1. Weh too tingz wi ku bee shoar bowt Jehoava?

JEHOAVA GAAD lov di peepl weh wership ahn, an hihn wahn aalwayz lov dehn. Hihn lov jostis tu. (Ps. 33:5) Soh wi ku bee shoar a too tingz: (1) Ih hert Jehoava wen peepl chreet ih servant dehn bad.(2) Hihn wahn mek shoar dat dehn geh jostis. Eena di fos aatikl a dis seeriz, * wi mi laan dat di Laa weh Gaad mi gi Izrel chroo Moaziz mi bays pahn lov. Ih promoat jostis fi evribadi, eevn dehn wan weh kyaahn protek dehnself. (Deut. 10:18) Da Laa shoa humoch Jehoava kay bowt peepl weh wership ahn.

2. Weh kweschanz wi wahn ansa eena dis aatikl?

² Wen di Kristyan kangrigayshan mi fos staat op eena di yaa 33 C.E., di Laa weh Jehoava mi gi Moaziz mi kom tu wahn en. Yu tink dat mi meen dat di Kristyan kangrigayshan neva mi wahn ga di protekshan a wahn komanment weh bays pahn lov ahn weh promoat jostis? No! Akchwali, dehn mi ga wahn nyoo komanment. Eena dis aatikl, wi wahn fers diskos wat da dis nyoo komanment. Den wi wahn ansa dehnya kweschan: Wai wi ku seh dat dis komanment bays pahn lov? Wai wi ku seh dat ih promoat jostis? An anda dis komanment, how dehn wan weh ga atariti sopoas tu chreet adaz?

3. Laik weh menshan da Galayshanz 6:2, weh “di komanment weh Jeezas Krais gi” inklood?

³ Reed Galayshanz 6:2. Kristyanz deh anda “di komanment weh Jeezas Krais gi.” Jeezas neva rait dong wahn lis a laa fi ih falowaz, bot ih mi gi dehn inschrokshanz, koman, ahn prinsipl fi liv bai. “Di komanment weh Jeezas Krais gi” da evriting weh hihn mi teech. Eena di neks paragraaf dehn, wi wahn laan moa bowt dis komanment.

4-5. Eena weh wayz Jeezas mi teech, ahn wen hihn mi teech?

⁴ Eena weh wayz Jeezas mi teech? Fos, ih teech peepl bai weh ih mi seh. Fi hihn werdz mi ga powa kaaz ih mi tel di chroot bowt Gaad, ih mi teech di reel meenin a laif, an ih mi shoa dat Gaad Kingdom da di onli ting weh ku geh rid a hyooman sofarin. (Look 24:19) Jeezas mi aalso teech bai egzampl. Di way hihn mi liv shoa ih falowaz how dehn mi sopoas tu liv dehn laif.—Jan 13:15.

⁵ Wen Jeezas mi teech? Hihn mi teech joorin ih minischri pahn di ert. (Mach. 4:23) Ih mi aalso kantinyu fi teech ih falowaz fi wahn lee wail afta ih rezorekshan. Fi egzampl, hihn mi apyaa tu wahn groop a disaipl, maybi oava 500 a dehn, an ih mi gi dehn di koman fi mek disaipl. (Mach. 28:19, 20; 1 Kor. 15:6) Az hed a di kangrigayshan, Jeezas mi kantinyu fi gi ih disaipl dehn inschrokshanz eevn afta ih mi gaahn bak da hevn. Fi egzampl, bowt rong di yaa 96 C.E., Krais mi dairek di apasl Jan fi gi inkorijment ahn kongsl tu anointid Kristyanz.—Kol. 1:18; Rev. 1:1.

6-7. (a) Wehpaat wi ku fain Jeezas teechin dehn? (b) How wee obay di komanment weh Jeezas Krais gi?

⁶ Wehpaat wi ku fain Jeezas teechin dehn? Di foa Gaspl gat een wahn lata di tingz weh Jeezas mi seh ahn du wen ih mi deh pahn di ert. Ahn di res a di Kristyan Greek Skripchaz help wi fi andastan moa bowt how Jeezas tink pahn sertn mataz, kaaz da Gaad mi mek dehn man rait dong aal weh dehn rait, ahn dehn mi “tink  di sayhn way Jeezas Krais tink.”—1 Kor. 2:16.

