1-2. Weh yoozhwali hapm wen sohnbadi geh baptaiz, ahn weh wi wahn diskos eena dis aatikl?

 YOO eva si wahn baptizm? Yu mi praabli hyaa how eksaitid dehn wan weh mi-di geh baptaiz mi song wen dehn ansa di too kweschanz. Ahn yu mi si how hapi dehn famili ahn frenz mi luk. Ahn wen dehn kom owta di waata, yu mi hyaa evribadi klap, ahn yu si evribadi di smail. Towznz a peepl dedikayt dehn laif tu Jehoava ahn geh baptaiz az fi hihn Witnisiz evri week.

² How bowt yoo? Yu don mek op yu main fi geh baptaiz? If yes, dat mek yu stan owt fahn di res a peepl eena dis wikid werl, bikaaz yu “di saach fi Jehoava.” (Ps. 14:1, 2) Weda yu yong er oal, dis aatikl da fi yoo. Bot aala wi weh don geh baptaiz aalso need fi mek wi dizaiya fi serv Jehoava geh schranga soh dat wi ku kip wi vow fi serv ahn fareva. Eena dis aatikl, wi wahn diskos chree reezn wai wi waahn serv Jehoava.

3. Wai Jehoava servants lov di chroot ahn weh raichos? (Psalm 119:128, 163)

³ Jehoava mi koman ih servants fi “lov chroot.” (Zech. 8:19) Jeezas inkorij ih falowaz fi liv bai Gaad raichos standadz. (Mach. 5:6) Soh dis meenz dat wahn persn need fi ga wahn schrang dizaiya fi liv bai dehndeh standadz a weh rait, gud, ahn kleen. Yoo lov di chroot ahn weh raichos? Wi noa dat yu lov dehndeh tingz bikaaz yu hayt laiz an evriting weh bad ahn wikid. (Reed Psalm 119:128, 163.) b Enibadi weh laik tel lai di kapi Saytan,  weh da di roola a dis werl. (Jan 8:44; 12:31) Wan a Saytan goal da fi slanda Jehoava hoali naym. Hihn di tel aal kaina lai sins di ribelyan eena di gyaadn a Eedn. Hihn chrai fi mek peepl tink dat Gaad selfish ahn dat hihn da wahn bad Roola bikaaz ih tel lai an ih noh waahn notn gud fi peepl. (Jen. 3:1, 4, 5) Sayka aala di lai weh Saytan seh bowt Jehoava, ih mek peepl ton weh fahn Jehoava. Wen peepl mek op dehn main fi noh “lov chroot,” dis mek dehn du tingz weh rang ahn wikid.—Roam. 1:25-31.

4. How Jehoava shoa dat hihn da “di Gaad a chroot?” (Koment pahn di picha.)

⁴ Jehoava da “di Gaad a chroot,” ahn hihn wilin fi teech di chroot tu peepl weh lov ahn. (Ps. 31:5) Wen hihn du dat, hihn help dehn fi noh geh fool op bai Saytan lai dehn. Jehoava aalso help ih servant dehn fi bee aanis ahn fi fala ih raichos standadz. Dat help dehn fi rispek dehnself ahn fi ga pees eena dehn haat. (Prov. 13:5, 6) Sins yu mi staat stodi di Baibl, yu noatis how Jehoava du dat fi yoo? Yu mi laan dat Jehoava way da di bes way fi yoo ahn fi evribadi. (Ps. 77:13) Soh yu waahn mek shoar dat yu liv op tu Gaad raichos standadz. (Mach. 6:33) Yu aalso waahn difen di chroot ahn mek evribadi noa dat weh Saytan seh bowt Jehoava da loan lai. How yu ku du dat?

