso inkorij wi fi kantinyu laan. Wi wahn neva stap “get fi noa . . . di onli chroo Gaad.” (Eccl. 3:11) Wi wahn kip aan di laan fareva an eva. Di moa wi laan bowt Jehoava, di kloasa wi wahn get tu ahn.—Ps. 73:28.

9. Weh wi need fi du afta wi laan di baysik Baibl teechinz?

⁹ Wen wi staat laan bowt Jehoava, wi laan baysik Baibl teechinz. Eena di leta weh di apasl Paal mi rait tu di Heebrooz, hihn mi seh dat dehndeh teechinz da di “fers tingz weh [wi] mi laan.” Hihn neva mi-di seh dat di “baysik teechinz” neva dat impoatant; hihn jos mi-di shoa dat da laik milk weh wahn baybi need. (Heeb. 5:12; 6:1) Hihn mi aalso inkorij di Kristyanz fi noh jos laan di baysik teechinz, bot fi laan deepa chroots fahn di Baibl. Yoo ga wahn schrang dizaiya fi laan deepa chroots fahn di Baibl? Yoo wilin fi kantinyu laan moa bowt Jehoava an ih perpos dehn?

10. Wai sohn peepl fain it haad fi stodi?

¹⁰ Lata wi fain it haad fi stodi. How bowt yoo? If yu gaahn da skool, yu mi laan fi reed ahn stodi gud? Yoo mi laik stodi? Er yu riyalaiz dat yu jos noh laik stodi? If dat da di kays, noh wori, da noh onli yoo feel soh. Bot Jehoava kud help yu. Hihn perfek an ih da di bes Teecha eva.

11. How Jehoava shoa dat hihn da di “Grayt Teecha”?

¹¹ Jehoava kaal ihself “yu Grayt Teecha.” (Isa. 30:20, 21) Hihn da wahn payshent, kain, an andastandin Teecha weh luk fi di gud eena eech wan a ih styoodent dehn. (Ps. 130:3) Ahn hihn neva aks wi fi du moa dan weh wi ku du. Memba dat fi wee brayn da wahn amayzin gif fahn Gaad. (Ps. 139:14) Soh hihn mek wi wid di dizaiya fi laan. Fi wee Kriyayta waahn mek wi kantinyu laan fareva an ih waahn wi injai it. Soh ih impoatant fi “waahn . . . weh deh eena di werd a Gaad” now. (1 Peet. 2:2) Set sohn goal weh yu ku reech, ahn reed ahn stodi di Baibl evri day. (Josh. 1:8) Wid Jehoava help, yu wahn ku injai di reed ahn laan bowt ahn moa ahn moa.

12. Wai ih impoatant fi mek wi stodi Jeezas laif ahn minischri?

¹² Az moch az yu kud, tek taim fi meditayt pahn Jeezas laif ahn minischri. If wee waahn serv Jehoava, wan a di moas impoatant ting fi du da fi kapi Jeezas egzampl eena evri way wi kud, espeshali joorin dehnya haad taimz. (1 Peet. 2:21) Jeezas mi tel ih falowaz dat dehn mi wahn ga lata chraiyalz. (Look 14:27, 28) Bot hihn mi shoa dat ih reel falowaz mi wahn ku stay faytful tu Jehoava, jos laik hihn. (Jan 16:33) Stodi Jeezas laif gud, ahn set goalz fi yuself fi kapi fi hihn egzampl eena yu evriday laif.

13. Weh yu need fi kantinyu aks Jehoava fa, ahn wai?

¹³ Ih noh inof fi jos ga nalij. Di reezn yu need nalij da soh dat yu ku laan moa bowt Jehoava ahn ga lov far ahn, an fayt eena ahn. (1 Kor. 8:1-3) Wail yu di laan moa bowt Jehoava, aks ahn fi help yu fi ga moa fayt. (Look 17:5) Hihn hapi fi ansa pryaaz laik dat. Reel fayt weh bays pahn nalij bowt Jehoava wahn help yu fi kantinyu mek spirichwal proagres.—Jay. 2:26.

