1-2. Weh chalenjiz wahn lata Witnisiz fays?

DI APASL Paal mi inkorij Timoti fi du ih bes ahn finish di werk weh Gaad giv ahn fi du. (2 Tim. 4:5) Wee fala Paal advais ahn du di saym ting weh ih tel Timoti fi du, bot sohntaim dat noh eezi. Lata wi bradaz ahn sistaz fain it haad fi tek paat eena di preechin werk bikaaz dehn frayd. (2 Tim. 4:2) Fi egzampl, som a wi bradaz liv da sohn plays wehpaat di govament ban wi werk. Bot dehn stil preech eevn doa dehn noa dehn mait goh da jayl!

² Jehoava peepl deel wid lata prablemz weh ku diskorij dehn. Fi egzampl, lata dehn haftu werk haad jos fi get di tingz weh dehn famili need. Dehn wuda laik fi du moa eena di minischri, bot da di en a di week dehn noh ga no enerji. Adaz kyaahn du az moch eena dehn servis tu Jehoava bikaaz dehn ga wahn seeryos helt prablem er dehn di geh oal, ahn som kyaahn eevn lef dehn hows. Adaz feel dat Jehoava noh lov dehn. Mary, * wahn sista weh liv da di Middle East, seh: “Ai haftu werk reeli haad fi kanchroal mi feelinz wen Ah feel diskorij ahn dat mek Ah feel taiyad imoashanali. Den Ah wuda feel gilti bikaaz Ah kyaahn du moch eena di minischri.”

3. Weh wi wahn diskos eena dis aatikl?

³ Noh mata weh prablemz wi mait fays, Jehoava ku gi wi di schrent weh wi need fi kip di du az moch az wi kud eena fi hihn servis. Bifoa wi diskos how Jehoava ku help wi, mek wi si how Jehoava mi help Paal ahn Timoti fi finish di werk weh hihn gi dehn fi du eevn doa dehn gaahn chroo chalenjiz.

4. Weh chalenjiz Paal mi fays?

⁴ Paal mi fays lata chalenjiz. Bot hihn mi need Jehoava help wen ih enimiz mi beet ahn, wen dehn chroa ahn eena jayl, an eevn wen dehn chrai kil ahn. (2 Kor. 11:23-25) Paal neva shaym fi seh dat sohntaim hihn mi feel diskorij. (Roam. 7:18, 19, 24) Hihn mi aalso haftu deel wid wahn helt prablem weh da-mi laik “wahn prikl” eena ih badi, ahn hihn mi reeli waahn Gaad tek it weh fan ahn.—2 Kor. 12:7, 8.

5. Weh Paal kuda mi du eevn doa hihn mi fays wahn lata chalenjiz?

⁵ Jehoava mi gi Paal di schrent fi kantinyu du ih bes eena di minischri eevn doa hihn mi-di goh chroo lata chalenjiz. Noatis weh aal Paal kuda mi du. Fi egzampl, wail hihn mi deh anda hows ares da Roam, hihn mi preech tu lata peepl, inkloodin sohn govament ofishal. (Aks 28:17; Fil. 4:21,22) Hihn mi aalso preech tu lata di soalja dehn weh gyaad di king. (Aks 28:30, 31; Fil. 1:13) Joorin da saym taim, Gaad mi yooz Paal fi rait letaz weh mi help chroo Kristyanz eena di paas an eevn op tu tudeh. Aalso, Paal egzampl mi schrentn di kangrigayshan da Roam weh mi “preech di werd a Gaad moa ahn moa widowt frayd.” (Fil. 1:14) Eevn doa Paal mi kyaahn du az moch az hihn mi waahnt, hihn mi stil du di bes ih kud eena Jehoava servis. Ahn sayka dat, “di gud nyooz spred aal oava.”—Fil. 1:12.

