1-2. Weh sohnbadi need fi du bifoa ih geh baptaiz?

 MOA dan wahn milyan peepl mi geh baptaiz az Jehoava Witnisiz joorin di laas faiv yaaz. Wahn lata dehn mi laan di chroot wen dehn mi “smaal,” jos laik Timoti. (2 Tim. 3:​14, 15) Som a dehn mi laan di chroot wen dehn da-mi don adolts, an adaz mi laan it wen dehn mi moch oalda. Wahn wail bak, wahn laydi weh mi-di stodi di Baibl wid Jehoava Witnisiz mi geh baptaiz wen shee mi 97 yaaz oal.

² If yu di stodi di Baibl er yu payrents da Jehoava Witnisiz, yoo di tink bowt geh baptaiz? Dat da wahn gud goal! Bot bifoa yu geh baptaiz, yu wahn need fi dedikayt yu laif tu Jehoava. Dis aatikl wahn help yu andastan weh ih meen fi dedikayt yu laif tu Gaad. An if yu feel laik yu redi fi dedikayt yu laif tu Jehoava ahn geh baptaiz, dis aatikl wahn aalso help yu fi si wai yu noh need fi bee frayd fi du dat.

WEH IH MEEN FI DEDIKAYT YU LAIF TU JEHOAVA?

3. Gi sohn egzampl a peepl fahn Baibl taimz weh mi dedikaytid tu Jehoava.

³ Wen di Baibl taak bowt dedikayshan, ih meen dat sohnting er sohnbadi geh set wan said fi wahn speshal perpos. Di hoal nayshan a Izrel mi dedikaytid tu Jehoava. Bot som a di Izrelaits mi dedikaytid tu Hihn eena wahn speshal way. Fi egzampl, Jehoava mi mek Ayron serv az hai prees fi di nayshan a Izrel. Dat da wai hihn mi wayr wahn “shaini goal ban weh hoali” pahn di front a ih speshal hedrap. (Lev. 8:9) Ahn di Nazarait dehn mi dedikaytid tu Jehoava eena wahn speshal way tu. Di werd “Nazarait” kohn fahn di Heebroo werd nazir, weh meenz “Di Wan Weh Geh Set Wan Said” er “Di Wan Weh Dedikayt Ihself.”  Eena di Laa weh Gaad mi gi Moaziz, dehn ga sohn spesifik roolz weh di Nazarait dehn mi haftu fala.—Num. 6:​2-8.

4. (a) Wai wi ku seh dat dehn wan weh dedikayt dehn laif tu Jehoava set dehnself wan said fi wahn speshal perpos? (b) Weh ih meenz fi disoan yuself? (Koment pahn di picha.)

⁴ Wen yu dedikayt yu laif tu Jehoava, yu chooz fi bee wan a Jeezas disaipl ahn fi put Jehoava fers eena yu laif. Weh yu need fi du fi dedikayt yu laif tu Jehoava? Jeezas mi seh: “If enibadi waahn fala mi, ih haftu disoan ihself.” (Mach. 16:24) Di chranslayshan a di Greek frayz “ih haftu disoan ihself” ku aalso geh chranslaytid az “ih haftu tel ihself no.” Soh wahn Kristyan weh dedikayt ih laif tu Jehoava wahn haftu seh no tu tingz weh Jehoava noh pleez wid. (2 Kor. 5:​14, 15) Dis meenz dehn wahn haftu seh no tu tingz “weh dehn sinful badi waahn,” laik sekshwal imoraliti. (Gal. 5:​19-21; 1 Kor. 6:18) Yu tink yu laif wahn bee haada if yu obay Jehoava koman dehn? Af koars nat. Yu noh wahn feel da way wans yu lov Jehoava wid aala yu haat ahn yu kanvins dat fi hihn komanment dehn da fi yu oan gud. (Ps. 119:97; Isa. 48:​17, 18) Wahn brada weh naym Nicholas seh: “Yu ku eeda vyoo Jehoava standadz laik wahn prizn sel weh stap yu fahn du weh yu waahn, er laik wahn laiyan kayj weh protek yu fahn daynja.”

