1. Weh Jehoava mi seh bowt wi enimi?

ADAM mi noa dat wahn snayk kyaahn taak. Soh ih maita mi ges dat wahn spirit persn mi yooz di snayk fi taak wid Eev. (Gen. 3:1-6) Adam ahn Eev neva reeli noa eniting bowt dis spirit persn. Ahn yet, Adam mek wahn chois fi ton ih bak pan ih lovin hevnli Faada ahn jain dis schraynja ahn gaahn gens Gaad wil. (1 Tim. 2:14) Rait away, Jehoava staat tu giv infamayshan bowt dis enimi hoo mi korop Adam ahn Eev. Ih mi pramis dat dis wikid persn wahn geh dischrai. Bot Jehoava mi aalso waan dat dis spirit weh mi taak chroo di snayk mi wahn ga di powa fi atak dehn wan weh lov Gaad.—Gen. 3:15.

2, 3. Weh ku bee wan reezn wai Jehoava noh seh moch bowt Saytan bifoa di Mesaiya mi kohn?

² Jehoava neva tel wi di persnal naym a da aynjel weh mi gaahn gens ahn. * Da neva til 2,500 yaaz afta di ribelyan eena Eedn dat Jehoava mi seh hoo da-mi da rebl. (Job 1:6)  Jehoava kaal ahn “Saytan,” weh meen sombadi weh fait gens Gaad. Onli chree buk eena di Heebroo Skripchaz, 1 Chronicles, Job, ahn Zechariah, menshan Saytan. Wai Jehoava neva seh moch bowt wi enimi bifoa di Mesaiya mi kohn?

³ Ih pasabl dat Jehoava neva waahn mek ih luk laik Saytan impoatant, ahn tek op wahn big sekshan a di Heebroo Skripchaz jos fi taak bowt hihn ahn weh ih du. Aftaraal, di perpos a di Heebroo Skripchaz da-mi fi help peepl rekonaiz di Mesaiya ahn fala ahn. (Look 24:44; Gal. 3:24) Wen di Mesaiya mi did kohn, Jehoava mi yooz hihn an ih disaipl dehn fi gi wi infamayshan bowt Saytan ahn di bad aynjel dehn. * Ih mek sens dat Jeezas gi wi infamayshan bowt Saytan, sins da hihn an ih anointid bradaz wahn dischrai Saytan an ih falowaz.—Roam. 16:20; Rev. 17:14; 20:10.

4. Wai wi noh wori tu moch bowt di Devl?

⁴ Di apasl Peeta seh Saytan da “laik wahn laiyan weh di roar,” ahn Jan kaal ahn wahn “snayk” ahn wahn “jragan.” (1 Peet. 5:8; Rev. 12:9) Bot wi noh need fi di wori tu moch bowt di Devl bikaaz fi hihn powa ga limit. (Reed Jaymz 4:7.) Jehoava, Jeezas, ahn di faytful aynjel dehn di bak wi op. Wid fi dehn help, wi ku fait gens wi enimi, bot, wi need fi noa di ansa tu chree impoatant kweschan: Humoch powa Saytan gat? How Saytan yooz da powa fi kanchroal peepl? Ahn wat da di limit a fi hihn powa? Bisaid ansa dehnya kweschan, wi wahn taak bowt weh wi ku laan.

5, 6. Wai hyooman govament kyaahn mek di chaynjiz weh wi need di moas?

⁵ Bifoa di Flod, Saytan mi temp som a di aynjelz fi ga seks wid di uman dehn pahn di ert. Now hihn di kanchroal aala di bad aynjel dehn. Di Baibl shoa dat eena wahn simbolik way, di jragan mi jreg wahn terd a di staar dehn lang wid ahn wen Jeezas mi kik ahn owta hevn. (Gen. 6:1-4; Jood 6; Rev. 12:3, 4) Wen dehndeh aynjel rijek Gaad famili, dehn put dehnself anda Saytan kanchroal. Dehnya rebl da noh jos wahn groop a aynjelz weh di kaaz chrobl. Saytan chrai kapi Gaad roolaship ahn set op wahn roolaship laik Gaad Kingdom. Ih mek ihself di king. Eena di spirit werl, Saytan aaganaiz di deemon dehn intu govament. Ih gi dehn atariti ahn gi dehn roolaship oava peepl.—Ifee. 6:12.

⁶ Saytan kanchroal aal hyooman govament chroo fi hihn spirit aaganaizayshan. Dis mi playn fi si wen Saytan shoa Jeezas “aala di konchri dehn a di werl” ahn tel ahn: “Ai wahn gi yu aala di powa ahn richiz weh yu si ya kaa da fi mee, an Ai ku gi enibadi weh Ai waahn.” (Look 4:5, 6) Eevn doa Saytan di kanchroal di govament dehn, moas a dehn du som gud tingz fi di peepl dehn. Ahn som roolaz mait waahn du gud. Bot no hyooman govament er roola ku mek di chaynjiz weh hyoomanz need di moas.—Ps. 146:3, 4; Rev. 12:12.

