1, 2. (a) Jos bifoa Jeezas mi ded, weh ih mi tel ih disaipl dehn? (Koment pahn di picha da di biginin a dis aatikl.) (b) Wai ih impoatant fi mek wi memba wai wi preech? (c) Weh wi wahn stodi now?

PAHN di nait bifoa Jeezas mi ded, ih mi ga wahn lang taak wid ih apasl dehn. Joorin dis diskoshan, ih rimain dehn humoch ih lov dehn. Ih mi tel dehn di iloschrayshan bowt di vain, di wan weh di laas aatikl mi taak bowt. Chroo da iloschrayshan, Jeezas inkorij ih disaipl dehn fi “kip aan di bayr lata froot” ahn noh stap preech bowt di Kingdom.—Jan 15:8.

² Jeezas neva jos tel ih disaipl dehn weh dehn mi need fi du, bot ih mi tel dehn di reezn wai dehn mi need fi du di preechin werk tu. Wai ih impoatant fi mek wi stodi dehndeh reezn? Wen wi memba wai wi need fi kantinyu preech, wi geh inkorij fi noh giv op ahn kehr ‘di gud nyooz tu aala di nayshan dehn.ʼ (Mach. 24:13, 14) Soh den, mek wi kansida foa reezn fahn di Baibl wai wi du di preechin werk. Ahn wi wahn taak bowt foa gif weh Jehoava gi wi fi help wi kantinyu bayr froot ahn noh giv op.

3. (a) Wat da wahn reezn wai wi preech bays pahn Jan 15:8? (b) Weh di graypz eena Jeezas iloschrayshan stan fa, ahn wai dat da-mi wahn gud way fi eksplayn it?

³ Di mayn reezn wai wi preech da fi aana Jehoava ahn kip ih naym hoali. (Reed Jan 15:1, 8, NW.) * Noatis dat Jeezas mi seh dat ih Faada da laik wahn gyaadna weh plaant grayps. Jeezas seh hihn da laik wahn vain er stem, an ih falowaz da laik di branch dehn. (Jan 15:5) Soh di grayps stan fi di Kingdom froot weh wi bayr az Krais falowaz. Dis da wen wi tel adaz bowt di Kingdom. Jeezas mi tel ih apasl dehn: ‘Unu bring aana tu mai Faada wen unu kip aan di bayr lata froot.ʼ Jos laik how di vain weh bayr gud grayps bring aana tu di gyaadna, jos laik dat, wi bring aana tu Jehoava wen wi chrai wi bes fi tel adaz bowt di Kingdom.—Mach. 25:20-23.

4. (a) Eena weh wayz wi ku kip Gaad naym hoali? (b) How yu feel bowt di privilij fi kip Gaad naym hoali?

⁴ Eena weh way wi preechin werk kip Gaad naym hoali? Wi kyaahn mek Gaad naym moa hoali dan how ih deh aredi. Ih hoali eena evri way. Bot noatis weh di prafit Aizaiya mi seh: “Jehoava a aamiz—hihn da di Wan unu fi chreet az hoali.” (Isa. 8:13) Wan way wi chreet Gaad naym hoali da fi kip it separayt fahn aal ada naym ahn fi help adaz chreet it az hoali tu. (Mach. 6:9) Fi egzampl, wen wi tel di chroot bowt Jehoava wandaful wayz an ih perpos fi hyoomanz, wi protek Gaad naym gens Saytan lai dehn. (Gen. 3:1-5) Ahn wen wi chrai fi help peepl eena wi teritori fi si dat Jehoava dizerv “gloari, ahn aana ahn powa” wi di kip Gaad naym hoali. (Rev. 4:11) Wahn brada weh naym Rune, weh di painyaa fi 16 yaaz, seh: “Jos fi noa dat Ai ga di apachooniti fi bee wahn witnis fi di Kriyayta a di yoonivers mek Ah feel soh graytful. Ih mek Ah waahn kantinyu preech.”

5. (a) Wat da wahn nada reezn wai wi preech bays pahn Jan 15:9, 10? (b) How Jeezas mi shoa dat ih impoatant fi kantinyu preech ahn noh giv op?

