Jeezas mi haftu pay di ransom sakrifais wid fi hihn laif fi mek wee kuda geh fergivnis fi wi sin dehn. (Ifee. 1:7) Bot stilyet, di Baibl seh dat “Gaad . . . mi fergiv peepl sin eena di paas” bifoa Jeezas mi pay di ransom sakrifais. (Roam. 3:25) How Jehoava jostis mi stil perfek eevn doa hihn mi fergiv peepl sinz bifoa Jeezas mi pay di ransom sakrifais?

Jehoava mi pramis dat hihn wahn sayv enibadi weh ga fayt eena hihn an ih pramis dehn chroo wan a Eev “disendant.” Tu hihn, dis pramis mi az gud az don fahn di minit hihn mi seh it. (Jen. 3:15; 22:18) Jehoava mi shoar dat wen di taim kohn, fi hihn preshos Son mi wahn wilin fi aafa ihself fi pay di ransom sakrifais. (Gal. 4:4; Heeb. 10:​7-10) Wail Jeezas mi deh pahn ert, Jehoava mi giv ahn di rait fi fergiv peepl sinz eevn doa hihn neva ded ahn pay di ransom yet. Hihn kuda mi fergiv peepl weh shoa fayt bikaaz hihn mi noa dat wen hihn sakrifais ih laif, dat mi wahn kova fi dehn sinz.—Mach. 9:​2-6.