5. How yoo ku shoa dat yu di liv op tu di chroot ahn Jehoava raichos standadz?

⁵ Yu ku chooz fi liv wahn laif weh shoa dat yu rijek Saytan lai dehn ahn liv op tu di chroot. Yu ku shoa dat yu waahn Jehoava bee yu Roola ahn dat yu waahn fala fi hihn raichos standadz. Bot how yu ku du dat? Wen yu pray tu Jehoava ahn dedikayt yu laif tu hihn ahn den geh baptaiz. Wen wi ga lov fi di chroot ahn waahn fala Jehoava raichos standadz, dat moov wi fi geh baptaiz.

6. Akaadn tu Psalm 45:4, weh difrent reezn wi ga fi lov Jeezas Krais?

⁶ Wai yoo lov Jeezas Krais? Wi fain sohn gud reezn wai wi shuda lov Jeezas da Psalm 45:4. (Reed.) c Jeezas mi shoa dat hihn hombl ahn dat hihn lov di  chroot ahn Jehoava raichos standadz. If yu lov di chroot ahn stan op fi weh rait, den dis meenz dat yu lov Jeezas. Fi egzampl, tink bowt weh aal Jeezas mi du ahn humoch korij ih mi ga fi difen di chroot ahn Jehoava raichos standadz. (Jan 18:37) Bot, how Jeezas inkorij wee fi bee hombl?

7. Weh yoo lov bowt Jeezas hombl egzampl?

⁷ Bai weh ih seh ahn du, Jeezas da wahn gud egzampl a how fi bee hombl. Fi egzampl, hihn aalwayz giv ih Pa gloari; hihn neva waahn dehn gi gloari tu hihn. (Maak 10:17, 18; Jan 5:19) How yoo feel bowt di hombl egzampl weh Jeezas set? Fi shoar, dis mek wi waahn lov Jeezas ahn fala ih egzampl. Bot wai Jeezas soh hombl? Hihn ga dis kwaliti bikaaz ih Pa hombl, ahn Jeezas lov ih Pa ahn kapi fi hihn persnaliti eena wahn perfek way. (Ps. 18:35; Heeb. 1:3) Aala dis jraa wi kloasa tu Jeezas, noh chroo?

8. Wai wi lov ga Jeezas az wi King?

⁸ Wee lov ga Jeezas az wi King bikaaz hihn da di bes Roola. Jehoava da di wan weh chrayn ahn, an pik ahn fi bee King. (Isa. 50:4, 5) Tink bowt aal weh Jeezas du fi proov dat ih lov wi. (Jan 13:1) Az wi king, hihn dizerv mek wi lov ahn. Jeezas seh dat dehn wan weh da fi hihn fren shoa dehn lov wen dehn obay ih komanment dehn. (Jan 14:15; 15:14, 15) Da wahn grayt aana fi bee fren wid Jehoava Son!

9. How di baptizm a Kristyanz simila tu Jeezas baptizm?

⁹ Wan a Jeezas koman da fi mek ih falowaz geh baptaiz. (Mach. 28:19, 20) Ahn hihn set di egzampl fi wi. Eena som wayz, Jeezas baptizm da di saym az di baptizm a ih falowaz, bot ih difrent eena ada wayz. (Si di baks “How Jeezas Baptizm Difrent Fan Ih Falowaz Baptizm?”) Fi egzampl, wen Jeezas mi geh baptaiz, hihn mi shoa dat hihn mi waahn du weh ih Pa aks ahn fi du. (Heeb. 10:7) Saym way soh, wen wi geh baptaiz, wi shoa evribadi dat wi don dedikayt wi laif tu Jehoava ahn wi waahn du Jehoava wil, noh fi wee wan. Da way deh wi di fala Jeezas egzampl.

