1-2. Weh wahn profesa mi seh, ahn weh wi wahn diskos eena dis aatikl?

MILYANZ a peepl tudeh klaym seh dehn bileev eena Jeezas, bot dehn noh aksep di tingz weh hihn mi teech. (2 Tim. 4:3, 4) In fak, wahn profesa mi seh dis eena wahn buk weh ih mi rait: “If dehn mi ga wahn nada man laik Jeezas monks wi tudeh weh seh tingz di way how Jeezas mi seh tingz . . . , wee wuda rijek da man tudeh di saym way peepl mi rijek Jeezas too towzn yaaz agoa? . . . Di ansa da yes.”

² Wen Jeezas mi deh pahn di ert, lata peepl mi hyaa fi hihn teechinz ahn si di miraklz weh ih mi du. Bot dehn mi rifyooz fi put fayt eena ahn. Wai? Eena di laas aatikl, wi mi diskos foa reezn wai peepl mi rijek Jeezas sayka di tingz weh ih mi seh ahn du. Mek wi diskos foa moa reezn wai peepl rijek Jeezas. Wi wahn aalso diskos wai peepl rijek Jeezas falowaz tudeh, ahn how wee ku mek shoar dat notn eva stap wee fahn serv Jehoava.

3. Weh Jeezas mi du weh mi mek sohn peepl rijek ahn?

³ Wen Jeezas mi deh pahn ert, hihn mi spen taim wid aal kaina peepl. Hihn mi eet wid rich ahn powaful peepl, bot hihn mi aalso spen wahn lata taim wid poa ahn helples peepl. Pahn tap a dat, hihn mi ga lata kompashan fi peepl weh adaz mi kaal ‘sinaz.ʼ Som a di prowd peepl mi rijek Jeezas kaaz a weh hihn mi du. Dehn mi aks Jeezas disaipl dehn: “Wai unu eet ahn jrink wid di taks kalekta ahn sina dehn?” Den Jeezas ansa dehn ahn seh: “Peepl  weh helti noh goh si wahn dakta, da onli peepl weh sik goh. Ai neva kohn fi raichos peepl, bot Ai kohn fi tel sinaz dat dehn need fi ripent.”—Look 5:29-32.

4. Akaadn tu di prafit Aizaiya, how di Jooz shuda mi ekspek peepl fi chreet di Mesaiya?

⁴ Weh di Skripchaz seh? Lang bifoa di Mesaiya mi kohn, di prafit Aizaiya mi seh dat peepl eena di werl neva mi wahn aksep ahn. Di prafesi mi seh: “Peepl mi hayt ahn, an dehn mi rijek ahn . . . Da mi laik if wi ton wi bak soh dat wi kudn si ih fays. Peepl mi hayt ahn, an wi mi chreet ahn laik if ih neva impoatant.” (Isa. 53:3) Di skripcha seh dat “peepl” mi wahn rijek di Mesaiya, soh di Jooz eena Jeezas taim shuda mi ekspek peepl fi rijek Jeezas.

5. Weh lata peepl tink bowt Jeezas falowaz tudeh?

⁵ Wee di si di saym prablem tudeh? Yes. Lata rilijos leedaz hapi wen peepl weh impoatant, rich, er waiz akaadn tu di werl jain dehn kangrigayshan. Dehndeh rilijos leedaz alow peepl laik dat fi deh eena dehn cherch eevn doa dehndeh peepl du tingz weh Jehoava hayt. Ahn di rilijos leedaz luk dong pahn Jehoava faytful ahn kleen servant dehn bikaaz peepl a dis werl noh si dehn az impoatant. Paal mi seh dat Gaad mi wahn chooz di wan dehn weh peepl “luk dong pan.” (1 Kor. 1:26-29) Bot eech wan a Jehoava faytful servant dehn preshos tu Jehoava.

6. Weh Jeezas mi seh da Machyu 11:25, 26, ahn how wee ku fala fi hihn egzampl?

⁶ Weh wahn help wi fi neva stap serv Jehoava? (Reed Machyu 11:25, 26.) Noh luk pahn Gaad peepl di way di werl luk pahn dehn. Andastan an aksep dat Jehoava onli yooz hombl peepl fi du fi hihn wil. (Ps. 138:6) Ahn tink bowt weh aal Jehoava yooz fi hihn peepl fi du, eevn doa di werl tink dat dehn noh ejukaytid ahn dehn noh waiz.

