1-2. Wen sohnting chaynj eena wi laif, wai sohn skripchaz geh fi bee moa impoatant tu wee?

 WEN wahn kopl geh marid, dehn lisn tu wahn Baibl taak weh ga fi du wid marij. Di skripchaz weh dehn diskos eena dis taak da notn nyoo tu dehn. Bot fahn now aan, dehnya skripchaz wahn bee impoatant tu dehn. Wai? Bikaaz now di too a dehn wahn di aplai dehnya skripchaz az wahn marid kopl.

² Da di sayhn ting wen wahn Kristyan kopl ga pikni. Fi wahn lata yaaz, dehn mait hyaa difrent taak weh diskos bowt how fi rayz chiljren. Bot now di advais eena dehndeh taak wahn bee moa impoatant tu dehn bikaaz now dehn ga dehn oan chiljren fi rayz. Dat da wahn big rispansabiliti! Wen tingz chaynj eena wi laif, fi shoar sertn skripchaz geh fi bee moa impoatant tu wi. Dis da wan reezn wai servants a Jehoava reed di Skripchaz ahn meditayt pan it. Da jos laik how Jehoava mi tel di kingz a Izrel fi du “evri day” a dehn laif.—Deut. 17:19.

3. Weh wi wahn diskos eena dis aatikl?

³ Unu payrents, unu ga wahn wandaful privilij az Kristyanz fi teech unu chiljren bowt Jehoava. Bot unu fi du moa dan jos teech dehn faks bowt Gaad, unu fi help  dehn ga schrang lov fi hihn. Weh yoo ku du fi teech yu chiljren fi ga da schrang lov fi Jehoava? Eena dis aatikl, wi wahn diskos foa Baibl prinsiplz weh ku help yoo az wahn payrent. (2 Tim. 3:16) Wi wahn aalso si how Kristyan payrents benifit wen dehn aplai Baibl prinsiplz.

4. Wat da wan prinsipl weh ku help payrents teech dehn chiljren fi lov Jehoava? (Jaymz 1:5)

⁴ Prinsipl 1: Luk tu Jehoava fi gaidans. Aks Jehoava fi gi yu di wizdom weh yu need fi help yu chiljren ga schrang lov fi hihn. (Reed Jaymz 1:5.) Hihn da di bes Persn weh yu ku geh advais fram. Dehn ga wahn lata reezn wai. Mek wi kansida too reezn. Fers, Jehoava ga di moas ekspeeryens az wahn payrent. (Ps. 36:9) Ahn sekant, yu ku aalwayz benifit fahn di waiz advais weh hihn giv.—Isa. 48:17.

5. (a) Weh kaina help Jehoava aaganaizayshan provaid fi payrents? (b) Laik weh di veedyo shoa, weh yu laan fahn how Brada ahn Sista Amorim rayz dehn pikni?

⁵ Chroo fi hihn Werd an ih aaganaizayshan, Jehoava gi payrents wahn lata infamayshan fahn di Baibl weh ku help dehn rayz dehn chiljren fi lov hihn. (Mach. 24:45) Fi egzampl, yoo ku fain wahn lata praktikal advais eena di aatikl seeriz weh naym “Help fi di Famili.” Fi wahn lata yaaz, dis seeriz yoostu deh eena di Awayk! magazeen weh wi print bot now yu ku fain it pahn wi websait. Pahn tap a dat, dehn ga wahn lata veedyo pahn jw.org weh ku help payrents fi aplai Baibl prinsiplz wen dehn di rayz dehn pikni. *—Prov. 2:4-6.

6. How wahn pa feel bowt di advais weh hihn an ih waif geh fahn Jehoava aaganaizayshan?

⁶ Wahn lata payrents seh dat dehn reeli graytful fi di help weh Jehoava provaid fi dehn chroo ih aaganaizayshan. Joe, weh da wahn pa, seh: “Fi rayz chree pikni eena di chroot noh eezi ataal. Mee ahn mi waif aalwayz aks Jehoava fi help. Ahn wi feel laik wi aalwayz ga wahn aatikl er wahn veedyo weh kom owt jos di  rait taim fi help wi deel wid wateva sichuwayshan wi di fays. Wi luk tu Jehoava fi advais an ih aalwayz help wi.” Joe an ih waif fain dat di aatikl ahn veedyo dehn reeli help dehn chilren fi jraa kloasa tu Jehoava.

7. Wai ih impoatant fi mek payrents du dehn bes fi set wahn gud egzampl fi dehn chiljren? (Roamanz 2:21)

⁷ Prinsipl 2: Bee wahn gud egzampl. Chiljren pay kloas atenshan tu weh dehn payrents du, ahn moas a di taim dehn kapi dehn. Af koars, no payrent perfek. (Roam. 3:23) Eevn soh, waiz payrents du dehn bes fi set wahn gud egzampl fi dehn chiljren. (Reed Roamanz 2:21.) Wahn pa seh: “Dehn da laik sponj weh soak op evriting. Dehn mek wi noa wen wi noh di praktis weh wi teech dehn fi du.” If wi waahn wi chiljren lov Jehoava, dehn need fi si dat fi wee lov fi Jehoava schrang.