5. (a) How yu dedikayt yuself tu Jehoava? (b) Wat da di difrens bitween dedikayshan ahn baptizm? (Koment pahn di picha.)

⁵ How yu dedikayt yuself tu Jehoava? Eena wahn speshal pryaa, yu pramis Jehoava dat hihn da di onli wan weh yu wahn wership ahn dat yu wahn put ahn fers eena yu laif. Soh, yu pramis Jehoava dat yu wahn aalwayz lov ahn “wid yu  hoal haat ahn wid yu hoal soal ahn wid yu hoal main ahn wid yu hoal schrent.” (Maak 12:30) Wen yu dedikayt yu laif tu Jehoava, da bitween yoo ahn Jehoava. Sins da wahn praivit pryaa, nobadi noa wen yu dedikayt yuself tu ahn; bot baptizm difrent kaaz evribadi seeʼt ahn dat da how dehn noa dat yu don dedikayt yuself tu Jehoava. Yu dedikayshan da wahn seeryos pramis weh yu mek tu Jehoava, ahn hihn ekspek yu fi kip da pramis.—Eccl. 5:​4, 5.

WAI YU SHUDA WAAHN DEDIKAYT YU LAIF TU JEHOAVA?

6. Wat da di reezn wai wahn persn wuda dedikayt ih laif tu Jehoava?

⁶ Yu dedikayt yu laif tu Jehoava bikaaz yu lov ahn. Bot dis lov noh jos hapm laik dat. Insted, yu geh fi lov Jehoava moa ahn moa az yu laan moa bowt hihn ahn yu geh “kompleet nalij” an “andastandin a spirichwal tingz.” (Kol. 1:9) Bikaaz yu stodi di Baibl, yu geh fi andastan dat (1) Jehoava reel, (2) di Baibl kohn fahn hihn, ahn (3) dat hihn yooz ih aaganaizayshan fi mek ih wil kohn chroo.

7. Weh aal wahn persn need fi du bifoa ih dedikayt ih laif tu Jehoava?

⁷ Wi noh dedikayt wi laif tu Jehoava ahn geh baptaiz jos fi mek wi Baibl teecha ahn wi frenz hapi. Insted, wi du it bikaaz wi geh fi andastan weh di Baibl teech, ahn wi laan fi lov weh Hihn lov ahn hayt weh Hihn hayt. Soh bifoa wahn persn dedikayt ih laif tu Jehoava, ih haftu stodi ahn noa di baysik Baibl teechinz, liv ih laif di way Jehoava waahn, ahn du ih bes fi tel adaz bowt weh ih laan. (Mach. 28:​19,  20) If yu lov fi Jehoava kip di groa, yu wahn wership onli hihn, yu noh wahn waahn wership enibadi er eniting els. Dat da how yoo feel?

8. If yu tankful fi evriting weh Jehoava du fi yu, how dat wahn help yu fi dedikayt yu laif tu ahn? (Psalm 116:​12-14)

⁸ Wen yu tink bowt evriting weh Jehoava du fi yu, yu feel soh tankful dat yu kyaahn help bot waahn dedikayt yu laif tu ahn. (Reed Psalm 116:​12-14.) a Di Baibl seh dat “evri gud ahn perfek gif” kohn fahn Jehoava. (Jay. 1:17) Di moas preshos gif weh Jehoava gi wi da wen ih alow ih Son fi giv op ih laif az wahn ransom sakrifais. Tanks tu da sakrifais, ih pasabl fi mek wi bee frenz wid Jehoava ahn ga di privilij fi liv fareva. (1 Jan 4:​9, 10, 19) Soh wen yu dedikayt yu laif tu Jehoava, yu shoa humoch yu apreeshiayt da preshos gif lang wid aala di ada blesinz weh ih gi yu. (Deut. 16:17; 2 Kor. 5:15) Dat da weh di Injai Laif Fareva! buk taak bowt eena lesn 46 point 4. An ih aalso gat een wahn shaat veedyo weh naym Giv Yu Gif tu Gaad.

YOO REDI FI DEDIKAYT YU LAIF TU JEHOAVA AHN GEH BAPTAIZ?

