1. How som a Jehoava servants mait feel?

 DI BAIBL seh: “Jehoava hapi wid fi hihn peepl.” (Ps. 149:4) Dat mek wi feel gud, noh chroo? Bot som a wi mait geh diskorij an eevn wanda, ‘Jehoava reeli hapi wid mee?ʼ Eena Baibl taimz, som a Jehoava faytful servants mi haftu fait feelinz laik dat.—1 Sam. 1:​6-10; Joab 29:​2, 4; Ps. 51:11.

2. Weh wi haftu du fi mek Jehoava hapi wid wi?

² Di Baibl tel wi dat aldoa wi noh perfek, wi ku mek Jehoava hapi. How dat pasabl? Wi need fi put fayt eena Jeezas ahn geh baptaiz. (Jan 3:16) Ahn dat wahn shoa evribadi dat wi reeli sari fi wi sinz ahn dat wi pramis Jehoava dat wi wahn du weh hihn waahn ahn noh weh wee waahn. (Aks 2:38; 3:19) Jehoava wahn hapi if wi tek dehnya steps fi ga wahn rilayshanship wid ahn. Az lang az wee kip di du wi bes fi du weh hihn waahn, hihn wahn hapi wid wi. Hihn wahn si wi az ih fren.—Ps. 25:14.

3. Weh wi wahn diskos eena dis aatikl?

³ Wai som a wi feel laik Jehoava noh hapi wid wi? How Jehoava shoa wi dat ih hapi wid wi? Ahn how  wahn Kristyan ku bee shoar dat Jehoava hapi wid ahn?

WAI SOM A WI FEEL LAIK JEHOAVA NOH HAPI WID WI?

4-5. Aldoa wi mait feel bad bowt wiself, how Jehoava feel bowt wi?

⁴ Fahn smaal, som a wi feel laik wi noh wert notn. (Ps. 88:15) Wahn brada weh naym Adrián mi aalwayz feel bad bowt ihself. Hihn seh: “Ai mi aalwayz pray dat mi famili mek it tu Paradais, bot Ai mi shoar dat Ai noh bilangz deh.” Wahn nada egzampl da wahn brada weh naym Tony. Fi hihn payrents neva serv Jehoava. Hihn seh: “Mi payrents neva tel mi dat dehn lov mi er dat dehn prowd a mi. Dis mi mek Ah feel laik Ah neva gud inof.”

⁵ Sohntaim wi mait feel laik wi noh wert notn. Bot ih impoatant fi memba dat Jehoava fain wahn way fi jraa eech wan a wi kloas tu hihn. (Jan 6:44) Hihn si di gud eena wee. Jehoava noa wee beta dan wee noa wi oanself. (1 Sam. 16:7; 2 Chron. 6:30) Soh wee ku chros Jehoava wen ih seh dat wee preshos tu hihn.—1 Jan 3:​19, 20.

6. How di apasl Paal mi feel bowt di sinz weh ih mi du eena di paas?

⁶ Som a wi mi du sohn bad tingz bifoa wi mi kom eena di chroot. Sayka dat, wi mait stil feel gilti sohntaim. (1 Peet. 4:3) Eevn if wi di serv Jehoava fi yaaz, wi stil haftu fait gens wi weeknis dehn. Yoo feel da way? Yu da noh di onli wan weh feel laik dat. Tek, fi egzampl, di apasl Paal. Hihn mi feel mizarabl bikaaz ih neva perfek. (Roam. 7:24) Eevn doa hihn mi ripent fan ih sin dehn ahn geh baptaiz, hihn mi stil seh dat hihn “da di lees wan owta aala di apasl dehn” ahn “di wers” sina.—1 Kor. 15:9; 1 Tim. 1:15.

7. Weh wi need fi memba bowt di sinz weh wi komit eena di paas?

⁷ Wi Pa, Jehoava, pramis fi fergiv wi if wi ripent. (Ps. 86:5) If wee reeli sari fi weh wi mi du, wi ku chros dat wen Jehoava seh ih fergiv wi, ih reeli meen it fi chroo!—Kol. 2:13.