7. Wai Jeezas mi kaal di Farisee dehn hipokrit, ahn weh dehn mi du bowt dat?

⁷ Jeezas neva frayd fi kandem di rilijos leedaz eena fi hihn day bikaaz dehn neva teech peepl fi wership Jehoava di rait way. Fi egzampl, hihn mi shoa evribadi dat di Farisee dehn da-mi hipokrit bikaaz dehn mi kay moa bowt how fi wash dehn han dan bowt how fi tek kayr a dehn payrents. (Mach. 15:1-11) Jeezas disaipl dehn mosi mi feel sopraiz bai weh hihn mi seh, soh dehn mi aks ahn: “Yoo mi noa dat di Farisee dehn mi feel ofendid sayka weh yu mi seh?” Jeezas mi ansa dehn ahn seh: “Mai Faada da hevn wahn root op evri plaant weh hihn neva plaant. Lef dehn loan. Dehn da sohn blain leedaz. If wahn blain man leed wahn nada blain man, di too a dehn wahn jrap eena wahn hoal.” (Mach. 15:12-14) Eevn doa di rilijos leeda dehn mi beks wid Jeezas bikaaz a di tingz weh hihn mi seh, hihn stil neva stap tel di chroot.

8. How Jeezas mi shoa dat Gaad noh aksep aal rilijos bileef?

⁸ Jeezas mi aalso shoa evribadi dat som rilijos teechinz neva chroo. Hihn neva seh dat Gaad aksep aal rilijos bileef. Rada, hihn mi eksplayn dat lata peepl wuda deh pahn di waid road weh leed tu dischrokshan, bot onli wahn fyoo wuda deh pahn di naro road weh leed tu laif. (Mach. 7:13, 14) Hihn mi mek it klyaa dat som peepl wuda luk laik dehn di serv Gaad, bot dehn noh reeli di serv ahn.  Hihn mi seh: “Unu wach owt fi di faals prafit dehn weh luk laik inosent sheep, kaaz dehn da laik wulf weh wuda waahn tayr unu tu peesiz. Bai dehn akshanz yu wahn noa hoo dehn.”—Mach. 7:15-20.

9. Wat da som a di faals rilijos teechinz weh Jeezas mi ekspoaz?

⁹ Weh di Skripchaz seh? Di Baibl mi prafesai dat di Mesaiya wuda ga wahn schrang lov fi Jehoava hows. (Ps. 69:9; Jan 2:14-17) Bikaaz a da lov, Jeezas mi ekspoaz lata faals rilijos teechinz ahn chradishanz. Fi egzampl, di Farisee dehn mi bileev dat wen sombadi ded, dehn soal kantinyu fi liv. Bot Jeezas mi teech dat wen sombadi ded da laik dehn di sleep. (Jan 11:11) Di Sadyusee dehn neva bileev eena di rezorekshan, bot Jeezas mi rezorek ih fren Lazaros. (Jan 11:43, 44; Aks 23:8) Di Farisee dehn mi teech dat Gaad don disaid evriting weh wi wahn du, bot Jeezas mi teech dat hyoomanz ku chooz weda er nat dehn wahn serv Gaad.—Mach. 11:28.

10. Wai lata peepl rijek wi tudeh?

¹⁰ Wee di si di saym prablem tudeh? Yes. Lata peepl rijek wi tudeh kaaz wee yooz di Baibl fi shoa peepl dat som a di rilijos teechinz weh dehn bileev da noh chroo. Rilijos leedaz teech dehn falowaz dat Gaad ponish wikid peepl da hel. Dehn yooz da faals teechin fi kanchroal peepl. Wee da Jehoava servant dehn, ahn wi wership wahn lovin Gaad, soh wi help peepl andastan dat da teechin da noh chroo. Dehndeh rilijos leedaz aalso teech dat di soal kantinyu liv afta sombadi ded. Bot if da teechin mi chroo, den nobadi mi wahn need wahn rezorekshan. Wee proov dat dis teechin noh deh eena di Baibl. An eevn doa lata rilijan teech dat Gaad don disaid evriting weh wi wahn du heda taim, wee teech dat peepl ga free wil ahn dehn ku chooz if dehn wahn serv Gaad er nat. Weh di rilijos leedaz du wen wi ekspoaz dehndeh faals teechin? Moas a di taim dehn geh beks wid wi!