⁵ Reed Jan 15:9, 10. Wi deep lov fi Jehoava ahn fi Jeezas da wahn impoatant reezn wai wi preech bowt di Kingdom. (Maak 12:30; Jan 14:15) Jeezas mi tel ih disaipl dehn fi “kip aan di liv eena [fi hihn] lov.” Wai ih mi seh dat? Bikaaz if wi waahn liv az wahn disaipl a Krais, yaa afta yaa, wi kyaahn giv op. Fi mek wi si wai ih impoatant fi noh giv op, Jeezas mi yooz werdz laik “stay” ahn “kip aan” wahn fyoo taimz eena da shaat pasij da Jan 15:4-10.

6. How wi shoa dat wi waahn kip aan di liv eena Krais lov?

⁶ How wi shoa dat wi waahn kip aan di liv eena Krais lov? Ahn how wi ku shoa dat wi waahn Krais stay hapi wid wi? Wi ku du dis wen wi obay ih komanment dehn. Jeezas tel wi, ‘Obay mi.ʼ Bot, weh Jeezas aks wi fi du da weh hihn mi du tu. Ih seh: “Jos laik how Ai du evriting weh mai Faada tel mi fi du an Ai kip aan di liv eena fi hihn lov.” Soh Jeezas set di egzampl fi wi.—Jan 13:15.

7. How obeedyans link tu lov?

⁷ Fi shoa dat ih disaipl dehn kyaahn jos bee obeedyant tu ahn, bot dat dehn need fi ga lov tu, Jeezas mi seh: “Dehn  wan weh noa mi komanment dehn, ahn obay dehn, da di wan dehn weh reeli lov mi fi chroo.” (Jan 14:21) Moroava, wen wi obay Jeezas koman fi goh ahn preech, wi di shoa lov fi Gaad tu kaaz Jeezas komanment dehn da weh Jehoava waahn wi du. (Mach. 17:5; Jan 8:28) Wen wi shoa Jehoava ahn Jeezas humoch wi lov dehn, dehn kip wi eena fi dehn lov.

8, 9. (a) Wat da sohn ada reezn wai wi preech? (b) Wai weh Jehoava seh da Ezekiel 3:18, 19 ahn 18:23 moov wi fi kip aan di preech?

⁸ Wi ga moa reezn fi kantinyu wi preechin werk. Wi preech fi gi wahn waanin. Di Baibl seh dat Noawa ‘mi preech tu peepl.ʼ (Reed 2 Peeta 2:5.) Di preechin werk weh hihn mi du bifoa di Flod mi inklood wahn waanin dat da werl mi wahn geh dischrai. Wai wi ku seh dat? Bikaaz a weh Jeezas mi seh: “Eena dehn dayz bifoa di flod, peepl mi-di eet op ahn jrink op laik notn, ahn dehn mi-di geh marid ahn soh, rait op tu di veri day wen Noawa gaan eena di aak; ahn dehn neva noa weh kech dehn til wen di flod kohn ahn wash aala dehn weh. Da rait soh ih wahn bee wen di Son a Man kohn bak.” (Mach. 24:38, 39) Eevn doa peepl neva shoa inchres, Noawa mi kantinyu fi preech ahn waan di peepl dehn.

⁹ Tudeh, wi preech di Kingdom mesij fi gi peepl wahn chaans fi laan bowt weh Gaad waahn fi hyoomanz. Jehoava waahn peepl rispan tu dis mesij ahn “kip aan di liv.” (Ezek. 18:23) Dis da weh wee wuda waahn tu. Bot di saym taim doh, wen wi preech fahn hows tu hows an eena difrent poblik ayrya, wi di waan az moch peepl az wi kud dat Gaad Kingdom wahn soon kohn an ih wahn dischrai dis wikid werl.—Ezek. 3:18, 19; Dan. 2:44; Rev. 14:6, 7.

10. (a) Wat da wahn reezn fi preech bays pahn Machyu 22:39? (b) Eksplayn how Paal ahn Sailas mi help wahn jayla da Filipai.