8-9. Weh ku help wi fi stap feel laik Jehoava noh hapi wid humoch wi du far ahn?

⁸ Aala wi waahn du moa fi serv Jehoava. Bot som a wi mait feel laik wateva wi du fi Jehoava noh inof. Wahn sista weh naym Amanda seh: “Ah feel laik fi gi Jehoava mi bes meenz dat Ah aalwayz haftu du moa fi ahn. Soh Ah aalwayz du moa dan weh Ah ku du. Wen tingz noh werk owt, Ah wuda geh beks wid miself ahn feel laik Jehoava feel di saym way.”

⁹ Weh ku help wi fi stap feel laik Jehoava noh hapi wid humoch wi du far ahn? Memba dat Jehoava noh schrik wid wi. Hihn noh ekspek moa dan weh wi ku giv ahn. Hihn apreeshiayt wateva wi ku du far ahn. Ih jos waahn wi du wi bes. Tink bowt faytful servants eena di Baibl weh mi serv Jehoava wid dehn hoal haat. Tek, fi egzampl, Paal. Fi lata yaaz, hihn mi werk haad. Hihn mi chravl wahn lata mailz di set op lata kangrigayshan. Bot laytaraan, ih sichuwayshan mi chaynj an ih kudn du weh ih yoostu du. Yu tink Jehoava neva hapi wid weh ih kuda mi du afta dat? No. Paal mi kantinyu du weh ih kud, ahn Jehoava mi bles ahn far it. (Aks 28:​30, 31) Saym way soh, humoch wee ku du fi  Jehoava mait chaynj fahn taim tu taim. Bot weh moa impoatant tu Jehoava da wai wi du weh wi du. Now mek wi taak bowt sohn wayz how Jehoava shoa wi dat ih hapi wid wi.

HOW JEHOAVA SHOA WI DAT IH HAPI WID WI?

10. How Jehoava mek wi noa dat ih hapi wid wi? (Jan 16:27)

¹⁰ Hihn gi wi di Baibl. Jehoava luk fi wayz fi shoa ih servants humoch ih lov dehn, an ih mek dehn noa dat hihn hapi wid dehn. Eena di Baibl, too difrent taimz Jehoava tel Jeezas dat ih lov ahn an dat ih pleez wid ahn. (Mach. 3:17; 17:5) Yoo wuda waahn Jehoava tel yu dat ih lov yu an ih hapi wid yu? Wi noh wahn hyaa Jehoava di taak tu wi fahn hevn, bot ih taak tu wi chroo di Baibl. Wen wi reed bowt how Jeezas mi taak tu ih disaiplz, da laik if Jehoava di taak tu wi. (Reed Jan 16:27.) Jeezas da jos laik ih Pa. Jeezas falowaz neva perfek. Stilyet, Jeezas mi tel dehn dat ih hapi wid dehn. Dat help wi fi si how Jehoava wuda taak tu wee.—Jan 15:​9, 15.

11. Wen wi goh chroo haad taimz, yu tink dat meen Jehoava noh hapi wid wi? Pleez eksplayn yu ansa. (Jaymz 1:12)

¹¹ Hihn gi wi weh wi need. Jehoava reeli waahn help wi. Fi egzampl, ih help wi wid di mateeryal tingz wi need. Sohntaim, doh, Jehoava alow wi fi goh chroo haad taimz, laik weh ih mi du wid Joab. (Joab 1:​8-11) Bot wen wi fays dehnya prablemz, ih noh meen dat Jehoava noh hapi wid wi. Wen wee goh chroo wahn haad taim, da wahn chaans fi shoa how deep wi lov fi Jehoava ahn humoch wi chros ahn. (Reed Jaymz 1:12.) Joorin dehndeh haad taimz, wi geh fi feel humoch Jehoava lov wi ahn wi geh fi si how ih help wi bayr op.

