1-2. Akaadn tu Psalm 40:5, wat da som a di gif weh Jehoava giv wi, ahn wai wi wahn diskos dehn eena dis aatikl?

JEHOAVA da wahn jenaros Gaad. Tink bowt som a di gif dehn weh hihn gi wi: di byootiful ert, weh da wahn perfek hoam fi wi; wi brayn, weh dizain eena wahn wandaful way; an ih preshos Werd, di Baibl. Bikaaz Jehoava gi wi dehnya chree gif, wi ga wahn plays fi liv, wi ku tink ahn kamyoonikayt wid adaz, ahn wi ga di ansaz tu di moas impoatant kweschan weh wi ku aks.—Reed Psalm 40:5. *

² Eena dis aatikl, wi wahn diskos moa bowt dehnya chree gif. Wen wi meditayt pahn dehnya gif, wi wahn geh fi apreeshiayt dehn ahn wi wahn waahn mek wi lovin Kriyayta, Jehoava, hapi. (Rev. 4:11) Wi wahn bee aybl fi aalso reezn beta wid peepl hoo adaz lai tu ahn weh bileev di faals teechin a evolooshan.

3. Wai di ert difrent fahn aal ada planet?

³ Wen wi luk pahn di way how Gaad mek di ert, wi laan dat hihn reeli waiz. (Roam. 1:20; Heeb. 3:4) Dehn ga ada planet weh chravl rong di son, bot no ada planet deh laik di ert bikaaz ih ga evriting weh hyoomanz need fi liv.

4. How wi ku si dat Gaad reeli waiz wen wi luk pahn di way how Hihn mek di ert? Yooz di egzampl eena di paragraaf.

⁴ Wi ku kompyaa di ert eena di yoonivers tu wahn boat owt da see. Bot dehn ga sohn impoatant difrens bitween wahn boat ahn di ert. Fi egzampl, how lang yu tink peepl  eena wahn boat wuda servaiv if dehn mi haftu projoos dehn oan aksijin, food, ahn waata an if dehn mi kyaahn chroa dehn ways owta di boat? Di peepl eena da boat wuda ded kwik. Pahn di ada han now, di ert ku kip bilyanz a peepl an animal alaiv. Ih projoos aal di aksijin, food, ahn waata weh wi need, ahn wi aalwayz gat inof a dehn tingz. Eevn doa aal di ways stay pahn di ert, ih da stil wahn byootiful plays fi liv. How dat pasabl? Jehoava kriyayt di ert eena wahn way dat di ways weh ih projoos ku geh yooz fi sohnting els. Wi wahn diskos how wi ku si Jehoava wizdom eena di aksijin saikl ahn di waata saikl.

5. Wat da di aksijin saikl, ahn weh dat proov?

⁵ Aksijin da wahn gyas weh hyoomanz an animalz need fi liv. Akaadn tu risaach, hyoomanz an animalz yooz bowt wahn honjrid bilyan ton a aksijin eena wan yaa. Wen dehn tek een aksijin dehn projoos wahn gyas weh naym karbon daiyoksaid. Bot aksijin aalwayz deh fi hyoomanz an animalz, ahn dehn neva ga tu moch karbon daiyoksaid. How dat pasabl? Ih pasabl bikaaz Jehoava aalso kriyayt aal difrent plaant, big ahn smaal, weh tek een karbon daiyoksaid ahn projoos aksijin. Bikaaz dis saikl projoos di ayaa weh wi breed, wi ku agree wid di werdz weh deh da Aks 17:24, 25: “Hihn [Gaad] gi laif ahn bret tu evriting.”

6. Wat da di waata saikl, ahn weh dat proov? (Si di baks “ Di Waata Saikl Da Wahn Gif Fahn Jehoava.”)

⁶ Di ert deh di perfek distans fahn di son. If di ert mi deh wahn lee bit kloasa tu di son, aal di waata mi wahn ivaporayt ahn di ert mi wahn bee reeli hat ahn notn kuda liv pan it. If di ert mi deh wahn lee bit ferda fahn di son, aal di waata pahn di ert mi wahn freez ahn di ert mi wahn kova wid snoa an ais. Bikaaz Jehoava mi put di ert eena di perfek spat, di ert waata saikl ku mek laif kantinyu. Di son waam op waata weh deh eena di see ahn weh deh pahn lan an ih ivaporayt di waata fi mek ih ton intu klowd. Di amonk a waata weh di son ivaporayt eena wan yaa da moa dan di amonk a waata eena aal di lagoon dehn pahn di ert. Afta di waata ivaporayt, ih stay eena di ayaa fi bowt ten dayz bifoa ih kohn bak dong az rayn er snoa. Den di waata ron bak tu di see ahn di waata saikl staat agen. Jehoava dizain dis saikl soh dat di ert ku aalwayz ga waata. Dis proov dat Jehoava powaful ahn waiz.—Job 36:27, 28; Eccl. 1:7.