¹⁰ Wahn nada impoatant reezn wai wi du di preechin werk da bikaaz wi lov wi nayba dehn. (Mach. 22:39) Dis lov help wi fi kantinyu preech kaaz wi noa peepl ku chaynj. Noatis weh di apasl Paal an ih fren, Sailas, mi gaan chroo. Eena di siti a Filipai, sohn bad peepl chroa dehn eena prizn. Den, aal af a sodn, eena di midl a di nait, wahn ertkwayk shayk op di prizn ahn mek di doa dehn flai oapm. Di jayla mi tink seh dat di prizna dehn ron weh, soh ih haal owt ih soad an ih mi wahn kil ihself. Bot Paal hala pahn di tap a ih vais aata ahn; ih seh: “Stap, noh kil yuself! Aala wi deh ya!” Afta dat di jayla aks: “Mista, da weh Ah ku du fi geh sayv?” Dehn tel ahn: “Bileev eena di Laad Jeezas ahn yoo wahn sayv.”—Aks 16:25-34.

11, 12. (a) Weh di pasij bowt di jayla teech wi bowt wi minischri? (b) Wai wi fi kantinyu preech di gud nyooz?

¹¹ Weh di pasij bowt di jayla teech wi bowt di preechin werk? Noatis dat  di jayla mi chaynj an aks fi help afta di ertkwayk mi hapm. Jos laik dat, som peepl hoo noh waahn hyaa di Baibl mesij mait chaynj afta dehn gaahn chroo wahn prablem eena dehn laif. Fi egzampl, som peepl eena wi teritori mait looz dehn jab weh dehn mi gat fi wahn lang taim. Ada peepl mait jos gaahn chroo wahn separayshan er divoas. An adaz mait di fays wahn terabl siknis, er feel hoaples afta wahn famili memba er fren ded. Wen peepl di goh chroo eni kaina chraiyalz, dehn mait ga kweschanz bowt laif. Dehn mait eevn aks, ‘How Ai ku geh sayv?ʼ Wen wi meet dehn, dehn mait waahn lisn tu wi mesij a hoap fi di fos taim eena dehn laif.

¹² Soh, wen wi kantinyu preech di gud nyooz, wi di mek shoar dat wi avaylabl wen peepl need komfert. Ahn dat mait bee di taim wen dehn redi fi aksep it. (Isa. 61:1) Wahn sista weh naym Charlotte, weh di painyaa fi 38 yaaz, seh: “Tudeh, peepl laas. Dehn need wahn chaans fi hyaa di gud nyooz.” Noatis weh Ejvor, wahn sista weh di painyaa fi 34 yaaz, seh: “Tudeh, moa dan eva, peepl feel dipres ahn sad. Ah reeli waahn help dehn. Dat mek Ah waahn goh preech tu dehn.” Soh lov fi wi nayba dehn da wahn byootiful reezn fi kantinyu eena wi minischri!

13, 14. (a) Wich gif Jan 15:11 menshan? (b) How Jeezas jai wahn bee fi wee jai? (c) How jai afek wi minischri?

¹³ Joorin di laas nait bifoa Jeezas mi ded, ih mi menshan tu ih apasl dehn wahn fyoo tingz weh Jehoava mi wahn gi dehn az gif fi help dehn bayr froot ahn noh giv op. Wat da dehnya gif, ahn how wi benifit fahn dehn?

¹⁴ Di fos gif—jai. Yu tink da wahn berdn fi obay Jeezas koman fi goh preech? Non ataal! Afta Jeezas mi menshan ih iloschrayshan, ih mi seh dat peepl weh preech wahn ga jai. (Reed Jan 15:11.) In fak, ih tel wi dat fi hihn jai wahn bee fi wee jai. How dat pasabl? Laik weh wi mi laan erliya, Jeezas seh hihn da di vain an ih disaipl dehn da di branch dehn. Wahn vain sopoat di branch dehn. Az lang az di branch dehn stik aan tu di vain, dehn geh waata ahn food fahn di vain. Jos laik dat, az lang az wi stik aan tu Krais—fala ih egzampl kloas-wan—wi wahn ga di saym kaina jai weh hihn ga wen ih du ih Faada wil. (Jan 4:34; 17:13; 1 Peet. 2:21) Wahn sista weh naym Hanne, weh di painyaa fi moa dan 40 yaaz, seh: “Di jai Ah aalwayz feel afta Ah get hoam fahn di minischri inkorij mi fi kantinyu eena Jehoava servis.” Soh, chroo jai gi wi di schrent fi kip aan di preech eevn if wi fays difrent chalenjiz eena wi teritori.—Mach. 5:10-12.

15. (a) Wich gif Jan 14:27 menshan? (b) Wai pees help wi fi kip di bayr froot?