14. How di apasl Peeta mi help wi fi si wai ih impoatant fi yooz weh wi laan eena wi laif? (Koment pahn di picha.)

¹⁴ Di apasl Peeta mi tel Krais falowaz how impoatant ih impoatant fi mek dehn kip di yooz weh dehn laan eena dehn laif. Hihn mi tel dehn bowt weh mi hapm wid Noawa. Jehoava mi tel Noawa dat ih mi  wahn kaaz wahn flod fi dischrai aala di wikid peepl weh mi-di liv eena Noawa dayz. Jos bikaaz Noawa mi noa dat wahn flod mi wahn kom, dat neva meen dat hihn an ih famili mi wahn geh sayv. Noatis how Peeta mi-di taak bowt di taim bifoa di Flod “wen Noawa an ih famili mi-di bil di aak.” (1 Peet. 3:20) Noawa an ih famili mi yooz weh dehn laan fahn Gaad fi bil wahn big aak. (Heeb. 11:7) Peeta mi kompyaa weh Noawa mi du tu baptizm wen ih tel di Kristyanz eena fi hihn taim: “Wi ku kompyaa weh mi hapm bak den tu di baptizm weh di sayv unu now.” (1 Peet. 3:21) Eena wahn way, wi ku seh dat di werk weh yu di du fi pripyaa fi baptizm da laik di werk weh Noawa an ih famili mi du fi bil di aak. Weh kaina werk yu need fi du fi geh redi fi baptizm?

15. How wi proov dat wi reeli ripent fahn aala wi sin dehn?

¹⁵ Wan a di fers tingz wi haftu du bifoa wi geh baptaiz da fi ripent fahn aala wi sin dehn. (Aks 2:37, 38) If yu reeli feel sari fi yu sin dehn, dat wahn moov yu fi mek chaynjiz eena yu laif. Yoo don geh rid a eni bad habit soh dat yu ku mek Jehoava hapi? Fi egzampl, maybi yu yoostu liv wahn imoaral laif, yooz doti langwij, er smoak. (1 Kor. 6:9, 10; 2 Kor. 7:1; Ifee. 4:29) Bot if yu stil di chrai mek chaynjiz eena yu laif, noh giv op. Aks di persn weh di stodi di Baibl wid yu er di eldaz eena di kangrigayshan fi help yu ahn gi yu sohn advais. If yu da wahn yong persn ahn stil di liv wid yu payrents, kip di aks dehn fi help yu geh rid a eni bad habit weh ku stap yu fahn geh baptaiz.

16. Weh ih meen fi stik tu wahn gud spirichwal skejul?

¹⁶ Ih impoatant fi mek yu stik tu wahn gud spirichwal skejul. Dat meenz dat yu need fi goh da aala di meetin dehn ahn tek paat eena dehn. (Heeb. 10:24, 25) Wen yu kwalifai fi goh preech wid di kangrigayshan, mek shoar yu du it aafn. Di moa yu preech, di moa yu wahn injai it. (2 Tim. 4:5) If yu stil liv wid yu payrents, aks yuself: ‘Mai payrents haftu rimain mi fi goh da meetin ahn goh preech, er Ai du dehnya tingz pahn mi oan?ʼ Wen yu  du spirichwal tingz pahn yu oan, yu shoa Jehoava dat yu tankful ahn dat yu lov ahn. Dehnya tingz shoa dat yu “faytful tu Gaad,” ahn da laik wahn gif weh yu giv ahn. (2 Peet. 3:11; Heeb. 13:15) Hihn hapi wen wi giv ahn gif bikaaz wi waahn giv ahn, an noh bikaaz sohnbadi tel wi fi du it. (Kompyaa 2 Korintyanz 9:7.) Wi du dehnya tingz bikaaz wi hapi fi gi Jehoava wi bes.