10. Wai di lov weh yu ga fi Jeezas shuda mek yu waahn geh baptaiz?

¹⁰ Wi hapi dat Jeezas da wi Roola ahn wi bileev dat hihn da Jehoava onli Son. Jeezas hombl an ih kapi ih Pa egzampl eena wahn perfek way. Wi aalso laan dat hihn mi feed hongri peepl, ih mi gi komfert tu peepl weh feel diskorij, an ih mi eevn heel sik peepl. (Mach. 14:14-21) Wi geh fi si how ih dairek di Kristyan kangrigayshan. (Mach. 23:10) Ahn wi noa dat hihn wahn du moa dan dat sins hihn da di King a Gaad Kingdom. Weh yoo ku du fi shoa dat yu lov Jeezas? Fala ih egzampl. (Jan 14:21) Wan way yu ku du dat da wen yu dedikayt yu laif tu Jehoava ahn geh baptaiz.

11. Wat da di moas impoatant reezn fi geh baptaiz?

¹¹ Wat da di moas impoatant reezn fi geh baptaiz? Wi ku fain di ansa eena weh Jeezas seh da di graytis komanment: “Yu fi lov Jehoava yu Gaad wid yu hoal haat ahn wid yu hoal soal ahn wid yu hoal main ahn wid yu hoal schrent.” (Maak 12:30) Dat da how yoo feel bowt Jehoava?

12. Wai yoo lov Jehoava? (Koment pahn di picha.)

¹² Wi ga soh moch reezn wai wi shuda lov Jehoava. Fi egzampl, yu laan dat Jehoava  da “di wan weh laif kohn fram” ahn dat “evri gud ahn perfek gif” kohn fahn hihn. (Ps. 36:9; Jay. 1:17) Evri gud ting weh wee injai da fahn wi jenaros Gaad, Jehoava.

13. Wai di ransom da di graytis gif Gaad ku gi wi?

¹³ Di ransom da wahn wandaful gif fahn Jehoava. Wai wi ku seh dat? Tink bowt di kloas rilayshanship weh Jehoava ahn Jeezas gat. Jeezas seh: “Di Faada lov mi” an “Ai lov di Faada.” (Jan 10:17; 14:31) Dehn mi soh kloas tu eech ada bikaaz dehn mi spen bilyanz a yaaz tugeda. (Prov. 8:22, 23, 30) Soh tink bowt humoch ih mi hert Jehoava wen ih mi alow ih Son fi sofa ahn ded. Jehoava lov peepl soh moch, inkloodin yoo, dat ih mi wilin fi giv ih Son az wahn sakrifais fi mek wee ku liv fareva. (Jan 3:16; Gal. 2:20) Dis da di graytis reezn wai wi lov Jehoava.

14. Wat da di bes goal fi gat eena laif?

¹⁴ Az yu mi geh fi laan bowt Jehoava, yu lov far ahn groa, ahn dat mek yu feel kloasa tu ahn. Da lov kud laas fareva! Eena wahn kain way Jehoava tel wi dat wi ku mek ih haat hapi wid di tingz weh wi seh ahn du. (Prov. 23:15, 16) Di way yu liv yu laif wahn proov dat yu reeli lov Jehoava. (1 Jan 5:3) Dat da di bes goal fi gat eena laif.

15. How yu ku shoa dat yu lov Jehoava?

¹⁵ How yu ku shoa dat yu lov Jehoava? Fers, eena wahn speshal pryaa yu dedikayt yu laif tu ahn. (Ps. 40:8) Den, wen yu geh baptaiz, dis wahn shoa evribadi dat yu don dedikayt yu laif tu ahn. Laik weh wi menshan erliya, di day wen yu geh baptaiz da di hapiyis ahn moas impoatant day a yu laif. Fahn da day yu laif chaynj, bikaaz yu noh di liv fi yuself nohmoh, bot yu put Jehoava fers eena yu laif. (Roam. 14:8; 1 Peet. 4:1, 2) Dat mait song laik wahn big chaynj fi chroo. Bot dat da di onli way fi liv di bes laif eva. Mek wi si wai.