¹⁵ Di sekant gif—pees. (Reed Jan 14:27.) Erliya pahn di laas nait bifoa Jeezas mi ded, ih tel ih apasl dehn: ‘Ah di lef mai oan pees wid unu.ʼ How da gif—fi hihn pees—help wi bayr froot? Di langa wi bayr froot ahn noh giv op, di moa wi ga wahn peesful feelin eena wi haat bikaaz wi noa dat Jehoava ahn Jeezas pleez wid wi. (Ps. 149:4; Roam. 5:3, 4; Kol. 3:15) Wahn brada weh naym Ulf, weh di painyaa fi 45 yaaz, seh: “Ah geh taiyad eena di minischri, bot ih mek Ah feel satisfai ahn mi laif ga meenin.” Wi gi tanks dat Jehoava bles wi wid pees weh deh deep dong eena wi haat!

16. (a) Wich gif Jan 15:15 menshan? (b) Weh di apasl dehn mi need fi du fi stay az Jeezas frenz?

 ¹⁶ Di terd gif—frenship. Afta Jeezas mi seh dat ih wuda waahn ih apasl dehn ‘geh ful op wid aala fi hihn hapinis,ʼ ih tel dehn dat dehn need fi shoa lov fi adaz. (Jan 15:11-13) Den ih seh: “Ah kaal unu frenz.” Frenship wid Jeezas da wahn preshos gif fi chroo! Weh di apasl dehn mi need fi du fi stay az fi hihn frenz? Dehn mi need fi “goh ahn kip aan di bayr froot.” (Reed Jan 15:14-16, NW.) * Bowt too yaaz erliya, Jeezas mi tel ih apasl dehn: “Ahn az unu goh, tel dehn dat di kingdom a hevn wahn soon kohn.” (Mach. 10:7) Soh pahn da laas nait, ih inkorij dehn fi noh giv op eena di werk ih mi gi dehn fi du. (Mach. 24:13; Maak 3:14) Ih neva eezi fi mek dehn obay Jeezas koman. Bot di apasl dehn mi du it ahn stay az fi hihn frenz. Weh mi help dehn? Jeezas mi gi dehn wahn nada gif.

17, 18. (a) Wich gif Jan 15:16 menshan? (b) How da gif mi help Jeezas disaipl dehn? (c) Wich gif gi wi schrent tudeh?

¹⁷ Di foat gif—pryaaz weh Gaad ansa. Jeezas seh: “Noh mata weh yu aks di Faada eena mi naym, ih mait giv it tu unu.” (Jan 15:16, NW) Da pramis mosi mi schrentn di apasl dehn! * Dehn neva reeli andastan dat Jeezas mi wahn soon ded. Bot dehn neva mi wahn deh pahn dehn oan. Jehoava mi redi fi ansa dehn pryaaz fi eni help dehn mi need eena dehn minischri. Ahn noh tu lang afta dat, dehn mi need help fi chroo ahn Jehoava ansa dehn pryaaz.—Aks 4:29, 31.

¹⁸ Di saym wid wee tudeh. Wen wi bayr froot ahn noh giv op, wi injai frenship wid Jeezas. Moroava, wi noa dat Jehoava redi fi ansa wi pryaaz wen wi need help wid prablemz wi mait fays eena wi minischri. (Fil. 4:13) Wi graytful dat Jehoava ansa wi pryaaz ahn dat wi ku bee frenz wid Jeezas! Dehnya gif fahn Jehoava schrentn wi fi kip aan di bayr froot.—Jay. 1:17.

19. (a) Wai wi kip aan di du dis preechin werk? (b) Weh wahn help wi fi finish Gaad werk?

¹⁹ Laik weh wi stodi eena dis aatikl, if wi kip aan di du fi wee paat eena di minischri, wi bring aana tu Jehoava ahn kip fi hihn naym hoali. Wi aalso shoa lov fi Jehoava, fi Jeezas, ahn fi wi nayba dehn chroo wi minischri. Di jai, pees, ahn frenship, weh da gif fahn Jehoava, schrentn wi. Ahn wen Jehoava ansa wi pryaaz, wi geh schrent tu fi finish dis werk. Jehoava wahn feel hapi wid wi wen hihn si how wi di put aala wi haat intu wi werk fi ‘bayr frootʼ!