1, 2. (a) Wai wi yong bradaz ahn sistaz di win di fait gens Saytan an ih deemon dehn? (Koment pahn di picha da di biginin a dis aatikl.) (b) Weh wi wahn stodi bowt?

DI APASL Paal mi seh dat fi wee laif az wahn Kristyan da laik wahn soalja weh deh eena wahn han-tu-han batl. Af koars, dis da wahn spirichwal waar. Bot wi enimiz reel. Saytan an ih deemon dehn da soalja wid lata ekspeeryens. Fi di fos, ih mait luk laik wi noh stan wahn chaans gens dehn. Wi yong bradaz ahn sistaz mait luk helples. Bot dehn ku win. In fak, dehn di win! Wai wi seh dat? Bikaaz ‘dehn geh schrent fahn di Laad ahn geh fi hihn powa.ʼ Bot dehn noh onli geh powa fahn Gaad, dehn jres fi batl. Jos laik how wahn soalja mek shoar ih gat aan wahn soot fi protek ihself ahn wepan fi batl, wi need fi gat aan wi “spirichwal aama” ahn ga wi “spirichwal wepan.”—Reed Ifeezhanz 6:10-12.

² Wen Paal mi-di yooz dis iloschrayshan, ih mi-di tink bowt di aiyan soot [aama] weh di Roaman soalja dehn yoostu put aan. (Aks 28:16) Mek wi taak bowt wai di iloschrayshan mek sens. Noatis weh sohn yong bradaz ahn sistaz ga fi seh bowt  di chalenjiz ahn di benifits wen dehn put aan eech paat a di spirichwal soot.

3, 4. How di chroot eena di Baibl, da laik di belt weh di Roaman soalja dehn yooz?

³ Reed Ifeezhanz 6:14. Wahn Roaman soalja belt mi gat metal rong ahn rong it. Da neva jos wahn belt, bot ih mi protek ih ways. Ih mi mek fi sopoat di wayt a ih aiyan soot. Ih mi ga wahn plays fi heng ih soad an ih daga. Wen wahn soalja ga ih belt faasn rong ih ways, ih ku stan op wid kanfidens eena batl ahn noh feel frayd.

⁴ Jos laik dat, di chroot wi laan fahn di Werd a Gaad protek wi eena wahn spirichwal way fahn faals teechinz. (Jan 8:31, 32; 1 Jan 4:1) Ahn di moa wi lov Baibl chroot, di eeziya ih wahn bee fi kehr wi “aiyan ves,” er liv bai Gaad raichos standadz. (Ps. 111:7, 8; 1 Jan 5:3) Bisaidz dat, wen wi ga wahn gud andastandin a di chroot fahn di Werd a Gaad, wi ku stan op wid kanfidens ahn noh frayd fi difen di chroot gens peepl weh noh laik wi.—1 Peet. 3:15.

5. Wai wi fi tel di chroot?

⁵ Wen wi rap di chroot fahn di Baibl rong wi, wi wahn liv wi laif bays pahn Baibl prinsiplz, ahn wi wahn tel di chroot aal di taim. Wai wi noh fi tel lai? Bikaaz laiz da wan a Saytan bes wepan fahn eva sins. Laiz damij di persn weh tel dehn ahn di persn weh bileev dehn. (Jan 8:44) Soh bikaaz wi noh perfek, wi haftu chrai wi bes fi avoid tel laiz. (Ifee. 4:25) Bot ih ku bee wahn chalenj. Wahn 18 yaa oal sista, weh naym Abigail, seh: “Ih mait noh luk laik ih wert it fi tel di chroot, espeshali if wahn lai ku get yu owta chrobl.” Wai shee tel di chroot den? Shee seh: “Wen Ah tel di chroot, Ah ga wahn kleen kanshans fronta Gaad, ahn mi payrents ahn frenz noa dat dehn ku chros mi.” Victoria, weh 23 yaaz oal, seh: “Peepl mait buli yu wen yu tel di chroot ahn stan op fi weh yu bileev eena. Bot tink bowt di benifit dehn: Yu geh kanfidens ahn yu feel kloasa tu Jehoava. Yu famili ahn frenz weh lov yu wahn rispek yu.” Soh ih wert it fi kip ‘di belt a chrootʼ faasn rong yu ways aal di taim; noh tek it aaf.