⁷ Di lesn dehn: Noh mata weh wi fays eena laif, Jeezas teechin ku help wi. Soh di komanment weh Jeezas Krais gi afek evriting wi du, weda wi deh hoam, da werk, da skool, er eena di kangrigayshan. Wi laan dis komanment wen wi reed ahn meditayt pahn di Kristyan Greek Skripchaz. Wi obay dis komanment wen wi fala di inschrokshanz, di koman dehn, ahn di prinsiplz weh wi fain eena di Baibl. Wen wi obay di komanment weh Jeezas Krais gi wi, wi di obay wi lovin Gaad, Jehoava, bikaaz hihn da di Wan weh teech Jeezas aal weh ih noa.—Jan 8:28.

8. Weh di komanment weh Jeezas Krais gi wi bays pan?

⁸ Wahn hows weh geh bil gud an pahn wahn salid fongdayshan mek di peepl weh liv eena it feel sayf ahn sikyoar. Sayhn way soh, wahn gud komanment weh bil pahn wahn salid fongdayshan mek dehn wan weh liv bai it er obay it feel sayf ahn sikyoar tu. Di komanment weh Jeezas Krais gi wi bil pahn di bes fongdayshan; lov. Wai wi ku seh dat?

9-10. Weh egzampl shoa dat Jeezas du tingz owta lov, ahn how wee ku kapi fi hihn egzampl?

⁹ Fos, da lov mi mek Jeezas du evriting weh ih mi du. Bikaaz Jeezas mi feel sari fi di peepl, dat mi moov ahn fi teech dehn, fi heel dehn, fi feed dehn, an eevn fi rezorek di ded. Fi feel sari er fi ga da kaina tenda kompashan, da wahn ekspreshan a lov. (Mach. 14:14; 15:32-38; Maak 6:34; Look 7:11-15) Eevn doa fi du dis tek op wahn lata taim an enerji, Jeezas mi wilin fi put ada peepl needz heda ih oan. Bot di moas impoatant way Jeezas mi shoa ih lov fi hyoomanz da-mi fi gi ih laif fi dehn.—Jan 15:13.

¹⁰ Di lesn dehn: Wee ku kapi Jeezas egzampl if wi put di needz a adaz heda wi oan. Wi ku aalso kapi Jeezas if wi laan fi ga da sayhn kaina tenda kompashan fi di peepl weh wi preech tu. Wi di kip di komanment weh Jeezas Krais gi wi, wen wi alow kompashan fi moov wi fi preech ahn teech di gud nyooz.

11-12. (a) Weh shoa dat Jehoava kay wahn lat bowt wi? (b) How wi ku kapi Jehoava lov?

¹¹ Sekant, Jeezas teech wi bowt Jehoava lov. Joorin ih minischri, Jeezas shoa humoch Jehoava kay bowt di peepl weh wership ahn. Som a di tingz weh Jeezas mi teech da-mi: (1) Eech wan a wi preshos tu wi Faada, Jehoava. (Mach. 10:31) (2) Jehoava kyaahn wayt fi welkom bak wahn laas sheep hoo ripent ahn kohn bak tu di kangrigayshan. (Look 15:7, 10) Ahn (3) Jehoava proov dat ih lov wi wen ih giv op ih Son az wahn ransom fi wi.—Jan 3:16.

¹² Di lesn dehn: How wee ku kapi Jehoava lov? (Ifee. 5:1, 2) Wi si eech wan a wi bradaz ahn sistaz az preshos, ahn wi glad fi welkom bak “wahn laas sheep” weh kohn bak tu Jehoava. (Ps. 119:176) Wi proov dat wi lov wi bradaz ahn sistaz wen wi yooz wi taim an enerji fi help dehn, espeshali wen dehn need it. (1 Jan 3:17) Wen wi chreet adaz wid lov, wi di obay di komanment weh Jeezas Krais gi wi.

13-14. (a) Akaadn tu Jan 13:34, 35, weh Jeezas mi koman ih falowaz fi du, ahn wai dis da wahn nyoo komanment? (b) How wee obay di nyoo komanment?

¹³ Terd, Jeezas koman ih falowaz fi shoa lov. (Reed Jan 13:34, 35.) Jeezas komanment da sohnting nyoo kaaz ih tel wi fi  shoa lov eena wahn way weh neva deh eena di Laa weh Gaad mi gi di Izrelait dehn. Da Laa seh dat wi mos lov wi bradaz laik how Jeezas lov wi. Dis meenz dat wi put di needz a adaz heda wi oan. Wi fi lov wi bradaz ahn sistaz eevn moa dan how wi lov wiself. Wi fi lov dehn soh moch dat wi wilin fi ded fi dehn, jos laik weh Jeezas mi du fi wee.