7. Wat da som a di wayz wi ku shoa dat wi apreeshiayt di gif weh menshan eena Psalm 115:16?

⁷ Weh ku help wi fi bee moa tankful fi wi amayzin planet an aal di gud tingz weh deh pan it? (Reed Psalm 115:16.)  * Wan way da fi mek wi meditayt pahn di tingz weh Jehoava mek. Dat wahn mek wi waahn tel Jehoava how tankful wi tankful fi di tingz weh ih gi wi. Ahn wi shoa dat wi apreeshiayt di ert wen wi kip di ayrya wehpaat wi liv az kleen az pasabl.

8. Wai wi ku seh dat wi brayn dizain eena wahn amayzin way?

⁸ Di hyooman brayn dizain eena wahn amayzin way. Wen yu mi deh eena yu ma beli, yu brayn groa akaadn tu di way how ih dizain. Ahn towznz a nyoo brayn sel mi-di faam evri minit! Peepl weh stodi di brayn seh dat wahn adolt brayn gat een bowt 100 bilyan speshal kaina nerv sel. Dehnya sel faam fi wee brayn  weh way bowt 3.3 pong (1.5 kg). Kansida jos wahn fyoo a di amayzin tingz weh di brayn ku du.

9. Wat proov dat di abiliti fi taak da wahn gif fahn Gaad?

⁹ Di abiliti fi taak da wahn mirakl. Tink bowt weh hapm wen yu taak. Evri werd weh yu seh, yu brayn haftu sen mesij fi mek bowt 100 mosl eena yu tong, chroat, lip, jaa, ahn ches werk tugeda. Fi mek yu ku prononks wahn werd eena di karek way, aala dehnya mosl haftu moov eena wahn spesifik aada. Wen ih kohn tu di abiliti fi taak difrent langwij, wahn stodi weh poblish eena 2019 shoa dat nyoo baan baybi ku rekonaiz ahn pik op wan wan werdz. Dis stodi sopoat weh wahn lata peepl weh du risaach bileev—dat wi baan wid di abiliti fi rekonaiz ahn laan difrent langwij. Wi abiliti fi taak da wahn gif fahn Gaad fi chroo!.—Ex. 4:11.

10. How wi ku shoa dat wi apreeshiayt di abiliti fi taak?

¹⁰ Wan way wi ku shoa dat wi apreeshiayt di abiliti fi taak da wen wi eksplayn tu peepl hoo bileev eena evolooshan wai wee bileev dat Gaad kriyayt evriting. (Ps. 9:1; 1 Peet. 3:15) Peepl weh bileev eena evolooshan bileev dat di ert an evri livin ting pan it neva dizain bot ih jos hapm bai aksident. If wi yooz di Baibl ahn som a di points weh wi diskos eena dis aatikl, wi wahn ku difen wi hevnli Faada. Wi wahn ku eksplayn tu peepl hoo wilin fi laan wai wee kanvins dat Jehoava da di Kriyayta a hevn an ert.—Ps. 102:25; Isa. 40:25, 26.

11. Wat da wan reezn wai wi brayn amayzin?

¹¹ Wi memri da sohnting amayzin. Eena di paas wahn raita mi tek wahn ges ahn seh dat di hyooman brayn ga di abiliti fi memba inof infamayshan fi ful moa dahn 20 milyan buk. Nowadayz, peepl hoo stodi di brayn tink dat wi ku memba moch moa dan dat. Weh speshal abiliti dat gi wi?

12. How wi abiliti fi laan how fi liv separayt wi fahn animalz?

¹² Owta aal di livin kreechaz pahn di ert, onli hyoomanz ga di abiliti fi laan how fi liv. Wi du dis wen wi kansida weh hapm tu wi eena di paas. Sayka dis, wi ku liv op tu wahn beta standad ahn wi ku chaynj di way wi tink ahn liv wi laif. (1 Kor. 6:9-11; Kol. 3:9, 10) Wi ku eevn chrayn wi kanshans fi rekonaiz di difrens bitween weh rait ahn weh rang. (Heeb. 5:14) Wi ku laan fi shoa lov, kompashan, ahn mersi tu adaz. Ahn wi ku laan fi fala Jehoava sens a jostis.