7. How Saytan yooz faals rilijan ahn di bizniz werl? (Koment pahn di picha da di biginin a dis aatikl.)

⁷ Saytan an ih deemonz noh onli yooz di govament dehn, bot dehn yooz  faals rilijan ahn di bizniz paat a dis werl fi fool op ‘aala di peepl eena di werl.ʼ (Rev. 12:9) Saytan yooz faals rilijan fi tel lai bowt Jehoava. Ih noh waahn peepl noa Gaad naym. (Jer. 23:26, 27) Bikaaz a dat, sinsyaa peepl weh tink dehn di wership Gaad, akchwali di wership di deemon dehn. (1 Kor. 10:20; 2 Kor. 11:13-15) Saytan yooz di bizniz werl fi fool peepl tu. Fi egzampl, dis werl teech peepl dat di bes way fi bee hapi da fi goh afta moni ahn get az moch tingz az pasabl. (Prov. 18:11) Peepl hoo bileev dis lai spen dehn laif di serv “moni” insteda Gaad. (Mach. 6:24) Lee bit bai lee bit, dehn lov fi mateeryal tingz ku mek dehn looz dehn lov fi Gaad.—Mach. 13:22; 1 Jan 2:15, 16.

8, 9. (a) Weh wi laan fahn di akonk bowt Adam, Eev, ahn di bad aynjel dehn? (b) Weh advantij wi ga wen wi noa humoch powa Saytan gat?

⁸ Di egzampl a Adam, Eev, ahn di bad aynjel dehn, teech wi at lees too impoatant lesn. Fos, dehn onli ga too said, ahn wi haftu pik wan. Eeda wi stay laayal tu Jehoava er wi pik Saytan said. (Mach. 7:13) Sekant, dehn wan weh jain Saytan onli injai tingz fi wahn lee wail. Fi egzampl, Adam ahn Eev mi geh di chaans fi disaid fi dehnself weh gud ahn weh bad. Ahn di deemon dehn mi geh limitid kanchroal oava di govament dehn. (Gen. 3:22) Bot wen wahn persn tek eniting fahn Saytan, ih wahn looz moa dan weh ih mi get fan ahn.—Job 21:7-17; Gal. 6:7, 8.

⁹ Weh advantij wi ga wen wi noa humoch powa Saytan gat? Ih help wi fi ga wahn balans vyoo a di govament, ahn wi du moa eena wi preechin werk. Wi andastan dat Jehoava waahn wi rispek di peepl dehn eena di govament. (1 Peet. 2:17) An ih ekspek wi fi obay di laa dehn a di govament az lang az dehn noh goh gens fi hihn standadz. (Roam. 13:1-4) Bot wi riyalaiz dat wi haftu stay nyoochral; wi kyaahn di ak laik wi prifaa wan politikal paati er leeda oava di ada. (Jan 17:15, 16; 18:36) Bikaaz wi si weh Saytan di chrai du tu Jehoava naym ahn repyutayshan, wi waahn spen moa taim di tel adaz di chroot bowt wi Gaad. Wi prowd fi bee wan a fi hihn Witnisiz ahn yooz fi hihn naym. Wi noa dat if wi lov Jehoava, wi wahn geh moa benifit dan if wi lov moni er tingz.—Isa. 43:10; 1 Tim. 6:6-10.

10-12. (a) How Saytan mi yooz bayt fi chrai chrap ih oan spirit bradaz? (b) Weh wi ku laan fahn weh mi hapm tu dehndeh aynjelz?

¹⁰ Saytan yooz di rait kaina bayt fi chrai kanchroal peepl. Ih chrai get dehn fi du tingz fi hihn way. An, ih chrai buli dehn fi goh lang wid hihn.

¹¹ Tink bowt humoch sokses Saytan mi gat wid ih oan brada dehn. Di bayt weh hihn mi set fi dehn mi werk. Ih mosi mi stodi dehn fi wahn lang taim bifoa ih chrai get dehn fi tek said wid ahn. Wen som a di aynjel dehn tek di bayt ahn ga seks wid di uman dehn, dehn baan soh jaiyant pikni weh mi tek advantij a hyoomanz. (Gen. 6:1-4) Maybi Saytan neva onli mi temp dehn wid seks bot maybi ih mi pramis dehn powa oava hyoomanz. Ih praabli mi waahn mes op di prafesi bowt di pramis seed. (Gen. 3:15) Bot wen Jehoava bring di Flod, ih put wahn stap tu eni plan weh Saytan ahn di deemon dehn mi gat.

¹² Weh wi ku laan fahn dis? Imoraliti ahn praid da bayt weh Saytan yooz. Mek wi neva dowt di powa a dehnya tingz. Fi yaaz, di aynjel dehn weh mi jain Saytan yoostu serv Gaad da hevn. Ahn yet, dehn mek bad dizaiya tek root ahn groa. Jos laik dat, wi ku di serv Jehoava fi yaaz eena fi hihn kleen aaganaizayshan bot doti tingz ku stil tek root eena wi haat ahn main. (1 Kor. 10:12) Soh den, ih impoatant fi mek wi aalwayz saach wi haat ahn geh rid a eni doti tinkin ahn bad praid!—Gal. 5:26; reed Koloashanz 3:5.

