1. Weh eech payrent waahn fi dehn pikni?

 WEE noa dat unu weh da payrents reeli waahn help unu pikni fi lov ahn geh fi noa Jehoava. Bot wi kyaahn si Gaad. Soh how yu ku help yu pikni fi si Jehoava az wahn reel Persn ahn geh kloas tu ahn?—Jay. 4:8.

2. How payrents ku teech dehn pikni bowt Jehoava kwalitiz?

² Wahn impoatant way how payrents ku help dehn pikni geh kloas tu Jehoava da wen dehn stodi di Baibl wid dehn. (2 Tim. 3:14-17) Bot di Baibl tel wi wahn nada way how yong peepl ku laan bowt Jehoava. Eena di buk a Proverbs, wi ku reed bowt wahn pa di tel ih son fi neva ferget bowt Jehoava kwalitiz weh ih si eena kriyayshan. (Prov. 3:19-21) Wi wahn taak bowt sohn wayz how payrents ku yooz kriyayshan fi teech dehn pikni bowt Jehoava kwalitiz.

3. Weh payrents shuda teech dehn pikni?

³ Di Baibl seh: “Peepl ku si dat Gaad ga powa weh laas fareva ahn dat hihn da di onli chroo Gaad, kaaz dehn ku seeʼt eena di ting dehn weh hihn mek.” (Roam. 1:20) Fi shoar az wahn payrent yu laik spen taim wid yu pikni owtsaid. Yooz da taim fi teech dehn bowt Jehoava kwalitiz fahn “di ting dehn weh hihn mek.” Now, mek wi si weh payrents ku laan fahn Jeezas egzampl.

4. Bays pahn Look 12:24, 27-30, how Jeezas mi yooz kriyayshan fi teech ih disaipl dehn bowt Jehoava?

⁴ How Jeezas mi yooz kriyayshan fi teech ih disaipl dehn bowt Jehoava? Wahn taim wen Jeezas mi deh wid dehn, ih mi tel dehn fi luk pahn di berd ahn di lili dehn. (Reed Look 12:24, 27-30.) Jeezas kuda mi tel dehn bowt eni  animal er plaant, bot hihn mi yooz sohnting weh ih disaipl dehn mi fameelya wid. Fi shoar di disaiplz kuda mi si di berd dehn di flai ahn di lili dehn eena di feel wehpaat dehn mi deh. Jos imajin Jeezas di point pahn dehndeh tingz wail ih mi-di taak. Ahn weh hihn du afta dat? Hihn mi teech ih disaiplz wahn impoatant lesn bowt how Jehoava kain ahn jenaros. Soh dehn mi laan dat Jehoava mi wahn tek kayr a dehn jos laik how ih tek kayr a di berd dehn ahn di flowaz.

5. Wat da wahn way how payrents ku yooz kriyayshan fi teech dehn pikni bowt Jehoava?

⁵ How payrents ku kapi Jeezas egzampl? Maybi yu ku tel yu pikni weh yoo laik bowt kriyayshan, laik wan a yu fayvrit animal er plaant. Wen yu du dat, chrai eksplayn tu dehn weh ih ku teech dehn bowt Jehoava. Den yu ku aks yu pikni bowt fi dehn fayvrit animal er plaant. If yu taak bowt sohnting weh dehn laik, den dehn mait lisn eevn moa wen yu chrai teech dehn bowt Jehoava.

6. Weh wi ku laan fahn Christopher ma?

⁶ Yu tink payrents haftu spen wahn lata taim di risaach bowt kriyayshan fi teech dehn pikni bowt Jehoava? Noh reeli. Jeezas neva gi wahn lang eksplanayshan bowt how di berd dehn eet er how di lili dehn groa. Eevn if yu pikni laik laan deetaylz bowt kriyayshan, sohntaim jos wahn simpl lee koment ku stil help dehn andastan di lesn weh yu di chrai teech dehn bowt Jehoava. Noatis weh Christopher seh bowt weh ih ma yoostu tel ahn wen hihn da-mi wahn lee bwai: “Mai ma wuda jos shayr wahn shaat lee point fi help wi apreeshiayt kriyayshan. Fi egzampl, wen wi wuda deh kloas tu sohn big mongtin, shee wuda seh: ‘Luk pahn dehndeh big ahn priti mongtin! Jehoava amayzin, noh chroo?ʼ Er wen wi mi deh bai seesaid, ih wuda seh: ‘Si how schrang dehndeh wayv! Yu noh tink Gaad powaful?ʼ Simpl tingz laik dat mi reeli mek wi tink, ahn dehn mi toch wi haat.”

7. How yu ku teech yu pikni fi laan bowt Jehoava fahn kriyayshan?

⁷ Az yu pikni geh oalda, yu ku staat chrayn dehn fi tink moa bowt kriyayshan fi si weh ih ku teech dehn bowt Jehoava kwalitiz. Yu ku chooz fi taak bowt sohnting weh Jehoava mek an aks yu pikni, “Weh dis teech yu bowt Jehoava?” Yu mait bee sopraiz fi hyaa weh dehn ga fi seh.—Mach. 21:16.

