Wai “di man” mi seh dat ih mi wahn looz ih inheritans if ih mi marid Root? (Ruth 4:1, 6)

Eena Baibl taimz, if wahn man mi ded an ih neva ga pikni, sohn kweschan wuda kom op, laik: Weh mi wahn hapm tu aal di lan weh ih mi oan? Dehn mi wahn ferget ih famili naym? Dehn kuda mi fain di ansaz eena di Laa weh Gaad gi Moaziz.

If wahn man ded er ih mi haftu sel ih lan bikaaz ih geh poa, eeda ih breda er wahn kloas relitiv kuda bai bak di lan. Dis wuda mek di famili stil oan di lan.—Lev. 25:23-28; Num. 27:8-11.

Weh dehn wuda du fi noh ferget di famili naym a di man weh ded? Wel, ih breda er wahn kloas relitiv wuda marid ih waif. An if dehn ga wahn son, hihn mi wahn inherit di ded man naym ahn prapati. Dis da-mi wahn lovin araynjment fi di wido dehn. Ahn dis da weh mi hapm eena Root kays.—Deut. 25:5-7; Mach. 22:23-28.

Mek wi luk pahn Nayomi egzampl. Shee mi marid tu Elimelek. Wen fi shee too son an ih hozban mi ded, nobadi mi deh fi tek kayr a shee. (Ruth 1:1-5) Afta Nayomi gaahn bak da Jooda wid ih daata-in-laa Root, ih mi tel ahn fi aks Bowaz if hihn kuda mi bai bak dehn lan, sins hihn da-mi wahn kloas relitiv tu Elimelek. (Ruth 2:1, 19, 20; 3:1-4) Bot Bowaz mi noa dat dehn mi ga wahn kloasa relitiv dan hihn. Di Baibl kaal ahn “di man.” Hihn da-mi di fers wan hoo kuda mi disaid if ih mi waahn bai bak di lan.—Ruth 3:9, 12, 13.

At fers, “di man” mi waahn help. (Ruth 4:1-4) Hihn mi noa dat if hihn mi bai bak di lan, hihn mi wahn haftu spen moni. Bot, hihn mi aalso noa dat Nayomi mi tu oal fi ga pikni weh kuda inherit Elimelek lan. Dis meenz dat di man mi wahn geh fi oan Elimelek lan an ih mi wahn bee paat a fi hihn inheritans. Soh fi hihn, ih mi luk laik da mi wahn gud aidyaa.

Bot di man mi chaynj ih main wen ih fain owt dat hihn mi wahn haftu marid Root fi bai bak di lan. Hihn mi seh: “Ai kyaahn bai di lan. If Ah du dat, Ah wahn looz wahn lat an Ah wahn geh poa.” (Ruth 4:5, 6) Wai hihn mi chaynj ih main?

If di man er sombadi els mi marid Root ahn shee ga wahn son, da pikni mi wahn inherit Elimelek lan. Soh wai di man mi feel laik dis mi wahn mek ih ‘looz wahn lat an geh poaʼ? Di Baibl neva seh wai, bot dehnya kuda mi bee sohn reezn:

• Fers, hihn mi wahn looz aal di moni weh ih wuda spen fi bai di lan, bikaaz laytaraan di lan neva mi wahn bee fi hihn. Ih mi wahn bee fi Root son.

• Sekant, ih wuda haftu tek kayr a Root ahn Nayomi.

• Terd, if Root wuda ga ada pikni wid di man, dehn mi wahn haftu shayr di inheritans wid di man ada pikni.

• Foat, if di man neva ga no pikni, den dat meenz dat Root son mi wahn oan di man lan an Elimelek lan. Dat da di son weh mi wahn ga Elimelek naym, noh fi hihn naym. Hihn neva wilin fi ris ih inheritans fi help Nayomi. Soh hihn mi rada mek Bowaz tek da rispansabiliti. Bowaz mi du dat “soh dat di lan ku stay eena Maalon famili.”—Ruth 4:10.

Wi ku si dat dis man mi onli kay bowt fi hihn oan naym an inheritans. Hihn mi onli selfish! Bot dat neva help hihn ataal, bikaaz op tu dis day wi noh eevn noa weh ih mi naym. Pahn tap a dat, hihn neva geh di privilij weh Bowaz get. Bowaz mi geh fi bee wan a di Mesaiya ansesta. Di man mi soh selfish dat ih neva wilin fi help sohnbadi weh mi need ih help! Dat sad, noh chroo?—Mach. 1:5; Look 3:23, 32.