11. Akaadn tu weh Jeezas mi seh da Jan 8:45-47, weh Gaad waahn ih peepl du?

 ¹¹ Weh wahn help wi fi neva stap serv Jehoava? If wi lov di chroot, wi haftu bileev an obay weh Gaad teech wi. (Reed Jan 8:45-47.) Wee wahn neva rijek di chroot laik weh Saytan di Devl mi du. Wee wahn neva du eniting weh noh gree wid weh wi bileev. (Jan 8:44) Gaad waahn mek ih peepl “hayt eniting weh wikid ahn hoal aan tu weh gud,” jos laik weh Jeezas mi du.—Roam. 12:9; Heeb. 1:9.

12. Wai lata Jooz mi rijek Jeezas bikaaz a how ih mi ded?

¹² Wat da wahn nada reezn wai som a di Jooz mi rijek Jeezas? Paal mi seh: “Wee preech dat Krais mi ded pahn di stayk. Ahn dis da sohnting haad fi mek di Jooz aksep.” (1 Kor. 1:23) Wai wahn lata di Jooz mi rijek Jeezas bikaaz a how ih mi ded? Wel, sins Jeezas mi ded pahn wahn taacha stayk, dehn mi si ahn az wahn kriminal ahn wahn sina. Ahn soh dehn mi rifyooz fi bileev dat hihn da-mi di Mesaiya.—Deut. 21:22, 23.

13. Weh di peepl weh mi rijek Jeezas neva waahn aksep?

¹³ Di Jooz weh mi rijek Jeezas neva aksep dat hihn mi inosent, dat di evidens gens ahn mi faals, ahn dat dehn neva chreet ahn fyaa. Di joj dehn eena di Jooish Sopreem Koat mi hori kohn tugeda fi joj Jeezas. Dehn neva kay bowt jostis ahn dehn neva fala di laa dehn bowt how fi du wahn chraiyal. (Look 22:54; Jan 18:24) Di koat neva joj Jeezas fyaa wen dehn mi hyaa di akyoozayshan ahn di evidens gens ahn. Dehn mi aalso chrai fi fain “faals evidens gens Jeezas, soh dat dehn kuda mi put ahn tu det.” Wen dat neva werk, di hai prees mi chrai geh Jeezas fi seh sohnting rang soh dat dehn kuda mi seh dat ih gilti. Dis neva leegal ataal! (Mach. 26:59; Maak 14:55-64) An afta Jeezas mi geh rayz op bak fahn di ded, dehndeh wikid joj mi pay di  Roaman soalja dehn weh mi-di gyaad ih toom “wahn gud amonk a moni” fi tel lai bowt wai di toom mi emti.—Mach. 28:11-15.

14. Weh di Skripchaz mi prafesai bowt how di Mesaiya mi wahn ded?

¹⁴ Weh di Skripchaz seh? Aldoa lata Jooz eena Jeezas day neva ekspek dat di Mesaiya mi wahn haftu ded, noatis weh di Skripchaz mi prafesai: “Hihn mi giv op ih laif, ahn peepl mi tink dat hihn da wahn sina; hihn mi pay fi lata peepl sinz, ahn hihn mi step een fi di sinaz.” (Isa. 53:12) Soh eevn doa Jeezas mi ded laik wahn sina, dat shudn a mi gi di Jooz wahn reezn fi rijek ahn.

15. Wat da som a di tingz weh peepl seh bowt Jehoava Witnisiz weh mek sohn peepl rijek dehn?

¹⁵ Wee di si di saym prablem tudeh? Yes! Dehn mi akyooz Jeezas bays pahn faals evidens, ahn dehn mi kandem ahn far it. Ahn peepl tudeh di du di saym ting tu Jehoava Witnisiz. Fi egzampl, da di United States bitween 1930 ahn 1950, dehn mi ga lata koat kays fi difen wi freedom fi wership Gaad. Som a di joj dehn mi prejudis gens wi. Da Quebec, Canada, di cherch ahn di govament mi werk tugeda fi chrai stap wi werk. Lata poblishaz gaahn da jayl jos bikaaz dehn mi taak tu dehn naybaz bowt Gaad Kingdom. Da Germany, di Nazi govament mi kil wahn lata faytful yong bradaz. Tudeh day, di govament da Russia seh dat ih daynjaros fi taak bowt di Baibl. Dehn seh dat lata wi bradaz gilti a dat, ahn soh dehn put dehn eena prizn. Dehn eevn ban di New World Translation of the Holy Scriptures eena di Russian langwij ahn seh dat da daynjaros infamayshan bikaaz ih gat een Jehoava naym.