9. Wai yu noh fi feel laik yu haftu geh baptaiz wen yu reech wahn sertn ayj?

⁹ Maybi yoo feel laik yu noh redi fi dedikayt yu laif tu Jehoava ahn geh baptaiz. Yu praabli feel laik yu need moa taim fi bil op yu fayt er fi mek chaynjiz soh dat yu ku liv op tu Jehoava standadz. (Kol. 2:​6, 7) Wi haftu memba dat evribadi noh tek di saym amonk a taim fi mek spirichwal proagres, ahn dehn noh ga wahn spesifik ayj wen yong peepl fi geh baptaiz. Soh noh kompyaa yuself wid adaz. Insted, ih impoatant fi mek yu egzamin yuself ahn si weh yoo need fi werk pan fi mek spirichwal proagres.—Gal. 6:​4, 5.

10. Weh yu ku du if yu riyalaiz dat yu noh redi fi dedikayt yu laif tu Jehoava ahn geh baptaiz? (Koment pahn di baks weh naym “ Moa Infamayshan fi Dehn Wan Weh Di Groa Op Eena di Chroot.”)

¹⁰ If yu riyalaiz dat yu noh redi fi dedikayt yu laif tu Jehoava yet, kantinyu werk tuwaadz da goal. Aks Jehoava fi help yu mek di chaynjiz yu need fi mek fi reech yu goal. (Fil. 2:13; 3:16) Yu ku bee shoar dat Jehoava wahn ansa yu pryaaz.—1 Jan 5:14.

WAI SOM PEEPL FRAYD FI GEH BAPTAIZ?

11. How Jehoava wahn help yu fi stay faytful tu ahn?

¹¹ Som peepl mait hoal bak fahn dedikayt dehn laif tu Jehoava ahn geh baptaiz eevn doa dehn redi fi tek da step. Dehn mait tink tu dehnself, ‘Sopoaz Ai en op di mek wahn mistayk ahn geh disfeloship?ʼ If dat da how yu feel, memba dat Jehoava pramis fi gi yu evriting weh yu need fi “liv di way how peepl weh serv [hihn] fi liv” ahn fi help yu “du di tingz weh bring prayz tu hihn.” (Kol. 1:10) Soh hihn wahn aalwayz gi yu di schrent weh yu need fi du weh rait. Wee ku bee shoar dat hihn wahn du dat, bikaaz hihn proov soh moch taim dat hihn help ih peepl. (1 Kor. 10:13) Dat da wan reezn wai onli wahn lee bit a peepl geh disfeloship. Jehoava aalwayz giv ih peepl evriting weh dehn need fi stay faytful tu ahn.

12. Weh ku help wi fi noh komit wahn seeryos sin?

¹² No hyooman pahn dis ert ku seh dat  dehn neva geh temtid fi du sohnting rang. (Jay. 1:14) Bot, wen wahn temtayshan kom op yoo ku chooz weh yu waahn du. Eevn doa lata peepl seh dat wi kyaahn kanchroal how wi feel ahn weh wi du, dat da noh chroo, kaaz yoo ku kanchroal how yu liv yu laif. Yoo ku laan fi kanchroal eni rang dizaiya yu mait ga, soh dat eevn if yu geh temtid fi du sohnting rang, yu wahn ku mek di rait disizhan. Sohn impoatant tingz weh ku aalso help wi da fi pray aal di taim, fi kip op wid wi persnal stodi a di Baibl, goh da aala wi meetinz, ahn preech az moch az wi kud. If wi kip op wid wi spirichwal skejul di way wi sopoas tu, dat wahn help wi fi liv op tu wi pramis fi du Jehoava wil fi di res a wi laif. Ahn wi shuda neva ferget dat Jehoava wahn aalwayz help wi.—Gal. 5:16.

13. How Joazef set wahn gud egzampl fi wee?

¹³ Ih impoatant fi mek yu pripyaa heda taim bifoa eni temtayshan hapm. Dis wahn mek it eeziya fi mek yu stay faytful tu Jehoava ahn kip yu pramis. Di Baibl tel wi bowt wahn lata Jehoava faytful servants weh mi du weh rait eevn doa dehn neva perfek, jos laik wee. Fi egzampl, Potifa waif mi kip di chrai temp Joazef fi sleep wid ahn. Bot Joazef mi don mek op ih main dat hihn neva wahn du dat. Hihn neva tink twais wen ih seh: “How Ai wahn sin gens Gaad ahn du sohnting weh soh bad?” (Jen. 39:​8-10) Joazef mi pripyaa heda taim bifoa ih mi geh temtid. Soh dis mi mek it eeziya fi mek ih du weh rait wen ih mi fays temtayshan.