6. Akaadn tu 2 Korintyanz 12:9, 10, weh mi help Paal fi finish di werk weh Gaad giv ahn fi du?

⁶ Paal mi riyalaiz dat da Jehoava giv ahn di schrent fi du evriting weh hihn mi du eena ih servis tu ahn. Paal mi seh dat Gaad powa “schranga wen [hihn] week.” (Reed 2 Korintyanz 12:9, 10.) Jehoava mi gi Paal ih hoali spirit fi finish di werk weh hihn giv ahn fi du eevn doa ih mi en op da jayl, ih mi fays persikyooshan, an ih mi fays ada chalenjiz.

7. Weh prablemz kuda mi mek it haad fi mek Timoti du ih asainment?

⁷ Wen Timoti mi yonga, hihn yoostu chravl wid Paal ahn hihn mi aalso haftu pen pahn Gaad powa fi du ih minischri. Timoti yoostu chravl wid Paal pahn sohn lang chrip fi goh vizit an inkorij  di kangrigayshan dehn. Paal yoostu sen ahn bai ihself fi goh vizit di kangrigayshan dehn tu. (1 Kor. 4:17) Timoti kuda mi feel dat hihn neva gud inof fi du aala dat. Maybi dat da wai Paal mi tel ahn: “Noh mek enibadi luk dong pahn yu bikaaz yu yong.” (1 Tim. 4:12) Pahn tap a dat, Timoti mi “aalwayz sik.” (1 Tim. 5:23) Bot Timoti mi noa dat Jehoava powaful hoali spirit wuda mi giv ahn di schrent weh ih need fi preech di gud nyooz ahn fi serv ih bradaz ahn sistaz.—2 Tim. 1:7.

8. How Jehoava schrentn fi hihn peepl tudeh?

⁸ Tudeh, Jehoava gi fi hihn peepl “powa weh hyoomanz noh naamali gat” soh dat dehn ku kantinyu fi stay faytful tu ahn. (2 Kor. 4:7) Mek wi diskos foa tingz weh Jehoava gi wi fi schrentn wi ahn fi help wi stay faytful tu ahn. Dehndeh foa tingz da: pryaa, di Baibl, wi bradaz ahn sistaz, ahn wi minischri.

9. How pryaa ku help wi?

⁹ Pryaa schrentn wi. Da Ifeezhanz 6:18, Paal inkorij wi fi pray tu Gaad “eena evri sichuwayshan.” Gaad wahn ansa wi pryaaz ahn gi wi di schrent weh wi need. Jonnie, wahn brada weh liv da Bolivia, mi feel how Jehoava help ahn wen hihn mi ga lata prablemz. Fi hihn waif ahn fi hihn payrents mi geh sik bad saym taim. Jonnie mi fain it haad fi du evriting weh ih mi haftu du fi tek kayr a di chree a dehn. Ih ma mi ded, an ih mi tek wahn lang taim fi mek ih waif an ih pa get oava dehn siknis. Jonnie seh, “Wen Ai mi deh anda wahn lata presha, ih mi help mi wahn lat wen Ah pray tu Jehoava ahn tel ahn how Ah feel.” Jehoava mi gi Jonnie di schrent weh ih mi need fi bayr op. Ronald, wahn elda da Bolivia, mi fain owt dat ih ma ga kyansa. Shee ded wan mont afta hihn mi fain dat owt. Weh mi help hihn joorin da taim? Hihn seh: “Wen Ah pray tu Jehoava, Ah poar owt mi haat ahn tel ahn how Ah feel. Ai noa dat hihn andastan mi beta dan enibadi els, eevn beta dan how Ai andastan miself.” Sohntaim wi feel laik wi kyaahn handl aala wi prablemz er wi noh mait noa weh wi shuda pray fa. Bot Jehoava invait wi fi pray tu ahn eevn wen wee wiself noh andastan weh wi tink er how wi feel.—Roam. 8:26, 27.

