1-2. (a) Wat da-mi di sichuwayshan wen Paal mi rait di leta tu di bradaz da Efisos? (b) Weh kweschanz wi wahn ansa eena dis aatikl?

 PAAL da-mi wahn prizna eena ih hows da Roam. Soh hihn mi rait letaz fi inkorij di bradaz bikaaz hihn kudn goh si dehn. Ahn rong 60 er 61 C.E., hihn mi rait wahn leta tu di bradaz da Efisos.—Ifee. 1:1; 4:1.

² Bowt 10 yaaz bifoa Paal mi rait da leta, hihn mi spen wahn lata taim da Efisos di preech ahn teech deh. (Aks 19:​1, 8-10; 20:​20, 21) Hihn mi reeli lov di bradaz ahn sistaz wahn lat, an ih mi waahn help dehn fi kip faytful tu Jehoava. Bot wai Paal mi tel di anointid Kristyanz wahn iloschrayshan bowt daaknis ahn lait? Weh wi ku laan fahn di kongsl weh hihn gi dehn? Mek wi fain owt di ansa tu dehndeh kweschanz.

FAHN DAAKNIS TU LAIT

3. Weh iloschrayshan Paal mi yooz eena ih leta tu di bradaz da Efisos?

³ Eena Paal leta weh ih mi rait tu di bradaz da Efisos, hihn seh: “Unu yoostu deh eena daaknis, bot now unu deh eena di lait.” (Ifee. 5:8) Rait yasoh, Paal mi yooz di iloschrayshan bowt daaknis ahn lait fi shoa humoch chaynjiz di bradaz da Efisos mi mek fi serv Jehoava. Now mek wi taak bowt wai Paal mi tel di bradaz dat dehn “yoostu deh eena daaknis.”

4. Eena weh way di peepl da Efisos mi deh eena daaknis?

 ⁴ Faals rilijan. Bifoa di bradaz da Efisos mi laan di chroot, dehn yoostu fala paygan teechinz ahn bileev eena majik. Efisos da-mi wehpaat di templ fi di faals gaad Artimis mi deh, ahn wahn lata peepl yoostu wership dis gaad. Di peepl mi mek aidolz a Artimis an Artimis templ bikaaz dehn mek wahn lata moni aafa it. (Aks 19:​23-27) Lata peepl deh yoostu praktis majik, tu.—Aks 19:19.

5. Wai wi ku seh dat di peepl da Efisos mi ga loa moaral standadz?

⁵ Loa moaral standadz. Di peepl da Efisos mi imoaral ahn goh aan brayzn. How wi noa? Joorin di difrent shoa dehn da di tayta er dehn rilijos selibrayshanz, evriting da-mi bowt seks. (Ifee. 5:3) Ahn lata peepl da Efisos neva feel “no shaym bowt weh dehn du.” Dis frayz kohn fahn wahn Greek werd weh meen dehn “noh feel nohmoh payn” eena dehn haat wen dehn du sohnting rang. (Ifee. 4:​17-19) Di tingz weh dehn yoostu du bifoa dehn mi laan bowt Jehoava neva bada dehn kanshans. Dehn neva kay bowt how Jehoava feel bowt weh dehn du. Dats wai Paal mi seh dat “dehn main deh eena daaknis ahn dehn stay separayt fahn di laif weh bilangz tu Gaad.”

6. Wai Paal kuda mi seh dat di Kristyanz da Efisos mi deh “eena di lait”?

⁶ Som a di peepl da Efisos mi kom owta da daaknis. Soh Paal mi tel dehn: “Now unu deh eena di lait bikaaz unu bilangz tu di Laad.” (Ifee. 5:8) Wen dehn mi chooz fi staat obay Jehoava, da laik if dehn mi-di waak eena lait bikaaz dehn mi-di alow Hihn fi gaid dehn. (Ps. 119:105) Som a di peepl da Efisos mi stap dehn paygan praktis ahn neva kantinyu du tingz weh Jehoava hayt. Insted, dehn mi “chrai fi bee laik Gaad.” (Ifee. 5:1) Dehn mi du dehn bes fi wership Jehoava di karek way ahn fi mek ahn hapi.

7. How fi wee sichuwayshan simila tu di sichuwayshan weh lata di Kristyanz da Efisos mi deh eena?

 ⁷ Saym way soh, bifoa wee mi laan di chroot, wi mi deh eena daaknis. Ih ku bee dat wi mi deh eena faals rilijan er ga loa moaral standadz. Maybi wi mi-di selibrayt halidayz weh di Baibl noh gree wid, er wi mi-di du ada tingz weh Jehoava noh pleez wid. Bot wans wi mi laan bowt Jehoava standadz a weh rait ahn rang, wi mi chaynj ahn staat tu liv akaadn tu Jehoava raichos standadz. Wi geh lata blesinz sayka dat. (Isa. 48:17) Bot stil wi fays lata chalenjiz. Wi need fi “kantinyu fi liv laik chiljren a di lait” ahn stay owta di daaknis. Bot how wi ku du dat?