13. Wat da wahn bayt weh Saytan yooz, ahn how wi ku stay weh fan it?

¹³ Wahn nada bayt weh Saytan yooz da spiritizm. Tudeh, ih waahn peepl bee inchrestid eena di deemon dehn. Soh ih yooz faals rilijan an entataynment. Di moovi dehn, gaymz, an ada tingz mek spiritizm luk eksaitin. How wi ku stay weh fahn dis chrap? Wi kyaahn ekspek Gaad aaganaizayshan fi gi wi wahn lis a gud ahn bad entataynment. Eech wan a wi need fi chrayn wi oan kanshans fi bee in lain wid Gaad standadz. (Heeb. 5:14) Bot, wi wahn mek waiz disizhan if wi aplai weh di apasl Paal seh. Ih seh: ‘Noh jos priten seh yu lov Gaad.ʼ (Roam. 12:9) Wi ku aks wiself dehnya kweschanz: ‘Mai chois a entataynment wahn mek Ah luk laik  wahn hipokrit? If mi Baibl styoodent er ritern vizit si di entataynment Ah chooz, Ah wanda if ih wuda tink dat Ah di praktis weh Ah preech?ʼ If wi liv bai weh wi bileev ahn teech, wi stan les chaans fi geh chrap bai wan a Saytan bayt.—1 Jan 3:18.

14. How Saytan mait chrai buli wi, ahn weh wi ku du bowt it?

¹⁴ Bisaidz di chrai redn wi aiy wid difrent bayt, Saytan chrai buli wi soh dat wi brok wi laayalti tu Jehoava. Fi egzampl, ih ku mek di govament ban wi preechin werk. Er ih ku mek sombadi da wi werk er skool mak wi bikaaz wi waahn liv bai Baibl standadz. (1 Peet. 4:4) Ih mait eevn mek wi famili membaz diskorij wi fahn goh da di meetin dehn. (Mach. 10:36) Weh wi ku du? Fos, wi haftu ekspek dis kaina dairek atak—wee ahn Saytan di waar. (Rev. 2:10; 12:17) Den, wi need fi si di biga ishu—Saytan klaym seh dat wi di serv Jehoava onli wen tingz goh gud fi wi. Ih seh dat if wi fays eni kaina presha, wi wahn ton wi bak pahn Gaad. (Job 1:9-11; 2:4, 5) Ahn wi haftu pen pahn Jehoava fi schrent fi fays di ishu. Memba, hihn wahn neva lef wi said.—Heeb. 13:5.

15. Yu tink Saytan ku foas wi fi du eniting? Pleez eksplayn yu ansa.

¹⁵ Saytan kyaahn foas peepl fi du sohnting weh dehn noh waahn du. (Jay. 1:14) Wahn lata peepl goh lang wid Saytan ahn noh eevn noa it. Bot afta dehn laan di chroot, eech persn haftu pik hoo ih wahn serv. (Aks 3:17; 17:30) If wi don mek op wi main fi du di wil a Gaad, Saytan kyaahn du notn fi brok wi laayalti.—Job 2:3; 27:5.

16, 17. (a) Wat da wahn ada limit weh Saytan ahn di deemon dehn gat? (b) Wai wi noh fi frayd fi pray owt lowd tu Jehoava?

¹⁶ Saytan ahn di deemon dehn ga ada limit. Fi egzampl, no way eena di Baibl ih seh dat dehn ku reed wi main er haat. Onli Jehoava ahn Jeezas ku du dat. (1 Sam. 16:7; Maak 2:8) How bowt wen wi taak er pray owt lowd? Yu tink wi shuda feel frayd dat di Devl er di deemon dehn mait hyaa wi pryaaz ahn chrai du sohnting? Di ansa da no. Wai wi noh fi feel frayd? Wel, wi noh frayd fi du gud tingz eena Jehoava servis jos bikaaz di Devl mait si wi. Jos laik dat, wi noh fi feel frayd fi pray owt lowd jos bikaaz di Devl mait hyaa wi. In fak, di Baibl ga lata egzampl a Gaad servants hoo mi pray owt lowd tu Jehoava, ahn dehn neva frayd dat di Devl maita mi hyaa dehn. (1 Ki. 8:22, 23; Jan 11:41, 42; Aks 4:23, 24) If wi du wi bes fi seh ahn du tingz akaadn tu di wil a Gaad, wi ku bee shoar dat Jehoava noh wahn mek di Devl du eni haam tu wi weh wahn laas fareva.—Reed Psalm 34:7. *

¹⁷ Wi need fi noa wi enimi, bot wi noh need fi frayd far ahn. Wee ku kanka Saytan wid Jehoava sopoat. (1 Jan 2:14) If wi stan op ahn fait di Devl, ih wahn ron weh fahn wi. (Jay. 4:7; 1 Peet. 5:9) Di wan dehn weh Saytan chrai goh afta di moas da wi yong bradaz ahn sistaz. Weh ku help dehn fi stan op schrang-wan gens di Devl? Di neks aatikl wahn ansa da kweschan.