16. Akaadn tu 1 Jan 4:1, wai wi shudn bileev di lai dehn weh peepl seh bowt Jehoava servant dehn?

¹⁶ Weh wahn help wi fi neva stap serv Jehoava? Laan di faks. Eena di Sermon pahn di Mongt, Jeezas mi waan ih falowaz dat sohn peepl mi wahn “tel aal kaina wikid lai” pahn dehn. (Mach. 5:11) Dehndeh lai kohn fahn Saytan. Hihn mek peepl weh hayt di chroot spred aal kaina lai bowt peepl weh lov di chroot. (Rev. 12:9, 10) Wi haftu rijek dehndeh lai. Wi noh waahn alow notn fi fraitn wi ahn stap wi fahn serv Gaad er mek wi fayt geh week.—Reed 1 Jan 4:1.

17. How di tingz weh mi hapm tu Jeezas jos bifoa ih ded kuda mi mek sohn peepl rijek ahn?

¹⁷ Jos bifoa Jeezas mi ded, wan a ih 12 apasl dehn mi bichray ahn. Wahn nada apasl mi disoan Jeezas chree taim, an aala ih apasl dehn mi lef ahn. (Mach. 26:14-16, 47, 56, 75) Bot Jeezas neva sopraiz. Hihn mi eevn prafesai dat dat mi wahn hapm. (Jan 6:64; 13:21, 26, 38; 16:32) Peepl kuda mi rijek Jeezas afta dehn mi si dat. Dehn kuda mi seh, ‘If dat da how Jeezas apasl dehn bihayv, Ai noh waahn ga notn fi du wid dehn peepl!ʼ

18. Wat da som a di prafesi dehn weh mi kohn chroo jos bifoa Jeezas mi ded?

¹⁸ Weh di Skripchaz seh? Honjridz a yaaz bifoa Jeezas mi kohn tu di ert, Jehoava mi prafesai dat sohnbadi wuda bichray di Mesaiya fi 30 pees a silva. (Zech. 11:12, 13) Di persn weh mi wahn bichray Jeezas wuda mi bee wan a ih kloas fren. (Ps. 41:9) Di prafit Zakaraiya mi aalso rait: “Atak di shepad, ahn mek di sheep skyata.” (Zech. 13:7) Peepl weh mi sinsyaa neva mi wahn rijek Jeezas  wen dehnya tingz hapm. Insted, dehn fayt wuda mi geh schranga wen dehn si aala dehndeh prafesi di kohn chroo.

19. Weh peepl wid di rait haat kandishan wahn riyalaiz?

¹⁹ Wee di si di saym prablem tudeh? Yes. Eena fi wee taim, sohn Witnisiz lef di chroot, ton apastayt, ahn chrai ton adaz weh fahn di chroot tu. Dehn spred negitiv ripoat ahn tel lai bowt Jehoava Witnisiz eena nyoozpaypa, pahn di rayjo, pahn TV, ahn pahn di Intanet. Bot peepl weh ga di rait haat kandishan noh faal intu dehndeh chrap. Insted, dehn riyalaiz dat di Baibl mi prafesai dat dehndeh tingz mi wahn hapm.—Mach. 24:24; 2 Peet. 2:18-22.

20. Weh wi ku du soh dat peepl weh lef di chroot noh chrik wi? (2 Timoti 4:4, 5)

²⁰ Weh wahn help wi fi neva stap serv Jehoava? If wi waahn kip wi fayt schrang, wi haftu stodi regyula, pray aal di taim, ahn stay bizi eena di werk weh Jehoava gi wi fi du. (Reed 2 Timoti 4:4, 5.) If wi ga fayt, wi noh wahn geh frayd wen wi hyaa negitiv ripoat bowt Jehoava Witnisiz. (Isa. 28:16) Wi lov fi Jehoava, fi ih Werd, ahn fi wi bradaz wahn help wi fi kip wi fayt schrang soh dat peepl weh lef di chroot kyaahn chrik wi.

21. Eevn doa moas peepl tudeh rijek wi mesij, weh wi noa fi shoar?

²¹ Eena Jeezas taim, lata peepl mi rijek ahn, bot lata peepl mi aksep ahn. Eevn wan a di joj eena di Jooish Sopreem Koat ahn “wahn big krowd a prees” mi aksep ahn. (Aks 6:7; Mach. 27:57-60; Maak 15:43) Saym way soh, milyanz a peepl tudeh disaid fi fala Jeezas. Wai? Bikaaz dehn noa an lov di chroot weh dehn fain eena di Skripchaz. Gaad Werd seh: “Di wan dehn weh lov yu laa wahn ga lata pees; notn ku mek dehn stombl.”—Ps. 119:165.