¹⁴ Di lesn dehn: How wi obay di nyoo komanment? Wi du dis wen wi mek sakrifais fi wi bradaz ahn sistaz. Wi lov dehn soh moch dat wi wilin fi mek big sakrifais, laik gi wi laif fi sayv dehn. Bot wi mek smaal sakrifais tu. Wi di obay di komanment weh Jeezas Krais gi wi wen wi goh owta wi way fi pik op wahn oalda brada er sista fi di meetin, er wen wi wilin fi sakrifais sohnting weh wi laik fi mek wan a wi bradaz er sistaz hapi, er wen wi tek taim aaf fahn werk fi help wid dizaasta rileef. Eena dis way, wi aalso di mek wi kangrigayshan wahn plays wehpaat evribadi feel sayf ahn sikyoar.

15-17. (a) How Jeezas akshanz shoa di way how hihn vyoo jostis? (b) How wee ku kapi Jeezas egzampl?

¹⁵ Eena di Baibl, “jostis” meen fi du weh Gaad seh rait, ahn fi du it widowt prejudis. Wai wi ku seh dat di komanment weh Jeezas Krais gi promoat jostis?

¹⁶ Fos, mek wi tink bowt how Jeezas akshanz shoa how hihn vyoo jostis. Wen Jeezas mi deh pahn di ert, di Jooish rilijos leedaz mi hayt peepl weh da neva Joo, dehn mi luk dong pahn peepl weh da-mi kaman Joo, ahn dehn mi disrispek uman. Jeezas da neva laik dat, hihn mi fyaa ahn jos wen ih mi-di deel wid adaz. Hihn mi alow peepl weh da neva Joo ahn weh mi ga fayt eena ahn fi fala hihn. (Mach. 8:5-10, 13) Hihn neva prejudis, hihn mi preech tu di rich ahn di poa. (Mach. 11:5; Look 19:2, 9) Ih neva kruwil er chreet uman bad. Hihn mi shoa rispek ahn kainis eevn tu dehn uman weh peepl mi luk dong pan er skaan.—Look 7:37-39, 44-50.

¹⁷ Di lesn dehn: Wee ku kapi Jeezas egzampl if wi vyoo evribadi hoo wi preech tu eena di sayhn way, noh mata if dehn rich er poa er wich rilijan dehn bilang tu. Di bradaz eena di kangrigayshan fala Jeezas egzampl ahn chreet uman wid rispek. Wen wi du dehnya tingz, wi di obay di komanment weh Jeezas Krais gi wi.

18-19. Weh Jeezas mi teech bowt jostis, ahn weh wee ku laan fahn weh hihn mi teech?

¹⁸ Sekant, mek wi tink bowt weh Jeezas mi teech bowt jostis. Hihn mi teech prinsiplz weh mi wahn help ih falowaz fi chreet adaz fyaa-wan. Fi egzampl, tink bowt di Goalden Rool. (Mach. 7:12) Aala wi waahn dehn chreet wi fyaa-wan. Soh wi fi chreet adaz fyaa-wan tu. If wi du dat, dat mait moov dehn fi bee kain tu wi. Bot wat if wi neva geh chreet fyaa? Jeezas mi aalso teech ih falowaz fi chros dat Jehoava “wahn gi jostis tu dehn wan weh . . . kaal owt tu ahn day ahn nait.” (Look 18:6, 7) Dehn werdz da wahn pramis, kaaz wi jos ahn fyaa Gaad si di chraiyalz weh wi di fays eena dehnya laas dayz, ahn hihn wahn kaaz jostis fi tek plays at di rait taim.—2 Tes. 1:6.

¹⁹ Di lesn dehn: Wen wi fala di prinsiplz weh Jeezas mi teech, wi wahn chreet adaz eena wahn fyaa way. An eevn if wi sofa bikaaz peepl chreet wi bad eena Saytan werl, wi ku bee shoar dat Jehoava wahn mek wi geh jostis.

20-21. (a) How peepl weh ga atariti fi chreet adaz? (b) How wahn hozban ku shoa di kaina lov Jeezas shoa, ahn how wahn pa shuda chreet ih pikni?

²⁰ Anda di komanment weh Jeezas Krais gi wi, how peepl weh ga atariti shuda chreet adaz? Sins lov da di fongdayshan a da komanment, peepl weh ga atariti fi chreet peepl weh anda dehn wid lov ahn rispek. Dehn fi memba dat Krais waahn wi shoa lov eena evriting wi du.