14. How yoo ku pripyaa heda taim fi stay faytful tu Jehoava?

¹⁴ How yoo ku kapi Joazef egzampl fi stay faytful tu Jehoava? Wi need fi pripyaa fahn now, bifoa wi fays wahn temtayshan. Wi ku laan fi seh no rait away tu eni rang dizaiya, ahn noh alow wiself fi tink bowt tingz weh Gaad hayt. (Ps. 97:10; 119:165) Da way deh, wi noh wahn sin wen wi doo geh temtid, bikaaz wi wahn don mek op wi main fi du weh Jehoava waahn.

15. How yu ku shoa dat yu di chrai yu bes fi du Jehoava wil? (Heebrooz 11:6)

¹⁵ Yoo praabli noa dat dis da di chroot ahn dat yu waahn serv Jehoava wid yu hoal haat. Bot maybi sohnting stil di hoal yu bak fahn dedikayt yu laif tu ahn an geh  baptaiz. Tink bowt how Dayvid egzampl ku help yu. Jos laik King Dayvid, yoo ku beg Jehoava ahn seh: “Oa Gaad, saach chroo mi ahn noa mi haat. Saach eena mi ahn noa aala mi woriz. Chek ahn si if Ah ga eniting eena mi weh ku hert mi, ahn leed mi tu evalastin laif.” (Ps. 139:​23, 24) Jehoava “bles di wan dehn weh di chrai dehn bes fi du ih wil.” Jehoava noa dat yu di chrai yu bes bikaaz hihn si how haad yu di werk fi dedikayt yu laif tu ahn an geh baptaiz.—Reed Heebrooz 11:6.

KANTINYU JRAA KLOAS TU JEHOAVA

16-17. How Jehoava jraa peepl weh groa op eena di chroot? (Jan 6:44)

¹⁶ Jeezas mi seh dat Jehoava jraa ih disaiplz tu ahn. (Reed Jan 6:44.) Dat amayzin, noh chroo? Dat meenz dat Jehoava jraa yoo tu hihn. Jehoava si sohnting gud eena eech persn weh hihn jraa kloas tu. Hihn lov eech wan a ih servant an ih si dehn az fi hihn “speshal prapati.” An ih tel eech wan a dehn: “[Yoo] wahn bee fi mee.” (Mal. 3:​16, 17) Dat inklood yoo tu!

¹⁷ If yoo da wahn yong persn ahn yu payrents di teech yu di chroot, yu mait feel laik yu di serv Jehoava bikaaz a yu payrents, noh bikaaz Jehoava jraa yu. Bot dat da noh di way Jehoava tink bowt yoo. Tu Jehoava, yoo speshal ahn hihn waahn yu jraa kloas tu ahn. Dat meenz dat evribadi weh deh eena di kangrigayshan dehdeh bikaaz a hihn, ahn dat inklood peepl weh rayz eena di chroot tu. Pahn tap a dat, di Baibl seh: “Kohn kloas tu Gaad, ahn hihn wahn kohn kloas tu unu.” (Jay. 4:8; 1 Chron. 28:9) Soh da skripcha ku help yu andastan dat az lang az yoo di du yu paat fi jraa kloas tu Jehoava, hihn wahn jraa kloas tu yoo tu.—Kompyaa 2 Tesaloanyanz 2:13.

18. Weh wi wahn taak bowt eena di neks aatikl? (Psalm 40:8)

¹⁸ Wen yu dedikayt yu laif tu Jehoava ahn geh baptaiz, yu di kapi Jeezas egzampl. Hihn mi wilin fi du wateva ih Pa aks ahn fi du. (Reed Psalm 40:8; Heeb. 10:7) Eena di neks aatikl, wi wahn taak bowt how wi ku kantinyu serv Jehoava afta wi geh baptaiz.