10. Akaadn tu Heebrooz 4:12, wai ih soh impoatant fi reed di Baibl ahn meditayt pahn weh wi reed?

¹⁰ Di Baibl schrentn wi. Paal mi pen pahn di Skripchaz fi schrent ahn komfert, ahn wee need fi du di saym ting. (Roam. 15:4) Wen wi reed Gaad Werd ahn meditayt pan it, Jehoava ku yooz ih hoali spirit fi help wi andastan how di Baibl ku help wi. (Reed Heebrooz 4:12.) Ronald, weh wi menshan eena di laas paragraaf, seh: “Ai reeli hapi dat Ai mek it wahn habit fi reed wahn paat a di Baibl evri nait ahn meditayt pahn Jehoava kwalitiz ahn how hihn tek kayr a ih peepl. Dis reeli schrentn mi.”

11. How di Baibl mi schrentn wahn sista weh da wahn wido?

¹¹ Wen wi meditayt pahn Gaad Werd, ih ku help wi fi ga di karek atichood tuwaadz wi prablemz. Tink bowt how di Baibl mi help wahn sista wen fi shee hozban mi ded. Wahn elda mi sojes dat shee kuda laan sohn gud lesn if ih reed di buk a Joab. Fers, wen shee mi staat reed it,  shee mi kwik fi kritisaiz Joab fi di way how hihn mi-di tink. Eena fi shee main shee tel ahn: “Joab! Stap foakos pahn aala yu prablem dehn!” Bot den shee mi riyalaiz dat fi shee atichood mi veri simila tu Joab atichood. Dis mi help shee fi chaynj di way ih tink an ih mi schrentn ahn fi bayr op eevn doa shee mi stil feel sad bikaaz ih hozban mi ded.

12. How Jehoava yooz wi bradaz ahn sistaz fi schrentn wi?

¹² Wi bradaz ahn sistaz schrentn wi. Jehoava ku aalso yooz wi felo Kristyanz fi schrentn wi. Paal mi reeli waahn vizit ih spirichwal bradaz ahn sistaz soh dat dehn kuda mi “inkorij wan anada.” (Roam. 1:11, 12) Mary, weh wi menshan bifoa, reeli lov spen taim wid ih bradaz ahn sistaz. Shee seh: “Sohntaim, di bradaz ahn sistaz weh Jehoava yooz fi inkorij mi noh eevn noa weh prablemz Ah di deel wid. Dehn seh sohnting inkorijin er sen mi wahn kyaad, ahn da mi egzakli weh Ah mi need. Wen Ah oapm op tu ada sistaz weh gaahn chroo simila prablemz, ih help mi wahn lat an Ah laan fahn fi dehn ekspeeryens. Di eldaz aalso mek Ah feel laik Ai da wahn impoatant paat a di kangrigayshan.”

13. How wi ku schrentn wan anada da wi meetin dehn?

¹³ Wi kangrigayshan meetin dehn da wan a di bes plays fi inkorij wan anada. Wen yu goh da meetin, yu ku tel adaz dat yu lov dehn ahn dat yu apreeshiayt weh dehn du, ahn dat wahn inkorij dehn. Fi egzampl, bifoa wahn meetin mi staat, wahn elda weh naym Peeta mi tel wahn sista weh mi marid tu wahn man weh da neva wahn Witnis: “Ih reeli inkorijin fi si yu ya da di meetin. Yu aalwayz ga yu siks chiljren redi ahn dehn pripyaa fi koment joorin di meetin.” Shee mi veri tankful ahn wid tyaaz eena ih aiy ih tel di brada: “Ai mi reeli need fi hyaa dat tudeh.”

14. How di minischri help wi?

¹⁴ Wi minischri schrentn wi. Wen wi preech tu peepl, wi feel gud weda dehn lisn er nat. (Prov. 11:25) Wahn sista weh naym Stacy mi feel how di minischri schrentn ahn. Wen sombadi eena ih famili mi geh disfeloship, shee mi veri sad an ih mi kip di aks ihself if shee kuda mi du eniting moa fi help di persn. Stacy mi fain it haad fi tink bowt eniting els. Weh mi help ahn fi feel beta joorin da taim? Di minischri! Wen shee gaan owt gaahn preech, ih mi foakos moa pahn di peepl eena di teritori weh mi need fi shee help. Shee seh: “Joorin da taim, Jehoava mi gi mi wahn Baibl styoodent weh mi mek faas proagres. Dat mi inkorij mi wahn lat. Di ting weh mi help mi di moas eena mi laif da di minischri.”

