1. Weh mi praabli sopraiz yu wen yu mi fers chrai taak tu peepl bowt weh di Baibl seh?

YOO memba di fers taim yu mi riyalaiz dat weh yu mi-di laan da-mi di chroot? Ih mi soh eezi fi andastan evriting weh yu mi-di laan fahn di Baibl! Yu mi tink dat evribadi mi wahn hapi fi laan di tingz weh yu mi-di laan. Ahn yu mi noa fi shoar dat di tingz weh yu laan fahn di Baibl mi wahn gi yu wahn beta laif now ahn wahn eevn beta laif eena di fyoocha. (Ps. 119:105) Yu mi geh soh eksaitid fi taak bowt di chroot wid yu frenz ahn faamli. Bot weh mi hapm? Wel, yu mi shak fi fain owt dat wahn lata dehn neva waahn hyaa notn weh yu ga fi seh.

2-3. Weh moas a di peepl eena Jeezas taim mi tink bowt hihn an ih mesij?

² Wi shudn bee sopraiz wen peepl noh lisn tu di mesij weh wi preech. Wen Jeezas mi deh ya pahn di ert, hihn mi du wahn lata miraklz weh mi proov dat Jehoava mi deh wid ahn. Fi egzampl, Jeezas mi rezorek Lazaros. Bot stilyet, moas peepl neva lisn tu ahn. Non a di peepl weh mi persikyoot Jeezas kuda mi seh dat da mirakl neva hapm. Bot eevn soh, di Jooish leedaz stil neva bileev dat Jeezas da-mi di Mesaiya. Dehn mi eevn waahn kil Jeezas ahn Lazaros!—Jan 11:47, 48, 53; 12:9-11.

³ Jeezas mi noa dat moas peepl neva mi wahn bileev dat hihn da-mi di Mesaiya. (Jan 5:39-44) Hihn mi tel wahn groop a Jan di Baptis disaiplz: “Di persn weh noh fain no reezn fi dowt da hoo mee wahn bee hapi.” (Mach. 11:2, 3, 6) Bot wai dehnya peepl neva put fayt eena Jeezas?

4. Weh wi wahn diskos eena dis aatikl?

 ⁴ Eena dis aatikl ahn di neks wan, wi wahn luk pahn wahn lata difrent wayz wai lata peepl eena di fers senchri neva put fayt eena Jeezas. Ahn wi wahn aalso si wai wahn lata peepl tudeh noh lisn tu di mesij weh wi preech. Bot moa impoatant, wi wahn laan wai wi ku ga schrang fayt eena Jeezas soh dat notn ku eva stap wi fahn bee fi hihn falowaz.

5. Wai sohn peepl mi tink dat Jeezas kudn bee di Mesaiya?

⁵ Wahn lata peepl neva put fayt eena Jeezas sayka wehpaat ih kohn fram. Dehn mi noa dat hihn da-mi wahn reeli gud teecha ahn dat hihn mi du wahn lata miraklz. Bot dehn mi jos si ahn az di son a wahn poa kyaapenta. Aalso, hihn da-mi fahn Nazaret, wahn siti weh wahn lata peepl mi tink neva impoatant. Eevn Natanyel, hoo mi kohn fi bee wan a Jeezas disaipl, mi seh: “Eniting gud ku kohn fahn Nazaret?” (Jan 1:46) Hihn praabli neva laik di siti wehpaat Jeezas mi liv. Er hihn mosi mi tink bowt di prafesi da Micah 5:2, weh mi seh dat di Mesaiya mi wahn baan da Betlihem, noh Nazaret.

6. Weh shuda mi help di peepl eena Jeezas taim fi riyalaiz dat hihn da-mi di Mesaiya?

⁶ Weh di Skripchaz seh? Aizaiya mi prafesai dat Jeezas enimiz neva mi wahn pay atenshan “tu di deetaylz a [di Mesaiya] jenarayshan.” (Isa. 53:8) Lata Baibl prafesi gat een deetaylz laik dehndeh. If di peepl mi tek di taim fi get di karek infamayshan, den dehn mi wahn fain owt dat Jeezas mi did baan da Betlihem ahn dat hihn da-mi wan a King Dayvid disendant. (Look 2:4-7) Soh di plays weh Jeezas mi baan mi mach op wid di prafesi weh deh da Micah 5:2. Soh den, wat da-mi di prablem? Di peepl mi hori fi jomp tu wahn kankloozhan. Dehn neva get aala di faks. Ahn sayka dat, dehn mi rijek Jeezas.