17-18. Weh impoatant kwaliti wahn help yu geh redi fi baptizm, ahn wai? (Proverbs 3:3-6)

¹⁷ Az yu kantinyu werk tuwaadz baptizm, yu wahn fays chalenjiz. Ih kud bee dat peepl mait ton gens yu, mek fon a yu, an eevn persikyoot yu bikaaz a yu fayt. (2 Tim. 3:12) Maybi yu di fait fi geh rid a wahn bad habit, bot yu mait stil slip op sohntaim ahn du da bad ting. Er yu mait jos feel beks er foschraytid kaaz yu feel laik yu wahn neva reech yu goal fi geh baptaiz. Weh wahn help yu fi kip yu foakos pahn yu goal ahn noh giv op? Wahn impoatant kwaliti weh wahn help yu da yu lov fi Jehoava.

¹⁸ Di bes kwaliti weh yu gat da yu lov fi Jehoava. (Reed Proverbs 3:3-6.) b Wen yu ga schrang lov fi Gaad, ih wahn help yu fi noh giv op wen yu fays prablemz. Wi aalwayz reed eena di Baibl bowt Jehoava laayal lov. Dis meen dat hihn wahn neva lef ih servants er stap lov dehn. (Ps. 100:5) Gaad mek yu fi bee laik hihn. (Jen. 1:26) How yoo ku shoa laayal lov laik Jehoava?

19. How yu ku bee moa tankful fi aal weh Jehoava du fi yu? (Galayshanz 2:20)

¹⁹ Di fers ting weh yu ku du da bee tankful tu Jehoava. (1 Tes. 5:18) Chrai aks yuself dis kweschan evri day: ‘How Jehoava shoa dat ih lov mee?ʼ Den mek shoar yu tank Jehoava eena yu pryaaz, ahn menshan spesifik tingz weh yu tankful fa. Andastan dat Jehoava du gud tingz fi yoo bikaaz ih lov yu, jos laik weh di apasl Paal seh. (Reed Galayshanz 2:20.) Aks yuself wahn nada kweschan: ‘Ai  waahn shoa Jehoava dat Ai lov ahn tu?ʼ Yu lov fi Jehoava wahn help yu fi fait gens temtayshan ahn fi noh giv op wen yu ga prablemz. Ih wahn mek yu waahn stik tu yu spirichwal skejul, ahn dat wahn shoa hihn dat yu lov ahn evri day.

20. Weh yu need fi du fi dedikayt yuself tu Jehoava, ahn wai da disizhan soh impoatant?

²⁰ Bifoa yu noa it, yu lov fi Jehoava wahn moov yu fi seh wahn speshal pryaa fi dedikayt yu laif tu Gaad. Memba, wans yu dedikayt yuself tu Gaad, yu wahn ga di wandaful hoap fi bilangz tu hihn fareva. Wen yu dedikayt yuself tu Jehoava, yu pramis fi serv ahn eena gud an eena bad taimz. Yu neva wahn need fi mek da pramis agen. Yu dedikayshan da wahn seeryos disizhan. Bot memba, yu wahn mek wahn lata disizhan eena yu laif. Som a dehn wahn bee gud, bot dis wan wahn bee di bes wan yu kuda eva mek. (Ps. 50:14) Saytan wahn chrai mek yu lov fi Jehoava geh week ahn mek yu stap bee faytful tu Gaad. Noh alow hihn fi win! (Job 27:5) Yu schrang lov fi Jehoava wahn help yu fi kip yu pramis fi serv ahn an geh eevn kloasa tu yu hevnli Faada.

21. Wai wi ku seh dat baptizm da di biginin a wahn nyoo laif?

²¹ Afta yu don dedikayt yu laif tu Jehoava, mek di eldaz eena yu kangrigayshan noa dat yu waahn geh baptaiz. Bot memba dat wen yu geh baptaiz, dat da jos di biginin a wahn laif weh yu wahn serv Jehoava fareva. Soh mek yu lov fi yu Faada groa schranga fahn now, ahn set goalz weh wahn help yu mek da lov kantinyu groa evri day. Dis wahn help yu fi geh redi fi geh baptaiz. Dat wahn bee wahn wandaful day. Bot da jos di biginin. Mek yu lov fi Jehoava ahn fi ih Son kip aan di groa fareva an eva!