15. Weh wi laan fahn weh Mary mi seh?

¹⁵ Sohntaim bikaaz a dehn sichuwayshan, wahn brada er sista mait feel laik dehn kyaahn du moch eena di minischri. If dat da how yoo feel, memba dat Jehoava hapi wen wi du wi bes. Kansida di egzampl a Mary, weh wi menshan erliya. Wen shee mi moov tu wahn plays weh di peepl mi taak wahn difrent langwij, shee mi feel laik ih kudn du moch fi help. Shee seh, “Fi wahn wail, aal Ai kuda mi du da gi wahn lee koment, er reed wahn skripcha, er giv owt wahn chrak eena feel servis.” Sayka dat, shee mi feel laik ih kudn du az moch az adaz weh kuda mi taak di langwij gud. Bot ih mi chaynj ih tinkin. Shee mi staat tu riyalaiz dat Jehoava  kuda mi yooz shee eevn doa shee kudn taak di langwij gud. Shee mi seh, “Di chroot weh wi teech fahn di Baibl simpl an eezi fi andastan, ahn da chroot da weh chaynj peepl laif.”

16. Weh ku schrentn wi bradaz ahn sistaz weh waahn goh preech bot kyaahn lef dehn hows?

¹⁶ Jehoava noa dat som a wi waahn goh preech, bot wi kyaahn lef wi hows. Soh hihn ku help wi fi preech tu di wan dehn weh kohn ten tu wi er fi preech tu wi dakta ahn ners dehn. If wi kompyaa weh wi di du now wid weh wi kuda mi du eena di paas, wi onli wahn diskorij wiself. Bot if wi riyalaiz how Jehoava di help wi now, wi wahn ga di schrent weh wi need fi bayr op anda eni chraiyal ahn stil bee hapi.

17. Akaadn tu Ecclesiastes 11:6, wai wi shuda kip aan di preech eevn if wi feel laik nobadi di lisn tu wi mesij?

¹⁷ Wee mait plaant wahn lata seed ahn noh noa wich wan wahn bee di wan weh wahn groa. (Reed Ecclesiastes 11:6.) Fi egzampl, Barbara, wahn sista weh deh eena ih 80ʼs, aalwayz du foan witnisin ahn leta raitin. Eena wan a fi shee leta, shee mi put een wahn kapi a The Watchtower a Maach 1, 2014, weh mi gat een di aatikl “What God Has Done for You.” Shee neva noa dat shee mi-di sen da leta tu wahn marid kopl weh yoostu bee Jehoava Witnisiz. Dehn mi reed di magazeen oava ahn oava. Di hozban mi feel laik if Jehoava mi-di taak tu hihn persnali. Di kopl mi staat tu goh da di meetin dehn, ahn dehn mi disaid fi kohn bak tu Jehoava afta moa dan 27 yaaz. Dat mi reeli inkorij Barbara an ih mi schrentn ahn bikaaz shee mi si how da wan leta weh shee rait mi reeli help sohnbadi!

18. Weh wi need fi du fi geh schrent fahn Jehoava?

¹⁸ Jehoava gi wi wahn lata tingz fi schrentn wi laik pryaa, di Baibl, wi bradaz ahn sistaz, ahn di minischri. Wen wi mek gud yoos a dehnya tingz, wi di shoa Hihn dat wee noa dat ih ku help wi ahn dat ih waahn help wi. Soh mek wi aalwayz pen pahn wi hevnli Faada, bikaaz “hihn schrentn di wan dehn weh laayal tu ahn wid dehn hoal haat.”—2 Chron. 16:9.