STAY OWTA DAAKNIS

8. Bays pahn Ifeezhanz 5:​3-5, weh di Kristyanz da Efisos mi need fi rijek?

⁸ Reed Ifeezhanz 5:​3-5. Fi mek di Kristyanz da Efisos noh goh bak tu daaknis, dehn mi need fi kantinyu rijek eniting weh wuda hert Jehoava. Dat meenz dehn mi haftu kip weh fahn eni kaina sin weh ga fi du wid seks. Pahn tap a dat, dehn neva fi taak naansens ner tel doti joaks needa. Paal mi rimain dehn dat dehn mi need fi kip weh fahn dehndeh tingz if dehn mi waahn “inherit di Kingdom a Krais ahn Gaad.”

9. Wai wi need fi bee kyaaful fi noh get involv eena eniting weh ga fi du wid sekshwal imoraliti?

⁹ Eevn Kristyanz tudeh need fi fait fi kip weh fahn “di wotlis tingz weh peepl weh bilangz tu di daaknis du.” (Ifee. 5:11) Di moa wi luk pan, lisn tu, ahn taak bowt tingz weh noh kleen, di eeziya ih wahn bee fi en op di du sohnting weh hert Jehoava. (Jen. 3:6; Jay. 1:​14, 15) Da wahn konchri, wahn groop a bradaz mi “fren” wan anada eena wahn groop chat pahn di Intanet. Fers, dehn mi yoostu taak bowt spirichwal tingz, bot oava taim di kanvasayshan chaynj til dehn mi-di taak bowt loan seks. Som a dehn seh dat bikaaz a weh dehn mi-di taak bowt eena di chat, dehn mi en op di komit sekshwal imoraliti.

10. How Saytan chrai chrik wi? (Ifeezhanz 5:6)

¹⁰ Saytan waahn chrik wi fi bileev dat notn rang wid di tingz weh Jehoava seh imoaral er doti. (2 Peet. 2:19) Tudeh, Saytan yooz wahn chrik weh ih di yooz fahn way bak. Ih chrai kanfyooz peepl soh dat dehn noh andastan weh rait er weh rang. (Isa. 5:20; 2 Kor. 4:4) Dis da wai difrent moovi, TV proagram, er websait gat een lata tingz weh goh gens Jehoava hai moaral standadz. Saytan waahn chrik wi fi mek wi tink dat sekshwal imoraliti naamal, dat wi shuda injai it an ih noh wahn hert wi.—Reed Ifeezhanz 5:6.

11. How Angela ekspeeryens help wi fi si dat wi need fi fala di waiz kongsl da Ifeezhanz 5:7? (Koment pahn di picha.)

¹¹ Saytan waahn wi kip rong peepl weh noh fala Jehoava hai standadz, kaaz dis wuda mek it haad fi mek wi fala dehndeh standadz. Paal mi tel di bradaz da Efisos: “Unu noh fi ga notn fi du wid dehn.” (Ifee. 5:7) Hihn mi-di taak bowt peepl weh rijek Jehoava standadz. Wi haftu memba dat wi noh onli spen taim wid peepl wen wi deh fays-tu-fays wid dehn. Wi spen taim wid dehn pahn di Intanet tu, fi egzampl, pahn soashal meedya. Dis da  sohnting weh di Ifeezhanz neva haftu fays. Angela, a wahn sista weh liv da Asia, mi si how daynjaros soashal meedya ku bee. Shee seh: “Lee bit bai lee bit, Ah staat tu ga frenz weh noh rispek Baibl prinsiplz. Soon, Ah staat tu feel laik notn rang wid du tingz weh noh mach Jehoava standadz.” Gud ting di eldaz mi help Angela fi mek di chaynjiz weh ih mi need fi mek. Angela seh: “Now Ah ful op mi main wid spirichwal tingz insteda wid soashal meedya.”

12. Weh wahn help wi fi stik tu Jehoava hai standadz?

¹² Wi waahn kantinyu fait gens di way di werl tink bowt Jehoava hai standadz bikaaz wi noa dat dehn rang. (Ifee. 4:​19, 20) Ih impoatant fi aks wiself: ‘Ai spen tu moch taim wid peepl da werk, peepl da skool, er enibadi els weh noh rispek Jehoava standadz? Ai stan op fi weh rait eevn doa peepl noh laik mi sayka weh Ai bileev eena?ʼ Laik weh 2 Timoti 2:​20-22 seh, eevn eena di kangrigayshan wi need fi bee kyaaful hoo wi chooz fi bee wi frenz. Wai? Bikaaz som a dehn mait noh help wi fi waahn kantinyu serv Jehoava.