²¹ Eena di famili. Wahn hozban fi lov ih waif “jos laik how Krais lov di kangrigayshan.” (Ifee. 5:25, 28, 29) Wen wahn hozban put ih waif needz heda ih oan, ih di kapi Jeezas egzampl. Dis taip a lov mait bee haad fi sohn man kapi kaaz dehn neva groa op eena wahn famili weh shoa lov er weh chreet adaz fyaa. Ih mait bee haad fi mek dehn chaynj dehn bad habits, bot dehn need fi mek dehnya chaynjiz soh dat dehn ku obay di komanment weh Jeezas Krais gi wi. Wahn hozban wahn geh ih waif rispek wen ih laan fi shoa dis kaina lov. Wahn pa weh reeli lov ih pikni dehn wahn neva abyooz dehn bai weh ih seh er du. (Ifee. 4:31) Insted, ih shoa dehn dat ih lov dehn an aproov a dehn eena wayz weh mek dehn feel sayf ahn sikyoar. Dis mek wahn faada win di lov ahn chros a ih chiljren.

22. Akaadn tu 1 Peeta 5:1-3, da fi hoo di “sheep” dehn, ahn how eldaz fi chreet dehn?

²² Eena di kangrigayshan. Eldaz need fi memba dat di “sheep” dehn da noh fi dehn. (Jan 10:16; reed 1 Peeta 5:1-3.) Di ekspreshan “di flak weh Gaad gi unu” ahn “di peepl weh deh eena yu kyaa” rimain eldaz dat di sheep dehn da fi Jehoava. Hihn waahn eldaz chreet ih sheep dehn wid lov. (1 Tes. 2:7, 8) Jehoava aproov a eldaz weh  shoa lov wen dehn tek kyaa a dehn rispansabiliti az shepadz. Wen eldaz du dis, dehn win di lov ahn rispek a di bradaz ahn sistaz.

23-24. (a) Wat da di eldaz rispansabiliti wen sombadi eena di kangrigayshan komit wahn seeryos sin? (b) Weh eldaz need fi memba wen dehn di deel wid wahn sichuwayshan laik dat?

²³ Wat da di eldaz rispansabiliti wen sombadi eena di kangrigayshan komit wahn seeryos sin? Fi dehn rispansabiliti difrent fahn di rispansabiliti a di joj dehn an elda dehn weh mi deh anda di Laa weh Jehoava mi gi di nayshan Izrel. Anda da Laa, di man dehn weh mi geh apointid neva onli mi deel wid mataz weh ga fi du wid wership tu Jehoava, bot aalso kraim ahn prablemz bitween peepl. Bot anda di komanment weh Jeezas Krais gi wi, di eldaz rispansabiliti da fi deel wid di spirichwal paat a di rangdooin. Di eldaz rekonaiz dat Gaad gi di govament di rispansabiliti fi deel wid kraim ahn prablemz bitween peepl. Dat inklood di atariti fi set ponishment, weda da fi pay moni er fi goh da jayl.—Roam. 13:1-4.

²⁴ Wen sombadi eena di kangrigayshan komit wahn seeryos sin, weh di eldaz dehn du? Dehn yooz di Skripchaz fi si weh disizhan fi mek. Dehn aalso kip eena main dat di komanment weh Jeezas Krais gi wi bays pan lov. Lov moov di eldaz fi tink: Weh wi need fi du fi help enibadi eena di kangrigayshan hoo da wahn viktim a wahn seeryos sin? Wen ih kohn tu di persn weh komit di seeryos sin, da lov mek di eldaz tink bowt kweschanz laik: Hihn reeli ripentant? Wee ku help hihn fi geh bak ih spirichwal helt?

25. Weh wi wahn diskos eena di neks aatikl?

²⁵ Wi soh tankful dat wi deh anda di komanment weh Jeezas Krais gi wi! Wen eech wan a wi werk haad fi obay da komanment, ih mek di kangrigayshan wahn plays wehpaat aala wi ku feel dat di peepl rong wi lov wi, ahn dat mek wi feel sayf. Bot stil, wi di liv eena wahn werl wehpaat “wikid peepl” wahn goh “fahn bad tu wos.” (2 Tim. 3:13) Wi need fi kip pan di lukowt. How di Kristyan kangrigayshan shoa Gaad jostis wen ih di deel wid sekshwal chail abyoos? Eena di neks aatikl wi wahn ansa da kweschan.