6, 7. Wai raichosnis da laik wahn aiyan ves?

⁶ How dehn yoostu mek wahn aiyan ves fi wahn soalja? Wel, wan way da-mi fi tek sohn naro pees a aiyan ahn yooz peesiz a leda ahn metal huk fi tai dehn tugeda laik blainz pahn wahn windo. Den, dehn wuda ben dehn fi fit di soalja badi ahn heng it oava ih ches. Dehn wuda du di saym ting fi kova ih bak an ih shoalda. Aala di peesiz a aiyan wuda mek it lee haada fi moov, ahn di soalja wuda haftu mek shoar ih kip it eena gud kandishan, bot dat neva mata kaaz dis ves wuda protek ahn fahn eni soad er aro weh ih enimi schraik ahn wid.

⁷ Dis da wahn gud way fi teech how raichosnis fahn Jehoava ku protek wi haat! (Prov. 4:23) Jos laik how wahn soalja wudn ekschaynj ih aiyan ves fi sohnting weh mek owta wahn lesa kwaliti metal, wi wuda neva waahn ekschaynj Jehoava standadz a weh rait fi wi oan. Wee noh perfek, soh wi mek mistayk wen wi chrai mek disizhan fi wiself. Fi wee oan tinkin kuda neva protek wi az moch az di “aiyan ves”—Jehoava raichos standadz. (Prov. 3:5, 6) Insted, wi haftu chek dat wi aiyan ves di kova wi haat gud gud.

8. Wai ih wert it fi stik tu Jehoava standadz?

 ⁸ Yu eva feel dat Jehoava raichos standadz da wahn berdn er dat dehn limit yu freedom? Daniel, weh 21 yaaz oal, seh: “Mi teecha ahn klaasmayt dehn mek fon a mi bikaaz Ah liv bai Baibl standadz. Fi wahn wail, Ah neva ga kanfidens an Ah mi feel dipres.” Weh Danyel mi du? Ih seh: “Ah geh fi si di benifits wen wi liv bai Jehoava standadz. Som a mi ‘frenzʼ staat tek jrogz; adaz jrap owta skool. Ih mi sad fi si how dehn laif en op. Jehoava reeli protek mi.” Wahn lee sista weh naym Madison, weh onli 15 yaaz oal, seh: “Da wahn schrogl fi mek Ah stik tu Jehoava standadz ahn noh goh lang wid weh mi frenz tink da fon.” Weh shee du? Ih seh: “Ah rimain miself dat Ai da wan a Jehoava Witnisiz ahn dat temtayshan da jos wan a di wayz weh Saytan di chrai shoot aata mi. Wen Ah win wahn schrogl, Ah feel beta bowt miself.”

9-11. (a) Wat da di simbolik shooz weh wahn Kristyan put aan? (b) Weh ku help wi fi noh feel frayd fi shayr di gud nyooz?

⁹ Reed Ifeezhanz 6:15. Wahn Roaman soalja weh neva gat aan ih boots neva redi fi goh da waar. Ih boots mi luk laik wahn sandalz weh mi mek owta chree laya a leda weh faasn tugeda. Dis sandalz mi giv ahn wahn gud grip espeshali wen ih deh eena batl. Di sandalz mi mek eena wahn way fi laas lang ahn bee komfatabl.

¹⁰ Di Roaman soalja dehn mi yooz dehn boots fi goh da waar. Bot di simbolik shooz weh Kristyanz yooz kehr dehn owt eena di minischri fi taak bowt wahn mesij a pees. (Isa. 52:7; Roam. 10:15) Bot, ih tek korij fi taak wen di apachooniti kom op. Wahn brada weh naym Bo, weh 20 yaaz oal, seh: “Ah tink Ai mi shaym. Bot wen Ah luk bak, Ah noh eevn noa wai Ah mi feel shaym. Ahn now Ah glad fi taak bowt Jehoava tu mi frenz.”