13. Laik weh Psalm 77:11, 12 seh, how wi ku shoa dat wi apreeshiayt wi memri?

¹³ Wan way how wi shoa dat wi apreeshiayt wi memri da wen wi chrai fi memba aal di taimz wen Jehoava help ahn komfert wi eena di paas. Dis wahn bil wi kanfidens eena ahn, an wi wahn noa fi shoar dat hihn wahn aalso help wi eena di fyoocha.  (Reed Psalm 77:11, 12; 78:4, 7) * Wahn nada way da wen wi memba di gud tingz weh ada peepl du fi wi ahn wen wi tankful fi weh dehn du. Peepl weh stodi mental helt fain owt dat moas a di taim peepl hoo tankful feel moa hapi. Ih aalso gud fi mek wi fala Jehoava egzampl ahn chooz fi ferget sertn tingz. Fi egzampl, Jehoava ga wahn perfek memri, bot if wi ton fahn fi wi sin dehn, hihn wahn fergiv wi ahn hihn wahn ferget di mistayk dehn weh wi mek. (Ps. 25:7; 130:3, 4) Ahn hihn waahn wi du di saym tu adaz wen dehn sari fi di mistayk weh dehn du weh hert wi.—Mach. 6:14; Look 17:3, 4.

14. How wi ku shoa dat wi apreeshiayt di wandaful gif a wi brayn?

¹⁴ Wi ku shoa dat wi apreeshiayt di wandaful gif a wi brayn wen wi yooz it fi aana di Wan weh gi wi it. Som peepl mait yooz dehn brayn fi sohn selfish reezn, laik fi disaid fi dehnself weh gud ahn weh bad. Bot bikaaz Jehoava da di wan weh kriyayt wi, ih reeznabl fi ekspek dat fi hihn standadz way beta dan eni standadz weh wi ku set fi wiself. (Roam. 12:1, 2) Wi ga pees wen wi obay Jehoava. (Isa. 48:17, 18) Ahn wi laan bowt weh Jehoava waahn wi du wid wi laif. Wi fi bring aana tu wi Kriyayta ahn Faada ahn mek ahn prowd a wi.—Prov. 27:11.

15. How di gif a di Baibl shoa humoch Jehoava lov hyoomanz?

¹⁵ Di Baibl da wahn lovin gif fahn Gaad. Wi hevnli Faada mi giv sohn faytful man ih hoali spirit soh dat dehn kuda mi rait di Baibl bikaaz hihn kay wahn lat bowt fi hihn pikni weh deh pahn di ert. Chroo di Baibl Jehoava ansa di moas impoatant kweschanz weh wee ku aks, laik: Weh wi kohn fram? Wat da di perpos a laif? Ahn weh wahn hapm eena di fyoocha? Jehoava  waahn aala fi hihn chiljren laan di ansaz tu dehndeh kweschanz, soh hihn mek man chranslayt di Baibl intu wahn lata langwij. Tudeh day, di hoal Baibl er paat a it avaylabl eena moa dan 3,000 langwij! Peepl chranslayt ahn mek di Baibl avaylabl moa dan eni ada buk weh peepl mek. Noh mata wehpaat peepl liv er weh langwij dehn taak, moas peepl ku reed di Baibl eena dehn oan langwij.—Si di baks “ Di Chranslayshan a di Baibl Eena Difrent African Langwij.”

16. Laik weh Machyu 28:19, 20 seh, how wi ku shoa dat wi apreeshiayt di Baibl?

¹⁶ Wi ku shoa dat wi apreeshiayt di Baibl wen wi reed it evriday, wen wi meditayt pahn weh ih teech, ahn wen wi du wi bes fi yooz weh wi laan. Pahn tap dat, wi shoa Gaad humoch wi apreeshiayt di Baibl wen wi du aal weh wi kud fi tel az moch peepl az pasabl bowt weh di Baibl seh.—Ps. 1:1-3; Mach. 24:14; reed Machyu 28:19, 20.

17. Weh aal gif wi kansida eena dis aatikl, ahn weh wi wahn diskos eena di neks aatikl?

¹⁷ Eena dis aatikl wi kansida som a di gif dehn weh Gaad gi wi, laik wi byootiful hoam pahn di ert, wi amayzin brayn, ahn Gaad Werd di Baibl. Bot dehn ga ada gif weh Jehoava gi wi weh wi kyaahn si. Wi wahn diskos dehndeh gif weh wi kyaahn si eena di neks aatikl.