7. Wai lata peepl tudeh noh waahn ga notn fi du wid Jehoava peepl?

⁷ Wee di si di saym prablem tudeh? Yes. Moas a Jehoava peepl noh rich er papyula, an adaz si dehn az peepl weh onli ga “wahn baysik ejukayshan.” (Aks 4:13) Som peepl feel laik Gaad peepl kyaahn teech adaz bowt di Baibl bikaaz dehn noh grajuayt fahn wahn fansi rilijos skool. Adaz seh dat Jehoava Witnisiz da wahn “wait man rilijan.” An ada peepl eevn seh dat di Witnisiz noh bileev eena Jeezas. Bikaaz dehnya peepl noh noa di chroot bowt wi, dehn noh waahn ga notn fi du wid wi.

8. Akaadn tu Aks 17:11, weh peepl shuda du if dehn waahn noa hoo da Gaad servant dehn tudeh?

⁸ Weh ku help peepl fi laan di chroot bowt Jehoava servant dehn? Peepl need fi geh di karek infamayshan. Dat da weh di Gaspl raita Look mi mek op ih main fi du. Hihn mi werk haad fi “egzamin aala dehnya tingz.” Hihn mi waahn ih reedaz “chros di tingz weh [dehn] mi laan” bowt Jeezas. (Look 1:1-4) Di Jooish peepl da aynshent Bereeya da-mi jos laik Look. Wen dehn mi fers hyaa di gud nyooz bowt Jeezas, dehn mi saach eena di Heebroo Skripchaz fi mek shoar dat weh dehn mi-di hyaa da-mi di chroot. (Reed Aks 17:11.) Peepl tudeh need fi geh aala di faks tu. Dehn haftu kompyaa di tingz weh dehn laan bowt Jehoava peepl wid weh di Skripchaz seh. Dehn aalso need fi stodi weh Jehoava peepl  du eena fi wee taimz. If dehn du gud risaach, dehn noh wahn mek notn fool dehn, nat eevn prejudis er tingz weh ada peepl seh.

9. Weh mi hapm wen Jeezas rifyooz fi du wahn mirakl fi shoa dat hihn da fahn Gaad?

⁹ Eena Jeezas taim, som a di peepl mi waahn hihn du moa dan jos teech. Dehn mi aks ahn fi proov dat hihn da-mi di Mesaiya ahn du “wahn mirakl fi shoa dat hihn da fahn Gaad.” (Mach. 16:1) Maybi dehn mi jos waahn hihn du dat bikaaz a weh dehn mi reed da Daniel 7:13, 14. Di tingz weh Jeezas mi teech shuda mi bee inof fi kanvins dehn dat hihn da-mi di Mesaiya. Bot bikaaz hihn mi rifyooz fi du di mirakl fi dehn, dehn mi rijek ahn.—Mach. 16:4.

10. How Jeezas mi mek Aizaiya prafesi bowt di Mesaiya kohn chroo?

¹⁰ Weh di Skripchaz seh? Di prafit Aizaiya mi seh dis bowt di Mesaiya: “Hihn noh wahn kwaaril ner showt, ahn nobadi wahn hyaa fi hihn vais pahn di mayn schreet dehn.” (Isa. 42:1, 2) Jeezas mi du fi hihn minischri widowt kaal eni atenshan tu ihself. Ih neva bil eni big er fansi templ, an ih neva wayr speshal rilijos kloaz er aks peepl fi yooz eni impoatant taitl fi rifaa tu ahn. Wen Jeezas mi deh pahn chraiyal, dehn mi waahn ih du wahn mirakl fi chrai impres King Herod, bot Jeezas mi rifyooz fi du it eevn doa fi hihn laif mi deh eena daynja. (Look 23:8-11) An eevn doa Jeezas mi du sohn miraklz, di moas impoatant ting tu hihn da-mi fi preech di gud nyooz. Hihn mi tel ih disaiplz, “dis da wai Ai deh ya.”—Maak 1:38.