¹¹ Wahn lata yong bradaz ahn sistaz fain dat if dehn pripyaa gud fi shayr di gud nyooz, dehn noh frayd fi du it. Weh ku help yoo fi bee redi? Julia, weh 16 yaaz oal, seh: “Ah kip lichricha eena mi skoolbag, an Ah lisn tu weh mi klaasmayt dehn ga fi seh ahn tu weh dehn bileev eena. Den Ah ku tink bowt weh wahn help dehn. Wen Ah pripyaa, Ah ku taak tu dehn bowt weh wahn help dehn.” Makenzie, weh 23 yaaz oal, seh: “If yu lisn wen yu frenz taak ahn bee kain tu dehn, yu wahn ga wahn aidyaa a weh dehn di deel wid. Ah mek shoar dat Ah reed aala di poblikayshan dehn fi yong peepl. Da way deh, Ah ku shoa dehn sohnting fahn di Baibl er pahn jw.org weh wahn help dehn.” Laik dehndeh koment shoa, di moa wi pripyaa fi preech, da laik wi gat aan wi “shooz” lays op gud-wan, redi fi goh preech.

12, 13. Wat da som a Saytan ‘aro wid faiyaʼ?

¹² Reed Ifeezhanz 6:16. ‘Di big sheelʼ weh wahn Roaman soalja mi yooz mi lang inof fi kova ahn fan ih shoalda tu ih nee. Ih mi protek ahn fahn eni wepan weh ih enimi yooz gens ahn.

¹³ Som a di “aro dehn wid faiya” weh Saytan mait shoot aata wi da laiz bowt Jehoava. Hihn waahn wi bileev dat Gaad noh kay bowt wi ahn dat nobadi kuda eva lov wi. Ida, wahn 19 yaa-oal  sista, seh: “Sohntaim Ah feel laik Ah noh wot eniting. Ah aalwayz mi feel dat Jehoava noh kloas tu mi ahn dat ih noh waahn bee mi Fren.” How shee mi deel wid dis atak? Ida seh: “Ah yoostu jos sidong ahn noh koment ataal da di meetin dehn. Ah wuda tink dat nobadi waahn hyaa weh Ah gat fi seh eniwayz. Now doh, Ah pripyaa fi di meetin ahn chrai fi ansa at lees too er chree taimz. Ih haad, bot Ah feel beta wen Ah koment. Ahn di bradaz ahn sistaz soh inkorijin. Ah aalwayz lef di meetin di feel dat Jehoava lov mi.”

14. Weh Ida ekspeeryens teech wi?

¹⁴ Ida ekspeeryens teech wi wahn impoatant chroot: Di sheel weh wahn soalja yooz da wan set saiz, bot di saiz a fi wee sheel a fayt ku eeda schrink er groa; ih op tu wee. (Mach. 14:31; 2 Tes. 1:3) Dats wai ih soh impoatant fi mek wi bil op wi fayt!

15, 16. How hoap da laik wahn helmit?

¹⁵ Reed Ifeezhanz 6:17. Di helmit weh wahn Roaman soalja mi yooz mi mek eena wahn way fi protek ih hed, nek, ahn fays. Sohn helmit mi ga wahn handl pan it soh dat di soalja kuda mi kehr it eena ih han.

¹⁶ Jos laik how wahn helmit protek wahn soalja brayn, wi hoap protek wi main ahn how wi tink. (1 Tes. 5:8; Prov. 3:21) Wi hoap help wi fi stay foakos pahn Gaad pramis an ih help wi fi  ga wahn beta vyoo a wi prablemz. (Ps. 27:1, 14; Aks 24:15) Bot if wi waahn mek gud yoos a wi “helmit,” wi haftu put it aan pahn wi hed, noh kehr it eena wi han.