8. Weh Izrelait payrents kuda mi du az dehn waak “pahn di road”?

⁸ Di Izrelait dehn mi fi teech dehn pikni bowt aala Jehoava koman dehn wen dehn di waak “pahn di road.” (Deut. 11:19) Wen dehn mi-di waak pahn di road eena Izrel, dehn kuda mi si wahn lata difrent animal, berd, ahn flowaz. Wen eech famili yoostu waak pahn di road, dehn kuda mi teech dehn pikni bowt di tingz weh Jehoava mek. Payrents tudeh ku aalso yooz kriyayshan fi teech dehn pikni bowt Jehoava wen dehn spen taim tugeda az wahn famili. Mek wi luk pahn di egzampl a sohn payrents weh mi du dat.

9. Weh wi ku laan fahn Punitha ahn Katya egzampl?

⁹ Wahn ma weh naym Punitha, weh liv da wahn big siti da India, seh: “Wen wi vizit wi famili da di konchrisaid, wi yooz  da taim fi teech wi pikni bowt Jehoava amayzin kriyayshan. Ai feel laik mi pikni apreeshiayt kriyayshan beta wen dehn noh deh eena wahn siti weh ful op a peepl ahn chrafik.” Yu pikni wahn neva ferget di taim yu spen wid dehn eena wahn byootiful plays. Kayta, wahn sista fahn Moldova, seh: “Weh Ah ku memba di moas fahn wen Ai da-mi wahn pikni da wen Ah mi spen taim wid mi payrents bai di konchrisaid. Ah hapi dat mi payrents teech mi fahn smaal fi tek di taim fi luk pahn kriyayshan fi laan bowt Jehoava.”

10. How payrents ku teech dehn pikni bowt kriyayshan eevn if dehn liv da wahn siti ahn kyaahn chravl? (Koment pahn di baks “ Help fi Payrents.”)

¹⁰ Wat if wi liv eena wahn siti ahn wi kyaahn chravl? Amol, wahn brada fahn India, seh: “Wehpaat Ai liv, payrents haftu werk aal day. Ahn wahn chrip owta di siti wuda bee reeli ekspensiv. Bot yu ku stil geh wahn chaans fi luk pahn kriyayshan ahn taak bowt Jehoava kwalitiz da wahn smaal paak er pahn yu rooftap.” If yu reeli tek taim fi luk rong yu, yu mait fain owt dat dehn stil ga lata tingz weh yu ku shoa yu pikni. (Ps. 104:24) Yu wuda praabli si sohn berd, insek, plaant, ahn lat moa tingz. Karina, fahn Germany, seh: “Mai ma lov flowaz, soh wen Ai mi smaal, shee wuda shoa mi aal di priti flowaz weh shee si wen wi di waak tugeda.” Payrents ku yooz di difrent poblikayshan ahn veedyo dehn weh di aaganaizayshan ga fi teech dehn chiljren. Noh mata wehpaat yu liv, yu ku teech yu pikni fi laan fahn di tingz weh Gaad mek. Now mek wi luk pahn som a Jehoava kwalitiz weh yu pikni ku laan fahn kriyayshan.

11. How payrents ku help dehn pikni fi si humoch Jehoava lov dehn?

¹¹ Fi help yu pikni dehn si dat Jehoava da wahn lovin Gaad, mek dehn luk pahn how difrent animalz tek kayr a dehn baybi. (Mach. 23:37) Yu ku aalso taak bowt aal di difrent tingz weh Jehoava mek. Karina, weh wi taak bowt erliya, seh: “Wen mee ahn mi ma wuda goh owt fi wahn waak, shee wuda tel mi fi stap ahn luk pahn how eech flowa difrent ahn how dehn shoa wi dat Jehoava lov wi. Eevn now Ah stil tek taim fi admaiya di flowaz ahn si how dehn difrent fahn eech ada. Enitaim Ah si eni flowaz, ih aalwayz rimain mi humoch Jehoava lov mi.”

12. How payrents ku help dehn chiljren laan dat Jehoava da wahn waiz Gaad? (Psalm 139:14) (Koment pahn di picha.)

¹² Payrents ku help dehn pikni laan bowt Jehoava wizdom. Nobadi els waiza dan Jehoava. (Roam. 11:33) Fi egzampl, yu ku tel yu pikni bowt how Jehoava mek di waata ton intu sohn klowd weh moov fahn wan plays tu di neks. (Job 38:36, 37) Yu ku aalso teech dehn bowt di amayzin way how Jehoava kriyayt wi badi. (Reed Psalm 139:14.) b Mek wi luk pahn how wahn pa weh naym Vladimir mi du dat. Hihn seh: “Wan day wi lee son jrap aafa ih baik an ih mi hert ihself. Ih mi onli tek sohn dayz fi heel op. Mee ahn mi waif mi eksplayn tu ahn dat Jehoava mek wi badi eena wahn amayzin way bikaaz ih ku heel pan ih oan. Wi mi tel ahn dat dis kyaahn hapm wid di tingz weh peepl mek. Fi egzampl, if wahn kaar krash, ih kyaahn fiks ihself. Weh hapm tu wi lee son mi help ahn andastan dat Jehoava waiz.”