12. Weh wi ku laan fahn Dmitrii egzampl?

¹² Mek wi luk pahn di egzampl a Brada Dmitrii, weh liv da Asia. Hihn mi looz ih jab, ahn fi monts ih neva fain no ada jab. Soh ih mi disaid fi chros Jehoava ahn du moa eena di minischri. Monts paas, an ih stil kudn fain wahn jab. Afta wahn wail, ih geh sik tu di point weh ih mi haftu stay eena bed.  Hihn mi staat tu feel laik hihn da neva wahn gud hozban er pa, an ih mi-di wanda if Jehoava hapi wid ahn. Wahn eevnin ih daata mi print owt Isaiah 30:15 far ahn. Da skripcha seh: “Yu wahn bee powaful if yu stay kaam ahn chros Gaad.” Den shee tel ahn: “Dadi, wen yu feel bad, memba dis skripcha.” Dmitrii riyalaiz dat, tanks tu Jehoava, ih mi stil ga inof food, wahn plays fi liv, ahn kloaz fi wayr. Hihn seh: “Ah mi need fi stay kaam ahn kantinyu fi chros mi Gaad.” Weh wee laan fahn fi hihn egzampl? If yoo di goh chroo sohnting laik dat, yu ku chros dat Jehoava wahn help yu.

13. Hoo Jehoava ku yooz fi help wi si dat ih hapi wid wi, ahn how hihn du dat?

¹³ Hihn gi wi bradaz ahn sistaz. Hihn yooz wi bradaz ahn sistaz fi help wi fi si dat hihn hapi wid wee. How dat pasabl? Wi bradaz ku help wi wid weh wi need fi hyaa da di karek taim. Tek, fi egzampl, wahn sista fahn Asia. Shee mi looz ih jab, den ih mi geh sik bad. Pahn tap a dat, ih hozban mi komit wahn seeryos sin an en op di looz ih privilij fi serv az wahn elda. Shee seh: “Ai neva andastan wai dis hapm. Ai du sohnting rang? Jehoava noh hapi wid mi nohmoh?” How Jehoava mi help wi sista? Di eldaz eena ih kangrigayshan mi inkorij ahn, an dehn help ahn fi si humoch Jehoava lov ahn. Laytaraan, shee mi pray agen an aks Jehoava fi help. Shee seh: “Ah geh wahn leta fahn wahn groop a bradaz da saym day. Wen Ah mi reed weh dehn seh, Ah mi shoar dat Jehoava mi hyaa mi pryaa.” Yes, Jehoava ku  shoa dat ih hapi wid wi chroo wi bradaz ahn sistaz.—Ps. 10:17.

14. Wat da wahn nada way how Jehoava shoa wi dat ih hapi wid wi?

¹⁴ Wahn nada way Jehoava shoa wi dat ih hapi wid wi da wen ih yooz wi bradaz fi gi wi kongsl wen wi need it. Fi egzampl, Paal mi rait 14 letaz tu di kangrigayshan dehn eena di fers senchri. Eena dehndeh letaz, hihn mi giv ih bradaz ahn sistaz schrang bot lovin kongsl. Wai Jehoava mi mek Paal du dis? Jehoava da wahn lovin Pa, ahn hihn disiplin “dehn wan weh ih lov.” (Prov. 3:​11, 12) Wat if wee geh kongsl? Wi waahn seeʼt laik if Jehoava di tel wi dat hihn hapi wid wi. (Heeb. 12:6) Now mek wi kansida sohn ada wayz how Jehoava shoa wi dat ih hapi wid wi.

WAT DA SOHN ADA WAYZ JEHOAVA SHOA WI DAT IH HAPI WID WI?