11. Wat da sohn rang aidyaaz peepl ga tudeh?

¹¹ Wee di si di saym prablem tudeh? Yes. Peepl reeli impres wen dehn si di big rilijos bildin dehn weh gat een lata ekspensiv dekorayshan, di rilijos leedaz weh gat impoatant taitl, ahn sohn fansi serimoni weh noh eevn menshan eena di Baibl.  Lata rilijos servis noh teech peepl bowt Jehoava an ih perpos dehn. Bot peepl weh kohn da fi wee meetin dehn laan weh Jehoava waahn wi du. Wi Kingdom Haal dehn kleen ahn dehn noh gat een no ekspensiv dekorayshan. Di wan dehn weh di tek di leed noh wayr no speshal kloaz ahn noh aks peepl fi rifaa tu dehn eena eni speshal kaina way. Ahn di tingz weh wi teech ahn bileev kohn fahn di Baibl. Bot eevn soh, wahn lata peepl noh waahn ga notn fi du wid wi bikaaz dehn tink dat fi wee way a wership tu simpl ahn di tingz weh wee teech da noh weh dehn waahn hyaa.

12. Akaadn tu Heebrooz 11:1, 6, weh wi shuda bays wi fayt pan?

¹² Weh wahn help wi fi kip wi fayt? Dis da weh di apasl Paal mi tel di Kristyanz weh mi-di liv da Roam: “Peepl haftu hyaa di mesij bifoa dehn ku ga fayt. Ahn di mesij weh dehn hyaa kohn fahn di werd bowt Krais.” (Roam. 10:17) Soh if wahn serimoni noh bays pahn di Baibl ih noh wahn schrentn wi fayt, noh mata if ih fansi er if ih impres wi. Weh schrentn wi fayt da wen wi stodi di Baibl. Wee haftu mek shoar dat wi ga schrang fayt bays pahn di chroo nalij bikaaz “widowt fayt, wahn persn kyaahn pleez Gaad.” (Reed Heebrooz 11:1, 6.) Dat da wai wi noh need Jehoava fi gi wi wahn speshal sain er fi du wahn mirakl fi proov dat wi fain di chroot. Wans wi du wahn deep stodi a di Baibl, dat wahn bee inof fi proov tu wiself dat wi ga di chroot an fi geh rid a eni dowt.

13. Wai lata peepl mi rijek Jeezas?

¹³ Eena Jeezas day, Jan di Baptis disaipl dehn mi kanfyooz bikaaz Jeezas disaipl dehn neva faas. Jeezas mi eksplayn dat dehn neva ga no reezn fi faas wail hihn mi stil alaiv. (Mach. 9:14-17) Eevn soh, di Farisee dehn an ada peepl weh mi deh gens Jeezas mi kandem ahn bikaaz  hihn neva fala fi dehn kostom ahn chradishan. Dehn mi geh beks wen hihn mi chooz fi heel sik peepl pahn di Sabat. (Maak 3:1-6; Jan 9:16) Dehn mi prowd fi klaym dat dehn obay di Laa bowt di Sabat, bot dehn neva ga no prablem di du bizniz eena di templ. Dehn mi beks wen Jeezas kandem dehn fi dat. (Mach. 21:12, 13, 15) Ahn di peepl weh Jeezas mi preech tu eena di sinagag da Nazaret mi geh beks bikaaz Jeezas mi yooz sohn egzampl fahn di paas fi shoa dehn dat dehn mi selfish ahn dat dehn neva ga fayt. (Look 4:16, 25-30) Lata peepl mi rijek Jeezas bikaaz hihn neva du weh dehn mi tink hihn mi wahn du.—Mach. 11:16-19.

14. Wai Jeezas mi kandem hyooman chradishan weh neva gree wid di Skripchaz?

¹⁴ Weh di Skripchaz seh? Eena di buk a Isaiah, Jehoava seh: “Dehnya peepl aana mi wid dehn mowt, bot dehn haat deh faar fahn mi. Dehn wership noh meen notn tu mi kaa dehn di teech fi dehn oan roolz weh dehn mek op laik ih kohn fahn Gaad.” (Isa. 29:13) Jeezas mi rait fi kandem hyooman chradishanz weh neva gree wid di Skripchaz. Peepl weh tink dat hyooman roolz ahn chradishanz moa impoatant dan di Skripchaz rijek Jehoava ahn di wan weh hihn mi sen az di Mesaiya.