8-9. Weh yoo laan fahn weh Andrew an Emma seh?

⁸ Dehn ga wahn lata wayz how payrents ku teech dehn chiljren fi lov Jehoava. Wahn yong brada weh naym Andrew, weh 17 yaaz oal, seh: “Mai payrents teech mi dat ih reeli impoatant fi pray. Evri nait mi pa wuda pray wid mi eevn if Ah wuda don seh mi oan pryaa. Dehn wuda aalwayz rimain mee ahn mi lee sista: ‘Yu ku taak tu Jehoava az moch az yu waahn.ʼ Bikaaz a dat, pryaa reeli impoatant tu mee. Now ih eezi fi mek Ah pray ahn feel dat Jehoava da wahn Pa weh lov mee.” Payrents, aalwayz memba dat yu lov fi Jehoava ku help yu pikni fi lov hihn tu.

⁹ Kansida Emma egzampl. Wen fi shee pa mi abandan dehn, hihn mi oa wahn lata moni tu ada peepl ahn fi shee ma mi haftu pay dehn bak. Emma seh: “Dehn mi ga lata taimz wen mi ma neva ga inof moni bot shee mi aalwayz taak bowt how Jehoava tek kayr a ih servant dehn. Ai kuda mi si bai di way shee liv ih laif dat shee mi reeli bileev dat. Mai ma mi praktis weh ih preech.” Wat da di lesn? Payrents ku set wahn gud egzampl eevn eena haad sichuwayshanz.—Gal. 6:9.

10. Weh difrent apachooniti Izrelait payrents mi ga fi taak tu dehn chiljren bowt Jehoava? (Deuteronomy 6:6, 7)

¹⁰ Prinsipl 3: Taak tu yu chiljren regyula. Jehoava mi tel Izrelait payrents fi teech dehn chiljren bowt hihn pahn wahn regyula baysis. (Reed Deuteronomy 6:6, 7.) Dehndeh payrents mi ga wahn lata apachooniti joorin di day fi taak tu dehn chiljren ahn teech dehn fi lov Jehoava. Fi egzampl, wahn lee Izrelait bwai wuda spen wahn lata taim wid ih pa joorin di day di plaant er di bring een di haavis. Ih sista mait spen moas a di day di help ih ma di soa, di nit, ahn di du ada howswerk. Wail payrents ahn chiljren werk tugeda, dehn ku taak bowt wahn lata impoatant tingz. Fi egzampl, dehn ku taak bowt how gud Jehoava gud ahn bowt how hihn help di famili.

11. Wen da wan apachooniti weh Kristyan payrents ga fi taak wid dehn chiljren?

¹¹ Tudeh, laif difrent fahn eena di paas. Eena wahn lata plays, payrents kyaahn spen wahn lata taim joorin di day wid dehn chiljren. Di payrents mait deh da werk, ahn di pikni mait deh da skool. Soh bikaaz a dat, payrents need fi chrai haad fi fain taim fi taak tu dehn chiljren. (Ifee. 5:15, 16; Fil. 1:10) Famili wership  da wan a di bes apachooniti fi du dis. Wahn yong brada weh naym Alexander seh: “Mai pa aalwayz mek shoar dat wi du famili wership tugeda, ahn hihn noh mek notn stap wi. An afta di stodi, wi wuda jos spen taim di taak.”

12. Weh wahn famili hed need fi memba joorin famili wership?

¹² If yoo da wahn famili hed, weh yoo ku du fi mek yu chiljren injai famili wership? Yu ku yooz wi wandaful nyoo poblikayshan weh naym Injai Laif Fareva! Dis buk mek it eezi fi ga sohn gud kanvasayshan. Bikaaz yu waahn yu chiljren taak tu yu bowt how dehn di feel ahn bowt di woriz weh dehn mait ga, yu noh waahn yooz famili wership fi rayl op er karek dehn. Chrai noh geh beks if dehn seh tingz weh noh gree wid weh di Baibl seh. Insted, bee graytful wen dehn aanis ahn tel yu weh dehn di tink ahn how dehn feel. Da way yu wahn mek it eeziya fi mek dehn kantinyu du dat. Di onli way yu wahn ku help yu pikni da if yu noa how dehn reeli feel.

13. Weh ada apachooniti payrents ga fi help dehn chiljren jraa kloas tu Jehoava?

¹³ Payrents, luk fi apachoonitiz joorin di day fi help yu chiljren jraa kloas tu Jehoava. Yu noh haftu wayt fi ga wahn Baibl stodi seshan soh dat yu teech yu pikni bowt wi lovin Gaad. Lisa, hoo da wahn ma, seh: “Wi yooz evriting rong wi fi teech wi pikni bowt Jehoava. Fi egzampl, wen wi daag du sohnting weh mek wi pikni dehn laaf, wi wuda tel dehn dat dis shoa dat Jehoava da wahn hapi Gaad ahn dat hihn fain tingz foni jos laik wee.”