16. Akaadn tu Psalm 41:12, how Jehoava wahn bles dehn wan weh stay faytful tu hihn?

¹⁶ Jehoava da di moas jenaros Persn eva. Hihn wahn aalwayz gi yu moa dan weh yu giv ahn. (Maak 10:29, 30). Eevn now wail wi di liv eena dis wikid werl, hihn stil waahn mek wi ga wahn hapi laif wid lata inchrestin tingz fi du. Ahn dis da jos di biginin. Now dat yu geh baptaiz, yu nyoo laif jos di staat an ih ku laas fareva az yu kantinyu serv yu Pa. Di lov bitween yoo ahn Jehoava wahn kantinyu groa, ahn yu wahn liv fareva jos laik hihn.—Reed Psalm 41:12. d

17. Weh yoo ku gi Jehoava weh hihn noh ga yet?

¹⁷ Wen yu dedikayt yu laif ahn geh baptaiz, yoo ga di privilij fi gi Jehoava sohnting reeli preshos. Jehoava da di wan weh gi yu evriting weh gud ahn weh mek yu hapi. Soh now, yoo ku gi di Kriyayta a hevn an ert sohnting weh hihn noh ga yet—yu wilin ahn laayal obeedyans. (Job 1:8; 41:11; Prov. 27:11) Yu noh tink dis da di bes way fi liv yu laif? No dowt yu lov fi Jehoava da di moas impoatant reezn wai yoo shuda geh baptaiz.

18. Weh kweschanz yu ku aks yuself?

¹⁸ Soh, yoo redi fi geh baptaiz? Onli yoo ku ansa da kweschan. Sohnting weh  ku help da fi aks yuself, ‘Weh di hoal mi bak?ʼ (Aks 8:36) Memba di chree reezn weh wi mi taak bowt eena dis aatikl? Fers, yu need fi lov di chroot ahn Jehoava raichos standadz. Sekant, yu need fi lov Jeezas Krais. Ahn terd, di moas impoatant reezn da fi lov Jehoava. Soh aks yuself, ‘Ai di luk faawod tu di taim wen evribadi wahn taak di chroot ahn fala Jehoava raichos standadz? Ai waahn mek Gaad Son bee mai King, an Ai waahn fala fi hihn egzampl? Ai waahn mek Jehoava hapi ahn serv hihn az mai Gaad?ʼ If yu ansa da yes, den yu noh tink yu redi fi geh baptaiz?—Aks 16:33.

19. How di iloschrayshan eena Jan 4:34 ku help yu if yu stil noh shoar if yu shuda geh baptaiz?

¹⁹ If yu stil noh shoar if yu shuda geh baptaiz, den tink bowt wahn iloschrayshan weh Jeezas mi yooz. (Reed Jan 4:34.) Noatis dat Jeezas mi seh dat fi du di wil a ih Faada da-mi laik food fi hihn. Wai? Wel, wi noa dat food gud fi wi. Soh Jeezas mi noa dat evriting weh Jehoava aks wi fi du gud fi wi. Jehoava noh wahn aks wi fi du eniting weh ku hert wi. Yu tink Jehoava waahn mek yu geh baptaiz? Yes. (Aks 2:38) Wen yu obay di koman fi geh baptaiz, fi shoar yoo wahn benifit. If dehn wuda put sohn reeli nais food fronta yu, yu wudn hoal bak fahn eet it, noh chroo? Soh wai hoal bak fahn geh baptaiz?

20. Weh wi wahn kansida eena di neks aatikl?

²⁰ Wai sohn peepl hoal bak fahn geh baptaiz? Wahn lata dehn wuda seh, “Ai noh redi yet.” Bot wi haftu memba dat di moas impoatant disizhan weh wi kuda eva mek da fi dedikayt wi laif tu Jehoava ahn geh baptaiz. Dat da wai yu reeli need fi tek taim fi tink bowt da disizhan, ahn werk haad fi kwalifai fi geh baptaiz. Bot if yu reeli waahn geh baptaiz, weh yu ku du now fi geh redi? Wi wahn ansa da kweschan eena di neks aatikl.