13. How payrents ku help dehn chiljren laan bowt Jehoava powa? (Isaiah 40:26)

¹³ Jehoava aks aala wi fi tek taim fi luk pahn di skai ahn tink bowt how Ih hoal op di staarz wid ih amayzin powa. (Reed Isaiah 40:26.) c Az payrents, yu ku inkorij  yu pikni fi luk op pahn di skai ahn tink bowt Jehoava powa. Dis da weh wahn sista fahn Taiwan weh naym Tingting seh: “Wahn taim, mi ma kehr mi fi kyamp owt, ahn wi mi deh faar fahn di siti soh wi kuda mi si di byootiful skai ful a staarz. Rong da taim deh, Ah mi-di wori dat Ah wahn kyaahn kantinyu stay faytful tu Jehoava bikaaz mai klaasmayt dehn mi-di chrai haad fi mek Ah noh obay Jehoava. Bot mi ma inkorij mi fi tink bowt di powa Jehoava yooz fi mek aala di staarz ahn fi memba dat hihn ku yooz da saym powa fi help mi stay faytful. Afta Ah mi geh fi si Jehoava kriyayshan pahn da chrip, Ah mi waahn geh fi noa Jehoava beta, an Ah mi mek op mi main fi kantinyu serv ahn.”

14. How payrents ku yooz kriyayshan fi help dehn pikni si dat Jehoava da wahn hapi Gaad?

¹⁴ Evriting weh Jehoava mek shoa dat hihn da wahn hapi Gaad ahn hihn waahn mek wee bee hapi tu. Sohn saiyentis noatis dat moas animalz play monks eech ada; dis inklood di berd ahn di fish dehn. (Job 40:20) Yoo eva si yu pikni di laaf wen dehn si animalz di play? Maybi dehn si wahn lee kyat di play wid ih tayl er dehn si too lee popi di play tugeda. Neks taim yu kech yu pikni di laaf aata di foni tingz weh animalz du, yu noh tink da wahn gud chaans fi rimain dehn dat dehn di serv wahn hapi Gaad?—1 Tim. 1:11.

15. Weh payrents ku du fi fain owt weh dehn chiljren di tink bowt? (Proverbs 20:5) (Koment pahn di picha.)

¹⁵ Sohntaim, payrents fain it haad fi mek dehn chiljren taak bowt di prablemz weh dehn di goh chroo. If dis da sohnting weh yoo di goh chroo, maybi yu need fi fain wahn way fi mek yu pikni taak tu yu. (Reed Proverbs 20:5.) d Sohn payrents fain it eeziya fi taak tu dehn chiljren  wen dehn di injai kriyayshan tugeda. Wai dehn seh dat? Bikaaz dehn noh ga soh moch dischrakshan wen dehn deh owt deh tugeda. Wahn pa fahn Taiwan weh naym Masahiko tel wi wahn nada reezn: “Wen mee ahn mi waif spen taim wid wi pikni di waak bai di seesaid er di haik sohn mongtin, evribadi yoozhwali hapi. Dis alow wi fi taak tu dehn ahn si weh deh pahn dehn main.” Katya, weh wi mi menshan erliya, seh: “Afta skool mi ma wuda kehr mi da wahn byootiful paak. Sins ih mi peesful, Ah mi komfatabl fi tel ahn weh hapm tu mi da day da skool er weh Ah di wori bowt.”

16. How wahn famili ku injai evriting weh Jehoava mek?

¹⁶ Di tingz weh Jehoava mek gi eech famili wahn chaans fi kohn tugeda an injai dehnself, ahn dis mek dehn lov eech ada eevn moa. Di Baibl seh dat dehn ga “wahn taim fi laaf” ahn “wahn taim fi daans.” (Eccl. 3:1, 4) Jehoava mek sohn byootiful plays wehpaat wi ku ga fon. Lata famili laik spen taim bai di rivasaid, seesaid, waatafaal, er bai wahn mongtin. Sohn pikni lov fi ron ahn play da wahn paak, wach animalz, er swim da wahn riva, lagoon, er see. Dehn ga lata wayz how wi ku injai Jehoava kriyayshan!

17. Wai payrents shuda help dehn pikni injai Jehoava kriyayshan?

¹⁷ Eena di nyoo werl, payrents ahn dehn pikni wahn ku injai Jehoava kriyayshan moa dan eva bifoa. Wi noh wahn haftu frayd fi di animalz, ner di animalz wahn haftu frayd fi wee. (Isa. 11:6-9) Wi wahn injai di tingz weh Jehoava kriyayt fareva. (Ps. 22:26) Soh payrents, chrai fi inkorij yu pikni fi injai ahn laan fahn Jehoava kriyayshan. If yu yooz di tingz weh Jehoava kriyayt fi teech yu pikni bowt ahn, den fi shoar dehn wahn feel laik how King Dayvid mi feel wen ih seh: “Oa Jehoava, nobadi kyaahn du weh yoo ku du.”—Ps. 86:8.