17, 18. (a) How Saytan chrai get wi fi tek aaf wi helmit? (b) How wi ku shoa dat Saytan noh fool wi wid ih laiz?

¹⁷ Saytan chrai get wi fi tek aaf wi helmit. How ih du dat? Tink bowt weh ih mi chrai du tu Jeezas. Saytan mi noa dat Jeezas mi ga di hoap fi rool oava hyoomanz. Bot Jeezas mi haftu wayt til Jehoava seh wen da di karek taim. Ahn bifoa den, ih wuda haftu sofa ahn ded. Soh Saytan mi aafa Jeezas di chaans fi rool oava hyoomanz bifoa Jehoava taim. Saytan mi seh dat if Jeezas wership ahn, ih wuda geh evriting rait deh pahn di spat. (Look 4:5-7) Jos laik dat, Saytan noa dat Jehoava aafa wi mateeryal benifits eena di nyoo werl. Bot wi haftu wayt, ahn wi mait haftu sofa difrent chalenjiz eena di meentaim. Soh Saytan chrai temp wi wid di chaans fi injai da kaina laif now. Ih waahn wi goh afta dehn mateeryal benifits fos—fi ga evriting an injai it now. Saytan waahn wi put di Kingdom sekant plays eena wi laif.—Mach. 6:31-33.

¹⁸ Wahn yong sista weh naym Kiana, weh 20 yaaz oal, noh mek Saytan fool shee ataal wid ih laiz. Shee seh: “Ah noa dat Gaad Kingdom da di onli hoap wi ga weh wahn fiks aala wi prablemz.” How dis hoap afek how shee tink an ak? Shee seh: “Di hoap a Paradais help mi fi put werli goalz eena di rait plays. Ah noh chrai mek moni fahn mi talents ner chrai praspa eena dis werl. Insted, Ah yooz mi taim an enerji fi du spirichwal tingz.”

19, 20. How wi ku du beta eena wi yoos a di Baibl?

¹⁹ Di saiz a di soad weh wahn Roaman soalja mi yooz rong di taim Paal mi rait ih leta da-mi bowt 20 inchiz lang. Dis da-mi di soad dehn yooz eena han-tu-han batl. Wahn reezn wai di Roaman soalja dehn mi soh gud wid dehn soad da-mi bikaaz dehn praktis evri day.

²⁰ Di apasl Paal seh dat Gaad Werd da laik wahn soad weh Jehoava gi wi. Bot wi haftu laan how fi yooz it wid skilz wen wi difen wi bileef dehn, er wen wi di karek di way wi tink. (2 Kor. 10:4, 5; 2 Tim. 2:15) How yu ku du beta wid yu skilz? Sebastian, weh 21 yaaz oal, seh: “Soh faar, Ah rait dong wan vers fahn evri chapta eena mi Baibl reedin. Ah mek wahn lis a mi fayvrit vers dehn. Da way deh, Ah feel laik Ah di tink moa ahn moa laik Jehoava.” Daniel, weh wi mi taak bowt lee erliya, seh: “Wen Ah di du mi Baibl reedin, Ah pik owt sohn vers weh Ah tink wahn help peepl Ah meet eena di minischri. Ah fain dat peepl rispan eena wahn gud way wen dehn si dat yu lov weh di Baibl ga fi seh ahn dat yu di du yu bes fi help dehn.”

21. Wai wi noh need fi frayd fi Saytan ahn di deemon dehn?

²¹ Wi laan fahn wi yong bradaz ahn sistaz eena dis aatikl dat wi noh need fi feel frayd fi Saytan ahn di deemon dehn. Dehn powaful, bot dat noh meen dat wi kyaahn fait dehn. Ahn, dehn ku ded. Soon, joorin Jeezas towzn yaa rool, ih wahn chroa dehn eena prizn. Den, ih wahn dischrai dehn fareva. (Rev. 20:1-3, 7-10) Soh wi noa wi enimi, how ih werk, an ih plan dehn. Bot wid Jehoava help, wi ku stan op schrang-wan gens ahn!