14. Wai ih impoatant fi mek payrents help dehn chiljren bee waiz wen dehn di chooz frenz? (Proverbs 13:20)

¹⁴ Prinsipl 4: Help yu chiljren fi chooz gud frenz. Di Baibl mek it klyaa dat wi frenz ku eeda afek wi eena wahn gud way er wahn bad way. (Reed Proverbs 13:20.) Payrents, unu noa hoo da unu chiljren fren? Unu don meet dehn ahn spen taim wid dehn? Weh unu ku du fi help unu chiljren ga frenz weh lov  Jehoava? (1 Kor. 15:33) Yu ku help yu chiljren mek gud frenz wen yu invait peepl weh ga wahn gud rilayshanship wid Jehoava fi du tingz wid yoo ahn yu famili.—Ps. 119:63.

15. Weh payrents ku du fi help dehn chiljren ga gud frenz?

¹⁵ Wahn pa weh naym Tony eksplayn weh hihn an ih waif mi du fi help dehn faiv pikni fain gud frenz. Hihn seh: “Fi yaaz, mee ahn mi waif invait bradaz ahn sistaz weh yong ahn weh oal fi kohn da wi hows. Dehn wuda eet wahn meel wid wi ahn jain wi fi famili wership. Dis da wahn gud way fi geh fi noa adaz weh lov Jehoava ahn weh hapi fi serv ahn. Wi mi eevn geh fi invait sohn serkit oavaseeya, mishineri, an adaz fi stay da wi hows. Wi chiljren mi laan wahn lat fahn fi dehn ekspeeryens, di zeel weh dehn shoa, ahn how dehn mi werk haad eena dehn servis tu Jehoava. Aala dis mi help wi chiljren fi jraa kloasa tu Jehoava. Payrents, mek op unu main fi help unu pikni ga gud frenz.

16. Wat if yu pikni tel yu dat ih noh waahn serv Jehoava?

¹⁶ Wat if eevn afta yu don du yu bes fi teech yu chiljren, wan a dehn disaid dat ih noh waahn serv Jehoava? If dat hapm, noh feel laik yu neva du wahn gud jab az wahn payrent. Jehoava giv aala wi, inkloodin yu pikni, di gif a free wil. Jehoava mek wi disaid weda er nat wi waahn serv ahn. If yu pikni disaid fi lef Jehoava, noh giv op pan ahn. Ga hoap dat wan day ih wahn kohn bak tu Jehoava. Memba di iloschrayshan bowt di son weh mi laas. (Look 15:11-19, 22-24) Hihn mi du wahn lata bad tingz, bot pahn di en, hihn mi kohn bak hoam. Sohn peepl mait seh: “Dat da jos wahn stoari. Ah wanda if mai pikni wuda eva kohn bak tu Jehoava? Yes ih kud! In fak, dat da weh mi hapm tu wahn yong man weh naym Elie.

17. How Elie ekspeeryens inkorij yoo?

¹⁷ Dis da weh Elie seh bowt ih payrents: “Mai payrents du dehn bes fi  teech mi fi lov Jehoava ahn di Baibl. Bot wen Ai da-mi wahn teenayja, Ah mi staat ribel.” Elie mi staat du tingz eena seekrit weh neva rait. Ih payrents mi chrai help ahn fi stay kloas tu Jehoava bot hihn neva lisn tu dehn. Afta Elie lef hoam, ih mi get involv eena rang kandok. Joorin dehndeh taim, hihn wuda stil taak bowt di Baibl wid wan a ih frenz. Elie seh: “Di moa Ah mi taak tu mi fren bowt Jehoava, di moa Ah mi tink bowt Ahn. Ahn lee bit bai lee bit, di seed a Baibl chroot weh mi payrents mi plaant eena mi haat staat tu groa agen.” Afta wahn wail, Elie mi kohn bak tu Jehoava. * Imajin how hapi ih payrents mi hapi dat dehn mi du dehn bes fi teech ahn fan ih mi yong fi lov Jehoava!—2 Tim. 3:14, 15.

18. How yoo feel bowt payrents weh werk haad fi teech dehn chiljren fi lov Jehoava?

¹⁸ Unu payrents, Jehoava giv unu wahn wandaful gif weh da fi rayz wahn nyoo jenarayshan weh wahn wership hihn. (Ps. 78:4-6) Dis noh eezi, soh wi komen unu fi di haad werk weh unu du fi help unu chiljren. If unu kantinyu du unu bes fi help unu chiljren lov Jehoava ahn teech dehn fi obay ahn, fi shoar dat wahn pleez Jehoava.—Ifee. 6:4.