15. Hoo Jehoava giv ih hoali spirit tu, ahn how dis ku help wi chros dat hihn hapi wid wi?

¹⁵ Jehoava gi wi ih hoali spirit, ahn dis shoa wi dat ih hapi wid wi. (Mach. 12:18) Wee ku aks wiself dehnya kweschan: ‘Ai shoa di froot weh di spirit bayr eena mai laif? Sins Ai geh fi noa Jehoava, Ai da wahn moa payshent persn?ʼ Akchwali, di moa wi shoa di froot weh di spirit bayr, di moa wi wahn feel laik Jehoava hapi wid wi!—Moa infamayshan deh eena di baks weh naym “ Di Froot Weh di Hoali Spirit Bayr Da . . .”

16. Hoo Jehoava yooz fi preech di gud nyooz, ahn how dat mek yoo feel? (1 Tesaloanyanz 2:4)

¹⁶ Hoo Jehoava yooz fi preech di gud nyooz? Jehoava yooz dehn wan weh ih hapi wid. (Reed 1 Tesaloanyanz 2:4.) Jocelyn, hoo da-mi wahn painyaa, mi benifit wen ih mi preech. Noatis fi shee egzampl. Wan day, shee mi feel dipres. Shee mi feel laik ih jos mi-di jreg ihself fi goh owt pahn feel servis. Bot ih mi pray, an ih mi stil gaahn preech. Shee mi meet wahn laydi weh naym Mary. Di laydi mi kain an ih mi aksep wahn Baibl stodi. Monts layta, Mary tel ahn: “Ah mi-di pray fi mek Gaad help mi wen yoo nak pahn di doa.” Jocelyn seh, “Ah mi feel laik Jehoava mi-di tel mi, ‘Ai  hapi wid yoo.ʼ” Da chroo, noh evribadi waahn hyaa weh wi ga fi seh wen wi goh preech. Bot wee ku bee shoar dat ih hapi wen wi du wi bes fi preech tu peepl.

17. Weh yoo laan fahn weh Vicky seh bowt di ransom? (Psalm 5:12)

¹⁷ Jehoava ku fergiv peepl fi dehn sinz bikaaz a di ransom. (1 Tim. 2:​5, 6) Hihn onli du dat fi peepl weh hihn hapi wid. Wee ku ga fayt eena di ransom ahn don geh baptaiz, bot wat if eena wi haat wi stil feel dat Jehoava noh hapi wid wi? Wi haftu memba dat wi kyaahn chros wi oan feelinz, bot wi kud chros Jehoava. If wi ga fayt eena di ransom, Jehoava wahn aksep wi az sombadi raichos, an ih pramis fi bles wi tu. (Reed Psalm 5:12; Roam. 3:26) Soh wi waahn meditayt pahn di ransom ahn si how ih help wi. Ahn dis da weh mi help Vicky. Wan day, afta shee mi-di meditayt pahn di ransom, shee seh: “Jehoava payshent wid mee fi wahn lang taim. . . . Bot da laik if Ai mi-di tel Jehoava: ‘Yu lov noh inof fi mee. Yu Son sakrifais noh inof fi mee needa.ʼ” Bot wen shee meditayt pahn di ransom, shee mi staat tu feel Jehoava lov. Wen wi tink bowt dis preshos gif laik Vicky, wi wahn feel Jehoava lov ahn chros dat hihn hapi wid wi.

18. If wi stay kloas tu Jehoava, weh wi ku bee shoar a?

¹⁸ Aldoa wi mait meditayt pahn di ransom, wi mait stil feel diskorij ahn feel laik Jehoava noh hapi wid wi. Bot wen dat hapm, wi need fi memba dat Jehoava hapi wid dehn wan “weh kantinyu fi lov ahn.” (Jay. 1:12) Soh stay kloas tu Jehoava. Lukowt fi wayz how Jehoava di shoa yu dat ih lov yu ahn dat ih hapi wid yu. Aalwayz memba dat Jehoava “noh deh faar fahn eech wan a wi.”—Aks 17:27.