15. Wai lata peepl tudeh noh laik Jehoava Witnisiz?

¹⁵ Wee di si di saym prablem tudeh? Yes. Lata peepl geh opset bikaaz Jehoava Witnisiz noh selibrayt bertday ahn Krismos an ada haliday weh noh gree wid di Baibl. Adaz geh beks bikaaz Jehoava Witnisiz noh selibrayt eni nashanal haliday er bikaaz dehn noh fala finaral kostom weh noh gree wid Gaad Werd. Peepl weh geh beks wid Jehoava Witnisiz bikaaz a dehnya ting mait reeli bileev dat Gaad aksep di way how dehn di wership ahn. Bot dehn kyaahn pleez Gaad if dehn prifaa di werl chradishanz oava di klyaa teechinz weh wi fain eena di Baibl.—Maak 7:7-9.

16. Akaadn tu Psalm 119:97, 113, 163-165, weh wi haftu du ahn weh wi haftu avoid?

¹⁶ Weh wahn help wi fi kip wi fayt? Wi need fi ga schrang lov fi Jehoava laa ahn prinsipl dehn. (Reed Psalm 119:97, 113, 163-165.) Wen wi lov Jehoava, wi wahn rijek eni chradishan weh hihn noh laik. Wi noh wahn mek notn bee moa impoatant dan wi lov fi Jehoava.

17. Weh lata peepl eena Jeezas day mi ekspek di Mesaiya fi du?

¹⁷ Som peepl eena Jeezas day mi waahn wahn nyoo govament. Dehn neva hapi wid di kruwil Roaman govament, ahn dehn mi ekspek di Mesaiya fi set dehn free. Bot wen dehn mi chrai mek Jeezas dehn king, hihn mi rifyooz. (Jan 6:14, 15) Adaz, inkloodin di prees dehn, mi frayd dat Jeezas wuda chrai chaynj di govament. Dat wuda mek di Roamanz geh beks ahn tek weh di powa weh dehn mi gi dehndeh prees. Soh lata di Jooz mi rijek Jeezas bikaaz dehn mi wori bowt palitiks.

18. Weh difrent Baibl prafesi bowt di Mesaiya wahn lata peepl mi ignoar?

¹⁸ Weh di Skripchaz seh? Lata prafesi seh dat di Mesaiya wuda bee wahn maiti Wariya, bot sohn ada prafesi seh dat fers ih mi wahn haftu ded fi wi sin dehn. (Isa. 53:9, 12) Soh wai di Jooz mi ga rang aidyaaz bowt di Mesaiya? Lata peepl eena  Jeezas day mi ignoar eni a di prafesi dehn weh neva pramis fi fiks dehn prablemz rait away.—Jan 6:26, 27.

19. Weh rang aidyaaz mek lata peepl rijek wi mesij tudeh?

¹⁹ Wee di si di saym prablem tudeh? Yes. Lata peepl tudeh geh beks wid wi bikaaz wi noh tek paat eena palitiks. Dehn ekspek wi fi voat wen ilekshan taim kohn. Bot wee noa dat if wi chooz wahn hyooman roola fi rool oava wi, den wi di rijek Jehoava. (1 Sam. 8:4-7) Som peepl mait tink dat wi shuda bil skool ahn haaspital ahn du ada tingz weh wuda help di kamyooniti. Dehn rijek wi mesij bikaaz wi werk haad fi preech insteda chrai fiks aala di prablemz weh di werl di goh chroo rait now.

20. Akaadn tu weh Jeezas mi seh da Machyu 7:21-23, weh shuda bee di moas impoatant ting tu wi?

²⁰ Weh wahn help wi fi kip wi fayt? (Reed Machyu 7:21-23.) Di moas impoatant ting wee ku du rait now da di werk weh Jeezas koman wi fi du. (Mach. 28:19, 20) Wi noh waahn geh dischraktid di chrai fiks aala di prablemz eena di werl. Wi lov peepl ahn wi kay bowt di prablemz weh dehn di goh chroo, bot wi noa dat di bes way fi help wi naybaz da fi teech dehn bowt Gaad Kingdom ahn fi help dehn fi bee Jehoava fren.

21. Weh wi waahn du now?

²¹ Eena dis aatikl, wi mi diskos foa tingz weh mi mek lata peepl rijek Jeezas eena fi hihn day ahn weh ku mek peepl rijek Jeezas falowaz tudeh. Eena di neks aatikl, wi wahn diskos foa moa tingz weh ku mek sohnbadi rijek Jeezas. Now, wi waahn du evriting weh wi kud fi kip wi fayt schrang soh dat wi neva rijek Jeezas!