“KANTINYU FI LIV LAIK CHILJREN A DI LAIT”

13. Weh ih meen fi “kantinyu fi liv laik chiljren a di lait”? (Ifeezhanz 5:​7-9)

¹³ Paal neva onli inkorij di Kristyanz da Efisos fi stay weh fahn di daaknis. Ih mi tel dehn fi “kantinyu fi liv laik chiljren a di lait” tu. (Reed Ifeezhanz 5:​7-9.) Bot weh dat meen? Ih meen dat wi need fi bee Kristyanz aal di taim. How wi ku du dis? Wan way wi ku du dat da wen wi ga wahn regyula skejul fi reed wi Baibl ahn wi poblikayshan dehn. Pahn tap a dat, ih reeli impoatant fi mek wi stodi Jeezas egzampl ahn di tingz weh hihn mi teech, bikaaz hihn da-mi “wahn lait fi di werl.”—Jan 8:12; Prov. 6:23.

14. How hoali spirit ku help wi?

 ¹⁴ Wi aalso need Gaad hoali spirit fi help wi kantinyu bihayv laik “chiljren a di lait.” Wai? Bikaaz wi ga wahn kanstant fait fi mek wi stay kleen eena dis werl weh ful a imoraliti. (1 Tes. 4:​3-5, 7, 8) Bot Gaad hoali spirit ku help wi fi noh tink laik peepl eena dis werl, kaaz dehn noh tink di way how Jehoava tink. Hoali spirit wahn help wi fi du “evriting weh gud ahn raichos.”—Ifee. 5:9.

15. How wi ku geh hoali spirit? (Ifeezhanz 5:​19, 20)

¹⁵ Wan way wi ku geh hoali spirit da wen wi pray tu Jehoava. Jeezas mi seh dat Jehoava redi fi “gi hoali spirit tu di wan dehn weh di aks far it.” (Look 11:13) Wahn nada way how wi geh hoali spirit da wen wi wership Jehoava tugeda da meetin. (Reed Ifeezhanz 5:​19, 20.) Hoali spirit ku help wi liv eena wahn way weh mek Jehoava hapi.

16. Weh wahn help wi mek gud disizhanz? (Ifeezhanz 5:​10, 17)

¹⁶ Enitaim wi ga wahn impoatant disizhan fi mek, wi need fi fain owt “wat da Jehoava wil” ahn werk lang wid it. (Reed Ifeezhanz 5:​10, 17.) Wen wi luk fi wahn Baibl prinsipl weh ku help wi wid weh wi di fays, wi shoa dat wi waahn Jehoava help wi wid wi prablem. Wen wi yooz Baibl prinsiplz, wi wahn ku mek gud disizhanz.

17. Weh ih meen fi yooz wi taim eena di bes way? (Ifeezhanz 5:​15, 16) (Koment pahn di picha.)

¹⁷ Paal mi aalso kongsl di Kristyanz da Efisos fi yooz dehn taim eena di bes way. (Reed Ifeezhanz 5:​15, 16.) Saytan, “di wikid wan,” waahn kip wi soh bizi wid tingz a dis werl dat wi noh ga no taim fi Jehoava. (1 Jan 5:19) Ih eezi fi mek wi staat foakos moa pahn mateeryal tingz, ejukayshan, ahn wi jab dan fi serv Jehoava. Da chroo dat wi need  dehnya tingz, bot dehn noh fi tek fers plays eena wi laif. If dehnya tingz moa impoatant tu wee dan Jehoava, den wi wuda di tink laik peepl eena di werl. Fi liv laik “chiljren a di lait,” wi need fi foakos pahn weh reeli impoatant ahn “mek di bes yoos a [wi] taim.”

18. Weh Donald mi du fi yooz ih taim eena di bes way pasabl?

¹⁸ Lukowt fi wayz fi du moa fi Jehoava. Donald, wahn brada fahn South Africa, mi du dat. Hihn seh: “Ah mi pray tu Jehoava fi help mi du moa eena mi minischri. Ah aks ahn fi help mi fain wahn jab weh wuda gi mi moa taim fi preech. Tanks tu fi hihn help, mee ahn mi waif staat serv Jehoava ful taim.”

19. How wee ku kantinyu “liv laik chiljren a di lait”?

¹⁹ Paal leta tu di Kristyanz da Efisos mosi mi reeli help dehn fi stay faytful tu Jehoava. Ahn dis saym kongsl ku help wee tu. Ih ku help wi fi pik gud entataynment ahn gud frenz. Ih ku help wi fi stik tu wahn regyula Baibl stodi skejul weh wahn help wi foakos moa pahn spirichwal tingz. An ih rimain how di hoali spirit ku help wi ga gud kwalitiz. If wi fala Paal advais, wi wahn ku mek disizhanz weh wahn mek Jehoava hapi, ahn wi wahn ku rijek di daaknis a dis werl ahn stay eena di lait!